புதன் 200304 : சொந்த கருத்தை வெளிப்படையா சொல்ல தயக்கம் வந்ததுண்டா ?

பானுமதி வெங்கடேஸ்வரன்: 

சினிமா, விளம்பரங்கள் எல்லாவற்றிலும் திருமணத்திற்கு முன்பே   ஆணும்,பெண்ணும் சேர்ந்து வாழ்வதாக காட்டுவது சகஜமாகி வருகிறதே? இது சரியா?




# திருமணம் என்பது ஒரு சடங்கு மட்டும் என்றாகிவிட்டது. சேர்வதும் பிரிவதும் முன்யோசனை இன்றி ஒழுங்கற்றதாகிவிட்டது. சிறந்த மனப்பாங்கு இருந்தால் சடங்குகள் இன்றியும் வாழலாம். இல்லாது போனால் திருமண பந்தம் என்பது பெயரளவில் மட்டும் தானே இருக்கும் ?

& அதாவது, அவங்க சொல்ல நினைப்பது என்னவென்றால், திருமணத்துக்கு முன்பு அவங்க சந்தோஷமா இருக்காங்க என்பது மட்டும்தான். மேலும் பல சினிமாக்களில், கல்யாணம் அல்லது கோர்ட் சீன் வந்தால், படம் முடிந்துவிட்டது என்று பொருள். அப்புறம் தியேட்டரில் யாரும் இருக்கமாட்டார்களே! 

தான் கனவு கண்ட வாழ்க்கை பறிபோன ஆத்திரத்தில் ஒரு ஊரையே எரித்த கண்ணகிக்கு சிலை வைப்பபவர்கள், கணிகையர் குலத்தில் பிறந்தாலும் கோவலன் இறந்ததும், துறவு வாழ்க்கையை மேற்கொண்டு, தன் மகளையும், அற வழியில் திருப்பிய மாதவிக்கு ஏன் சிலைவைப்பதில்லை?

 # கண்ணகி மாதவி இரண்டு பேருக்கும் வேறு யாருக்கானாலும் சிலை தேவையில்லை என்பது என் கட்சி.  தன்மகளை சந்யாசினி ஆக்கும் வேறு எந்த அன்னையை நாம் ஆதரிக்க முடியும்?  கற்பனா பாத்திரங்களுக்கு சிலை !!

& மாதவிக்கு சிலைதானே, வைத்துவிடுவோம். நிதி திரட்டுவோம். எல்லோரும் என் பெயருக்கு செக் அல்லது டிமாண்ட் டிராப்ட் அல்லது paytm - என்று ஏதாவது ஒரு வழியில் ஆளுக்கு ஆயிரம் ரூபாய் அனுப்புங்க. 

  (அடப்பாவி இந்த ஆளு யாருக்கு சிலை வெக்கப்போறான்!)

சில செலிபிரட்டிகளை பார்க்கும் பொழுது நமக்குத் தெரிந்த சிலர் நினைவுக்கு வருவார்கள். சம்பந்தப்பட்ட இருவருக்கும், உருவத்தில் எந்த ஒற்றுமையும் இருக்காது. உதாரணமாக நதியாவை திரையில் பார்க்கும் பொழுதெல்லாம் ஏஞ்சல் நினைவுக்கு வருவார். என்ன,காரணமாக இருக்கும்?

# நதியா (பலருக்கு) ஒரு ஏஞ்சல் என்பதால் இருக்கும்.

& நம்ம மைண்டு பலவகை உருவங்களையும், காட்சிகளையும் வார்த்தைகளையும் தினுசு தினுசா முடிச்சு போட்டு நினைவில் வைத்துக்கொள்ளும். இந்த அரிய வகை நினைவாற்றலுக்கு Similariyo Sync scenario recognitech என்று கூறுவார்கள். 

