கேட்டு வாங்கிப் போடும் கதை :: திருப்பம்

     இந்த வார கேட்டு வாங்கிப் போடும் கதை பகுதியில் மூத்த பதிவரான திருமதி கோமதி அரசு மேடம் அவர்களின் கதை இடம்பெறுகிறது.

 

     அவரின் தளம் திருமதி பக்கங்கள்.

     நான் நேரில் சந்தித்துள்ள பதிவர்களில் ஒருவர்!  முன்னர் ஒருமுறை திருக்கடையூர் சென்றபோது மயிலையில் இறங்கி பஸ் மாறும்போது மேடத்தின் நினைவு வந்தது.  அவர்கள் அப்போது அங்குதான் இருந்தார்கள்.  அதைப் பற்றி அவர்கள் தளத்திலும் குறிப்பிட்டபோது, சொல்லியிருக்கலாமே என்றார்கள்.

     தற்சமயம் மதுரையில் வசிக்கிறார்கள்.  திரு திருநாவுக்கரசு அவர்கள் கல்லூரி ஒன்றில் ப்ரொபஸராக இருந்து ஒய்வு பெற்றவர்.  சிறந்த ஆன்மீகச் சொற்பொழிவாளர்.  அழகாகப் படங்கள் வரைபவர்.  கோமதி மேடமும் ஆன்மீக விஷயங்களில் நாட்டம் கொண்டவர்.  புகைப்பட வல்லுநர்களில் ஒருவர்.  கோவில்களையும், இயற்கைக்கு காட்சிகளையும் அடுக்கடுக்காகப் படங்கள் எடுத்துக் பகிர்வார்.  இந்தப் புலிகளுக்குப் பிறந்த இவர்களின் மகன் சாக்பீஸிலேயே ஒரு கோவில் செய்திருக்கிறார்.  அவர் பதிவொன்றில் இது பற்றிய விவரம் சொல்லியிருக்கிறார் கோமதி அரசு மேடம்.  நாங்கள் நேரிலேயே அந்தக் கோவிலையும் பார்த்தோம்.

     கதை பற்றிய அவரின் முன்னுரையைத் தொடர்ந்து அவரின் படைப்பு தொடர்கிறது...



====================================================================

முன்னுரை :-

 

நான் 2009 ம் ஆண்டு ஜூன் 1ம் தேதி  வலைத்தளம்  ஆரம்பித்தேன். என் குழந்தைகளிடமிருந்து கற்றுக் கொண்டு  வலைத்தளத்தில் எழுத ஆரம்பித்தேன்.

 

ஜூன் மாதம் எழுதக் கற்றுக் கொண்டு  அக்டோபர் மாதம்  போட்டியில் கலந்து கொள்வது  என்பது  குருட்டு தைரியம்.

ஆனால்  அதில் ஒரு வேடிக்கை என்னவென்றால்  கதையை கேட்டு இருந்த சர்வேஷனுக்கு அனுப்பாமல்  என் தளத்திலேயே வைத்துக் கொண்டது. போட்டி கதைகள் ஒவ்வொன்றாக வரும் போது என் கதையைப் பற்றி ஒன்றும் வரவில்லையே என்று நினைத்துக் கொண்டேன்.

 

போட்டி முடிவுகள் வந்தன  . பரிசு வராது என்று தெரிந்தாலும் முடிவுகளையும், கலந்து கொண்டவர்கள் பெயர் பட்டியலையும் பார்த்த போது என் பெயர் இடம் பெறவில்லை  என்பது தெரிந்தது.

 

 

 அப்புறம் தான் என் தவறு புரிந்தது கதை கேட்டவருக்கு நான் அனுப்பி வைக்க வேண்டும் என்பது. (தமிழ்மணத்திற்கு மட்டும் அனுப்பிவிட்டு இருந்தேன்.)

வலைச்சரத்தில்  அந்த கதையை   இரண்டொரு ஆசிரியர்கள் குறிப்பிட்டு இருக்கிறார்கள். 

”எங்கள் பிளாக் ” ஸ்ரீராம் என்னிடம் கதை கேட்ட போது குட்டிக்கதைதான் எழுதி இருக்கிறேன் என்று சொன்னேன் அனுப்பி வைக்க சொன்னார். 

படித்து விட்டு சிரிக்காதீர்கள் . ”திருப்பம்” என்ற தலைப்பில் கதை இருக்க வேண்டும் முடிவு ”நச்” இருக்க வேண்டும் என்பதால் இப்படி.

இந்த கதையை கேட்டு வாங்கிய ஸ்ரீராமுக்கு நன்றி. படிக்க போகும் உங்களுக்கும் நன்றி.

====================================================================

திருப்பம்

கோமதி அரசு .

