நாலாயிர திவ்யப் பிரபந்தம் – வாரம் ஒரு பாசுரம் தொடர்
நெல்லைத் தமிழன்
குரு பரம்பரை மற்றும் பாசுரம் – பகுதி 39
சென்றவாரம் திருவரங்கம் கோயில் தெப்பக்குளத்தைப் பற்றிக் குறிப்பிட்டிருந்தேன். அதனைச் சமைத்தவர் கூரநாராயண ஜீயர் என்றும் குறிப்பிட்டிருந்தேன்.
திருவரங்கம் கோயிலில் சுமார் 21 கோபுரங்கள் உள்ளன (ஏழு பிராகாரங்கள்). அதில் முதன்மையானது தெற்குப் பகுதியில் இருக்கும் பெரிய கோபுரம்தான். இந்த கோபுரம் அமைந்த திருவீதி அடையவளைந்தான் திருவீதி என்று அழைக்கப்படுகிறது (தெற்கு அடையவளஞ்சான், மேற்கு அடையவளஞ்சான்..)
விஜயநகர மன்னர் அச்சுதராயர் (அவருடைய காலம் கிபி 1530-1542) திருவரங்கத்தில் ஆறுமாத காலம் தங்கியிருந்தார். அப்போது தெற்குப் பகுதியில் பெரிய கோபுரம் கட்ட முனைந்தார். 1565ல் விஜயநகர அரசின் வீழ்ச்சிக்குப் பிறகு இந்தக் கோபுரம் மொட்டைக்கோபுரமாகவே நிலைத்து நின்றுவிட்டது. இதனை இராயர் கோபுரம் என்றே அழைப்பர். (இது போல பல கோயில்களில் கோபுரத் திருப்பணிகள் பாதியில் நின்றிருக்கின்றன). இன்னொரு இடத்தில், கிருஷ்ணதேவராயர், ஏறத்தாழ 90 கோயில்களுக்கும் மேல் இராஜகோபுரம் கட்ட ஆரம்பித்ததாகவும், அனைத்துமே பாதி முடிந்த நிலையில் நின்றுவிட்டதாகவும் கூறுகின்றனர். (திருவெள்ளறையிலும் மொட்டைக் கோபுரமாகவே இருகிறது தற்போது திருப்பணிகள் ஆரம்பிக்கப்பட்டுள்ளன)
திருஷ்டி வராமல் இருக்க, இந்த மொட்டைக் கோபுரத்தில் ஸ்ரீநிவாசனுக்கு ஒரு சன்னிதியும், கோட்டைக் காவலராக முனியப்பனுக்கு ஒரு சன்னிதியும் உள்ளது (இப்போதும் பார்க்கலாம்). அதனால் இதனை முனியப்பன் கோட்டை என்று வழங்கும் வழக்கமும் இருந்தது.
1979ல் இந்தக் கோபுரத்தை முழுமையாகக் கட்டவேண்டும் என்று எண்ணிய அஹோபிலமடம் ஜீயர் 8 வருடங்களில் பலரின் துணை கொண்டு கட்டிமுடித்தார். அதுவே நாம் இப்போது பார்க்கும் 236அடி உயரத்தில் நிற்கும் ஆசியாவிலேயே பெரிய கோபுரம்.
1979க்கு முன் இருந்த இராயர் கோபுரம் அல்லது மொட்டைக் கோபுரம்
அஹோபில மடம் ஜீயர் முன்னெடுத்துச் செய்த புதிய கோபுரம்
ஏழாம் பிராகாரத்தில் உள்ள கோபுரங்கள் சித்திரை வீதி அல்லது கலியுகராமன் திருவீதி கோபுரங்கள் எனப்படுகின்றன. இதில் நான்கு கோபுரங்கள் உள்ளன. இந்த வீதி, கலியுகராமன் என்ற பட்டம் பெற்ற மாறவர்மன் வீரபாண்டியன் பெயரில் அமைக்கப்பட்ட வீதி. சித்திரைத் தேரோட்டம் இந்தத் திருவீதியில் நடைபெறுவதால் சித்திரைத் திருவீதி.
