"திங்க"க்கிழமை அவகேடோ - இரு சட்னிகள் - கீதா ரெங்கன் ரெஸிப்பி

 

 அவகேடோ பழம் பயன்படுத்தி இரு சட்னிகள்

Avocado / அவகேடோ பழத்தைப் பற்றி முந்தைய செய்முறையில் (Gaucamole) சொல்லியிருப்பதால் அதைப் பற்றி ======>ஒரு Recap இங்கு சென்று பார்த்துக் கொள்ளலாம்<====== என்பதால் இன்றைய செய்முறையை தொடர்கிறேன்.

முதலில் தேவையான பழத்தை தயாராக வைத்துக் கொண்டு விடுவோம். கொட்டையை எடுத்துவிட்டு, ஒரு ஸ்பூனால் பழத்தின் உட்பகுதியை வழித்து ஒரு பெரிய கிண்ணத்தில் போட்டு மத்தாலோ பருப்பு மசிக்கும் கரண்டியாலோ நன்றாக மசித்து தயாராக வைத்துவிடலாம். படங்கள் கீழே. 

பழத்தை வழித்து மசித்து வைத்தது தயார்

இனி செய்முறைக்கு…

அவகேடோ (வெள்ளை) சட்னி - 

வதக்கி, வறுத்து அரைக்க

வதக்குவதற்கு - நடுத்தர அளவு பெரிய வெங்காயம் - 1 தோல் எடுத்து விட்டு, வதக்கி அரைக்கப் போவதால் ரொம்பச் சிறிதாக எல்லாம் நறுக்கத் தேவையில்லை, ஓரளவு நடுத்தரமாக நறுக்கிக் கொள்ளுங்கள். 

சாம்பார் வெங்காயம் - 15 தோல் உரித்து வைத்துக்கொள்ளவும்

பூண்டு -  1 இதழ் தோல் நீக்கி வைத்துக் கொள்ளவும்

பச்சைமிளகாய் - 4  அல்லது உங்கள் தேவைக்கேற்ப 

வறுக்க -

வெள்ளை உளுத்தம்பருப்பு -  1 1/2 மேசைக்கரண்டி

(பாதி அளவு பருப்புகளுடன், 1 கைப்பிடி நிலக்கடலையும் வறுத்துச் சேர்த்துக் கொள்ளலாம். அல்லது கடலை மட்டும் இரண்டு கைப்பிடி வறுத்துச் சேர்த்துக் கொள்ளலாம்.)

உப்பு -   தேவைக்கேற்ப 

எலுமிச்சைச் சாறு - 1 எலுமிச்சை பழத்தின் சாறு (எலுமிச்சைக்குப் பதில்ஒரு சின்ன நெல்லிக்காய் அளவு புளியும் சேர்த்துக் கொள்ளலாம்)

கொஞ்சம் கறிவேப்பிலை அரைப்பதுடன் சேர்த்துக் கொள்ள

தாளிக்க - கடுகு - 1 தேக்கரண்டி, கொஞ்சம் கறிவேப்பிலை

வாணலியில் சிறிது எண்ணை விட்டு உளுத்தம் பருப்பு / நிலக்கடலை எதுவானாலும் அல்லது இரண்டும் கலந்தோ பொன்னிறமாக வறுத்துக் கொள்ளவும்.

வாணலியில் இரண்டு ஸ்பூன் எண்ணை விட்டு பச்சைமிளகாயை வதக்கி கூடவே வெங்காயம், பூண்டு, வதக்கி கறிவேப்பிலையும் சேர்த்து பிரட்டிவிட்டு எடுத்து தட்டில் மாற்றி ஆறவிடவும். உப்பையும் சேர்த்துக் கொள்ளவும்

வறுத்த சாமான்கள், வதக்கியவை இவற்றுடன் கொஞ்சம் கறிவேப்பிலையும் போட்டு நன்றாக அரைத்து மசித்து வைத்திருக்கும் அவகேடோ பழத்தோடு சேர்த்து அதில் எலுமிச்சைச் சாறு சேர்த்துக் கலக்கி விட்டு, ஒரு ஸ்பூன் எண்ணையில் கடுகு கறிவேப்பிலையை தாளித்து சேர்த்துவிடவும். 