(சர்வேசன் 500-’நச்’னு ஒரு கதை 2009 போட்டிக்கு)

சிவநேசனின் வீடு அன்று காலை முதலே ஒரே பரபரப்பாய் இருந்தது. அவர் மகனுக்குப் பெண் பார்க்கப் போகிறார்கள்.  அவர், "குறித்த நேரத்தில் நாம் பெண் வீட்டில் இருக்க வேண்டும். கால தாமதம் செய்யாமல் கிளம்புங்கள்" என்று தன் மனைவி மகன்களிடம் சொல்லிக்கொண்டிருந்தார்.

ஆம்! அவருக்கு இரண்டு மகன்கள். அவர் மனைவி பட்டுப் புடவையில் வைரநகைகள் மின்ன பூரணி என்ற பெயருக்கேற்றாற்போல் பூரண கலசம்போல் வந்தார்.  தன் மனைவி பூரணியைப் பார்த்த சிவநேசன் ஒரு கணம் மெய்ம்மறந்து ரசித்துவிட்டு குறும்பாய் "இப்போது நாம் நம் மகனுக்குப் பெண் பார்க்கப் போகிறோம்" என்று நினைவூட்டினார்.

பூரணியும் வெட்கத்தால் சிவந்து "சரி, சரி"  என்று சொல்லி, பூ, பழம் முதலியவற்றை எடுத்துக்கொண்டு காரில் ஏறினார்கள்.

காரில் போகும்போது தன் மகன்களைப் பெருமிதமாய்ப் பார்த்துக்கொண்டார் பூரணி.அழகு, படிப்பு, நல்ல வேலை, நல்ல குணம் நிரம்பிய தன் மகனுக்கு நல்ல மனைவியாய் பார்க்கும் பெண் இருக்கவேண்டும் என்று நினைத்துக் கொண்டார்.

பெண்வீட்டை அடைந்தனர்.

பெண்வீட்டு வாசலில் அழகாய்ச் செம்மண் இட்டுக் கோலம் போட்டிருந்தார்கள்.  வரவேற்பறையில் வெண்கல உருளியில் பலவித மலர்களால் அலங்கரித்திருந்தனர்.  பெண்வீட்டார் சிவநேசனின் குடும்பத்தாருக்கு நல்ல வரவேற்பளித்தார்கள். சிவநேசனின் மனதில் பெண்வீட்டைப் பற்றிய மதிப்பீடு உயர்ந்துகொண்டிருந்தது.

வீட்டின் உள்ளே மூக்கை உறுத்தாத ஊதுவத்தியின் நறுமணம்.


சிறு ஒலியில் காயத்திரி மந்திரம் பின்னணியில் ஒலிக்க, எல்லோரும் அமர, உறவின்ர்களின் அறிமுகப்படலம் நடந்தது. பிறகு இப்பொழுது உலகம் முழுவதும் உள்ள பொருளாதார மந்த நிலையைப் பற்றிப்
பேச்சு வந்தது.  அப்போது அதில் கலந்துகொண்ட சேகரின் அணுகுமுறை, நேர்மறையான சிந்தனைகள் ஆகியவற்றை உள்ளே இருந்து கேட்டுக் கொண்டிருந்த பூங்குழலிக்குப் பிடித்தது.

பெண்வீட்டில் உள்ள வயதில் மூத்தவர், பெண்ணைப் பார்த்துவிடலாம் எனப் பேச, பெண் அழைத்துவரப்பட்டாள்.  பெண்ணைப் பார்த்தவுடனேயே அனைவருக்கும் பிடித்துவிட்டது.  பெண்ணின் உயரம்,பெண் நடந்துவந்த விதம், புன்சிரிப்புடன் அனைவரையும் வணங்கிய பாங்கு எல்லாம் பிடித்திருந்தது.


பூங்குழலியைத் தன் மகனுக்குத் திருமணம் செய்யப் பூரணி முடிவெடுத்துவிட்டார்.  தன் கணவனைத் தனியாக அழைத்துத் 'தன் மகனுக்குப் பிடித்திருக்கிறதா' எனக் கேட்டு, 'பிடித்திருந்தால் பெண்வீட்டாரிடம் முடிவு தெரிவித்துவிடுவோம்' என்று கூறினார்.  சிவநேசன் தன் மகன்களிடம் கேட்டார்,பெண் எப்படி என்று. 

கல்யாணப் பையன் சங்கர், பெண் பிடித்திருக்கிறது என்றான்.  தம்பி சேகரும் பெண் நன்றாக இருக்கிறார் என்று தன் கருத்தைச் சொன்னான். சிவநேசன் பெண்ணின் தந்தையிடம் எங்களுக்குப் பூரண சம்மதம்.எப்போது நிச்சயம் செய்வது என்று கேட்டார். பெண்ணின் கருத்தைக் கேட்க பெண்ணின் அப்பா உள்ளே போனார்.

வெளியில் வரும்போது தயங்கித் தயங்கிப் பெண்ணிற்கு சேகரைததான் பிடித்திருக்கிறதாம் என்று சொன்னார்.