ஆறாம் பிராகாரம் உள்ள கோபுரங்கள் உத்தர வீதி அல்லது திருவிக்கிரமன் திருவீதி கோபுரங்கள் எனப்படுகின்றன. இதில் நான்கு கோபுரங்கள் உள்ளன. சோழ நாட்டை ஆண்ட விக்கிரமச் சோழன் பெயரால் அமைந்த திருவீதி. விக்கிரமச் சோழன் காலம் கிபி 1118-1135. இராமானுஜர் காலத்தில் இந்த வீதியில் கோயிலின் உள் பணி செய்பவர்களுக்கான வீடுகள் அமைந்திருந்ததால் இதனை உள்துறை வீதி என்று அழைத்தனர் (பிறகு உத்தர வீதி என்று மருவிவிட்டது)
ஐந்தாம் பிராகாரத்தில் உள்ள கோபுரங்கள் அகளங்கன் திருவீதி கோபுரங்கள் எனப்படுகின்றன. விக்கிரம சோழனின் ‘அகளங்கன் – களங்கமில்லாதவன்’ என்ற பட்டப்பெயரால் அழைக்கப்பட்டது. இவனது தந்தை முதலாம் குலோத்துங்கச் சோழனுக்கும் அகளங்கன் என்ற பட்டப்பெயர் இருந்தது என்கிறார்கள். தெற்குப் பகுதியில் இருப்பது நான்முகன் கோபுரம் என்றும், வடக்குப் பகுதியில் இருப்பது தாயார் வடக்கு வாசல் கோபுரம் என்றும், கிழக்குப் பகுதியில் இருப்பது அகளங்கன் கோபுரம் அல்லது வெள்ளைக் கோபுரம் என்று அழைக்கப்படுகிறது. புதிய தெற்குக் கோபுரம் கட்டுவதற்கு முன்பு, இந்த வெள்ளைக் கோபுரமே மிக உயரமான கோபுரமாக இருந்தது.
நான்காம் பிராகாரம், ஆலிநாடன் திருவீதி என்று அழைக்கப்படுகிறது. (திருமங்கை ஆழ்வாருக்கு ஆலிநாடன் என்ற பெயர் உண்டு, திருவாலி நாட்டைச் சேர்ந்தவர் என்பதால்) இதில் தெற்கில் உள்ள கோபுரம் ஆலிநாடன் திருவீதிக் கோபுரம் என்று அழைக்கப்படுகிறது. கார்த்திகை மாதத்தில் இந்தக் கோபுரம் முன்புதான் சொக்கப்பனை கொளுத்துவதால், இதனை கார்த்திகை கோபுரம் என்றும் அழைக்கின்றனர். இந்த கோபுரத்தின் இரு புறமும் யமுனை, கங்கை என்று இரு துவாரபாலகிகள் சிலைகள் உள்ளன. இந்தப் பிராகாரத்தின் வடக்குப் பகுதியில் உள்ள கோபுரம் ஐந்து குழி மூன்று வாசல் கோபுரம் என்று அழைக்கப்படுகிறது. மேற்கு வாயில் அடைபட்டுள்ளது. கிழக்கில் உள்ள கோபுரத்தின் பெயர் தவுட்டரவாசல் கோபுரம். முன்பு, கோயிலிலிருந்து இந்த வாசல் வழியாக நெல்மூட்டைகளை எடுத்துச் சென்று, அதனை அரைத்து அரிசியாக்கி, அரிசியையும் தவிட்டையும் கோயிலுக்குள் எடுத்து வரும் வழக்கம் இருந்தது. அதனால் தத்ராத்ரேய வாசல் என்று இருந்த இதன் பெயர் தவிட்டு-அரை-வாசல் – தவிட்டரைவாசல் என்றாகிவிட்டது.
