ஆயுள் பத்து இருபது வருடங்கள்தாம் என்று தெரிந்தும் நாயோ பூனையோ வளர்ப்பது ஏன்? சரோஜாதேவி தொடர்கதை இறுதிப் பகுதி.

 

கேள்வி பதில்கள் : 

நெல்லைத்தமிழன் : 

1. எல்லாக் கோயில்களையும் அரசு ஒரு கூரையின் கீழ் நடத்தும்போது, வருமானமுள்ள கோயில் வருமானமற்ற கோயில், வருமானம் இருந்தால் இந்த இந்த சௌகரியங்கள் என்றெல்லாம் செய்வது சரியா?  தன் குழந்தைகளை, அவர்கள் சம்பளத்தைப் பொறுத்து நடத்துகின்ற மனநிலை அல்லவா இது?    

# இதில் பலவித நியாயங்கள் அடிபடும். வருமானம் நிறைய இருக்கிற கோயிலுக்கு வரும் திரளான பக்தர்களுக்கு வேண்டிய சௌகரியங்கள் செய்து கொடுப்பதில் பெரிய தவறு ஏதும் இல்லை.  

என்னைப் பொருத்த வரையில்,  ஊரில் இருக்கும் கோயிலைச் சரியான நிலையில் வைத்திருக்க மக்களுக்கு  ஆர்வம் இருக்க வேண்டும். அது இல்லாதவரை,  ஏழைக் கோயில்கள் ஏழைக் கோயில்களாகவே தொடரும்.

2.  நம் அனுபவங்களை எழுத ஆரம்பித்தால், அந்த காலகட்டத்தில் நடந்த அநீதிகள், அனுபவித்த கஷ்டங்களையும் திரும்பிப் பார்ப்பதாக ஆகிவிடாதா? அதனால் என்ன பிரயோசனம்?  

# தற்புகழ்ச்சியையும்,  தான் அனுபவித்த சிரமங்களையும் அதிகம் பேசாது,  தன் அனுபவங்கள் கற்றுத்தந்த பாடம் என்ன என்ற கண்ணோட்டத்தில் எழுதினால் அது சரியாக அமையும் என்பது என் எண்ணம்.

& ஏதோ ஒரு மன ஆறுதல். அவ்வளவுதான்! 

3.  மிருகங்களைப் பார்க்க, மிருகக்காட்சி சாலைக்குப் போவதில் விருப்பமா இல்லை அதன் வாழ்விடங்களில் சஃபாரி முறையில் பார்ப்பது இஷ்டமா?   

# சஃபாரி நான் போனதில்லை.  வன விலங்குகளை காட்சிச் சாலையில் மட்டுமே பார்த்திருக்கிறேன்.‌ என் மாதிரி நபருக்கு சஃபாரி ஒத்து வராது.

& சஃபாரி எல்லாம் பெரிய ரிஸ்க். மிருகக் காட்சி சாலையில் கொஞ்சம் பாப் கார்ன் கொறித்தபடி ஒவ்வொரு மிருகமாகப் பார்த்து ஹலோ சொன்னால் அது போதும்! 

4. நிச்சயம் ஆயுள் பத்து இருபது வருடங்கள்தாம் என்று தெரிந்தும் நாயோ பூனையோ வளர்ப்பது ஏன்? எதற்கு அதீத அன்பு செலுத்தி பிறகு வருத்தப்படுகிறார்கள்?  

# அன்பு செலுத்துவதும், பிறர் நம்மிடம் காட்டும் அன்பினால் மகிழ்ச்சி அடைவதும் மனித இயல்பு.  ஒரு வேளை அது கிடைக்காவிட்டால் அல்லது இன்னும் வேண்டும் என்று நினைத்தால் செல்லப் பிராணிகளை நாடுவோமோ ? 

அவை இனி இல்லை என்று வரும்போது கொஞ்ச காலம் துயரப் படுவதும் புரிந்து கொள்ளக் கூடியதுதான்.

& எனக்கும் அதே ஃபீலிங்க்தான். செல்லப் பிராணிகள் வளர்ப்பது வேண்டாத விவகாரம். 

5. வயதாகும்போது இரவில் ஆழ்ந்த தூக்கம் வருவது குறைவதன் காரணங்கள் என்ன? எல்லோரும் தூங்கிக்கொண்டிருக்கும்போது நீங்க கொட்டக் கொட்ட முழித்துக்கொண்டிருந்திருக்கிறீர்களா?