சட்னி தயார்.

அவகேடோ சிவப்புச் சட்னி

வதக்கி, வறுத்து அரைக்க

வதக்குவதற்கு - நடுத்தர அளவு பெரிய வெங்காயம் - 1 தோல் நீக்கி நடுத்தரமாக நறுக்கி வைத்துக் கொள்ளவும்

சாம்பார் வெங்காயம் - 15 தோல் நீக்கி வைத்துக் கொள்ளவும்

பெரிய தக்காளி - 1. சின்னதாக இருந்தால் 2. 

துண்டுகளாக நறுக்கிக் கொள்ளவும்.

பூண்டு -  4 இதழ். தோல் எடுத்து வைத்துக் கொள்ளவும்

வறுப்பதற்கு -

வெள்ளை உளுத்தம்பருப்பு -  1 1/2 மேசைக்கரண்டி

கடலைப்பருப்பு - 1 1/2 மேசைக்கரண்டி

(பாதி அளவு பருப்புகளுடன், 1 கைப்பிடி நிலக்கடலையும் வறுத்துச் சேர்த்துக் கொள்ளலாம். அல்லது கடலை மட்டும் இரண்டு கைப்பிடி வறுத்துச் சேர்த்துக் கொள்ளலாம்.)

மிளகாய் வற்றல் - 4  அல்லது உங்கள் தேவைக்கேற்ப 

அரைப்பதற்குக் கொஞ்சம் கறிவேப்பிலை

உப்பு -  தேவைக்கேற்ப 

எலுமிச்சைச் சாறு - 1 எலுமிச்சை பழத்தின் சாறு (எலுமிச்சைக்குப் பதில்ஒரு சின்ன நெல்லிக்காய் அளவு புளியும் சேர்த்துக் கொள்ளலாம்)

தாளிக்க ; கடுகு - 1 தேக்கரண்டி, கறிவேப்பிலை

வாணலியில் 1 ஸ்பூன் எண்ணை விட்டு உளுத்தம் பருப்பு போட்டு வறுக்கும் போதே மிளகாய் வற்றலையும் போட்டு கருகாமல் வறுத்து எடுத்துக் கொண்டு விடவும். அடுத்து கடலைப்பருப்பு போட்டு (நிலக்கடலை சேர்த்தால் அதையும்) பொன்னிறமாக வறுத்து எடுத்துக் கொன்டுவிடவும். ஆறட்டும்.

அதே வாணலியில் இன்னும் 1 ஸ்பூன் எண்ணை விட்டு நறுக்கிய வெங்காயம், பூண்டு போட்டு நன்றாக வதங்கியதும், நறுக்கி வைத்திருக்கும் தக்காளியும் சேர்த்து வதக்கவும். நன்றாக வதங்கியதும் கறிவேப்பிலை சேர்த்து பிரட்டிவிட்டு ஆறவிடவும். தேவையான உப்பு சேர்க்கவும். 

வறுத்த மிளகாய்வற்றல், பருப்புகள் உப்பு இவற்றை மிக்ஸி ஜாரில் போட்டு நன்றாகப் பொடித்துக் கொண்ட பிறகு அதில் வதக்கிய வெங்காயம் பூண்டு தக்காளி கூடவே கொஞ்சம் கறிப்வேப்பிலை போட்டு நன்றாக அரைத்து அதை மசித்து வைத்திருக்கும் அவகேடோ பழத்துடன் சேர்த்து, எலுமிச்சை பிழிந்து கலந்துவிட்டு, வாணலியில் எண்ணை 1 ஸ்பூன் விட்டு கடுகு, கறிவேப்பிலை போட்டு தாளித்து சட்னியில் சேர்த்துவிட்டால் அவகேடோ சிவப்புச் சட்னி தயார்.

அவகேடோ பழத்தை வதக்காம, வேக வைக்காம செய்யறது நல்லது. அதன் சத்துகள் மாறாமல் இருக்கும். உடனே செலவாக்குவதும் நல்லது.

வேறு செய்முறைகள் செய்திருந்தாலும், அவகேடோ தொடருக்கு முற்றுப் புள்ளி. No more Avocado Recipes! Cool!