நான் தரிசனம் செய்த கோயில்கள் – மனைவியுடன் யாத்திரை – பகுதி 01 (திருநீர்மலை) நெல்லைத்தமிழன்

 

முகவுரை: 

நான் பெரும்பாலும் திருவல்லிக்கேணியைச் சேர்ந்த அத்யாபகருடன் யாத்திரை செல்வேன். அப்படி அவருடன் ஒரு சில திவ்யதேசக் கோவில்கள் தவிர மற்ற எல்லாவற்றையும் தரிசனம் செய்திருக்கிறேன். அவற்றில் நிறைய கோவில்களை ஒரு தடவைக்கு மேல் தரிசனம் செய்திருக்கிறேன். அவருடன் செல்லாத கோவில்களை நாங்கள் தனியே சென்று தரிசனம் செய்திருக்கிறோம். வைணவ திவ்யதேசக் கோவில்களில் 106 கோவில்களை இந்த நிலவுலகில் தரிசிக்கலாம். அவற்றில் ஒரே ஒரு கோவில் திருநீர்மலை. நாங்கள் நினைத்த போதெல்லாம் செல்ல முடியாமல் தடங்கல்கள் ஏற்பட்டிருந்தன. நாங்கள் பெங்களூரில் இருப்பதால், அவருடைய ஒரு நாள் யாத்திரையில் அமையும் அப்படிப்பட்ட கோவில்களைத் தரிசனம் செய்ய வாய்ப்பில்லாமல் இருந்தது.  குரோம்பேட்டையில் தங்கியிருந்தபோதும் எங்களால் திருநீர்மலை பெருமாளை தரிசனம் செய்யும் வேளை வந்திருக்கவில்லை.

இப்படி இருக்கும்போது, என் பெண்ணுடைய திருமணப் பத்திரிகையை உறவினர்களைச் சந்தித்துக் கொடுப்பதற்காக காரை ஏற்பாடு செய்திருந்தோம். என் மனைவியின் உறவினர் ஒருவர் அடையாறில் இருக்கிறார். அவர் வீட்டிற்கு காலை 9 ½ மணிக்குப் பத்திரிகை கொடுக்கச் சென்றிருந்தபோது, அவருடைய கணவர், திருநீர்மலை இன்னும் நாங்கள் தரிசனம் செய்யவில்லை என்பதை அறிந்து, நீங்கள் அருகிலிருக்கும் இன்னொரு உறவினர் வீட்டில் பத்திரிகை கொடுத்துவிட்டு நேரே கோவில் சென்றுவிடலாமே. மதியம் 12 மணிக்குத்தான் நடை சாத்துவார்கள் என்றார். அவர் சொன்னது இறைவன் அழைப்பதாக என் மனதிற்குத் தோன்றியது. உடனே திட்டத்தை மாற்றிக்கொண்டு, 10 ½ மணிக்கெல்லாம் அடையாறிலிருந்து புறப்பட்டு திருநீர்மலை சென்றோம்.

நான் எழுத நினைத்து ஆரம்பித்தது, ஜூலை மாதம் நாங்கள் சென்றிருந்த நாலைந்து கோவில்கள் பற்றி. ஆனால் திருநீர்மலை கோவிலை இந்தச் சந்தர்ப்பத்தை விட்டால் எழுத வாய்ப்பு கிடைக்காதோ என்றெண்ணி இந்த வாரம் எழுதுகிறேன்.

திருநீர்மலை, பல்லாவரத்திலிருந்து சுமார் 6 கிமீ தூரத்தில் இருக்கிறது. இங்கு சுமார் 200 அடி உயரமுடைய சிறிய மலை இருக்கிறது. மலையின் அடிவாரத்தில் ஒரு கோவிலும், மலை மீது ஒரு கோவிலும் உண்டு.  அடிவாரத்தில் உள்ள கோவிலில் நீலமுகில் வண்ணன் நின்றதிருக்கோலத்தில் கிழக்கு நோக்கி சேவை சாதிக்கிறார். தாயாரின் திருநாமம் அணிமாமலர் மங்கை (ஜீவி சார்… நம் திருக்கோவில்களில் பெருமாள், தாயார், ஏன் பல்வேறு சைவ சமயக் கோவில்களிலும் சிவன்/பார்வதி திருநாமங்கள் மனத்தைக் கொள்ளைகொள்ளும் தமிழில் அமைந்துள்ளதைக் கண்டிருக்கிறீர்களா?). தாயார் தனிக்கோவிலில் சேவைசாதிக்கிறார்.

மலை மீது இருக்கும் கோவிலில் மூன்று சன்னிதிகள் இருக்கின்றன.  வீற்றிருந்த திருக்கோலத்தில் சாந்த நரசிம்ஹரும், மாணிக்க சயனத்தில் ரங்கநாதரும், நடந்த திருக்கோலமாக திரிவிக்ரமனும் சேவைசாதிக்கின்றனர்.

