சட்டம், நீதி, சரவணன்

 

அவர் சட்ட அறிவில் பெரிய அளவில் புத்திசாலி.  ஆனால் ஏனோ நீதிமன்றத்துக்குள் சென்று வாதாடுவது இல்லை.  அதற்கான காரணம் பின்னால் ஃபிளாஷ்பேக்காக சொல்லவும் செய்கிறார்கள்.  நீதிமன்ற வாசலில் நாற்காலியில் டைப்ரைட்டரின் முன் அமர்ந்து நோட்டரி பப்ளிக் வேலை  செய்கிறார்.  அதனால் டீக்கடைக்காரர் உட்பட அவரை கிண்டல் செய்பவர்கள் அதிகம்.  மகனும் மகளும் கூட கிண்டல் செய்கிறார்கள்.  மனைவி அலட்சியப்படுத்துகிறாள். சட்டக்கல்லூரியில் சேருவதாகச் சொன்ன மகன் வேறு பாடத்தில் சேர அப்ளிகேஷன் வைக்கிறான்.  கேட்டால் இவரை மரியாதை இல்லாமல் பேசி அவமானப்படுத்துகிறான்.  அவனுக்கு அப்பாவின் இயலாமை மேல் கடும் கோபம்.

அவரை நம்பி வரும் ஒரே நபர் புதிதாக சட்டம் பயின்று பயிற்சிக்கு வரும் ஒரு மாணவி.  அழகிய மாணவி.  கல்லூரிக்கு காலத்தில் இவர் கற்றுக்கொடுத்த விஷயங்களால் கவரப்பட்டு இவர் மேல் இருக்கும் மதிப்பால் இவரிடமிருந்து சிபாரிசுக்கு கடிதம் வாங்கியதாலேயே எந்த வழக்கறிஞரிடமும் ஜூனியராக சேர முடியாத நிலை.  கேலிக்கு உள்ளாகிறார்.  இன்னொரு பிரபல வழக்கறிஞரிடம் உதவியாளராக இருக்கும் அவரது சீனியர் மாணவன் அவரை எள்ளி நகையாடுகிறான்.   'வாஉனக்கு சிபாரிசு செய்கிறேன்' என்கிறான்.

அந்தப் பெண் இவரிடம் தைரியமாக உள்ளே வந்து வழக்காட அழைக்கிறாள்.  இவர் மறுக்கிறார்.

எல்லோரும் அவரின் இயலாமையைச் சுட்டிக் காட்டி கேலி பேசும் ஒரு சூழ்நிலை அவரை மாற்றுகிறது.  தன்னை நிரூபிக்க ஒரு வழக்கை கையில் எடுக்கத் தீர்மானிக்கிறார்.

ஆரம்பக் காட்சியில் ஒரு பெரியவர் கோர்ட் வளாகத்தில்  தன்னைத்தானே பெட்ரோல் ஊற்றி எரித்துக் கொள்கிறார்.  யாரும் கண்டு கொள்ளாமல் இருக்கும் அதையே இவர் தன்னை நிரூபிக்க பயன்படும் வழக்காக எடுக்கிறார். அந்தப் பெண்ணையும் துணைக்கழைத்துக் கொள்கிறார்.

சாதாரண வழக்கு போல தோன்றும் இது திடீரென படா படா வழக்கறிஞர் PP யாக வர, சூடு பிடிக்கிறது.  இந்த சின்ன வழக்குக்கு இவ்வளவு புகழ்பெற்ற வழக்கறிஞர் ஏன் என்று கூட முதலில் இவ்விருவரும் சந்தேகபப்டுவதில்லை.  வழக்கம் போலான ஆரம்ப அவமானங்கள், தோல்விகள்...

நீதிபதிகள் கேள்விகள் கேட்கிறார்கள்.  அவர்கள் முன் இந்த சாதாரண நோட்டரி பப்ளிக் தன்னை நிரூபிக்க வேண்டிய கட்டாயம் .  தடுமாறுகிறார்.