நதியாவைப் பார்க்கும்போது உங்கள் நினைவுக்கு ஏஞ்சல் வரக் காரணம், இதுதான் : 

நதியா படங்களில் பெரும்பாலும் வெள்ளை உடை அணிந்து வந்து ஆடிப்பாடுவார். (என் மாமன் கிட்ட மோதாதே - அவர் ராஜாதி ராஜனடா!) 
பாரதிராஜா படங்களில் காதல் காட்சிகளில் தந்தன தந்தன என்று பாடி ஆடும் தேவதைகள் வெள்ளை உடை அணிந்திருப்பார்கள். பள்ளிக்கூட நாட்களில் நம்  நண்பர்கள் நடித்த பாடல், நாடக காட்சிகளிலும் தேவதைகள் வெள்ளை frock அணிந்து, ஒரு ஈர்க்குச்சியில் சில்வர் ஸ்டார் ஒன்றை ஒட்டிவைத்துக்கொண்டு வந்து தலையை இடது பக்கமும் வலது பக்கமுமாக ஆட்டியபடி rhymes சொல்வார்கள். 

இந்தக் காரணங்களால், உங்களுக்கு 
நதியா -> வெள்ளை -> ஆடல், பாடல் -> தேவதை -> ஏஞ்சல் என்று ஞாபகம் வருது. 

முன்பெல்லாம் ஐந்து நாட்கள் நடக்கும் டெஸ்ட் மாட்ச்சில் நடுவில் ஒரு நாள் ப்ரேக் இருக்கும் என்பதை என் மகன் நம்ப மறுத்தான். அதே போல மெய்டன் ஓவர் என்று ஒரு விஷயம் உண்டு என்பதே இன்னும் கொஞ்ச நாட்களில் மறந்து விடுமோ?

 # அவசர, ஊதாரி யுகத்தில் பிரேக் விட இடமில்லை. மெய்டன் ஓவர் அவ்வளவு சீக்கிரம் காணாமல் போய் விடாது.

& கிரிக்கட்டைப் பார்த்து வளர்ந்த என் பையன், இதே போல எங்கள் ஊரில் நாங்க கிட்டிப்புள் என்று ஒரு ஆட்டம் ஆடுவோம் என்று சொன்னால் நம்ப மறுத்தான். என்னுடைய பேரன் star wars படம் பார்த்து கதையை சொல்லும்போது எனக்கு, அதற்கும் மகாபாரதப் போருக்கும் நிறைய ஒற்றுமைகள் இருப்பது போலத் தோன்றும். எல்லாம் காலம் செய்யும் மாயம். 

திரையிசைத் திலகம் கே.வி.மஹாதேவன், மெல்லிசை மன்னர் எம்.எஸ்.விஸ்வநாதன், இசைஞானி இளையராஜா, இசைப்புயல் ஏ.ஆர்.ரஹ்மான், தேனிசைத் தென்றல் தேவா இவர்களில் தங்கள் டைட்டிலை ஜஸ்டிஃபை செய்வது யார்?

# எனக்குத் தெரியாது.

& எல்லோருமே. அதிகம் ரசித்தவை முதல் இரண்டு பேர் இசை அமைத்தவை. 

ஏஞ்சல் :         

1.  நாம் நல்லவர் அனைத்திலும் சிறந்தவர் என்ற உணர்வு  உங்களுக்கு தோன்றியதுண்டா ? அது எப்ப உங்களுக்கு ஏற்பட்டது ?எனக்கு தோணினதே இல்லை அதான் கேட்டேன் :) ஒருவேளை யாருக்கும் அவங்களை பற்றி அபிப்பிராயம் இருக்காதோ ??

$ எனக்கும்தான்..நான் அவ்வளவு நல்லவனில்லையோ?

# தான் பெரிய புத்திசாலி என எல்லாருக்கும் தோன்றாது. ஆனால் தான் நல்ல மனிதர், தன் வாதம் நியாயமானது எனும் உணர்வு எல்லாரிடத்திலும் இருக்கும்.

& நான் நல்லவன், அனைத்திலும் சிறந்தவன் என்ற உணர்வு தோன்றுவதா! அது எப்பவுமே இருந்துகிட்டு இருக்கு. மறைந்தால்தானே திரும்பத் தோன்ற! 

2,  சொந்த கருத்தை வெளிப்படையா சொல்ல தயக்கம் வந்ததுண்டா ?

$ 98 சதவிகிதம் என்  சொந்தக் கருத்துகள் அபத்தம் வெளியிட தயக்கம் நிச்சயம். 

# நிறைய. இப்போதும்.

& தயக்கம் வந்ததே இல்லை. மற்றவர்களின் சொந்தக் கருத்தை தயங்காமல் சொல்லுவேன். சொல்லிவிட்டு, இது அவர்களுடைய சொந்தக் கருத்து என்பதையும் மறைக்காமல் சொல்லிவிடுவேன். மண்டகப்படி எல்லாம் அவர்களுக்கே போகட்டுமே! 

