வெள்ளிக்கிழமை : 'மேரி நைனா'வும் சிவரஞ்சனியும்!

     'நான் அதிகமாக ஹிந்திப் பாடல்கள் கேட்டதில்லை' என்று சொல்லியிருந்தார் நெல்லைத்தமிழன்.  அவருக்கு இந்தப் பாடலைக் கேட்க சிபாரிசு செய்கிறேன்.  அழகு ராஜேஷ் கன்னாவுக்காக, அழகு ஹேமமாலினிக்காக,  காட்சியுடன்  தனியாக ஒருமுறையும்,  காட்சியைப் பார்க்காமல் கிஷோர் குமார் குரலை மட்டும் ஒருதரமும் கேட்கும்படி கேட்டுக் கொள்கிறேன்.  (அதிரா...  ஹிந்திப் பாடல்கள் கேட்டிருக்கிறீர்களோ?  இதை முழுசாக் கேட்கோணும்... சொல்லிப்போட்டேன்!!)

     பாடல் ஒன்றை ரசிக்க காணொளி தேவையில்லை, கவனம் திருப்பும் என்பது என் அபிப்ராயம்.  காட்சியைக் காணும்போது பாடலின் இனிமையை, பாடகரின் குரலின் குழைவை ரசிப்பதில் கவனம் சிதறுகிறது.  (கில்லர்ஜி பாடகர் ஒருவர் பற்றி போட்டிருக்கும் பதிவு நினைவுக்கு வந்து "அந்தப் பாடகர் யாராயிருக்கும்" என்ற கேள்வி மனத்தைக் குடைகிறது!) ஆனால் என்ன செய்ய?  இன்று 'வீடியோ கிழமை'.  வீடியோ பகிரவேண்டிய கட்டாயம்!  

     இந்தப் பாடலில் கிஷோரின் குரலைத்தான் முக்கியமாகச் சொல்லவேண்டும்.  அர்த்தம் புரிந்தால் வரிகளையும் மிகமிகமிகமிக ரசிக்கலாம்.  என் அபிமான பாடகர்.  என் அபிமான இசை அமைப்பாளர்.  இந்தப் பாடல் அமைந்துள்ள ராகம் சிவரஞ்சனி.  இந்தப் பாடலைக் கேட்கும்போதே இதே ராகத்தில் வேறு சில பாடல்களும் உங்களுக்கு நினைவுக்கு வரவேண்டும். ஏனென்றால் இந்த ராகத்தில் பல பாடல்களை பலரும் அமைத்திருக்கிறார்கள்.  சில பாடல்கள் எனக்கே "அப்படியா?  இதுவும் சிவரஞ்சனியா?" என்று ஆச்சர்யப்படவைத்தது!  (ராமலிங்கம் ராஜீவனுக்கு ஆச்சர்யம் இருக்காது.  அவரும் ராகங்கள் தெரிந்து பாடல்கள் ரசிக்கிறார்.  பாடலை முழுமையாகக் கேட்பீர்கள் இல்லையா ராரா?)

     ஹிந்தியில் மேரா நாம் ஜோக்கர் படத்தில் முகேஷ் பாடிய "ஜானே கஹாங்..  கயே ஓ தின்.." பாடல், ஏக் துஜே கேலியே படத்தில் எஸ் பி பி லதா மங்கேஷ்கர்  பாடும் "தேரே மேரே பீச் மெயின்" 

     தமிழில் நான் அடிமை இல்லை படத்தில் வரும் "ஒரு ஜீவன்தான்", நட்சத்திரம் படத்தில் வரும் "அவளொரு மேனகை" இதயகோவில் படத்தில் வரும் "வானுயர்ந்த சோலையிலே"  பாடல் ஆகியவற்றைச் சொல்லலாம்.  இவை பெரும்பாலும் சோகராகமாகவே அமைந்த பாடல்கள் என்று பார்த்தால் திருடா திருடா படத்தில் வரும் "கண்ணும்  கண்ணும் கொள்ளையடித்தால்"  பாட்டு கூட இதே ராகம்தானாம் (ஏஞ்சலின்... ஹிந்திப் பாடல்கள் நீங்கள் கேட்டிருக்க வாய்ப்பு இருக்கிறது.  "இந்தி"யாவில் இருந்திருக்கிறீர்களே!!!!!  அட்லீஸ்ட் ஆராதனா, ஷோலே, பாபி போன்ற படப்பாடல்கள்)

     இன்னும் கூட பாடல்கள் உண்டு. உங்களால் ஏதாவது கண்டு பிடிக்க முடிகிறதா என்று பார்க்கலாம்!  (ஜி எம் பி ஸார் "நான் சினிமாப் பாடல்களே கேட்பதில்லை ஸ்ரீ!" என்பார்!)

     கீதாக்கா பாடலை முழுசும் கேட்டு கமெண்ட் செய்யும்படி கேட்டுக்கொள்கிறேன்.  நழுவி எஸ்கேப் ஆயிடக் கூடாது.  வல்லிம்மாவை மிஸ் செய்கிறேன்.  நெட் இல்லாததால் பதிவுப் பக்கம் காணோம்.  இல்லாவிட்டால் ஹிந்திப் பாடல் ரசிகர்களில் அவரும் ஒருவர்.  கீதா ரெங்கன் டூர்!  ம்ம்ம்.... பார்ப்போம்!

தமிழ்மணம் வாக்களிக்க இங்கு க்ளிக் செய்யவும்.