அந்த பிரபல வழக்கறிஞர் அசைக்க முடியாமல் சில வாதங்களை எடுத்து வைத்ததும் கோர்ட்டிலேயே  மயங்கி விழுகிறார் இவர்.  அங்கும் தன்னை நிரூபிக்க வேண்டிய கட்டாயம்.

விசாரிக்க ஆரம்பிக்கையில் தீக்குளித்து இறந்தவர் கொடுத்திருந்த அட்ரஸ் ஒரு மனநல காப்பகம் என்று தெரிகிறது.  அதாவது மனநிலை சரி இல்லாதவர்!  சோர்ந்து போகிறார் இவர்.  இப்படி வரும் ஆரம்பக் குழப்பங்களை சுந்தரமூர்த்தியாக வரும் சரவணன் எப்படி சமாளிக்கிறார் ஏன்பது கதை.

மனநிலை சரியில்லாதவராக வரும் நடிகர் நன்றாகத்தான் நடித்திருக்கிறார்.  ஆனால் காட்சிக்குக் காட்சி அவர் அழுவதைப் பார்த்தல் இரக்கத்துக்கு பதில் எரிச்சல்தான் வருகிறது.  நாயகியாக வருபவர் பெரிதாக எதுவும் சாதிக்கவில்லை என்றாலும், இந்த மாதிரி கதைகளுக்கு தேவையான உதவியாளர் பாத்திரத்துக்கு வருகிறார், அழகாக இருக்கிறார்.  சரவணன் பரவாயில்லை.  இன்னும் கொஞ்சம் நடித்திருக்கலாம்.  இளவயதிலேயே வராதது இப்போதா வரப்போகிறது?

கோர்ட் சம்பந்தப்பட்ட கதை என்றதுமே ஆர்வமாகப் பார்த்தேன்.  ஏமாற்றவில்லை.  எலலவற்றையும் மீறி சுவாரஸ்யமாகவே இருந்தது.   

ZEE 5  OTT யில் பார்த்தேன்.  

================================================================================================

ஓர் அபார நூல்

என் தந்தையார் எனக்கு பிரபந்தத்தின் மேல் ஆர்வத்துடன் சில அரிய புத்தகங்களையும் விட்டுச்சென்றார். பாலகங்காதர பிரம்மாண்டமான புத்தகம். பொடிப்பொடியான ஆங்கில எழுத்து களில் ஆயிரம் பக்கங்கள். இதை ஒரு நாள் படித்து முடிக்கவேண்டும் என்கிற ஆர்வத்துடன் பக்கம் பதினைந்து வரை வந்திருக்கிறேன். 

அதேபோல பனாரஸிதாஸ் பதிப்பித்த 'வேதிக் கன்கார்டன்ஸ்' என்னும் புத்தகத்தைத் தூக்கி வைக்க இரண்டு ஆள் வேண்டும். அத்தனை கனமானது. இந்தப் புத்தகத்தை அவ்வப்போது என் அப்பாவின் நினைவுக்காகப் புரட்டுவேன். அதோடு சரி. மூன்றாவது புத்தகம், ஸ்தானிகம் பார்த்தசாரதி ஐயங்கார் தொகுத்த 'திவ்யப்ரபந்த அகராதி: இதன் தொகுப்பாசிரியர் ஸ்ரீரங்கம் தேவஸ்தான பத்திரிகை யின் ஆசிரியராக இருந்தவர். 

இந்த நூலை என் தந்தை கையெழுத்திட்டு 1964ல் எனக்கு அன்பளிப்பாக கொடுத்தார். இதைத்தான் நான் போற்றிப் பாதுகாத்து அடிக்கடி படித்தும் பயன்பெற்றிருக்கிறேன். இந்த நூலுக்கு அந்தக் காலத்தில் அறநிலைய ஆட்சித்துறை அமைச்ச ராக இருந்த எம்.பக்தவத்சலமும் தமிழறிஞர் தெ.பொ.மீனாட்சி சுந்தரனாரும் முன்னுரையும் அணிந்துரையும் வழங்கியிருக்கிறார்கள். ஒரு தனி மனித சாதனையாக நம்மை வியப்படைச் செய்யும் நூல். 

