'திங்க'க்கிழமை 170619 : வாழைப்பூ, பொடி கலந்த சாதம் - ஏஞ்சல் ரெஸிப்பி

வாழைப்பூ ,பொடி கலந்த சாதம்  

================================ 

வாழைப்பூவில் ரசம்  உசிலி பொரியல் சூப் என செய்தாச்சு அடுத்த எக்ஸ்பெரிமென்ட் fried ரைஸ் போல செய்து பார்த்தேன்.  மிகவும் அருமையாக வந்தது.  ருசி கொஞ்சம் மஷ்ரூம் ரைஸ் போல இருந்தது.  இதில் வெங்காயம் பூண்டு எதுவும் சேர்க்கவில்லை   பொதுவாகவே நான் வெஜிடபிள் கலந்த சாதம் செய்யும்போதும் பூண்டு மட்டுமே சேர்ப்பேன்.  இதில் அதையும் தவிர்த்து விட்டேன் .

எனது  செய்முறையில் ஒரு பங்கு அரிசி சாதத்துக்கு முக்கால் பங்கு காய்கறிகள் இருக்கும் .  அந்த அளவையே  வாழைப்பூ பொடி   சாதத்துக்கும் சேர்த்துள்ளேன்.

தேவையான பொருட்கள் 

=========================

சிறிய அளவு வாழைப்பூ --- கள்ளன் நீக்கி  சுத்தம் செய்து சிறியதாக நறுக்கியது 

தாளிக்க                                ---- தேங்காய் எண்ணெய் ...ஒரு ஸ்பூன் 

வறுத்து பொடி செய்ய 

-------------------------------------------

தனியா விதைகள் -------- 2 தேக்கரண்டி 

ஆளிவிதை               -------- 3 தேக்கரண்டி 

தேங்காய்                 --------- 4/5 துண்டுகள் 

வற்றல் மிளகாய்    --------- 3

சின்ன சீரகம்           --------  1 தேக்கரண்டி 

கறிவேப்பிலை        ---------- ஒரு ஆர்க் 

வறுக்க -------------------------------தேங்காயெண்ணை 

சமைத்த அரிசி ,பொன்னி அல்லது சீராக சம்பா ---------3 கோப்பை 

ஆளி விதை உடலுக்கு மிகவும் நல்லது.  அதன் சுவை விரும்பாதோர் அதற்குப்பதில் கடலை பருப்பு அல்லது துவரம் பருப்பு சேர்க்கலாம்.  சாதம் தாளிக்கும்போதும் வேர்க்கடலை உளுந்து கடலைப்பருப்பு அலங்காரமாக தாளித்து சேர்க்கலாம்.  பேலியோவில் பருப்புகள் தவிர்ப்பதால் நான் மேற்கூறியவற்றை  சேர்க்கவில்லை.

 ஆளிவிதையின் பயன்களை அறிந்தால் நிச்சயம் தவிர்க்க மாட்டீர்கள்.

பிற தாவர உணவுகளை விட 75 முதல் 800 மடங்குகள் அதிக அளவிலான lignans ஆளி விதையில் உள்ளன.  ஆளி விதையில் எளிதில்  கரையக் கூடிய மற்றும் திடமான நார்ச்சத்துக்களும் நிரம்பியுள்ளன .

ஆளி விதையில் உடலுக்கு ஆரோக்கியம் தரும் பல்வேறு குணங்கள் உள்ளன.  அவற்றில் முக்கியமானவை ஒமேகா-3 என்ற நல்ல கொழுப்பு அமிலங்கள்.   இவை இதயத்திற்கு உகந்தவை.  உடலில் தேவையற்ற கொழுப்பை கரைத்து /குறைத்து எடையை சீராக வைக்க உதவுகின்றன. ஒரு தேக்கரண்டி ஆளி விதையில் 1.8 கிராம் அளவிற்கு ஒமேகா-3 உள்ளது.  Anti inflammatory குணம் என்பது நாளங்களில் கட்டிகள் வாதம் அழற்சி உருவாகாமல் தடுப்பது.

மார்பக புற்றுநோய், புரோஸ்டேட் புற்றுநோய் மற்றும் பெருங்குடல் புற்றுநோய் ஆகியவற்றை எதிர்த்து செயல்படும் திறன்கள் இந்த ஆளி விதைக்கு உள்ளன என்று ஆய்வுகள் தெரிவிக்கின்றன .

செய்முறை 

----------------------

அடுப்பை பற்றவைத்து அடி  கனமான  வாணலியில் தேங்காய் எண்ணெய் ஊற்றி சூடானதும் தனியா ,மிளகாய் ,சீரகம் ,தேங்காய் ஆகியவற்றை ஒவ்வொன்றாக சேர்த்து தீயாமல்  வறுத்து அடுப்பை அணைத்தபின் அந்த சூட்டிலேயே ஆளிவிதைகளை சேர்த்து,  ஓரிரு நிமிடங்கள் வைத்து,  பிறகு மிக்சியில் பொடித்துக்கொள்ளவும் .

அடுத்தது வாணலியில் ஒரு கரண்டி எண்ணெய் விட்டு அதில் சுத்தம் செய்த வாழைப்பூவை சேர்த்து பிரட்டவும்.   அதிலிருந்து நீர் வெளி வந்து வற்றியதும்,  உப்பு சேர்க்கவும்.   பிறகு அரைத்து வைத்த  பொடியையும் சேர்த்து அடிப்பிடிக்காமல் கிளற,  5-6 நிமிடங்களில் வாழைப்பூ  நிறம் மாறி வெந்து வந்ததும் 

 

கறிவேப்பிலை இலைகளை சேர்க்கவும்.

அதிலேயே சமைத்த பொன்னி அல்லது சீரக சம்பா அரிசியை கலந்து உடையாமல் பிரட்டவும்  .சுவையான வாழைப்பூ ஆளி விதை  பொடி  சாதம் தயார்.

 

  

இதனுடன் தயிர் பச்சடி ,உருளை பொரியல்  மிகவும் சுவையாக இருக்கும் .

[ புதுசாக இருக்கிறது.  சுவாரஸ்யமாகவும் இருக்கிறது.  ஒருமுறை முயற்சி செய்து பார்க்க வேண்டும்.  நன்றி - ஸ்ரீராம் ]

தமிழ்மண வாக்களிக்க இங்கு க்ளிக்கவும்!