# பலமுறை. அடிக்கடி. வேலைச்சுமை அறவே நின்றபின் தூக்கம் குறையத் தானே செய்யும் ?

மீண்டும் உறங்க என்ன செய்ய வேண்டும் என்பது இன்னும் புரியாத புதிராக இருக்கிறது.‌

& எனக்கும் இது நிகழ்ந்துகொண்டு இருக்கிறது. யாருக்காவது என்ன remedy என்று தெரிந்தால் சொல்லுங்கள். கவலைப்பட எதுவும் இல்லை என்றாலும் சில இரவுகள் சிவராத்திரிதான்! 

6. படித்தால் மட்டும் போதுமா, பார் மகளே பார் போன்ற பழைய படங்களின் பாடல்களை நினைவில் வைத்திருந்து ரசிக்க முடிந்த நமக்கு, ஜெயிலர் 1, 2ல் வந்த பாடல்கள் போன்ற சமீப படங்களின் பாடல்கள் வேப்பங்காயாக கசப்பதன் காரணம் என்ன?

# இப்போது சினிமா இசை இயந்திரத் தனமாக கோர்க்கப் படுகிறது என்று தோன்றுகிறது. அற்ப ஆயுளுக்கு இதுவும் ஒரு காரணம்.

= = = =  = = = = =====+========= ===== ==== ====== ======= =======   =========   =======   ======

மனசாட்சியம் - 40

KGY Raman

" நான் நினைத்தால் தீபாவளி "

தீபாவளியின் முக்கியத்துவத்தைப் பற்றி நான் விவரமாக சொல்லப் புகுந்தால் , " என்னையா,  இது கூட எங்களுக்கெல்லாம் தெரியாதா ? இதை எல்லாம் கூட நீர் எழுதிக் கொண்டிருக்க வேண்டுமா ? " என்று நீங்கள் கேட்கலாம். 

அகில இந்திய அளவில் தீபாவளி போல் மிகவும் விரும்பப்படும் பண்டிகை பேரு உண்டா என்று எனக்கு ஒரு சந்தேகம் உண்டு. என்னதான் நவராத்திரி சங்கராந்தி என்று பரவலாக கொண்டாடினாலும் அந்த தீபாவளிக்கு இருக்கிற மகத்துவம் வேறதானே. மிக இளம்பிராயத்திலேயே, பஞ்சாங்கம் அல்லது காலண்டர் வந்தவுடன், தீபாவளி எந்த தேதியில் வருகிறது அன்று என்ன கிழமை என்று அரக்கப் பறக்க தேடிப் பார்ப்போம்.

இன்று போலவே, அன்றும் தீபாவளி என்றால், புதுத் துணி, வாண வேடிக்கை,  பலகாரம் பட்சணம் என்று இருந்தாலும் இன்றைய நிலவரம் வேறு அன்றைய நிலவரம் வேறு. 

என்னுடைய சிறு பிராயத்தில் பிறந்தநாள் கொண்டாடி புது டிரஸ் வாங்குவது என்பது வழக்கத்தில் இல்லை. உண்மையில் என் 13 வது வயது வரை என் சரியான பிறந்தநாள் என்ன என்று எனக்குத் தெரியாமல் தான் இருந்தது. எனவே வருஷத்தில் புதுத் துணி வாங்குவது என்றால் அது தீபாவளிக்குத் தான் என்று எழுதப்படாத நியதி ஒன்று அமலில் இருந்தது. இப்போது போல, ரெடிமேடு கடைக்குப் போனோம்,  வாங்கினோம் வந்தோம் என்று இருக்குமா ? நிச்சயமாக இல்லை. முதலில் துணி வாங்க வேண்டும். " இவனுக்கு அரைக்கை சட்டை தைக்க எவ்வளவு துணி ? " என்று வீதி தையற்காரரைக் கேட்க வேண்டும். அவர் என்னை ஏற இறங்கப் பார்த்து,  'ஒன்றரை கஜம் வாங்குங்க' என்று எஸ்டிமேட் கொடுப்பார். அதன்படி குழந்தைகளுக்குத் துணி வாங்கி அவரிடம் தைக்கக் கொடுக்க வேண்டும். அப்பா வேட்டி துண்டு வாங்கிக் கொள்வார். அம்மாவுக்கு ஒரு புடவை - ரவிக்கை ஏற்கனவே தைக்கப்பட்டு இருப்பில் இருக்கும். 