நாலாயிர திவ்யப்ரபந்தத்தில் உள்ள ஏறத்தாழ எல்லா சொற் களுக்கும் அவை எந்தப் பாட்டில் எந்த வரியில் வருகிறது, அதற்கான அரும்பத உரை, வியாக்கியானங்களில் உள்ள சிறப்புக் குறிப்பு விளக்கம் இவையனைத்தையும் ஒருங்கிணைத்து தந்திருக்கிறார் பார்த்தசாரதி ஐயங்கார். 1918லிருந்து இந்த அகராதி திரட்டுவதில் ஈடுபட்டு பலரிடம் உதவி கேட்டு கிடைக்காமல் சோர்விழக்காமல் பத்தாயிரம் ரூபாய் வரை சேர்த்து முடித்து பதிப்பித்திருக்கிறார். 

இது அகராதி மட்டும் அல்ல. ஒருவிதமான 'கன்கார்டன்ஸ்' என்று சொல்லலாம். ஒவ்வொரு சொல்லும் பிரபந்தத்தில் எந்தெந்த பாடல்களில் எந்தெந்த அர்த்தத்தில் வழங்குகின்றன என்று குறிப்பிட்டி ருக்கிறார். கூடுதலாக நாலாயிரம் பாடல்களுக்கு கணக்கு காட்டியிருக்கிறார். தேசிகர் தமிழ், கோயில் தமிழ், சிலேடைகள் போன்ற விஷயங்களும் உள்ளன. தேசிகர் தமிழில் வேதாந்த தேசிகர் அருளிய ரஹஸ்ய கிரந்தங்களின் ஊடே உள்ள சில அரிய தமிழ்ப் பதங்களுக்கு விளக்கங்கள் கூறியுள்ளார். உதாரணம், 'அடி தப்பாதே கருவி வைக்கை' என்பதற்கு 'சதுரங்கம் ஸ்தாகம், இடம், கட்டான், கருவி-ஆனை, குதிரை என்ற பெயருள்ள செப்புகள்'

'கோயில் தமிழ்' என்ற தலைப்பில் ஸ்ரீரங்கம் கோயிலிலே வழங்கும் விசேஷமான தமிழ்ச் சொற்களை பட்டியலிட்டிருக்கிறார். உதாரணம் அளவுக்காரன் - கொட்டாரத்தில் நெல் அளப்பவன், அருளப்பாடு காரளப்பன் என்ற மரியாதைச் சொல்லால் பெருமாளிடம் அழைப்பு உண்டு."

இவ்வாறான பல அரிய செய்திகள் கொண்டது இந்நூல்.

"திவ்யப்ரபந்த அகராதியின் ஓர் உதாரணம், பார்த்தசாரதி ஐயங்காரின் ஆராய்ச்சியின் ஆழமும் ஞானமும் தெரிய வரும். 'தினைத்தனையும் 1014-4 சொல்லவொண்ணா தினை ஸூக்ஷ்மமான தாந்யம், எள்ளத்தனை என்னுமாப் போலேயாய்' அபரிமிதமான காலத்தைச் சொல்கிறது 1919/1.

தினைத்தனையும் விடாள் 3526-3 தினைத்தனையும் அச்சம் 1919-1 தினையாஞ்சிறிதளவும் 2929-2"

