வெள்ளி வீடியோ : கண்ணா என்றாள் முருகன் வந்தான்; முருகா என்றாள் கண்ணன் வந்தான்

 வெளிவந்த ஆண்டு : 1977  44 ஆண்டுகளுக்கு முன்னர் வந்த படம்!

கமல் ரஜினி இணைந்து நடித்த படங்களில் ஒன்று.  ரஜினி ஸ்டைல் வில்லன்!  பாலச்சந்தர் படம்.  அவர்கள் திரைப்படம்.

படம் வெற்றிபெறாவிடினும் சுஜாதாவுக்கு சிறந்த நடிகைக்கான பிலிம்பேர் அவார்ட் கிடைத்தது.

கமலஹாசன் இந்தப் படத்துக்காக வென்ட்ரிலாகிசம் பயின்றார்.  அதோடு ரகுராம் மாஸ்டரோடு இணைந்து நடனத்தையும் வடிவமைத்திருக்கிறார் என்கிறது விக்கி.  தனக்கு காட்சிகள் இல்லாதபோது கமல் நடிப்பதைக் கூர்ந்து கவனித்துத் தன் நடிப்பை மேம்படுத்திக் கொள்வாராம் ரஜினி.  இதையு விக்கிதான் சொல்கிறது!  ஆனால் கமலை விட ரஜினி இந்தப் படத்தில் திறம்பட செய்திருப்பதாகத்தான் தோன்றும்.  அவருக்கு அமைந்த கேரக்டர் அப்படி.

பானு அக்கா இந்தப் படத்திலிருந்து "காற்றுக்கென்ன வேலி" பாடலை நேயர் விருப்பமாகக் கேட்டிருக்கிறார்.  பெண்குரலில், அதுவும் எஸ் ஜானகி குரலில் இதே படத்தில் என் முதல்  தெரிவு "இப்படியோர் தாலாட்டு பாடவா" பாடலாக இருக்கும்.  எம் எஸ் விஸ்வநாதன் குழலிசையில் விளையாடி இருப்பார்.

கண்ணதாசன் பாடல்களுக்கு எம் எஸ் விஸ்வநாதன் இசை.

பாலச்சந்தர் படங்கள் என்றாலே பாடல்கள் கொஞ்சம் ஸ்பெஷல்தான்.

சென்றவாரப் பாடல் பகிர்வில் ஜீவி ஸார் பாடல் வரிகளிலேயே கதையைப் பிழிந்து கொடுப்பதில் கண்ணதாசனைப் புகழ்ந்திருந்தார்.  இதோ ஒரு உதாரணம்.

முதலில் பானு அக்காவின் விருப்பமாக காற்றுக்கென்னவேலி பாடல்.. இந்தப் பாடல் பாலநந்தினி ராகத்தில் அமைக்கப்பட்ட பாடலாம்.  இந்த ராகத்தின் பெயரை இப்போதுதான் நான் முதன்முதலாகக் கேள்விப்படுகிறேன்.  பெண் தான் எப்படி சுதந்திரமாகத் துள்ளித்திரிய வேண்டும் என்று கற்பனை செய்து பாடும் பாடல்.  எல்லோருக்கும் இந்த கற்பனை, ஆசை இருக்கும்.  திருமணம்தான்  போடுகிறது - பெரும்பாலும்.

காற்றுக்கென்ன வேலி...  

கடலுக்கென்ன மூடி 

கங்கைவெள்ளம் சங்குக்குள்ளே அடங்கி விடாது 

மங்கை நெஞ்சம் பொங்கும் போது விலங்குகள் ஏது

நான் வானிலே மேகமாய் பாடுவேன்  பாடல் ஒன்று 

நான் பூமியில் தோகை போல் ஆடுவேன் ஆடல் ஒன்று 

நான் வானிலே மேகமாய் பாடுவேன் பாடல் ஒன்று 

நான் பூமியில் தோகை போல் ஆடுவேன் ஆடல் ஒன்று 

கன்றுக்குட்டி துள்ளும் போது காலில் என்ன கட்டுப்பாடு 

காலம் என்னை வாழ்த்தும்போது ஆசைக்கென்ன தட்டுப்பாடு

தேர் கொண்டுவா தென்றலே  இன்று நான் என்னைக் கண்டேன் 

சீர் கொண்டுவா சொந்தமே இன்று தான் பெண்மை கொண்டேன் 

பிள்ளை பெற்றும் பிள்ளை ஆனேன் பேசி பேசி கிள்ளை ஆனேன் 

கோவில் விட்டு கோவில் போனேன் குற்றம் என்ன ஏற்றுக்கொள்வேன்

அடுத்ததாக இப்படி ஓர் தாலாட்டுப் பாடவா பாடல்...  குழந்தைக்கு தாலாட்டு பாடுவது போலவே பழைய காதலனுக்கு தன் நிலையைக் கூறும் பாடல்.  முதலில் உள்ள வரிகளைக் கேட்கவேண்டும் என்றால் மேலே இபப்டி ஓர் வரியில் உள்ள லிங்க் க்ளிக் செய்து அந்த இடத்தில பாடலைக் கேட்கவேண்டும்!  கடைசி சரணத்துக்கு முன் வருகிறது குழல் ஒலி.  மீண்டும் பாடலின் இறுதியில் வந்து சுகமாகத் தாலாட்டுகிறது.

