ஐயோ அப்புறம் என்னாச்சு?

 

                                         ஐயோ அப்புறம் என்னாச்சு?

JKC 

அப்புறம் என்ன ஆச்சு என்ற எதிர்பார்ப்பு ஒரு தூண்டில் தான். ஒரு சங்கதியை, கதையை, கட்டுரையை சிறிது விவரித்து ஒரு சிறிய சஸ்பென்ஸ் கொடுத்து தூண்டில் போட்டு நிறுத்தினால், உடன் கேட்பவரோ, பார்ப்பவரோ “ஐயோ அப்புறம் என்ன ஆச்சு “ என்று ஆர்வத்துடன் கேட்பார். இது குழந்தைகளுக்கும் பெரியவர்களுக்கும் சாதாரணமான ஒன்று. கதைகளுக்கும், கட்டுரைகளுக்கும், தொலைக்காட்சி தொடர்களுக்கும் பொருந்தும் விதி.

இந்த தலைப்பில் வாசகர்களுக்கு ஒருவேண்டுகோள் விடுத்து பதிவிட்டு வாசகர் ஆர்வத்தை தூண்டலாம் என்பது எனது கருத்து.  நானே தொடங்கி வைக்கிறேன்.

இங்கு எனக்கு தினமும் தான் எதோ ஒரு விதத்தில் ….தோசை கல்லில் ஒட்டுது … முதல் எத்தனையோ நிகழ்வுகள் இந்த கேள்வியை எழுப்ப தோன்றும். ஆனால் சில நிகழ்வுகள் மிகவும் அச்சத்தினைத் தூண்டும். அப்படிப்பட்ட ஒன்று எனக்கு சமீபத்தில் நேர்ந்தது. அதை விவரிக்கிறேன்.

காலை ஆறு மணி. பாஸ் எப்போதும் போல் எழுந்து ஹால் கதவு, வீட்டு கதவு, கேட் கதவு திறந்து வாசல் தெளிக்க செல்லவேண்டும். முதலில் திறக்க வேண்டிய ஹால் கதவை திறக்க முடியவில்லை என்று என்னை எழுப்பினார். நானும் எழுந்து திறக்கப்பார்த்தேன். முடியவில்லை. 

ஐயோ அப்புறம் என்ன ஆச்சு? 

வீட்டில் இருந்து ரோடில் இறங்க மூன்று கதவுகளை திறக்க வேண்டும். காம்பௌண்ட் கேட், வெராண்டா கிரில், ஹால் மெயின் மரக்கதவு என்ற மூன்று கதவுகள். இரவு படுக்கப்போகும் முன் கேட், மற்றும் கிரில் கதவுகள் சாவி போட்டு திறக்க கூடிய பூட்டுகளால் பூட்டப்படும். ஹால் கதவு உள்ளிருந்து தாழ்ப்பாளால் அடைக்கப்படும். மேல் போல்ட், கீழ் போல்ட், மார்ட்டிஸ் லாக் சின்ன போல்ட் என்ற மூன்று போல்ட்டுகள்.

மார்ட்டிஸ் லாக் படம் இதோ

படம் உதவி ; இணையம்

இதில் சாவி போட்டு திறக்க, மற்றும் பூட்ட உள்ளது பெரிய போல்ட். சின்ன போல்ட் எப்போதும் பூட்டும் முறையிலேதான் இருக்கும். கதவை திறக்க வேண்டுமாயின் கைப்பிடியை பிடித்து கீழே தாழ்த்தி போல்டை உள்ளே இழுக்க வைத்து திறக்கவேண்டும். கைப்பிடியை கீழே அழுத்தினால் அது திரும்ப நேராக வர ஒரு ஸ்ப்ரிங் உள்ளது. அந்த ஸ்ப்ரிங் வேலை செய்யவில்லை. அதனால் சின்ன போல்ட் பூட்டிய முறையிலேயே இருந்தது. போல்டை உள்ளே இழுக்க முடியவில்லை. கதவைத் திறக்க முடியவில்லை.

சரி ஒரு காபி குடித்து விட்டு ஆலோசிப்போம் என்று அடுக்களையில் சென்று பாலைக் காய்ச்சி காபி கலந்து குடித்து ஆலோசித்தோம்.