3,நேசிப்பது அல்லது வெறுப்பது இதில்  எது  சுலபம் மற்றும் எளிதில் உடனடியா வருவது ?

$ சுலபம் கஷ்டம் என்பது போல் விருப்பம் வெறுப்பும் இரண்டுமே...
இருங்க இருங்க.. எங்கேயோ மானும் மீனும் இரண்டும் இன்றி... என்று பாட்டு...

 # இரண்டுமே உடனடியான வெகு சுலபம்.

& இரண்டுமே இல்லாமல் இருப்பது கஷ்டம். ஆனால், விருப்பு / வெறுப்பு இல்லாமல் இருப்பதுதான் ஆனந்தம் என்று ஆன்றோர் கூறுகின்றனர். 

4, ஒருவர் ஒரு விஷயத்தையோ அல்லது நபரையோ  அதிகமா வெறுக்கிறாங்கன்னா அதன் காரணம் என்னவா இருக்கும் ?   கசப்பான அனுபவமா ? 

$ சூடு பட்ட பூனை?

# சினம் மற்றும் அவமான உணர்வு.

5, இதெல்லாம்  தேவையற்ற விஷயங்கள் என்று நீங்கள் கருதுபவை எவை ? 

 $ ஐயோ அதுக்கு ஒரு நாள் பதிவு போதாதுங்கோ.

# அரசியல் தலைகள் சினிமா தாரகைகள் வழிபாடு. 

   

6, யாராலாவது ஏமாற்றப்பட்டு அவரை மீண்டும் சந்தித்த அனுபவம் உண்டா ?

$ சாயம் போகாது என்று சத்தியம் செய்தவரையும் மற்றும் பலரையும்.

# (நல்ல வேளையாக) இல்லை.

& உண்டு. ஆனால் மீண்டும் சந்திக்கும்போது பழைய உணர்வுகளை மறந்துவிடுவேன். ஆனால் ஜாக்கிரதையாக பழகுவேன். 

7, இதுவரைக்கும் எத்தனை புத்தகங்களை வாசித்து முடிச்சிருக்கீங்க ?     எந்த புத்தகத்தையாவது இரண்டுமுறைக்கும் மேலே வாசித்ததுண்டா ?

$ படித்து சேர்த்து வைத்திருப்பது 3000 என்றால் மொத்தம் எத்தனை இருக்கும் என்று தெரியவில்லை. பல புத்தகங்களை 3 முறை கூட படித்ததுண்டு.

 # எண்ணிக்கை சொல்வது கடினம். உத்தேசமாக 3500~4000.
பல புத்தகங்கள் இரண்டு தடவைக்கும் மேலாக வாசித்ததுண்டு. இரண்டொன்று ஐந்தாறு முறை கூட. ஆரம்பித்து முடிக்காமல் சுமாராக 50.

& ஆயிரக்கணக்கில் இருக்கும். 1972 to 1978 காலகட்டத்தில் ஒரு நாளைக்கு ஒரு புத்தகம் என்று வாசித்திருக்கிறேன். 
சின்ன வயசுல வாய்ப்பாடுன்னு ஒரு புத்தகம். அதை பலமுறைகள் வாசித்தது உண்டு. ஆரல் மணீஸ் வாய்ப்பாடு புத்தகம். 

                

8, எல்லா ஜீவராசிகளைவிடவும் நமக்கே 6 ஆம் அறிவான பகுத்தறியும் திறன் இருந்தும் வீணாய்ப்போன மனிதன் அதை பெரும்பாலும் பயன்படுத்தாமல் வீணாக்குறானே என்ற சிந்தனை அடிக்கடி எனக்கு தோணுது இப்படி நீங்களும் யோசிச்சதுண்டா ?

 $ பகுத்தறிவு என்பது மனிதருக்கு மனிதர் வேறுபடும். மனிதராய்ப் பிறந்ததால் மட்டும் ஆராய்ந்து பார்க்கும் திறன் வந்துவிடுமா என்ன?

# மனுஷன் வீணாக்குறானே என்று தோன்றாது, நான் வீணாக்கிவிட்டேனே என்று தோன்றும்.
                      
9, சமூகத்தின் தலையாய பொறுப்பு குறிப்பா  நம் மக்களின்  சமூகக்கடமை எது ?