தீபாவளியன்று காலை வெடி வெடிக்க வேண்டிய நேரம் வரையிலும் தையற்காரர் இதோ அதோ என்று போக்கு காட்டுவாரே தவிர , சட்டையை தைத்துக் கொடுக்க மாட்டார். பாவம் அவர் தான் என்ன செய்வார். வருஷத்தில் ஒரு நாள் வருகிற தீபாவளி சமயம் தான் அவருக்கு பெரிய வரும்படி வரக்கூடிய மாதம். எத்தனை பேர் துணி கொண்டு வந்து தைக்கக் கொடுத்தாலும் மறுக்காமல் வாங்கிக் கொள்வார். பெரும்பாலும் சிறுவர்கள் உடைகள் தான் கடைசி ராங்க்.  தையல் கூலி, சிறுவர் உடுப்புகளுக்குக் கம்மியாகத் தானே வரும் ! என் முக்கால் கை சட்டைக்கு நான் கொடுத்த  தையல் கூலி ஒன்றரை ரூபாய் என்று நினைவு. துணியையும் சேர்த்து புது சட்டையின் விலை ஐந்து ரூபாய்க்கும் கீழே வரும். எங்கள் தெரு தையல்காரர் எனக்கு நெருங்கிய நண்பர். அவருக்கு வாடகைக் காமிராவில் படம் எடுத்துக் கொடுத்திருக்கிறேன். பொழுது போகாத போது அவர் கடையில் உட்கார்ந்து அவருடன் அரட்டை அடித்துக் கொண்டிருப்பேன். தைப்பதிலேயே மும்முரமாகக் கண்ணும் கையும் காலும் வேலை செய்தாலும், காது மட்டும் நான் சொல்வதைக் கேட்கும் - வாய் அதற்கு பதிலும் சொல்லும். 

அதிகாலை வேளையில் விடியும் முன் எண்ணெய் தேய்த்துக் குளிப்பதே ஒரு தனி அனுபவம் தான். சீயக்காய்ப் பொடிக் கசப்பு உதடுவழியாக நாக்கிற்குச் சென்று கஷ்டப்படுத்தும். 

என்ன இருக்கிறதோ இல்லையா எங்கள் வீட்டு தீபாவளிப் பலகாரத்தில் வெள்ளை அப்பம் என்பது கட்டாயம் இருந்தே தீரும். அது எங்கள் வீட்டு வழக்கம் என்று பக்தியுடன் சொல்வார்கள். இந்த வழக்கம் என் தலைமுறையிலேயே காணாமல் போய்விட்டது. இப்போது வெள்ளையப்பம் என்றால் என்ன என்று கேட்கும் நிலைக்கு வந்து விட்டோம். பலகாரங்கள் எல்லாம் சாப்பிடும் முன் தீபாவளி மருந்து ஒரு நெல்லிக்காய் அளவு தின்றாக வேண்டும். பல பேருக்கு தீபாவளி மருந்து என்பதே ஒரு பட்சணம் போல. 

அடுத்து , பட்டாசு வெடிப்பது.  எங்கள் பக்கத்து வீட்டில் வசதியான ஒரு குடும்பம் இருந்தது. தீபாவளிக்குப் பத்து நாட்கள் முன்பிருந்தே தினசரி மாலை 7 மணிக்குத் தொடங்கி சுமார் ஒன்றரை மணி நேரம் பட்டாசும்  மத்தாப்புமாக வெடித்துத் தீர்ப்பார்கள். அதைப் பார்த்துப் பார்த்து பட்டாசு ஆசையே மிகவும் குன்றிப் போய்விட்டது. இவ்வளவுக்கும் ஒரு காலத்தில் ரோலிங் கேப் துப்பாக்கி வேண்டும் என்று சத்தியாக்கிரகம் செய்து தோற்றவன் நான்.  பட்டாசு மத்தாப்பு கொளுத்தும் போது சிறு சிறு விபத்துகள் ஏற்படும். ஒரே ஒரு முறை ஏரோப்ளேன் செலுத்தப் போய் அது தாறுமாறாக பறக்க ஆரம்பித்து, பட்டாசு வைத்திருந்த கூடையில் விழுந்து எல்லா பட்டாசு மத்தாப்பும் தொடர்ந்து வெடித்து எரிந்து , கோயில் திருவிழா வாணவேடிக்கை போல் ஆகி விட்டது. நடுவில் சித்தப்பாவின் புது வேட்டியில் புகுந்து புறப்பட்டதில் வேட்டியில் பெரிய ஓட்டை. நல்ல காலமாக அவருக்கு ஏதும் காயம் படவில்லை.

