"திங்க"க்கிழமை : வெங்காய வடகறி (உசிலி) - ஸ்ரீராம்

பாஸ் இன்னொரு ஐட்டம் செய்தார்.  அதைப் பற்றி ஒரு திங்களில் கதைக்கிறேன் என்று சொல்லியிருந்தேன்.

'அந்த நாள் எந்த நாளோ' என்று ஏக்கத்துடன் பார்(கா)த்துக் கொண்டிருந்தவர்களுக்கு ஒரு நற்செய்தி! அது இந்த நாள்தான்! ("யோவ்... நாங்க எங்கப்பா கேட்டோம்?" என்று நீங்கள் குரல் கொடுப்பது என் காதில் விழவில்லை!)

ஒருநாள் ஏதோ பார்த்துக் கொண்டிருக்கும்போது எங்கேயோ பார்த்த ரெசிப்பி ஒன்றை பாஸுக்கு அனுப்பினேன்.  அவரும் அதைப் படித்த உடனேயே அடுத்த சந்தர்ப்பத்தில் உற்சாகத்துடன் செய்தார் செய்து கொடுத்தார்..   வெங்காயம் அவருக்குப் பிடிக்காது என்றாலும் எங்களுக்காக செய்து கொடுத்தார்.   அவருமே கொஞ்சம் சுவைத்துப் பார்த்துவிட்டு ரசித்தார் என்பதை நான் சொல்ல மாட்டேனே...  அதற்கு அப்புறம் மூன்று முறை செய்தாயிற்று.  மறுபடி மறுபடி செய்து சாப்பிடத் தோன்றுகிறது.

வெங்காயத்தை மட்டுமே ஒரே காயாக போட்டு கறியா என்று எனக்கும் முதலில் தோன்றியதுதான்.  மற்ற காய்களுக்கு பக்கவாத்தியம்  வாசிப்பது மட்டும்தானே அதன் வேலை!

அப்போது வெங்காயம் என்முன் வந்தது!

"சிங்கத்தை காட்டுல பார்த்திருப்பீங்க, ஜூல கூண்டுல பார்த்திருப்பீங்க..."  வசனம் கேட்டிருப்பீங்க...

அதுபோல "வெங்காயத்தை குழம்புல போட்டுருப்பீங்க..  கூட்டுல போட்டுருப்பீங்க...  வதக்கல்ல போட்டுருப்பீங்க.. சட்னியில் போட்டுருப்பீங்க..   ஏன் அரைச்சு கூட விட்டுருப்பீங்க...  ஆனா அதையே மெயின் காயா வச்சு கறி செஞ்சுருக்கீங்களா..  செஞ்சுருக்கீங்களா...  செஞ்சுருக்கீங்களா....  சாப்பிட்டுப் பார்த்தா ஸூப்பர் டேஸ்ட்டுடா" என்று ஈஸ்வர சிங்கம் சூர்யா குரலிலேயே அடித்துச் சொல்லுவது போல இருந்ததது.  ஆம் அவ்வளவு சுவையாக இருந்தது.

இதற்கு தேவையான பொருட்கள் வெங்காயம், அளவான பெரிய சைஸில் நான்கு, ரொம்பப் பெரிதாக இருந்தால் மூன்று.  கடலைப் பருப்பும், துவரம்பருப்பும் சேர்ந்து ஒரு மான்பிடி அல்லது ஒரு டம்ளர், சிவப்பு மிளகாய் அவரவர்கள் காரத்துக்கேற்ப - (நாங்கள் வெங்காயம் தித்திக்கும் என்பதால் பத்து மிளகாய் வைத்தோம்), தேவையான உப்பு, பெருங்காயம், நல்லெண்ணெய் அல்லது கோல்டுவின்னர் சுமார் ஐந்து டேபிள் ஸ்பூன்,, கடுகு, உளுத்தம்பருப்பு,  மூன்று ஸ்பூன் தேங்காய்த் துருவல், கொத்துமல்லி.

துவரம் பருப்பு, கடலைப் பருப்பு இரண்டையும் அரைமணிநேரம் ஒரு பாத்திரத்தில் ஊறவைக்கவும். அரைமணி ஊறியபின் அதை எடுத்து லேசாக தண்ணீர் தெளித்து மிக்சியில் அரைத்து எடுத்து வைத்துக் கொள்ளவும்.  தனியே வைத்து விடுவோம்.

நான்கு வெங்காயத்தையும் பொடியாக இல்லாமல் நீளவாக்கில் கொஞ்சம் பெரியதாக நறுக்கி வைத்துக்கொள்ளவும். வாணலியில் 2 ஸ்பூன் எண்ணெய் விட்டு கடுகு, உளுத்தம்பருப்பு தாளித்ததும் வெங்காயத்தை அதில் போட்டு சிறிதளவு உப்பு சேர்த்து, கருக்காமல் பொன்னிறமாக வதக்கிக் கொள்ளவும்.  அதை அப்படியே ஓரமாக எடுத்து தனியாக வைக்கவும்.

மறுபடி வாணலியை அடுப்பில் வைத்து எண்ணெய் இட்டு கடுகு உளுத்தம் பருப்பு தாளித்து, அரைத்த பருப்பு விழுதை அதில் சேர்த்து அடிபிடிக்காமல் பிரட்டவும்.  பருப்பு நன்றாக வெந்ததும் பொலபொல என்று வரும்.  அந்த நேரத்தில் அடுப்பிலிருந்து இறக்கும் நேரம் தேங்காய்த்துருவல் மூன்று ஸ்பூன் அதில் போட்டு, ஒரு திருப்பு திருப்பி விட்டு, அடுப்பை சிம்மில் வைத்து, வதக்கிய வெங்காயத்தை அதில் போட்டு நன்றாக சேர்த்து விட்டு, கடைசியாக நறுக்கிய கொத்துமல்லித் தழைகளை அதில் தூவி இறக்கவும்.

ஸூப்பரா இருக்குங்க...   அவ்வளவுதான் சொல்வேன்.  செஞ்சு பாருங்க..  சாப்பிட்டு பாருங்க... கருத்து சொல்லுங்க...

"வெங்காய உசிலி கையோடு அள்ளி வாயினில் சுவைப்பதும் சுவைதானே... சமையல் எப்போதும் தொடர்கதைதான்... முடிவே இல்லாதது..."

பி. கு :  புகைப்படங்கள் யாவும் பாஸே எடுத்தது.