திருமங்கையாழ்வார் இந்தத் தலத்தைப் பாடும்போது, (2ம் பத்து, 4ம் திருமொழி), நின்றான் இருந்தான் கிடந்தான் நடந்தாற்கு இடம் மாமலையாவது நீர்மலையே என்று பாடியிருக்கிறார்.  திருமங்கையாழ்வார் இந்தத் தலத்தை தரிசிக்க வந்தபோது, மலையைச் சுற்றிலும் நீர் நிறைந்திருந்தது. அவரால் நீரைத் தாண்டிச் சென்று சுவாமியைத் தரிசிக்க இயலவில்லை. கோவில் எதிரிலுள்ள மற்றொரு மலையில் ஆறு மாதங்கள் தங்கி, நீர் வடிந்த பிறகு பெருமாளை தரிசித்தார் என்பது வரலாறு. நான்கு நிலைகளில் பெருமாள் காட்சி தருவதால், இங்கு இறைவனை வழிபட்டால், நான்கு திவ்யதேசங்களான நாச்சியார்கோவில், திருவாலி, திருக்குடந்தை மற்றும் திருக்கோவிலூரை வழிபட்ட பலன்களை அடைவார்கள் என்று சொல்லப்படுகிறது.

முதலில் கீழே இருக்கும் நீர்வண்ணப் பெருமாள் கோவிலுக்குச் சென்றோம். அவர்களோ, மலைக் கோவிலை 12 மணிக்கு நடை சார்த்திவிடுவார்கள், அதனால் அங்கு முதலில் தரிசனம் செய்துவிட்டு வாருங்கள் என்றனர். நிறைய படிகள் இருக்குமே என்று முதலில் தயக்கம் இருந்தது (நேரத்துக்குள் கோவிலை அடையவேண்டுமே).

திருநீர்மலையை அடையப்போகிறோம்.

திருநீர்மலை நீர்வண்ணப் பெருமாள் கோவில் ராஜகோபுரம்  (நேரே தெரிவது இராமர் சந்நிதி)

மலைக்கோவிலுக்குச் (ரங்கநாதர் கோவில்) செல்லும் பாதை

கொஞ்சம் படிகள் ஏறியதுமே, வலப்புறத்தில் ஒரு சிறிய பாதையில் சென்றால் ஆஞ்சநேயர் கோவில் இருக்கிறது.

ஒரு வழியாக மலைக்கோவிலுக்கு வந்து சேர்ந்துவிட்டோம்.

மலைக்கோவிலை அடைவதற்குச் சிறிது முன் ஒரு மண்டபம் உள்ளது.

இந்த மண்டபம் கல்கி மண்டபம் என்று அழைக்கப்படுகிறது. இதனை கல்கி சதாசிவம் தம்பதியினர் ஏற்படுத்தித் தந்திருக்கிறார்கள்.

மலைக்கோவில் நுழைவாயில். த்வஜஸ்தம்பம் தெரிகிறதா?

மலைக்கோவிலின் ராஜகோபுரமும் த்வஜஸ்தம்பமும். 

இந்தக் கோவிலில் நுழைந்தவுடன் பிரதான மூலவர் சன்னிதிக்குச் செல்கிறோம். அங்கு இறைவன் கிடந்த கோலத்தில் ரங்கநாதராக சேவை சாதிக்கிறார்.

இணையத்திலிருந்து – திருநீர்மலை ரங்கநாதர்

தாயார் சன்னிதி

பிறகு பிரகாரத்தைச் சுற்றிவரும்போது, நடந்த கோலமாக உலகளந்தானாகவும், இருந்த கோலமாக சாந்த நரசிம்மராகவும் காட்சியளிக்கும் பெருமாளை இரண்டு சன்னிதிகளில் தரிசனம் செய்தோம்.

ரங்கநாதர் சன்னிதியைச் சுற்றியுள்ள பிராகாரம். அதில் வலதுபுறத்தில்தான் உலகளந்த பெருமாள் சன்னிதியும் அதன் அருகில் சாந்த நரசிம்ஹர் சன்னிதியும் அமைந்துள்ளன.

சாந்த நரசிம்ஹர் (இருந்த திருக்கோலம்)

உலகளந்த பெருமாள் (நடந்த திருக்கோலம்), சாந்த நரசிம்ஹர் (இருந்த திருக்கோலம். பாலக நரசிம்ஹர் என்றும் சொல்கிறார்கள்)

மலை மீதிருந்து ஊரின் தோற்றம்

ரொம்ப வயல்களாகத் தெரிகிறதே என்று அஞ்ச வேண்டாம். இன்னும் ஒரு சில தசாப்தங்களில் அங்கெல்லாம் ஊர்கள் வந்துவிடும்.

 இன்னும் மலைமீதுதான் இருக்கிறோம். பிறகு மலைமீதிருந்து கீழே இறங்கி நீர்வண்ணப் பெருமாள் கோவிலுக்குச் செல்லவேண்டும். அடுத்த வாரம் தொடர்வோமா? 

(தொடரும்)