வெளியில் செல்வதோ வெளியில் இருந்து உள்ளே வருவதோ பிரச்சினை இல்லை. அடுக்களையில் பின் வாசல் உண்டு. கேட் மற்றும் கிரில் பூட்டுகள் திறக்கவும் பிரச்சினை இல்லை. அடுத்த வீட்டில் டூப்ளிகேட் சாவி கொத்து உண்டு, (எங்கள் சாவி கொத்து வெராண்டாவில் மாட்டிக்கொண்டது). பிரச்சினை மெயின் ஹால் கதவை எப்படி திறப்பது என்பது மட்டுமே.

கடைசியாக ஒரு முறை திறக்க முயல்வோம் என திறப்பதற்கு கைப்பிடியை கீழே இறக்காமல் மேலே பிடித்து இழுக்க ஆச்சர்யமாக சின்ன போல்ட் உள்ளே சென்றது, கதவைத் திறக்க முடிந்தது. .

கடவுளுக்கு நன்றி.

தற்போது அந்த போல்ட்டை உள்ளே தள்ளி ஒரு முட்டு கொடுத்து வெளியே வராமல் இருக்க செல்லோடேப்பை ஒட்டி வைத்திருக்கிறோம். தச்சரை கூப்பிட வேண்டும். வேறு ஒரு கஷ்டம் என்னவென்றால் பூட்டை கழட்ட முடியுமா என்பது தான். பூட்டை கதவில் பொருத்திய ஸ்க்ரூ எல்லாம் தலை இல்லாமல் ஸ்க்ரூ டிரைவர் வைத்து திறக்க முடியாத நிலையில் உள்ளன.

இது போன்று ஏகப்பட்ட அப்புறம் என்னாச்சு சங்கதிகள் உள்ளன. ட்ரெயினில் அடிபட்டு சாக இருந்தது,  வீட்ல திருடன் வந்து திருடிப் போனது என்று சில திடுக்கிடும் சம்பவங்களும் உண்டு. சமயம் வாய்க்கும்போது அவற்றை எழுதுகிறேன்.

இதைப்பார்த்து எ பி வாசகர்கள் அவரவர்களுடைய என்ன ஆச்சு கதையை பதிவிடுவார்கள் என்று நம்புகிறேன். தொடரட்டும்.

==========================================================================================

JKC ஸார் மற்றவர்களும் இந்த 'அப்புறம் என்ன ஆச்சு'வை தொடரலாம் என்று சொல்லி இருக்கிறார்.  உங்களுக்கும் இதுபோல பகிர விஷயங்கள் இல்லாமலா இருக்கும்!  

அது இருக்கட்டும்..  இந்த 'அப்புறம் என்ன ஆச்சு'வில் ஒரு ஜோக்ஸ் ஸீரீஸ் உண்டு. உங்களுக்கும் தெரியும்.  ஆபீஸில் தூங்கும் ஜோக் போல இதுவும் தொடர், ப்ளஸ் சிரஞ்சீவி! எப்படி என்று உதாரணத்துக்கு ஒன்று மட்டும் சொல்கிறேன்.. உங்களுக்கும் ஞாபகம் வந்துவிடும்..

"மாமியாரை தோசை மாவு வாங்க கடைக்கு அனுப்பினேன்..   அவங்க மேல பஸ் மோதிவிட்டது.."

"ஐயைய்யோ..  அப்புறம் என்ன ஆச்சு?"

"அப்புறம் என்ன..   நல்லவேளையா வீட்டில் கொஞ்சம் ரவா இருந்தது..  உப்புமா கிண்டினேன்.."

==========================================================================================

தினமணியிலிருந்து திருடியது...

புதுடில்லி, ஜன. 8 - அரசியல் சட்டத்தின் 19வது ஷரத்தில் உத்தரவாதம்

தரப்பட்டுள்ள 7 சுதந்திரங்களை” வலியுறுத்த கோர்ட்டுக்குச் செல்லும் உரிமையை அவசர நிலைமைக் காலத்தில் நிறுத்திவைத்து ராஷ்டிரபதி இன்று உத்தரவு பிறப்பித்துள்ளார்.

அரசியல் சட்டத்தின் 19-வது ஷரத்தினால் உத்தரவாதம் தரப்பட்டுள்ள "7 சுதந்திரங்கள்" வருமாறு:-

(1) பேச்சு, எழுத்து சுதந்திரம்.

