எது நம்மை கடைசி வரை உயிர்ப்புடன் வைத்திருக்கும்?

 

எங்கள் கேள்விகள் :

1) நினைத்த மாத்திரத்தில் உங்களால் உங்கள் கைகளை எவ்வளவு நீளம் வேண்டுமானாலும் நீட்டலாம் என்று ஒரு மந்திர சக்தி உங்களுக்குக் கிடைக்கிறது என்று வைத்துக்கொள்வோம். அதைப் பயன்படுத்தி என்னவெல்லாம் செய்வீர்கள்? 

2) கீழே இருக்கின்ற படத்திற்கு ஒரு கவிதை எழுதுங்கள். 

= = = = = = = = =

கேள்வி பதில்கள் : 

நெல்லைத்தமிழன் : 

1. செத்துப்போவது (தற்கொலை) என்று தீர்மானித்த பிறகு ஏன் கஷ்டமான வலியான முறைகளைத் தேர்ந்தெடுக்கிறார்கள்? - மண்ணெண்ணெய் ஊற்றித் தீவைத்துக்கொள்வது போன்று.   .. 

# தற்கொலையின் பின்னணியில் இருக்கும் மன நிலை மிகச் சிக்கலானது. இது பற்றி அதிகம் பேச எனக்கு உடன்பாடில்லை. சில தற்கொலைகள்  மக்கள் பலரின் கவனத்தைக் கவர வேண்டும் என்ற உந்துதலால் ஏற்படுவதுண்டு.‌

2.  எது நம்மை கடைசி வரை உயிர்ப்புடன் வைத்திருக்கும்?   

# செயலில் ஆர்வம். மேன்மையான ரசனை.‌

3.  இந்த தசாப்தத்தில் ஒவ்வொருவரும் குறைந்த பட்சம் ஒரு நாளைக்கு ஐந்து மணி நேரம் கணிணி/மொபைலைப் பார்த்துக்கொண்டிருப்பதால் என்ன என்ன உடற்குறைகள் வரலாம்?    

# என்னைக் கேட்கக் கூடாத கேள்வி.  பார்வைக்குறை, முதுகு வலி, பைத்தியம் ?

4.  முப்பது வருடங்களுக்கு முன்பு நமக்கு வியாதிகள் குறைவா? இல்லை எதற்கெடுத்தாலும் டாக்டரிடம் அல்லது ஆஸ்பத்திரிக்குச் செல்லும் வியாதி நமக்கு இல்லாமலிருந்ததா? புற்றீசல் மாதிரிப் பரவியிருக்கும் மருத்துவமனைகளைப் பார்க்க எனக்கு ஆச்சர்யமாக இருக்கிறது.   

# வசதிகள் கூடினால் செலவு செய்யத் தயங்க மாட்டோம். உடல் உபாதை வரும் போது மருத்துவம் பார்த்தால் தான் என்ன என்ற மனப்பான்மை வந்து விடுகிறது.

5. உலகில் எது உன்னதமான தொழில்? பெரும்பாலான பெரியவர்கள் சொல்வது, வக்கீல், மருத்துவத் தொழில் போன்றவை பாவத்தைச் சேர்க்கும் தொழில் என்று. அதனால் இந்தச் சந்தேகம்.

# என் கருத்து: ஆசிரியர் தொழில்.

= = = = = = = = = =

படமும் பதமும் : 

சமீபத்தில் நான் 4,5 மற்றும் 6ம் வகுப்பு படித்த ஊருக்குச் சென்றிருந்தேன். என் அப்பா, தலைமை ஆசிரியராக வேலை பார்த்த (1972) மேல் நிலைப் பள்ளி இது. இங்குதான் நான் 6ம் வகுப்பு சில மாதங்கள் படித்தேன். உள்ளே சென்று என் அப்பாவின் அறையைப் பார்க்க விரும்பினேன். ஆனால் செல்லும் பாதை புதராக இருந்ததால் பாம்பு இருக்குமோ என்ற பயம். மிகவும் கலைநயத்துடன் கூடிய கட்டிடம் இது. அந்த வருடமே புதிதாக ஒரு பெரிய பள்ளிக்கூடம் கட்டப்பட்டு (மிகப் பெரிய பள்ளிக்கூடம்) அங்கு எல்லோரும் சென்றுவிட்டோம். இது பற்றி பயணப் பதிவில் பகிர்வேன். இந்தப் பள்ளிக்கூடமும் சிறியது அல்ல. 11ம் வகுப்பு வரை இங்கு நடந்துகொண்டிருந்தது.

உடைந்த கிளைகள் சிதிலங்கள் இருந்ததால் இந்தப் பள்ளியின் உள்ளே செல்லவில்லை.  காலையில் பள்ளி 9 மணிக்கு ஆரம்பிக்கும் என்று நினைவு. என் அப்பா, கையின் பின்னால் பிரம்பை வைத்துக்கொண்டு, அது தெரியாமல் வாசலில் நின்றுகொண்டிருப்பார். 9 மணிக்கு மேல் வருபவர்களை பிரம்பைக் காட்டி பயமுறுத்துவார். ஐம்பது வருடங்களுக்கு முன் நான் வாழ்ந்த இடத்துக்குச் சென்றது எனக்கு ரொம்பவே உணர்வுபூர்வமான விஷயமாக இருந்தது. 