கங்கையிலே நீர் பெருகி 

வயல்கள் எல்லாம் விளைந்து 

பொய்கையிலே தாமரைப்பூ பூத்ததம்மா 

கைநிறைந்த பூக்கள் என மதிநிறைந்த விழிதிறந்து 

கோகுலத்தில் ஒரு குழந்தை பிறந்ததம்மா 

இப்படி ஓர் தாலாட்டு பாடவா 

அதில் அப்படியே என் கதையை கூறவா 

அதில் அப்படியே என் கதையை கூறவா  

கை பிடித்த நாயகனும் காவியத்து நாயகனும் 

கை பிடித்த நாயகனும் காவியத்து நாயகனும் 

எப்படியோ வேறு பட்டார் என் மடியில் நீ விழுந்தாய் 

என் மடியில் நீ விழுந்தாய்

நீல வானம் கோபம் கொண்டா நிலவு தேய்ந்தது 

கண்ணா நேரம் பார்த்து மறுபடியும் ஏன் வளர்ந்தது 

இடையினிலே இந்நிலவு எங்கிருந்தது 

அது இருண்டிருந்த வீட்டினிலே தங்கி வந்தது

அன்றொரு நாள் மீராவும் கண்ணனை நினைந்தாள் 

ஏனோ அவளுடைய தலையெழுத்து மன்னனை மணந்தாள்

அது வரைதான் தன் கதையை என்னிடம் சொன்னாள் 

நான் அதில் இருக்கும் என் கதையை உன்னிடம் சொன்னேன்

கண்ணன் அவன் கையினிலே குழல் இருந்தது 

அந்த கானம்தானே மீராவை கவர்ந்து வந்தது 

இன்று வரை அந்த குழல் பாடுகின்றது 

அந்த இன்னிசையில் என் குழந்தை தூங்குகின்றது 

இப்போது என் தெரிவாக ஒரு பாடல்.  முந்தைய  தெரிவும் என் தெரிவுதான்!  இது எஸ் பி பி குரலில் வரும் அற்புதமான பாடல்.  இது என் வெள்ளி லிஸ்ட்டில் ஏற்கெனவே இருந்த பாடல்.  இன்று பானு அக்கா இந்தப் படப்பாடலை நேயர் விருப்பமாகக் கேட்டதும் இந்த இருபாடல்களையும், குறிப்பாக இந்தப் பாடலையும் சேர்த்தே பகிர்கிறேன்.  எம் எஸ் வி இந்தப் பாடலை பதினைந்து நிமிடங்களில் அமைத்தாராம்.  இந்தப் பாடல் தீரசங்கராபரணம் ராகத்தில் அமைந்த பாடலாம்.

கணவனிடமிருந்து பிரிந்து வந்திருக்கும் பெண்.  வந்த இடத்தில் அந்தத் அலுவலகத்தில் வேலைபார்க்கும் நல்லவன் ஒருவன் அவளை விரும்புகிறான்.  அவன் பார்த்து குடிவைக்கும் வீட்டுக்குப் பக்கத்து வீட்டில் பழைய காதலன்!  

திடீரென இந்த அலுவலகத்துக்கு மேலதிகாரியாய் பழைய கணவனே வந்து விடுகிறான்.  என்ன சொல்ல அனுவின் நிலையை!   

ஒரு சமயம்அவளுக்கு உடல்நிலை சரி இல்லை என்றதும் மூவரும் பரபரக்கிறார்கள்.  "கண்ணா என்றால் முருகன் வந்தான்...   முருகா என்றால் கண்ணன் வந்தான்...   எந்த தெய்வம் சொந்தம் என்று பூவை பூஜை செய்வாள்."  இந்நிலையை கண்ணதாசன் இப்படி விளக்குகிறார்.

அங்கும் இங்கும் பாதை உண்டு இன்று நீ எந்தப் பக்கம் 

அங்கும் இங்கும் பாதை உண்டு இன்று நீ எந்தப் பக்கம் 

ஞாயிறுண்டு திங்கள் உண்டு எந்த நாள் உந்தன் நாளோ

கல்லைக் கண்டாள் கனியைக் கண்டாள் 

கல்லும் இன்று மெல்ல மெல்ல கனியும் மென்மை கண்டாள்  

கல்லைக் கண்டாள் கனியைக் கண்டாள் 

கல்லும் இன்று மெல்ல மெல்ல கனியும் மென்மை கண்டாள் 

கதை எழுதி பழகி விட்டாள் முடிக்க மட்டும் தெரியவில்லை 

அங்கும் இங்கும் பாதை  உண்டு இன்று நீ எந்தப் பக்கம்

கண்ணா என்றாள் முருகன் வந்தான்

முருகா என்றாள் கண்ணன் வந்தான்

எந்த தெய்வம் சொந்தம் என்று பூவை பூஜை செய்வாள்

அவள் எழுதும் கவிதைகளை விதி புகுந்தே திருத்துதம்மா

அவள் எழுதும் கவிதைகளை விதி புகுந்தே திருத்துதம்மா

சொந்தம் ஒன்று பந்தம் ஒன்று 

வெள்ளை உள்ள பிள்ளை ஒன்று

நடுவில் ஊஞ்சல் ஒன்று

தொடர்கதையோ பழங்கதையோ

விடுகதையோ எது இன்று