(2) ஆயுதங்களின்றி அமைதியாக கூட்டம் கூடும் உரிமை.

(3) சங்கங்கள், யூனியன்கள் அமைக்கும் உரிமை.

(4) இந்திய பிரதேசத்தில் தாராளமாக நடமாடும் உரிமை.

(5) இந்திய பிரதேசத்தில் எப்பகுதியிலும் தங்கி வசிக்கும் உரிமை.

(6) சொத்துக்களை வாங்க, விற்க, வைத்திருக்க உரிமை.

(7) தொழில், வர்த்தகம், ஜீவனோபாயம் நடத்தும் உரிமை.

அரசியல் சட்டத்தின் 14, 21, 22வது ஷரத்துகள் உத்தரவாதம் தந்துள்ள உரிமைகளை அவசர நிலைமை காலத்துக்கு நிறுத்திவைத்து கடந்த ஆண்டு ஜூன் 27 (ஆம் தேதி) ராஷ்டிரபதி உத்தரவு பிறப்பித்தார்.

இன்று ராஷ்டிரபதி பிறப்பித்த உத்தரவின் சாராம்சம் வருமாறு:

"அரசியல் சட்டத்தின் 19வது ஷரத்து உத்தரவாதமளிக்கும் உரிமைகளை

வலியுறுத்த எந்த நபரும் கோர்ட் ஏறுவதற்கு உள்ள உரிமையும். மேற்குறித்த உரிமைகளை வலியுறுத்த கோர்ட்டில் உள்ள நடவடிக்கைகளும் அரசியல் சட்டத்தின் 352(1) ஷரத்துப்படி 1971 டிசம்பர் 3 (ஆம் தேதி) மற்றும் 1975, ஜூன் 25 (ஆம் தேதி) பிராகடனமான அவசர நிலைமை அமலில் உள்ள காலத்துக்கு நிறுத்திவைக்கப்பட, அரசியல் சட்டத்தின் 359(1) ஷரத்து அளிக்கும் அதிகாரத்தைச் செலுத்துவதன் மூலம், ராஷ்டிரபதி இதன்மூலம் உத்தரவு பிறப்பிக்கிறார்.

இந்த உத்தாரவு இந்திய பிரதேச முழுதிலும் செல்லுபடியாகும்".

நன்றி தினமணி 

============================================================================================

வாணலியில் வார்த்துப் பாரு

தோசை பிடிச்சுப் போகும்

வெங்காயத்தைத் தூவிப் பாரு

சுவையும் பிடிச்சுப் போகும்

எண்ணெய் ஊற்றி திருப்பிப் பாரு

Shape பிடிச்சுப் போகும்

புட்டு புட்டு வாயில் போட

தோசை உள்ள போகும்

என்று நான் பாடியது வாணலிக்குக் கேட்டு விட்டது போல... இறுகப் பிடித்துக் கொண்டு விட்டது - பாட்டை அல்ல, தோசையை. ( எந்தப் பாட்டை நான் உல்ட்டா செய்திருக்கிறேன், தெரியுமா ?!)

நான்தான் ப(பா)டாதபாடு பட்டேன்! தோசையை. திருப்பிப் போடக்கூட விட மாட்டேன் என்று ஒரே அடம்.

வார்க்காத தோசையை வார்க்க வந்தாய்

பாடாத பாட்டினையே பாடி வந்தாய்

எடுக்காமல் நீயும்தான் வாடி நின்றாய்

மிடுக்காக நானும்தான் பார்த்து நின்றேன்

மிடுக்காக நானும்தான் பார்த்து நின்றேன்

என்று வாணலி மெல்லிய குரலில் பாடியது!

முன்பெல்லாம் தாளிக்கும் கரண்டியில் கூட தோசை மாவை ஊற்றி சாப்பிட்டதுண்டு.

ஏன், ஒரு மாதத்துக்கு முன்னால் கூட வாணலியில் வார்த்தபோது சரியாகத்தான் வந்தது. இப்போது யார் மேல் தப்பு என்று தெரியவில்லை. தட்டு போட்டு மூடினாலும் எடுக்க வரவில்லை!

