சென்னையை ஏன் நிறைய பேர் வெறுக்கிறார்கள்?

 

அப்பாதுரை : 

சென்னையை ஏன் நிறைய பேர் வெறுக்கிறார்கள்?

$ தன்னைப்போல் பிறரையும் நினைக்கிறார்களோ?

# காரணம் சொல்லிவிட்டு வெறுக்குமாறு கேட்டுக் கொள்வோமா ?

& 'சென்னையை வெறுக்கிறேன்' என்று யாருங்க உங்க கிட்ட வந்து சொன்னாங்க? நாகையில் நாங்க  வாழ்ந்த காலங்களில் எல்லாம் சென்னை (அந்தக் காலத்தில் மெட்ராஸ்) என்றால், ஸ்வர்க்கபுரி, இன்பலோகம், பல பொழுதுபோக்குகள் நிறைந்த  சுவாரஸ்யமான ஊர் - என்று நினைப்போம். சென்னையை விட்டு பெங்களூர் வந்த பிறகு, சில விஷயங்களில் சென்னையை விட பெங்களூர் மேல் என்று தோன்றுகிறது. சங்கீத சீசன், கிரிக்கட் சீசன் போன்ற சமயங்களில் சென்னைக்கு ஈடு இணை, இன்றும் உலகில் எங்கும் கிடையாது. 

நெல்லைத் தமிழன்: 

1. எனக்குப் பிடித்து எல்லோருக்கும் பிடிக்கணும் என மனித மனம் ஏன் எதிர்பார்க்கிறது? அப்படிப் பிடிக்கவில்லையானால், ஏன் குறை கூற விழைகிறது,

# ஐயோ இவ்வளவு நல்ல விஷயத்தை இப்படி மிஸ் பண்றாங்களே என்ற நல்லெண்ணம் அல்லது இதைக்கூட ரசிக்காத ஜடமாக இருக்காங்களே என்ற பச்சாத்தாபம் காரணமாக இருக்கலாம்.  ஒத்துப் போகாதவரை எல்லாரும் குறை கூற மாட்டார்கள். 

2. சுவர்க்கம், நரகம் என்பதற்கு விளக்கம், உங்கள் பார்வையில்?

 # மன மகிழ்ச்சி மன நிறைவு சுவர்க்கம் ஏமாற்றம் எரிச்சல் பொறாமை நரகம்.

& ஒரு ஜென் கதை : 

இராணுவ வீரன் நோபுஷிகே, தனக்கு இருக்கும் சந்தேகத்தை தீர்க்க, ஹகுயன் என்ற குருவை சந்தித்தான். அந்த குருவை சந்தித்து அந்த வீரன், "உண்மையில் சொர்க்கம், நரகம் என்று உள்ளதா?" என்று கேட்டான்.

அதற்கு அந்த குரு "நீ யார்?" என்று வீரனிடம் கேட்டார். அதற்கு "நான் ஒரு இராணுவ வீரன்" என்று கூறினான்.

நீ ஒரு ராணுவ வீரனா! என்று ஆச்சரியத்துடன் அந்த குரு "எந்த ஆட்சியாளர் உன்னை ஒரு பாதுகாப்பு வீரனாக தேர்ந்தெடுத்தது? உன் முகத்தில் ஒரு பிச்சைக்காரன் அம்சம் தெரிகிறது!" என்று அவனைப் பார்த்து கூறினார்.

அதனைக் கேட்டதும் கோபம் கொண்ட அவன், கோபம் தாங்காமல் தனது வாளை எடுத்தான். அதைப் பார்த்த அந்த குரு "ஓ! உன்னிடம் வாள் இருக்கிறதா? இருப்பினும் அந்த வாள் மிகவும் மந்தமாக காணப்படுகிறது. அது என் தலையை துண்டிக்காது" என்று கேலியாக கூறினார்.

இதை கேட்ட வீரனுக்கு, மிகுந்த கோபம் ஏற்பட்டு வாளை எடுத்து வீச முற்பட்டான். அப்போது குரு அவனிடம், "இங்கு தான் நரகத்தின் கதவுகள் திறந்தன!" என்று கூறினார்.