மூன்றாம் பிராகாரம் குலசேகரன் திருவீதி என்று அழைக்கப்படுகிறது. மூன்றாம் பிராகாரத்தில், தெற்கில் இருக்கும் கோபுரம் ஆரியபட்டாள்/ஆரியபடாள் வாசல் என்று அழைக்கப்படுகிறது. வங்காளத்திலிருந்து வந்த மன்னர் ஒருவர், இந்த வாசலில் பெரும் செல்வத்தை வைத்துச், சிலரை விட்டுச் சென்றதாகவும், அக்காவலர்கள் அந்தச் செல்வத்தை அரங்கன் வழிபாட்டுக்கு உபயோகப்படுத்தினார்கள் என்றும் சொல்லப் படுகிறது. அதனால் இதன் பெயர் ஆரியபட்டாள் வாசல். இந்தப் பிராகாரத்தின் வடக்குப் பகுதி கோபுரம், பரமபதவாசல் கோபுரம். இந்தப் பிராகாரத்தின் திருமதிலையும், வடக்குப் பகுதி கோபுரத்தையும் திருமங்கையாழ்வார் கட்டினார்.
இரண்டாம் பிராகாரம் இராஜமகேந்திரன் திருவீதி என்று அழைக்கப்படுவதை முன்பே பார்த்தோம். இவர் இராஜேந்திர சோழனின் மூன்றாம் மகனான “இரண்டாம் இராஜேந்திர சோழனின்’ புதல்வர். இரண்டாம் இராஜேந்திர சோழன், இரண்டாம் ராஜேந்திர சோழன் அரசனாக இருந்தபோது தன் புதல்வனாகிய இராஜமகேந்திரனை இளவரசனாக்கினான். (கிபி 1060-1063). தந்தைக்கு முன்னாலேயே வீர மரணம் அடைந்ததால், இவனால் சோழ அரசனாக ஆகமுடியவில்லை.
இராஜமகேந்திரன் பெயரால் அமைந்த திருவீதி இது. இதில் தெற்குப் பக்கம் உள்ள கோபுரத்தின் பெயர் நாழி கேட்டான் கோபுரம். கோயில் பூஜைக்காக இங்கு ஒலிக்கும் வித வித மணிகளின் ஒலிகளைக் கொண்டு, எந்த நாழிகை, என்ன பூஜை என்று தெரிந்துகொள்ளமுடியும் என்பதால் இதனை நாழிகை கேட்டான் வாசல் என்கிறார்கள். இந்த வாசலில் ஐந்து படிகள் உண்டு. வாயிலுக்கு பத்ரன், சுபத்ரன் ஆகிய இருவர் துவாரபாலகர்கள். (கொடிமரத்தை தாண்டியவுடன் இந்த வாசல் வரும்)
ஐந்தாம் பிராகாரத்தின் நான்முகன் கோபுரத்தைக் கடந்து சென்றால் நான்கு தூண்களைக் கொண்ட சிறிய மண்டபம் உள்ளது. இதன் பெயர் திருவந்திக்காப்பு மண்டபம். (தெய்வத் திருவுருவங்கள் மீது கண்ணேறு படாமல் இருக்க இங்கு சடங்குகள் செய்வர்). இதைத் தாண்டியதும் உள்ள பெரிய மண்டபம் (இதன் கிழக்குப் புறம் வரிசையாக கடைகள் உண்டு) அரங்கவிலாச மண்டபம் எனப்படுகிறது. இதனைக் கட்டியவர் திருமலை நாயக்கர் (1623-1659) (இவருடைய தலைநகர் முதலில் திருச்சிராப்பள்ளியாக இருந்தது. பிறகு மதுரையைத் தலைநகரமாகக் கொண்டு ஆண்டார்)
ஐந்தாம் பிராகாரத்தின் வடகிழக்கு மூலையில் உள்ளது ஆயிரங்கால் மண்டபம் (953தான் இருக்கிறது). இதில் தெற்குப் பகுதி கனு மண்டபம் என்றும் நடுவில் இருக்கும் சிறிய பகுதி (சுமார் 28 தூண்கள் உடையது) திருமாமணி மண்டபம் என்றும் வடக்குப் பகுதி சங்கராந்தி மண்டபம் என்றும் அழைக்கப்படுகிறது.
