"திங்க"க்கிழமை : பனீர்க் குருமா - துரை செல்வராஜூ ரெஸிப்பி

 பனீர் குருமா எனப்படும்

ஊக்கி  குருமா 

(நம்ம உருளக் கெழங்கு குருமா தாங்க!..)

*** *** **** *** ***

பனீர் 200 கிராம்

உருளைக்கிழங்கு  2

நடுத்தரமாக

கேரட் 1 நடுத்தரமாக

பெரிய வெங்காயம் - 1 

தக்காளி - 1 

கல் உப்பு - சிறிதளவு

அரைப்பதற்கான பொருட்கள்:

தேங்காய்த் துருவல் - 1/4 கப் 

முந்திரிப்பருப்பு 3 

இஞ்சி சிறிதளவு

பூண்டு 4

மிளகு - 1 டீஸ்பூன்

சோம்பு  1 டீஸ்பூன்

பட்டை - சிறிது

கிராம்பு  2 

ஏலக்காய்  2

நட்சத்திரப் பூ 1

நட்சத்திரப் பூவை உடைத்து விதைகளை நீக்கி விட்டு மெல்லிய ஓட்டினை மட்டும் தேங்காய்த் துருவலுடன் சேர்த்துக் கொள்ளவும்..

மசாலா :

மஞ்சள் தூள் - 1/4 டீ ஸ்பூன்

மிளகாய்த்தூள் 1 டீ ஸ்பூன் 

மல்லித்தூள்  2 டீ ஸ்பூன்

மஞ்சள் தூள் மிளகாய்த்தூள் மல்லித்தூள்  - இவை எல்லாம் வீட்டில் தயாரிக்கப்பட்டவையாக இருந்தால் மிக மிக நல்லது..

தாளிப்பதற்கு தேவையான பொருட்கள்:

கடலெண்ணெய் சிறிதளவு

சோம்பு  1/4 டீ ஸ்பூன்

பிரியாணி இலை - 2

கறிவேப்பிலை - 2 இணுக்கு 

பனீர் கட்டியை ஒருமுறை அலசி விட்டு (பெரியதாக இருந்தால்) சிறு சிறு துண்டுகளாக நறுக்கி தனியே வைத்துக் கொள்ளவும்.. 

உருளைக் கிழங்குகளையும் நன்றாகக் கழுவி விட்டு விருப்பப்படி  நறுக்கிக் கொள்ளவும்.. இதற்குமேல் கேரட், வெங்காயம் தக்காளியை விட்டு வைக்கக் கூடாது.. இவற்றையும் நறுக்கிக் கொள்ளவும்..

அரைப்பதற்கு என்று குறிக்கப்பட்டுள்ள (தேங்காய் துருவல் முதலான) அனைத்தையும் மிக்ஸியில் போட்டு, நன்றாக அரைத்துக் கொள்ளவும்..

குழம்பு வைப்பதற்கான பாத்திரத்தை அடுப்பில் ஏற்றி மிதமான தீயில் உருளைக் கிழங்கு துண்டுகளை வேகவைத்துக் கொள்ளவும்.. 

உருளைக் கிழங்கு அரை வேக்காட்டில் இருக்கும்போது  கேரட், வெங்காயம் தக்காளியையும் சேர்த்து தேவையான உப்பு இடவும்..

குழம்பு கொதித்து வரும்போது தேங்காய் விழுதையும் மசாலாத் தூள்களையும் சேர்த்து விடவும்.. சில நிமிடங்களில் குழம்பின் நறுமணம்.. அடடா!..

இப்போது பனீர் துண்டுகளைச் சேர்த்து - உடனடியாக குழம்பைத் தாளித்து இறக்கி விடவும்..

ஒரு முக்கியமான பொருள் சேர்மானத்தில் இல்லையே?.. என்றால், 

அது வேண்டாம்...  விட்டுடுங்க!..

***