பார்த்தசாரதி ஐயங்காரின் இந்த அபார நூலில் அவருடைய நாலாயிர கணக்குத்தான் சற்று எனக்கு உதைக்கிறது. எப்படியாவது 4000 வரவேண்டும் என்று பெரிய திருமடல், சிறிய திருமடல் போன்ற ஆசிரியப்பாக்களை 148 1/2, 77 1/2 என்று செயற்கையாக கணக்கிட்டு நாலாயிரத்துக்கு இழுத்திருக்கத் தேவையில்லை. இரண்டு மடல்களும் இலக்கணப்படி ஒற்றைப் பாக்களே இதைப் பற்றி வானமாமலை ஜீயர் ஸ்வாமிகளைக் கேட்டபோது கணக்கு வர வேண்டும் என்பதற்காக நாலாயிரத்துக்கு இழுக்க வேண்டியதில்லை என்றார். 'ஸ்டாண்டர்டு' எண்ணிக்கை வைப்பு ஸ்ரீவைஷ்ண மற்றும் ஸ்ரீசுதர்ஸனரின் பதிப்புகளில் கிடைக்கிறது. பார்த்தசாரதி ஐயங்காரின் அகராதியைப் பயன்படுத்த தபால் ஆபீசுகளில்போல ஒல்டு நம்பர், ந்யூ நம்பர் போட்டுக்கொள்ள வேண்டியிருக்கிறது. இந்த சின்ன சங்கடத்தைத் தவிர மற்றபடி இது ஒரு மிக அருமையான நூல்.

சுஜாதா 

28.08.2005

================================================================================================

கிசுகிசுவை படிக்க முடிகிறதா?  உடைக்க முடிகிறதா?

கீழே உள்ள படங்களில் இருக்கும் ஆண் நடிகர்களை அடையாளம் காணமுடியும் என்றே நினைக்கிறேன்!  

===============================================================================================

எந்தப் பாடலை வரிகள் மாற்றி இருக்கிறேன் என்று உங்களுக்கு தெரியாதா என்ன!  பாடிப் பாருங்கள் சரியாக இருக்கும்!

நான் சமைக்க திங்க  நினைப்பதெல்லாம் நீ சமைக்க வேண்டும் 

காயோடும் கறியோடும் கலந்தாக்க வேண்டும் 

கலந்தாக்க வேண்டும் ம்ம்ம்  ம்ம்ம்ம்  ம்ம்ம்ம்   ம்ம்ம்   (நான் திங்க )

குழம்போடு ரசம் வைத்து பரிமாற வேண்டும் பரிமாற வேண்டும் 

நான் என்ன போட்டாலும் பொறுத்தாக வேண்டும் பொறுத்தாக வேண்டும் 

பருப்போடு காய்சேர்ந்து குழம்பான பின்னே குழம்பானபின்னே 

ம்ம்ம்ம்ம்ம்  ம்ம்ம்ம்ம்ம்ம் 

மோர்சாதம் போதும்னு சொல்லாமை வேண்டும் சொல்லாமை வேண்டும் 

ம்ம்ம்ம்ம்ம்  ம்ம்ம்ம்ம்ம்ம்   ம்ம்ம்ம்ம்ம்ம்    (நான் திங்க )

கறியென்றும் தயிரென்றும் பகை ஒன்றும் இல்லை 

பகை ஒன்றும் இல்லை 

சமைக்காத சமையலால் பயனொன்றும் இல்லை பயனொன்றும் இல்லை 

உன்னோடு நான் சேர்ந்து உறவானபின்னே  உறவானபின்னே 

ம்ம்ம்ம்ம்ம்  ம்ம்ம்ம்ம்ம்ம்   

பணியாரம் தினம்தோறும் டிஃபனாகவேண்டும் டிஃபனாகவேண்டும் 

ம்ம்ம்ம்ம்ம்  ம்ம்ம்ம்ம்ம்ம்   ம்ம்ம்ம்ம்ம்ம் 

நான் சமைக்க திங்க  நினைப்பதெல்லாம் நீ சமைக்க வேண்டும் 

காயோடும் கறியோடும் கலந்தாக்க வேண்டும் 

கலந்தாக்க வேண்டும் ம்ம்ம்  ம்ம்ம்ம்  ம்ம்ம்ம்   ம்ம்ம்   

ம்ம்ம்ம்ம்ம்  ம்ம்ம்ம்ம்ம்ம்   ம்ம்ம்ம்ம்ம்ம் 

ம்ம்ம்ம்ம்ம்  ம்ம்ம்ம்ம்ம்ம்   ம்ம்ம்ம்ம்ம்ம் 

==============================================================================================

=====================================================================================================

----------------------------------------------------------------------------------------------------------------------------------------

பொக்கிஷம்