சின்னஞ்சிறுகதை : மூன்று பெண்கள் : பானுமதி வெங்கடேஸ்வரன்

 

மூன்று பெண்கள்

பானுமதி வெங்கடேஸ்வரன்

அந்த மூன்று பெண்களும் வேலையை முடித்து விட்டு வந்து கொண்டிருந்தார்கள்.

மல்லிகாவும், எஸ்தரும் முன்னால் நடக்க, பின்னால் வந்த மரியம், “என்னடி பேசிட்டே போறீங்க? சுத்தி முத்தி என்ன நடக்குதுன்னு கவனிக்க மாட்டீங்களா?” என்றாள்.

“நாமதான் நடக்கறோம், வேற என்ன நடக்குதாம்?” எஸ்தர் நக்கலாக கேட்டாள்.

இதுதான் நீ கவனிக்கற லட்சணம்! மூணு நாளா நானும் பாக்கறேன், அங்கன ஒரு காரு தெனமும் வந்து நிக்குது..”

“ஏன்கா பீச்சுனா நூறு காரு வரும், போகும், அதுல என்ன இருக்கு?”

“பீச்சுக்கு வரும் காருக்கெல்லாம் நம்ம குப்பத்தாண்ட என்ன வேலை? இதுல என்னமோ இருக்கு”

“உன்க்கு எல்லாமே சந்தேகம்” மல்லிகா சிரித்தாள். ஆனால் அன்று இரவு தன் கணவனிடம் சொன்னாள்.

மறுநாள் அந்த கார் வந்து நின்றதும், மீனவ குப்பத்து ஆண்கள் ஆறு பேர்கள் அந்த வண்டியை சூழ்ந்து கொண்டனர். வண்டி ஓட்டி வெலவெலத்து இறங்கினார். அவர் பயத்தோடு ஏதோ சொல்ல, பின் சீட்டிலிருந்த பிரபல சினிமா நடிகை விினோதா இறங்க, எல்லோரும் திகைத்து, பிரமித்தார்கள்.

“மேடம், நீங்களா..?”

“ஆமாம், என்னோட அடுத்த படத்தில் மீனவ குப்ப பெண்ணாக நடிக்கிறேன்,

அதுக்காக உங்க பெண்களை அப்சர்வ் பண்ணத்தான் தினமும் இங்க வரேன்”

“அதுக்கென்ன மேடம், தாராளமா வாங்க, உங்களுக்கு இல்லாததா? ஏன் ஓரமா உக்காந்து வேடிக்க பாக்கறீங்க? வாங்க எங்க வீட்டுக்கு” என்று வினோதாவை அழைத்துச் சென்றார்கள்.

========================================================================================

எப்போதோ படித்தது...

*அந்நிய நாட்டு அரசன் பீ ர்பாலை விருந்துக்கு அழைத்தான். தன் அரண்மனையைச் சுற்றிக் காட்டினான். அவனுக்கு அக்பரைக்  கேவலப்படுத்த வேண்டும் என்ற எண்ணம் அதனால் கழிப்பிடத்தில் அக்பரின் படத்தை மாட்டி வைத்திருந்தான். 

'பார்த்தீரா பீர்யால்? உமது அரசனுக்கு எவ்வளவு மரியாதை கொடுத்திருக்கிறேன்பாருங்கள்' என்று கிண்டலாகக் கேட்டான்.

பீர்பால் அமைதியாகச் சொன்னார் "சரியான இடத்தில்தான் அக்பரின் படத்தை மாட்டி இருககிறீர் உமக்கு மலச்சிக்கல்.  அக்பரின் படத்தைப் பாரத்தாலே உமக்கு பயம் ஏற்பட்டு வயிற்றைக் கலக்கும் மலம் கழிப்பது சுலபமாக இருக்கும். ஆகவே எமது மன்னர் படம் உமது அரண்மனையின் கழிப்பிடத்தில் இருப்பதே முறை".

)))))))))))))))))))))))))))))))))))))))))))))))))))))

இளையபாரதி கவிதைகள் :

நேரில் பேசியதைப் போல் 

பின்னால் 

இல்லை மனிதர்கள். 

புத்தகத்தில் படித்ததைப் 

போல் 

இல்லை வாழ்க்கை.

நதி அறியுமோ 

நதி மூலம்?

வாழ்வதற்காக 

செத்துக் கொண்டிருக்கிறோம். 

சாவதற்காக 

வாழ்ந்து கொண்டிருக்கிறோம்.

மலர் உதிர்த்து சருகாகும் 

மறுபடியும் பூவாகும்.

========================================================================================

 மேலே உள்ள இரண்டுமே 1991 சுபமங்களா இதழிலிருந்து...