இது என்ன கட்டிடம்?  இதுதான் தனுஷ்கோடியில் இருந்த இரயில்வே ஸ்டேஷன். டிசம்பர் 64ல் ஏற்பட்ட பெரும் புயலில் அந்த ஊரே அழிந்துபோனதும், அப்போது தனுஷ்கோடிக்கு வந்துகொண்டிருந்த போட் மெயில், ஊருக்குச் சிறிது தூரத்தில் கடலால் கொள்ளப்பட்டதும் உங்களுக்குத் தெரிந்திருக்கும். ஊர் தபால் நிலையம், சாலை, வீடுகள் என்று ஒன்றையும் விட்டுவைக்கவில்லை. இப்போது ஒரு சாலை கடலை நோக்கி, அதன் ஒரு புறம் கடல் நுழைந்திருக்கிறது, இன்னொரு புறம் கடலில் ஆரவாரமான அலைகள் என்று ஊர் இருந்த சுவடே இல்லை. 

தனுஷ்கோடி ஸ்டேஷனை ஒட்டியுள்ள இருப்புப்பாதை தடம் மாத்திரம் எஞ்சியிருக்கிறது. 

= = = = = = = = = = = = =

KGG பக்கம் : 

அண்மையில், facebook பதிவில், பட்டுக்கோட்டை ஜோதிடர் சுப்பிரமணியன் எழுதிய ஜோதிடக் குறிப்பு - பெண்களின் ராசி - அவர்களின் குணங்கள் பற்றி - படித்தேன். 

நம் வாசகர்கள், இதைப் படித்து, குறிப்புகள் சரியா என்று கருத்து பதியவும். 

உலகில் பிறந்த அனைத்து பெண்களுக்கும் ஒவ்வொரு தனித்துவமான குணங்கள் இருக்கும்.

எந்தந்த ராசி பெண்களுக்கு எப்படியான குணம் இருக்கும் என பார்ப்போம்.

மேஷ ராசி பெண்கள்: 

மேஷ ராசி பெண்கள்  வெளிப்படையாக இருப்பார்கள். அவர்களுக்கு எதையும் சாதிக்கும் சிந்தனைகள் தோன்றும். இவர்கள் பொய் சொல்லவோ பொய்யாக நடிக்கவோ மாட்டார்கள். இவர்கள் மிகவும் நல்ல குணம் கொண்டவர்கள். கொஞ்சம் முன்கோபிகள்.

ரிஷப ராசி பெண்கள்

இவர்களுக்கு இயற்கையிலேயே கொஞ்சம் திமிர் இருக்கும். ஆனால் உங்களுடன் மனம் திறந்து பேச ஆரம்பித்துவிட்டால், அவர்கள் உள்ளே எவ்வளவு நல்லவர்களாக இருக்கிறார்கள் என்பது உங்களுக்குப் புரியும். இனிமையானவர்களாகவும், உதவி செய்யும் குணம் கொண்டவர்களாகவும், புரிந்து கொள்ளும் குணம் கொண்டவர்களாகவும் இருப்பார்கள். இவர்களிடம் ஒரு தலைமை குணம் அடிக்கடி வெளிப்படும். அன்பு மனம் கொண்டவர்கள்.

மிதுன ராசி பெண்கள்

மிதுன ராசி பெண்கள் உயர்ந்த சிந்தனை கொண்டவர்கள். சில நேரங்களில் மனநிலையை பொருத்து ஒவ்வொரு விதமாக நடந்து கொள்வார்கள். தக்க சமயத்தில் சூழ்நிலைக்கு ஏற்ப நடந்துகொள்வார்கள். பாசமானவர்களாக இருப்பார்கள். மற்றவர்களுக்கு   உதவி செய்யத் தயங்க மாட்டார்கள்.

கடக ராசி பெண்கள்

கடக ராசி பெண்கள் தைரியமும், தன்னம்பிக்கையும் கொண்டவர்கள். இவர்கள் மீது யார் மிகவும் பாசமாக இருந்தாலும் அவர்களுக்காக உயிரையே கொடுப்பார்கள். அன்புக்கு மட்டும் அடிபணிவார்கள். இவர்கள் மிகவும் கவர்ச்சியானவர்கள், அதே சமயம் அமைதியானவர்கள், வெட்கப்படுபவர்கள். யாரையும் எளிதில் நம்பிவிடுவார்கள்.

சிம்ம ராசி பெண்கள்

சிம்ம ராசி பெண்களுக்கு இயற்கையாகவே தான்தான் அறிவாளி என்ற எண்ணம் இருக்கும். ஆனால் ரொம்ம நல்லவர்கள். உங்களுக்கு ஏதேனும் கஷ்டம் என்றால் இவர்களது தோளில் சாய்ந்து அழலாம் என்ற அளவுக்கு இவர்களுடன் நீங்கள் அனைத்தையும் பகிர்ந்து கொள்ள முடியும். தாழ்வு மனப்பான்மை கொண்டவர்கள். யாரிடமும் மனம் விட்டு பேச மாட்டார்கள்.ரொம்ப மென்மையான இதயம் கொண்டவர்களாக இருப்பார்கள்.