ஹொய்சாள மன்னர்கள் ஆட்சியில் (மூன்றாம் நரசிம்மன் 1251-1293) தண்டநாயக்கர்கள் என்ற படைத்தலைவர்கள், அமைச்சர்கள் ஒவ்வொரு பகுதியையும் நிர்வாகம் செய்தனர். தமிழகம், கர்நாடகப் பகுதிகள் 13 பகுதிகளாகப் பிரிக்கப்பட்டு இந்த தண்டநாயக்கர்கள் நிர்வாகத்தை நடத்தினர். பெருமாள் தண்டநாயக்கன், மாதப்பன், கம்பைய வீரையன் போன்றோர்களால் இந்தப் பகுதி நிர்வாகம் செய்யப்பட்டு வந்தபோது ஆயிரங்கால் மண்டபம் தொடங்கப்பட்டது. இதனைக் கட்டி முடித்தவன் முதலாம் சடையவர்ம சுந்தரபாண்டியன் என்கிறார்கள்.
இந்த சடையவர்ம சுந்தரபாண்டியன் கனு மண்டபப் பகுதிகளைக் கட்டினான் என்கின்றனர். இவனே திருவரங்கம் கோயிலில் பொன் வேய்ந்தான். (எவ்வளவு பொன் என்றால், அவன் ஆனை மீதேறி, ஆனை படகின் மீதேறி தண்ணீரில் இருக்க, பக்கத்திலேயே இன்னொரு படகை வைத்து அதில் தங்கம், நகைகள் போன்றவற்றைக் கொட்டி, இரண்டு படகுகளும் சம உயரத்தில் தண்ணீரில் நிற்கும்படியாகச் செய்து அத்தனை பொன்னையும் திருவரங்கம் கோயிலுக்குச் செய்தானாம்)
சந்தனு மண்டபத்தில் மூன்று அறைகளில் நடுவில் தற்போது மூலவரைப் பார்த்த மாதிரி கல்கருடன் உள்ளது. சுந்தரபாண்டியன் காலத்தில் தங்கக் கருடனைச் செய்து வைத்திருந்தானாம். அதுபோல மூன்றாவது சிறிய அறையில் (மேற்குப் பகுதி) தன்னுடைய தங்க விக்ரஹத்தை வைக்க முயன்றானாம். அதனை கோயிலில் பிரதிஷ்டை செய்ய மறுத்த தால், ஹேம சந்தன ஹரி என்று பெயர் மாற்றி பிரதிஷ்டை செய்தானாம் (இவன் காலம் 1251-1271)
கோயிலுக்காக 18 லட்சம் பொன் செலவழித்து பொன்னால் செய்த விக்ரஹம், பாத்திரங்கள், மதில்களை பொன்னால் வேய்ந்தது என்று செய்த தால், இவனுக்கு ‘கோயிலில் பொன் வேய்ந்த பெருமான்’ என்ற பட்டம் ஏற்பட்டது. இந்த மாதிரி அரங்கன் கோயிலில் பொன் வேய்ந்து பளீரிட வைத்தது முஸ்லீம் படையெடுப்புக்கு முக்கியக் காரணமாக அமைந்தது.
ஆயிரங்கால் மண்டபத்துக்கு வெகுதூரத்தில் எதிரே தெற்குப் பகுதியில் சேஷராயம் மண்டபம் உள்ளது. இது விஜயநகரப் பேரரசின் காலத்தில் கட்டப்பட்டது. (1500களில், கிருஷ்ணதேவராயர் காலம்). அதில் உள்ள சிற்பங்கள் மனதைக் கொள்ளைகொள்ளும்.
சேஷராயர் மண்டப முகப்பில் உள்ள அசரடிக்கும் சிற்பங்கள். (இந்த ஸ்ரீராம்தான் எங்கள் பிளாக் பல வருடங்களாகத் தொடர்ந்துகொண்டிருந்த இந்த நாளுக்கு இந்த பதிவு என்பதை மாற்றி, அன்றைய பதிவைப் பார்த்து இன்று எந்த நாள் என்று தெரிந்துகொள்வதை மாற்றிவிட்டாரோ அதுபோல இன்று சனிக்கிழமையா இல்லை ஞாயிறா என்று சந்தேகப்பட வைக்கவில்லை. திருவரங்கம் என்பதால் படங்கள் கோர்த்தேன்)
ஓரளவு திருவரங்கம் கோயில் பற்றி இரண்டு மூன்று வாரங்கள் வந்த பதிவுகளிலிருந்து தெரிந்துகொண்டிருப்பீர்கள். ஞாயிறு பகுதியில் ஒரு நாள் முக்கியமான படங்கள் பகிர்கிறேன். இனி இன்றைய பாசுரம் பார்த்துவிடுவோமா?