 $ நிலம் நீர் காற்று இவை மாசுபடுவதை நம்மால் இயன்ற  அளவு குறைத்தல். 

 # சட்டங்களை மதித்து வெறுப்பை நீக்கி பொறுப்பு உணர்வோடு நடந்து கொள்வது. 

& Prioritization of activity based on value. Value = Ratio of worthiness to the cost (of any product or service) 

              

10,  பல வெப்சைட்டுகளில் What is your reaction? ஹாப்பி ,லவ், கோபம், வருத்தம்.. இதை பார்த்திருப்பீங்க நிச்சயம் . இது உண்மையில் அவசியமானதொன்றா ?

$ அவர்களது சேவையின் தரத்தை உயர்த்திக் கொள்ள ஒரு வழி.

# நான் பார்த்ததில்லை. அந்த தளத்துக்கு உரியவர்கள் இவற்றில் ஒன்று மட்டும் சாத்தியம் என்று நினைக்கலாம். 

& Some way of getting customer feed back. It is an important step for achieving customer satisfaction through continuous improvement. 

வல்லி சிம்ஹன் :   1, கொரோனா வைரஸ் பற்றியது.
நம் ஊரில் எந்த அளவில் நடவடிக்கைகளூம் பயங்களும்
இருப்பதாக நினைக்கிறீர்கள்.?

 $ எதிர்க்கட்சி தலைவர் என்ன செய்தீர்கள் என்று கேட்காத அளவுக்கு.

# பயம் இப்போது தான் தலை தூக்குகிறது. நடவடிக்கைகள் சரியாக இருப்பதாகவே தோன்றுகிறது.

& பயம் எல்லோருக்கும் இருக்கு. நடவடிக்கைகள் பற்றி சரியாகத் தெரியவில்லை. 
     
===========================================

4, 13, 22, 31 தேதிகளில் பிறந்தவர்களைப் பற்றி நல்லதா நாலு வரிகள் சொல்லிவிட்டு, அப்புறம் வாயை மூடிக்கொள்வது நலம் என்று நினைக்கிறேன். காரணம் அப்புறமா கடைசி வரியில் சொல்றேன். 

நான்காம் எண் கூட்டுத்தொகை வரும் நாட்களில் பிறந்தவர்கள், தனித்தன்மை வாய்ந்தவர்கள். எல்லா விஷயங்களையும் எதிர் கோணத்தில் பார்த்து, அலசி ஆய்வு செய்வார்கள். இவரை அறியாமலேயே இவரை வெறுக்கும் எதிரிகள் இருப்பார்கள். ஆனால், அவர்களால் இவரை ஒன்றும் செய்ய இயலாது! 

சட்ட திட்டம், கட்டுப்பாடு இதெல்லாம் இவர்களுக்குப் பிடிக்காது. எல்லாவற்றையும் ஏன், எதற்கு என்று கேள்வி கேட்பார்கள். 

1, 2, 7, 8 எண்காரர்களுடன் நட்பாக இருப்பார்கள். ஆனால் மிகவும் குறைந்த எண்ணிக்கையில்தான் நண்பர்கள் இவர்களின் நட்புப் பட்டியலில் இருப்பார்கள். 

எதிராளியின் ஏதேனும் ஒரு வார்த்தையில் அல்லது ஒரு சிறிய செயலில் சுலபமாக மனம் காயம் பட்டு, ஒதுங்கிப்போய்விடுவார்கள். 

நாலாம் எண்காரர்கள் :

ஜார்ஜ் வாஷிங்டன், பைரன், மைக்கேல் ஃபாரடே, ஆர்தர் கானண்டாய்ல் (ஷெர்லாக் ஹோம்ஸ் காரெக்டரைப் படைத்தவர்), ஐசக் பிட்மன் (சுருக்கெழுத்து).

நம்ம ஊருல என்று தேடினால், 
சட்டென்று என் ஞாபகத்திற்கு வருபவர்கள் தியாகராஜரும், (Saint Tyagaraja) திரிஷாவும்தான். ( தியாகராஜர், திரிஷா, என் மருமகள் எல்லோரும் மே நான்காம் தேதி பிறந்தவர்கள்.) 

என் திருமதியும், நான்காம் எண்காரர்.  

===============================================

மீண்டும் சந்திப்போம். 

===============================================