குருவின் வார்த்தைகளைக் கேட்டு வீரன் சற்று சாந்தம் கொண்டு, அவனுடைய ஒழுக்கத்தை அறிந்து மீண்டும் தனது வாளை உறையில் வைத்தான். இப்போது குரு "இங்கு தான் சொர்க்கத்தின் கதவுகள் திறந்தன" என்று கூறினார்.

பின் அந்த வீரன், "கோபம் உள்ள இடத்தில் நரகமும், குணம் உள்ள இடத்தில் சொர்க்கமும் உள்ளன" என்பதைப் புரிந்து குருவின் முன் தலை குனிந்து நின்றான்.

3. நம் இரத்த சொந்தங்களால் வெறுக்கப்படுவதைவிட நரகம் கஷ்டமாக இருக்குமா? எல்லோராலும் விரும்பப்படுவதைவிட சுவர்க்கம் நன்றாக இருந்துவிட முடியுமா?

# நிச்சயம் சாத்தியம்தான்.  மற்றவரால் விரும்பப் படுவதோ அல்லது வெறுக்கப் படுவதோ மட்டுமே லட்சியமாக இருக்க முடியாது. 

4. 50 ரூபாய் கொடுத்தால் ஒரு கட்டு கீரை, 1கிலோ வெண்டை, 1/2 கிலோ கத்தரி (மூன்றும் சேர்த்து) வாங்கிவிட முடியும்போது, மனித மனம், ஏன் 300 ரூபாயும், உழைப்பும் சேர்த்து இதில் பாதியை அறுவடையாக வீட்டுத் தோட்டத்தில் அறுவடை செய்து மகிழ எண்ணுகிறது?

# அதுதான் படைப்பாளியின் உயர்நிலை திருப்தியும் ஆனந்தமும். 

& வீட்டுத் தோட்டம் அமைப்பதால் ஏற்படும் நன்மைகளை, இங்கே சென்று விவரமாகத் தெரிந்துகொள்ளுங்கள். 

5. எழுதி எழுதி (வடுவூர் துரைசாமி ஐயங்கார். திஜர..... சாரு நிவேதிதா வரை....) எழுத்தாளர்கள் சாதித்தது என்ன?

# எழுதிப் பணம் குவித்தோர் உண்டு.  எழுத்தினால் பரவலாகப் புகழ் பெற்றவர்களும் உண்டு.  பேசப்பட்டவர்களும் உண்டு.  இதெல்லாமே சாதனைதானே.

 = = = =

சென்ற வாரம் நாங்கள் கேட்ட கேள்விகளுக்கு வந்த பதில்களும், வெளியிடப்பட்ட படங்களுக்கு வந்த கருத்துகளும், மின்நிலா 67 இதழில், 25 ஆம் பக்கத்திலிருந்து, 31 ஆம் பக்கம் வரையிலும் பிரசுரித்துள்ளோம்.

மின்நிலா 67 இதழின் சுட்டி >>>> இதோ இங்கே <<<<< 

= = = = = =

 எங்கள் கேள்விகள் : 

1) ஒரு குறிப்பிட்ட பொருளை - (குறிப்பிட்ட brand name கொண்ட ஒரு பொருளை)  வாங்க ஒரு கடைக்கு செல்கிறீர்கள். அந்தக் கடையில், அந்த brand name கொண்ட பொருள் இல்லை. ஆனால் அதே பொருள் வேறு brand name உள்ளது. அதை வாங்குவீர்களா அல்லது, நீங்கள் விரும்பும் brand name கொண்ட பொருளை வேறு ஒரு கடைக்கு சென்று வாங்கிக்கொள்வீர்களா? 

2) உங்கள் பூஜை அறை விளக்கில், என்ன எண்ணெய் உபயோகிக்கிறீர்கள்? 

3) முக்கணிகளில் உங்களுக்குப் பிடித்த கனி எது? ஏன்?

= = = = 

படம் பார்த்துக் கருத்து எழுதுங்க : 

1) 

2) 

3)  

= = = = =