இன்றைக்கு திருப்பாணாழ்வார் பாசுரம். இது ‘அமலனாதிபிரான்’ என்ற தலைப்பில் வரும் பிரபந்தத்தில் கடைசி பாசுரம். மொத்தம் பதினோரு பாசுரங்கள் கொண்டது. திருப்பாணாழ்வார், அரங்கநாதனை பாதாதி கேசமாக வர்ணித்துவிட்டு கடைசியில் உன்னைக் கண்ட கண்கள் வேறு ஒன்றையும் காணாது என்று முடித்து அந்த அரங்கனோடேயே ஐக்கியமாகிவிடுகிறார். இனி பாசுரத்தைப் பார்ப்போம்.
கொண்டல் வண்ணனைக் கோவலனாய் வெண்ணெய்
உண்ட வாயன் என் உள்ளம் கவர்ந்தானை,
அண்டர் கோன் அணி அரங்கன் என் அமுதினைக்
கண்ட கண்கள் மற்றொன்றினைக் காணாவே
பொருள்: மழைமேகம் போன்ற நிறத்தில் திருமேனி உடையவன். கண்ணனாக அவதரித்து யசோதையின் இல்லத்தில் வெண்ணெய் திருடி உண்ட வாயை உடையவன். தன்னுடைய குணத்தினால் என் மனதை முழுமையாக க் கொள்ளை கொண்டவன். தேவர்களுக்கெல்லாம் தலைவன். அழகாக விளங்கும் திருவரங்கத்தில் அறிதுயிலமர்ந்திருக்கும் அரங்கநாதன். எனக்கு இன்பம் தரும் அமுதம் போன்றவன். அப்படிப்பட்டவனைக் கண்ட என் கண்கள் வேறு எந்தப் பொருளையும் காண விரும்பாது.
விளக்கம்: கொண்டல் வண்ணன் – மழை மேகம் போல கரிய நிறம் உடையவன். கோவலன் – ஆயர் சிறுவன், ஆநிரை மேய்த்தவன்
பிரயோகச் சக்கரம் கொண்டுள்ள அந்த பரவாசுதேவன் நம் எல்லோரையும் காக்கட்டும்.
முருகா சரணம்
பதிலளிநீக்குசரணம் சண்முகா. வாங்க துரை செல்வராஜு சார்.
நீக்குநலமே வாழ்க
பதிலளிநீக்குவாழிய நலம்.
நீக்குபுரட்டாசி இரண்டாம் கிழமை..
பதிலளிநீக்குபரவாசுதேவன் நம் எல்லோரையும் காக்கட்டும்.
முதல் சனிக்கிழமை எங்களுக்கு உப்பிலியப்பன் மற்றும் பல திவ்யதேசங்களில் தரிசனம் கிடைத்தது. நீங்களும் அருகில் உள்ள கோயிலில் ஓரிரு நாட்கள் இருந்தீர்கள். இன்று எந்தக் கோயில்?
நீக்குஎப்போதும் போல் அருமையாக எழுதியிருக்கிறார் நண்பர் நெல்லைத் தமிழன். என் உள்ளம் கவர் கள்வன் என்று பாடத்தோன்றுகிறது !! படங்களும் அருமையோ அருமை.
பதிலளிநீக்குவாங்க ராமன் சார். மிக்க நன்றி. சில சமயங்களில் எழுதுவது சோர்வடைய வைக்கும். அதனால்தான் கோயில் உலாவை நிறுத்திவிட்டு ஞாயிறு சொந்த உலாவிற்குச் சென்றுவிட்டேன்.