கன்னி ராசி பெண்கள்

கன்னி ராசி பெண்கள் பெருந்தன்மை கொண்டவர்களாக இருப்பார்கள். இவர்கள் எதிர் பாலினத்தவர்களின் கருத்தை எளிதில் புரிந்து கொள்வார்கள். இவர்களுக்கு தன்னம்பிக்கை சற்று அதிகமாக இருக்கும்.  அவர்களை மற்றவர்கள் பெருமையாக உணர வைக்க வேண்டும் என எதிர்பார்ப்பார்கள். ஏனெனில், அவர்கள் உண்மையாகவே பெருமைக்குரியவர்களாகத்தான் இருப்பார்கள்.

துலாம் ராசி பெண்கள்

துலாம் ராசி பெண்கள் தங்களது குடும்பம் மற்றும் நண்பர்களுடன் சரிசமமாக பழகுவார்கள், அவர்கள் மீது அதிக அன்பு வைத்திருப்பார்கள். இவர்கள் கலை உணர்வும், அழகுணர்வும் கொண்டவர்களாக இருப்பார்கள். இவர்கள் உண்மையான அன்பை கொண்டவர்கள்.

விருச்சிக ராசி பெண்கள்

விருச்சிக ராசி பெண்கள் பெருமைக்குரியவர்கள். தங்களது வாழ்க்கைத்துணையின் சந்தோஷத்திற்காக எதையும் செய்யும் மனம் கொண்டவர்கள். ஒருவரை இவர்கள் நட்பாக ஏற்றுக்கொண்டு விட்டால் அவர்களின் சந்தோஷத்திற்காக எந்த ஒரு எல்லைக்கும் செல்லக்கூடியவர்களாக இருப்பார்கள். இவர்களின் நட்பு உங்களுக்கு கிடைத்துவிட்டால் உங்களுக்கு எந்த இன்னல்களிலும் தோள் கொடுப்பார்கள்.

தனுசு ராசி பெண்கள்

தனுசு ராசி பெண்கள் நாணயமும் நீதியும் கொண்டவர்கள். இவர்கள் சற்று எளிதில் உணர்ச்சி வசப்படுவார்கள்.  தனக்கு என்ன தேவை என்பதை, தானே முடிவு செய்துவிடுவார்கள். இவர்களுக்கு திறமைகள் அதிகமாக இருக்கும். எதையும் சாதிக்கும் மன தைரியம் கொண்டவர்கள். இவர்கள் நல்ல மனம் கொண்டவர்கள். படபடப்பாக இருப்பார்கள். உண்மையை மட்டும் விரும்பக்கூடியவர்கள்.

மகர ராசி பெண்கள்

மகர ராசி பெண்கள் உள்ளத்தில் எப்போதும் அன்பு குடி கொண்டிருக்கும், இவர்கள் அனைவருடனும் நட்புடன் பழகுவார்கள், பிரபலமானவர்களாகவும் இருப்பார்கள். தன்னை யாருக்கு பிடிக்கிறதோ அவர்களை இவர்களுக்கும் பிடிக்கும். இவர்கள் நீண்ட நாள் உறவில் நிலைத்திருப்பார்கள். அடுத்தவர்களுக்கு உதவி செய்யத் தயங்காதவர்கள்.

கும்ப ராசி பெண்கள்

கும்ப ராசி பெண்கள் சமுதாயத்தில் மற்றவர்களால் மதிக்கக்கூடிய இடத்தில் இருப்பார்கள். இவர்கள் மற்றவர்களுக்காக கவலைப்படாமல் சுதந்திரமாக இருக்க விரும்புவார்கள்.  மேலும் எளிமையாக இருப்பார்கள் ஆனால் தன்மானமும், சுய கௌரவத்துடன் இருப்பார்கள். இவர்கள் பிரபலமானவர்களாக இருப்பார்கள். இவர்களது மனம் புண்படும்படி நடந்து கொண்டால் பின்னர் இவரது இதயத்தை மீண்டும் வெல்வது மிகக் கடினம்.

மீன ராசி பெண்கள்

மீன ராசி பெண்கள் புத்திசாலிகளாக இருப்பார்கள். இவர்களிடன் நீங்கள் மரியாதையாகவும், நன்றாகவும் நடந்து கொண்டால் அவர்களும் உங்களுடன் அவ்வாறே நடந்துகொள்வார்கள். நீங்கள் அவர்களைத் தவறான நோக்கத்துடன் நெருங்கினால், அதை அவர்கள் எளிதில் புரிந்து கொள்வார்கள்.  நல்ல எண்ணமும் உயர்ந்த சிந்தனையும் கொண்டவர்கள். அன்பான மனம் கொண்டவர்கள். சேவை மனப்பான்மை கொண்டவர்கள். விருந்தோம்பலில் வல்லவர்கள். 

= = = = = = = = = = = = = = =