"திங்க"க்கிழமை : அப்பம் - அதிரா ரெஸிப்பி

பால் அப்பம்/பால் பான்கேக்

இப்போ பெயரோ முக்கியம்?:), ஹா ஹா ஹா மட்டருக்கு வருவோம்:).

இது ஒரு வித்தியாசமான முயற்சி. அப்பம் எனில் அதுவும் உள்ளே பால் விட்டுச் சுடுவது வீட்டில் எல்லோருக்கும் பிடிக்கும் என்பதால், எந்த வகையாயினும் பயப்பிடாமல் முயற்சி செய்வேன்.

இதற்கு, நல்ல வெள்ளையாக, குண்டாக இருக்கும் பச்சை அரிசியில் இரண்டு கப்பும், அதே கப்பால இரண்டு கப், உடன் திருவிய தேங்காய்ப்பூவும் எடுக்கோணும்.

முதலில் அரிசியை 7-8 மணி நேரம் ஊறவைக்கவும்.

ஊறிய பின்னர், தண்ணி பெரிதாக சேர்க்காமல் நன்கு அரைக்கவும், அரைக்கும்போது ஒரு கட்டத்தில் இப்படி குட்டிக் குருணல்போல வருமெல்லோ, அப்போ இரு மேசைக்கரண்டிகளை எடுத்து ஒரு பானில் வைத்துப் போட்டு, மிகுதிக்குள், அந்த தேங்காய்ப்பூவைப் போட்டு நன்கு மெத்தோ மெத்தென:) அரைச்செடுக்கவும்.

அந்த இரு மேசக்கரண்டிக்கும், அதே கப்பை எறிஞ்சிடாமல் தேடி எடுத்து, முக்கால் கப் தண்ணி சேர்த்து, மெல்லிய நெருப்பில் கஞ்சிபோல காய்ச்சவும்..

இப்படி பதம் வந்ததும், அடுப்பால் இறக்கி ஆறவிடவும், ஆகவும் கட்டிபோல ஆக்கிட வேண்டாம். ஆறியதும், அந்த அரிசி அரைச்ச பிளெண்டர் கப்பைக் கழுவி, இதனுள் ஊத்தி, நன்கு கரைச்சு கூழாக்கி, கட்டியில்லாமல் ஆனதும், இதனையும் அப்ப மாவில் ஊற்றி புளிக்க வைக்கவும். சோடா வகையோ, உப்போ எதுவும் தேவையில்லை.

உங்கள் ஊர் வெப்ப நிலைக்கேற்ப பொயிங்கி:) வந்ததும்[எங்களுக்கு ஓவர் நைட் அல்லது ஒரு நாள் தேவைப்படும் பொங்க].. உப்பைச் சேர்க்கவும்.

மாப் பொயிங்கிட்டுதோ, இப்போ ரெடியாகுங்கோ அப்பம் சுட:), அதுற்குள் ஒரு குறும்படம் பார்த்திட்டு வந்திடலாம்:)..

😸😸😸😸😸😸இதோ குறும்படம்:)😸😸😸😸😸😸

இது என்ன தெரியுதுதானே.. பிரசெல்ஸ் ஸ்பிறவுட்ஸ் Brussels Sprouts

{ எங்கே இதை ஸ்பீட்டாக றிப்பீட்டில சொல்லுங்கோ பார்ப்போம்:)) 

ஜத்தமாக ஹா ஹா ஹா}

இது இங்கு எப்பவும் கிடைக்கும், எங்களுக்கு நல்ல விருப்பம், வீட்டில் அனைவரும் சாப்பிடுவார்கள். ஆனா இதில் கறி வகைகள் செய்தால் பெரிதாக சுவை வருவதில்லை, அதனால இப்படித்தான் செய்வேன், சும்மாவே சாப்பிடலாம்.

கிறிஸ்மஸ் க்கு இங்கு ட்ரடிஷனலாக சமைப்பார்கள், ரேக்கியுடன், அதனால இப்போ நிறையக் குமிச்சு, பயங்கர மலிவும். இது என்ன விலைக்கு வாங்கினோம் தெரியுமோ.. அரைக் கிலோ பக்கட்- வெறும் 15 பென்ஸ்சுகளே, மனம் கேட்காமல் 4,5 பக்கட்டுக்கள் வாங்கி விட்டேன். அப்படித்தான் இப்போ கரட்டும் -ஒரு கிலோ- 15 பென்ஸ்கள்[கிறிஸ்மஸ் நியூ இயருக்காக].

நம்பரைப் பாருங்கோ.

1].கழுவிப்போட்டு, மூள் பகுதியை மட்டும் கட் பண்ணி எறிஞ்சுபோட்டு, பாதியாக மட்டும் வெட்டிக் கொள்ளோணும். கொஞ்சமாக தண்ணி சேர்த்து[அரைக் கப் போதும்] 2 மேசைக்கரண்டி எண்ணெயும் சேர்த்து உப்புப் போட்டு மூடி அவிய விடவும். கன நேரம் தேவையில்லை ஒரு கொதியில் அவிந்து விடும்.

2]. அவிந்ததும், அதனுள் கறிப்பவுடர் சேர்த்து[கொஞ்சம் அதிகமாக சேர்க்கவும்] ...

3]மூடாமல், ஸ்லோ ஃபயரில பிரட்டி பிரட்டி எடுக்கவும். தண்ணியில்லாமல் வற்றியதும் இறக்கி, கொஞ்சம் தேசிக்காய் சேர்த்து சும்மா சாப்பிடலாம்.

😸😸😸😸😸😸😸😸😸😸😸😸😸😸😸😸😸😸

என்ன அப்பம் இன்னும் ரெடியாகவில்லையோ?:))

இதற்கு இன்னொரு விளக்கமும் தரோணும், மாவைப் புளிக்க வைக்கும்போதே, அளவுக்கு தண்ணி சேர்த்திடுங்கோ, பின்னர் புளிச்சபின் தண்ணி சேர்க்கக்கூடாது, அப்படியே சூட் பண்ணிடோணும்:)).

அந்த மாவில், கொஞ்சம் சீனி [சுகர்] சேர்த்து.. இப்படி தோசைக் கல்லியோ அல்லது தட்டைப் பானிலோ.. ஒரு கரண்டி எடுத்து ஊத்தி விடவும், தடவக்கூடாது, அப்படியே பான்கேக் போல ஊத்திப்போட்டு கையை எடுத்திடோணும், இல்லை எனில் அழுந்துப்பட்டால், துவாரம் வராது.

இன்னொரு விதமாக, அப்பச் சட்டியில் ஊற்றி, இப்படி உள்ளே பால் ஊற்றி அதனுள் சீனியும் சேர்த்து மூடி, அப்பம் போல அவித்தெடுக்கலாம், விரும்புவோர், முட்டையும் ஊற்றி எடுக்கலாம், நான் ஒண்ணும் வாணாம் ஜொல்லலியே:).

தட்டை அப்பம் பஞ்சுபோல மென்மையாக வந்துது, நல்ல உறைப்பு சட்னி சூப்பர். சட்டியில் சுட்ட அப்பம், மொறுமொறுப்பாக வராமல், சோர்ந்து வந்தது. அதனால இந்த முறைப்படி என் வாக்குகள் தட்டை அப்பத்துக்கே:).

🙏🙏🙏🙏🙏🙏