சூரிய உதயத்துக்கு முன் எண்ணெய் ஸ்நானம் செய்ய வேண்டும் -  அப்போதுதான் கங்கையில் குளித்த பலன் முழுவதுமாகக் கிடைக்கும் என்று சொல்லி, எங்களை அதிகாலைப் பொழுதிலேயே எழுப்பி விட்டுவிடுவார்கள். இப்போதும் பல வீடுகளில் அந்த பழக்கம் இருக்கும் என்று நினைக்கிறேன். மிகுந்த கண் எரிச்சலுடன் தூக்கம் பாதி கலைந்த நிலையில் எழுந்து,  எண்ணெய் தேய்த்துக் குளிப்பது என்பது ஒரு தனி அனுபவம். அதன் சிறப்பு அப்போது எங்களுக்குப் புரிந்ததில்லை. 

அன்றாடம் சைக்கிள் வண்டியில் ஸ்வீட் காரம் வைத்து தள்ளிக்கொண்டு ஒரு வட இந்தியர் வருவார். எல்லா பட்சணங்களும் மிகவும் நன்றாக இருக்கும். அவர் பஞ்சகச்சம்  ஜிப்பா தொப்பி என்று அச்சு வட இந்திய ஆடை அணிகளில் வலம் வருவார். அவருக்கு ஜெயப்பிரகாஷ் நாராயணன் என்று நாங்கள் பெயர் வைத்திருந்தோம். அக்காவின் தலை தீபாவளி  சமயம் அவரை வீட்டுக்கு வந்து ஸ்வீட் செய்து கொடுப்பீர்களா என்று கேட்டதற்கு நூறு ரூபாய் கொடுத்தால் வருகிறேன் என்று சொன்னார். அந்தக் காலத்தில் நூறு ரூபாய் என்பது மிக மிகப் பெரிய தொகை. சராசரி குடும்பத்தின் மாத வருமானமே 150 ரூபாயாக இருக்கும். அக்கா தலை தீபாவளிக்கு எல்லா பட்டணங்களும் அம்மாவே செய்தார். அதில் அவரையும் அறியாமல் ஏதோ ஒரு மாற்றம் ஏற்பட்டு அல்வா மிகச் சிறப்பாக அமைந்துவிட்டது. 

தீபாவளியின் இன்னொரு சிறப்பு அம்சம் நண்பர்களுக்கு வாழ்த்து அட்டைகள் அனுப்புவது.  தெருவோரத்தில் தீபாவளி வாழ்த்து அட்டைகளை பரப்பி விற்பனை செய்வார்கள் ரூபாய்க்கு 12 முதல் ரூபாய்க்கு நாலு மட்டும் என்று பல வகைகளில் கிடைக்கும். இதுவும் தற்சமயம் மறைந்து போன ஒரு வழக்கம் என்று ஆகிவிட்டது.

இப்போதெல்லாம் தீபாவளிப் பண்டிகை என்றால் அந்த அளவு திரில் இல்லையோ என்று எனக்கு அவ்வப்போது தோன்றும். பேரப்பிள்ளைகள் எல்லாம் தீபாவளி எப்போது வருகிறது என்பதில் எல்லாம் சிறிது அளவு கூட ஆர்வம் காட்டுவதில்லை. புது உடைகள் கூட அவர்களுக்கு எந்த விதமான விசேஷ  சுவாரசியத்தையும் கொடுப்பதில்லை என்று எனக்குத் தோன்றுகிறது. இது என் கற்பனை என்றாகி விட்டால் என்னை விட சந்தோஷப்படுபவர் யாரும் இருக்க முடியாது.