நீக்குதிருவரங்கம் கோயில் மிக வசீகரமானது. அடுத்தது காஞ்சி வரதராஜப் பெருமாள் கோயில். இந்த இரண்டு கோயில்களில் ஆற அமர நாம் தரிசனம் செய்து குருபரம்பரை மற்றும் ஆழ்வார் வாழ்வில் நிகழ்ந்த நிகழ்வுகளை அசைபோட இயலும். ஆனால் திருமலையில் நம் நோக்கம் ஒரு சில வினாடிகளாவது அவனைப் பார்த்துவிட மாட்டோமா என்பதிலேயே இருக்கும்.
அனைவருக்கும் வணக்கம், வாழ்க வளமுடன்
பதிலளிநீக்குவாங்க கோமதி அரசு மேடம். வாழ்க வளமுடன்.
நீக்குநிறைய விவரங்களுடன் பதிவு அருமை.
பதிலளிநீக்குபுரட்டாசி மாதம் நாலாயிர திவ்யப் பிரபந்தம் பாடல்களை படிப்பேன் இன்று
ஸ்ரீ குலசேகரப்பெருமாள் அருளிச்செய்த பெருமாள் திருமொழி படித்தேன்
திருவரங்கத்தை இன்று மனதால் நினைத்து வணங்கி கொண்டேன்.
பழைய படங்கள் , மற்றும் கோபுர தரிசனம் செய்து கொண்டேன்.
பாசுரத்தை படித்து அரங்கனை வணங்கி கொண்டேன்.
//பிரயோகச் சக்கரம் கொண்டுள்ள அந்த பரவாசுதேவன் நம் எல்லோரையும் காக்கட்டும். //
எல்லோரையும் காக்க வேண்டிக் கொள்வோம்.
/
ஆஹா... இன்று பெருமாள் திருமொழியா? இருளிரியச் சுடர் மணிகள் என ஆரம்பிக்கும். மன்னுபுகழ் என்று தொடங்கும் இராமரைத் தாலாட்டும் பாட்டு மனதை மயக்கும். என்னை நீ விட்டாலும் நான் உன்னை விட மாட்டேன் என்ற ஆசை, வைராக்யம் வித்துவக்கோட்டுப் பாசுரங்களில் தெரியும். ஏதாவது ஒன்றாக திருமலையில் பிறந்துவிட மாட்டேனா என குலசேகர ஆழ்வார் பாசுரம் அந்த வேங்கடமலையின் பெருமை கூறும். தனக்குப் பிறந்தும் அவனை குழந்தையாக அனுபவிக்கக் கொடுத்து வைக்கவில்லையே என தேவகி புலம்புவது.... ஆமாம்... எப்படிப்பட்ட பாக்கிய இழப்பு, யசோதைக்குத்தான் எவ்வளவு கொடுத்து வைத்திருக்கிறது என எண்ணத் தோன்றும். ஒருவேளை, நீ எனக்கு மகனாகப் பிறக்க வேண்டும் என வரம் கேட்டவள், முழுமையாக்க் கேட்கவுல்லையோ எனத் தோன்றும். இராமனின் அழகு, குணங்களை அனுபவித்த தயரதன், கைகேயி வரத்தினால் புலம்புவது நம் கண்ணளில் கண்ணீரை வரவழைக்கும்.
நீக்குசடையவர்ம சுந்தரபாண்டியன் பொன் கொடுத்த வரலாறு அருமை.
பதிலளிநீக்குசேஷராயர் மண்டப முகப்பில் உள்ள அசரடிக்கும் சிற்பங்கள் படம் அழகு.
//100 ரூ வரிசைக்குச் செல்லும் வழியில் இருக்கும் கல்வெட்டு (ராஜராஜ தேவர் எழுத்து தெரிகிறதா?) //
தெரிகிறது.
ஒரு நாள் சேஷராயர் மண்டப சிற்பங்களைப் பகிர்கிறேன்.காலத்தால் பிற்பட்டது என்றாலும் அருமையான சிற்பங்கள்.
நீக்குஅடுத்த தடவை செல்லும்போது அந்தக் கல்வெட்டைப் பாருங்கள் கோமதி அரசு மேடம்.
முதல் தடவையாக சனிக்கிழமை, பாசுரப் பகுதி மாத்திரம் வெளியாகி இருக்கிறது.