உன்னைச் சொல்லிக் குற்றமில்லை

என்னைச் சுற்றிக் குற்றமில்லை

மாவு செய்த குற்றமடி

உளுந்து செய்த குற்றமடி

உளுந்து செய்த குற்றமடி

என்று வாணலி பாடி கொண்டிருந்தது எனக்கு மட்டும் கேட்டது!

FaceBook கில் அது என்ன வாணலியா, வானொலியா என்று கேட்டிருந்தார்

பகவான்ஜி!

===============================================================================

ரீல்ஸ் பிட் பகிர்ந்தால் சைஸ் சற்று பெரிதாகத்தான் வருகிறது. இதில் கங்குலி ஒரு சம்பவத்தைச் சொல்லிவிட்டு அதன் தொடர்ச்சியாக சொல்லும் கருத்து எனக்கு பிடித்திருந்தது.

நாம் நினைப்பதைதான், நமக்கு பிடித்ததைதான் அடுத்தவர்களும் செய்ய வேண்டும் என்று நினைப்பது தவறு. அவர்கள் செய்வது பெரும்பான்மையான சமயங்களில் சரியாக இருக்கலாம். நம் வழி சரியில்லாததாக இருக்கலாம். நமக்கும் இது மாதிரி அனுபவங்கள் நிறைய இருந்திருக்கும். அலுவலகங்களிலோ.. வீட்டிலோ.. வெளியிடங்களிலோ...

கிரிக்கெட்டைப் பொறுத்தவரை இதை கங்குலி தவிர வேறு யாரேனும் பேசி இருப்பார்களா என்பதும் சந்தேகம்.

=====================================================================================

அபூர்வ ராகங்கள்; நாகேஷ் 

சமீபத்தில் நாகேஷ் இந்தப் படத்தில் பேசும் "ஒரு சின்னக் கல்லை கண்ணுக்கு பக்கத்துல வச்சு பார்த்தா" வசனத்துக்காக தேடினேன்.  பிடித்த வசனம் என்ன என்று திரு ஆரண்யபோவாஸ் நடத்தும்  seven o clock வாட்ஸாப் குழுமத்தில் கேட்டிருந்தார்.  அதற்கு தேடியபோது அதைத்தவிர மற்றவை கிடைத்தன.  நாகேஷ் ஒரு அற்புதம்.  கே பாலச்சந்தருக்கு நாகேஷுக்கு அண்டவே சிலகாலம் கருத்து வேறுபாடு ஏற்பாட்டு சிலகாலம் கேபி படத்தில் நாகேஷ் இடம்பெறாமல் இருந்தார்.  அவர் மறுபடி கேபி படத்தில் நடித்தது இந்தப் படத்தில்தான்.  என்ன நடிப்புடா சாமி..   நடிப்பு அசுரர்.

குறித்து வைத்திருந்த சில வசனங்களும், காட்சியும்!  "வேர் இஸ் மை ஸீட்} என்று அவர் மேஜரை மிரட்டுவாடாஹிப் பாருங்கள்! 

நான் ரேஸுக்கு போறதில்லை...  எதுக்கு போகணும்...  நாலு குதிரை ஓடினா நாற்பதாயிரம் பேர் உட்கார்ந்து பார்க்கறீங்க..  அந்த நாற்பதாயிரம் பேரே ஓடினாலும் ஒரு குதிரை உட்கார்ந்து பார்க்குதா?

ஏய் யார்றா நீ..  புள்ளத்தாச்சியை தூக்கற மாதிரி தூக்கறே..   கடைக்காரன் அப்பவே சொன்னான்..  சாப்பிட்ட அரைமணி நேரத்துல சொய்ங்னு மேல போயிடுவேன்னு...

என்னுடைய அப்பா யாருக்கு மாமனாரோ அவருடைய மருமகளுக்கு அப்பா என் மகனுக்கு மாமனார். இது நாகேஷ் பேசும் வசனம் இல்லாவிடினும் ரசித்த வசனம்.

பாவம் ஸார் பைரவி...  அவங்க கவலையை மறக்க நாம குடிப்போமா...  பிகாஸ் அவங்க குடிக்க மாட்டாங்க...

=================================================================================================

இந்த அளவில் இன்றைய வெள்ளியை மங்களம் பாடி நிறைவு செய்து விடலாமா?