=== ==== ==== ==== ==== ==== ==== ==== ==== ==== ==== ==== ==== ==== ==== ==== ==== === ==== ==== ==== 

படமும் பதமும் : 

நெல்லைத்தமிழன் : 

போன்சாய் மரங்கள் (பெரிய மரத்தை குறுகலாக சிறிய அளவில் வளர்ப்பது) உங்களைக் கவர்ந்திருக்கிறதா? இப்படி ஒரு மரத்தைச் செயற்கை முறையில் போன்சாய் செடியாக வளர்ப்பது சரியா? இதையே மனித இனத்துக்கும் விரிவாக்கினால், உணவு, உடை, இடம் போன்ற அத்தியாவசியத் தேவைகள் மிகவும் குறைந்துவிடும், ஒருவருக்கு இப்போது என்ன ஆகிறதோ அதில் மூன்றில் ஒரு பகுதி கூட தேவையிருக்காது என்று எதிர்காலத்தில் இப்படி மனித இனத்தையும் போன்சாயாக மாற்றுவார்களா? (இந்தப் படம் மைசூரிலிருந்து பெங்களூர் வரும்போது வழியில் இருந்த கோயில் மற்றும் அதன் பூங்காவிற்குச் சென்றிருந்தபோது எடுத்தது)

முந்தைய படத்தில் சரியாகத் தெரியவில்லை என்று நினைத்தால் இதோ ஒரு குட்டி ஆலமரம் விழுதுகளோடு. ஆமாம் இப்படி குட்டியாக ஒரு மரத்தை வளர்க்கும்போது இலைகள் சிறியதாக ஆவதில்லை. பழங்களும் அப்படியே.. இதைக் கவனித்திருக்கிறீர்களா?  (உடனே மனித போன்சாயை மனதில் கொண்டுவராதீர்கள். கற்பனை உருவமே கொடூரமாக இருக்கும்)

படமும் பதமும்  2 - ஸ்ரீராம் 

எந்த ஊர் என்பவரே..  சொல்லவும் வேண்டுமோ.. 

= = = = = = = = = = = =

KGG பக்கம் : 

சரோஜாதேவி தொடர் கதை 

சென்ற பகுதி  - சுட்டி : 21 : " நாநாவின் திட்டம் "

இனி  இறுதிப் பகுதி. 

மீதி நான்கு அல்லது ஐந்து வாரங்கள் எழுத இருந்த கதையை சுருக்கமாக இங்கே கொடுத்துள்ளேன். 

** நாநாவின் திட்டப்படியே எல்லாம் நடந்தது. சுந்தரும் அவனுடைய அப்பாவும் வீணாவின் கல்யாணத்தை நிறுத்த தாங்கள் செய்த சதியை  ஒப்புக்கொண்டு மன்னிப்பு கோரினர். அதை வீடியோவாக எடுத்து நாநா ஆனந்துக்கு அனுப்பினான். 

** வீணா ஆனந்த் திருமணம் வெகு விமரிசையாக நடந்தது. ஜயராமன் மற்றும் ஆனந்த் குடும்பத்தினருக்கு ரொம்ப சந்தோஷம். விமலா பாபா பற்றிய தன்னுடைய விருப்பத்தை ஜயராமனிடம் தெரிவித்தாள். 

** தன்னுடைய கல்யாணப் பத்திரிக்கையை தோழிகளுக்குக் கொடுக்கச் சென்ற விமலா தன்னுடைய கல்லூரி தோழி நீனாவை சந்தித்து உரையாடுகிறாள். அப்பொழுது பனானா எண்டர்பிரைசஸ்  பற்றி சொல்கிறாள். நாநா பற்றி விவரங்கள் அறிந்துகொள்ளும் நீனா, நாநாவை விரும்புகிறாள். பாபா விமலா கல்யாணத்தில் மாப்பிள்ளைத் தோழன் நாநாவும் மணப்பெண் தோழி நீனாவும் ஒருவரை ஒருவர் பார்த்து லவ்வுகின்றனர். 

இவர்தான் நீனா 

** நாநா & நீனா கல்யாணம் வெகு விமரிசையாக நடந்தது. 

சரோஜாதேவி கதையின் நீதி : 

1) ஒரு செயற்கை நுண்ணறிவு மற்றும் இரண்டு துடிப்பான, திறமை உள்ள இளைஞர்கள் ஒன்று சேர்ந்தால் நிறைய சாதிக்கலாம். 