பதிலளிநீக்குஅதுவும் அவனது இன்னருளே என நினைப்பதா இல்லை ஜெயகுமார் சாரை, பகுதி இருந்தாலும் இல்லாவிட்டாலும் நினைக்க வைக்கும் என்பதா?
எனக்கும் இப்போது தான் ஜேகேசி சாரின் நான் படிச்ச கதை இல்லாதது வெறுமையாகக் காட்சி அளித்தது. அதை நினைத்துக் கொண்டே படிக்கையில் உங்கள் கருத்து! :( என்ன சொல்லுவது! எல்லோருக்கும் இது தான் கிடைக்கப் போகிறது எனத் தெரிந்தாலும் சில சமயங்களில் மனம் ஏற்க மறுக்கிறது. நம்பவும் மறுக்கிறது. :(
நீக்குஇன்று இரண்டாம் சனிக்கிழமை. அடுத்த சனியன்று மஹாலய பக்ஷம் என்பதால் பெருமாளுக்குச் செய்ய வேண்டியவற்றைப் பலரும் இன்னிக்கே செய்வார்கள். நவராத்திரியும் இல்லாமல், மஹாலயமும் இல்லாமல் வரும் சனிக்கிழமைகள் புரட்டாசியில் கிடைப்பது அரிது.
பதிலளிநீக்குவாங்க கீதா சாம்பசிவம் மேடம்... எங்களுக்கு அடுத்த சனிக்கிழமைனு நினைக்கிறேன்.
நீக்குஅடுத்த சனி என்றால்? மாஹாலய பக்ஷம் வந்துடுமே? அப்போ சமாராதனை போன்றவை செய்தால் அது பித்ருக்களுக்குனு ஆயிடும். நவராத்திரி சனி எனில் அம்பிகைக்குனு சொல்லுவாங்க. நீங்க எது அடுத்த சனிக்கிழமைனு சொல்றீங்க? புரியலை.
நீக்குமாளயபக்ஷத்தில் இல்லைனு நினைக்கிறேன். அது இல்லாத சனிக்கிழமை. இன்று பண்ண விட்டுப்போய்விட்டது
நீக்குபடங்கள் அனைத்தும் அருமை. சேஷராயர் மண்டபத்தைப் பார்த்திருக்கேனானு நினைவில் இல்லை. கோயிலுக்குப் போனால் தான் தெரியும். :( இனி எங்கே? நாயக்கர் காலத்துச் சிற்பங்கள் எனப் பார்த்ததுமே தெரிகிறது. கல்வெட்டை இங்கே உங்கள் படத்தின் மூலமே பார்த்தேன். கோயிலில் பார்த்த நினைவெல்லாம் இல்லை.
பதிலளிநீக்குஇராமானுஜர் சன்னிதிக்கு முன்னால் சேஷராயர் மண்டபம் வழியா வருவதற்குத்தான் நிறைய வாய்ப்பு. (மூலவரை சேவித்த பிறகு). கல்வெட்டை பலரும் மிஸ் செய்திருப்பார்கள். நான் அந்தக் கல்வெட்டு அழகாக இருக்கவும் படித்துப் பார்க்க முயற்சித்தேன். அதன் பிறகு பலமுறை அந்தக் கல்வெட்டைப் பார்த்து வருவேன்
நீக்குவீட்டுக்கு அருகில் உள்ள பிள்ளையார் கோயிலில் பெருமாள்
பதிலளிநீக்குஅபிஷேக தரிசனம்...
இப்போது தான் வந்தேன்...
மிக நன்று துரை செல்வராஜ் சார்.
நீக்குஜெயகுமார் ஐயா அவர்களது
பதிலளிநீக்குபதிவாக்கம் இல்லை...
மனதை அழுத்துகின்றது
நெருநல் உளனொருவன் இன்றில்லை என்னும்
நீக்குபெருமை உடைத்துஇவ் வுலகு.
திரு அரங்க தரிசனம் நற்பேறு...
பதிலளிநீக்குமிக்க நன்றி
நீக்குதிருவரங்கம் முழுவதுமாக அறிந்து கொண்டோம்.
பதிலளிநீக்குசிற்பங்கள் அழகாக உள்ளன.
வாங்க மாதேவி அவர்கள். மிக்க நன்றி
நீக்கு