2) வலைப்பதிவுகளில் தொடர்கதை என்பது விஷப்பரிட்சை. எட்டு வாரங்களுக்குள் எழுதிமுடித்துவிட்டால் நல்லது. இல்லையேல் யாரும் தொடர்ந்து படிக்கமாட்டார்கள். 

3) தொடர்கதைகளுக்கு ஒவ்வொரு வாரமும் கவர்ச்சியான படம் ஒன்று தேவை. படம் பார்த்துக் கதை படிப்பவர்கள் அதிகம்! 

சுபம்! 

= = = = = = = = = 

காலை எழுந்தவுடன் தவளை (தொடர்ச்சி) 

ஏன் ‘காலை எழுந்தவுடன் தவளை’?

வாழ்வதற்கான ஓர் அற்புதமான காலகட்டம் இது. நீங்கள் உங்களுடைய பெருவாரியான இலக்குகளை அடைவதற்கான அதிகமான சாத்தியக்கூறுகளும் வாய்ப்புகளும் இன்று போல முன்பு ஒருபோதும் இருந்ததில்லை. மனித வரலாற்றில் இதுவரை இல்லாத அளவுக்கு, நீங்கள் தேர்ந்தெடுப்பதற்கான விஷயங்கள் அபரிமிதமாக உள்ளன. நீங்கள் செய்யக்கூடிய நல்ல விஷயங்கள் ஏராளமாக இருக்கின்றன. அவற்றில் எவற்றைச் செய்வது என்பதைத் தீர்மானிப்பதற்கான உங்கள் திறன்தான் வாழ்வில் நீங்கள் என்ன சாதிப்பீர்கள் என்பதைத் தீர்மானிக்கின்ற முக்கியக் காரணியாக இருக்கிறது.

நீங்கள் பெரும்பாலான மக்களைப் போன்றவர் என்றால், செய்வதற்கு அளவுக்கதிகமான வேலைகளுடனும் அவற்றைச் செய்து முடிப்பதற்கு மிகக் குறைவான நேரத்துடனும் நீங்கள் திணறிக் கொண்டிருப்பீர்கள். நீங்கள் உங்கள் கைவசம் இருக்கும் வேலைகளைச் செய்து முடிக்கப் போராடிக் கொண்டிருக்கும்போதே, புதிய வேலைகளும் பொறுப்புகளும் பெருங்கடல் அலைகளைப் போல அடுத்தடுத்து உருண்டோடி வந்து உங்களை மேலும் திணறடிக்கும். உங்களால் ஒருபோதும் எல்லாவற்றையும் செய்து முடித்திருக்க முடியாது. சில வேலைகள் மற்றும் பொறுப்புகளை நிறைவேற்றுவதைப் பொருத்தவரை நீங்கள் எப்போதும் பின்தங்கியே இருப்பீர்கள். உண்மையைக் கூறினால், உங்களுடைய பல வேலைகள் நிறைவுறாமல் கிடப்பில் இருக்கும்.

தேர்ந்தெடுப்பதன்மீது கவனம் செலுத்துங்கள். 

ஒவ்வொரு கணமும் எது உங்களுடைய மிக முக்கியமான வேலையோ, அதைத் தேர்ந்தெடுத்து, உடனடியாக அதைச் செய்யத் தொடங்கி, அதை வேகமாகவும் சிறப்பாகவும் செய்து முடிப்பதற்கான உங்கள் திறன், நீங்கள் வளர்த்துக் கொள்ளக்கூடிய வேறு எந்தவொரு திறமை அல்லது பண்புநலனை விடவும் உங்கள் வெற்றியின் மீது மிக அதிகமான தாக்கத்தை ஏற்படுத்துகிறது.

தெளிவான முன்னுரிமைகளை நிர்ணயித்துக் கொண்டு, முக்கியமான வேலைகளை வேகமாகச் செய்து முடிக்கும் பழக்கத்தை வளர்த்துக் கொள்கின்ற ஒரு சராசரி நபர், அளவுக்கதிகமாகப் பேசுகின்ற, அற்புதமான திட்டங்களை வகுக்கின்ற, ஆனால் செயலில் இறங்காத ஒரு மேதையைவிடவும் வாழ்வில் வெகுதூரம் முன்னேறுவார்.

(அடுத்த வாரம் முடியும்)