தலை தீபாவளி - தி சு நிகழ்வுகள்

 

பானுமதி வெங்கடேஸ்வரன்: 

தொலைகாட்சிகளில் தீபாவளி சிறப்பு நிகழ்ச்சிகள், பத்திரிகைகளில் திபாவளி சிறப்பு மலர் ஒற்றுமை வேற்றுமைகள் என்னென்ன?

# இரண்டுமே நான் பார்த்துப் பல ஆண்டுகள் ஆகின்றன.

இரண்டுமே தீபாவளியுடன் தொடர்பு, இரண்டிலும் கதம்பமான உள்ளீடுகள், சினிமா மோகம் , இரண்டிலும் சற்று முதிர்ச்சியின்மை அப்போது நான் கவனித்த ஒற்றுமை. 

வேற்றுமை:

மலர்களில் பட்டி மன்றம் இராது. சற்று அறிவார்ந்த பகுதிகள் இருக்கும்.  பிரபல எழுத்தாளர் , ஓவியர் பங்களிப்பு இருக்கும்.‌ ஆன்மீக விஷயங்கள் காணப்படும்.‌ 

தொலைக்காட்சி நிகழ்ச்சிகள் ரசிகர்கள் எண்ணிக்கை பல மடங்கு அதிகம்.‌

& தொலைக்காட்சி தீ சி நி - பவர் கட் ஆனால் அம்பேல் - போயிந்தி it இஸ் கான் ! அல்லது வீதியில் இருக்கும் தீவிரவாதிகள் 1000 வாலா 10000 வாலா எல்லாம் வெடித்தால் சிறப்பு நிகழ்ச்சியில் பேசுபவர் என்ன சொன்னார் என்று தெரியாமல் முழிக்க வேண்டும். கொஞ்சம் வெளிச் சத்தம் குறையும் நேரத்தில், விளம்பர இடைவேளை வந்து கழுத்தை அறுக்கும் - அதுவும் ஒரே விளம்பரத்தைத் திரும்பத் திரும்பப் போட்டு இன்னும் வெறுப்பு ஏற்றுவார்கள். . 

தீபாவளி சிறப்பு மலர்கள் அப்படி இல்லை. பக்கத்தில் இடி விழுந்தால் கூட தொந்தரவு இல்லாமல் படிக்கலாம். விளம்பர பக்கங்களில் kazana ஜ்வெல்லரி தமன்னா, சென்னை சில்க்ஸ் நடிகை என்று படங்களை விருப்பம் இருந்தால் மட்டும் பார்க்கலாம். 

கே. சக்ரபாணி சென்னை 28: 

1.  உங்கள்  தலைதீபாவளி  தித்திக்கும். சுவாரஸ்யமான   சில  நிகழ்வுகள்  பகிரவும். 

# என் தலை தீபாவளி கிட்டத்தட்ட 60 ஆண்டுகளுக்கு முன்னால் நடந்தது. அதிலே குறிப்பிட்டு சொல்லத் தக்கதாக எதுவுமே நடக்கவில்லை என்பதுதான் விசேஷம். இரண்டு குடும்பங்களும் மிகவும் எளிய பொருளாதார நிலையில் இருந்ததால் ஆடம்பரமாக பட்டாசுகளோ பலகாரங்களோ இல்லை. புத்தாடைகளும் மிகவும் சாதாரணமானவையாகவே இருந்தன.

& என்னுடைய தலை தீபாவளிக்கு மனைவி செய்த கோதுமை அல்வா மிகவும் பிரமாதமாக, தித்திப்பாக இருந்தது. ஆபீஸில் லீவு கிடைக்காததால், மாமனார் வீட்டுக்குப் போகஇயலவில்லை. சென்னையிலேயே சிறப்பாகக் கொண்டாடினோம். 46 வருடங்கள் ஆகிவிட்டதால் இப்போது அன்றைய சுவாரஸ்ய நிகழ்வுகள் எதுவும் ஞாபகம் இல்லை. 

2. லிவ்விங் டுகெதர்   கலாசாரம் பற்றி தங்கள்  கருத்துகள்?

# திருமணம் செய்யாது சேர்ந்து வாழ்கிற அமைப்புக்கு நான் எதிரி. இதில் எழக்கூடிய சிக்கல்களை மக்கள் புத்திசாலித்தனமாக அணுகுவதில்லை என்பதே என் கணிப்பு.

& நமது கலாச்சாரத்திற்கு ஏற்றது அல்ல. 

3.  டெல்லி கணேஷ். கோவை சரளா   சூலமங்கலம்  சிஸ்டர்ஸ் போன்று.  நாகை என்றால்  உங்கள்  நினைவுக்கு  வருபவர்  யார்?

# நாகை என்றால் என் நினைவுக்கு வருபவர் கவி காளமேகம். கத்து கடல் சூழ் நாகை காத்தான் தன் சத்திரத்தில் என்று தொடங்கும் நாலடி செய்யுளை அவர் இயற்றி இருப்பதே அதற்குக் காரணம். மிகவும் சுவாரசியமான பாடல். 

நாகை என்றதும் அடுத்தபடியாக எனக்கு நினைவுக்கு வருபவர் நீங்கள் அனேகமாக அறிந்திடாத ஒருவர். என் அப்பாவுக்கு முதலாளியாக இருந்தவர்.  மிகவும் ஆழ்மையான முருக பக்தி கொண்டவர். திருமுருக கிருபானந்த வாரியாரின் பரம ரசிகர் - போஷகர்.  கந்த சஷ்டியின் போது அவர் ஆறு நாட்கள் கடுமையான விரதம் இருந்து சஷ்டி முடிந்த பின் பழனி முருகனுக்கு அபிஷேகம் செய்த பாலை அருந்தித் தன் விரதத்தை முடித்துக் கொள்வார். அது  வரை ஒரு நாளில் ஒரு தடவை பால் பழம் மட்டும் சாப்பிட்டு விரதம் இருப்பார். வசதியான ஒரு நபர் இவ்வளவு பக்தி சிரத்தையோடு விரதம் இருந்து அதுவரை நான் பார்த்ததில்லை. ஊரைச் சொன்னாலும் பேரைச் சொல்லக்கூடாது என்பார்கள்.  ஊரை நீங்கள் சொல்லி விட்டீர்கள். பெயரை நான் சொல்கிறேன் அவர் பெயர் ஜெ. மு. குரு நமசிவாயம்.‌ நாகப்பட்டினம் மதுரை திருச்சி ஜெயங்கொண்டம் ஆகிய ஊர்களில் மிகவும் பிரபலமாக இருந்த ஜவுளிக் கடைகளின் அதிபர்.

& நாகை முகுந்தன் ஆன்மீக சொற்பொழிவாளர் 

    நாகை முரளிதரன் - வயலின் வாசிப்பவர். 

= = = = = = = = = = 

KGG பக்கம் :

kgs  நினைவுகள். 

என்னுடைய ஆரம்பப் பள்ளி நாட்களில், ஹை ஸ்கூல் படித்துக்கொண்டிருந்த kgs எங்களிடமும், குடித்தனம் இருந்த மற்ற சிறுவர்களுடனும் சில சில சுவாரஸ்யமான விளையாட்டுகள் விளையாடியது எனக்கு ஞாபகம் வருகிறது. 

அந்த நாட்களில் நாகையில் எடுக்கப்பட்ட படம் : 

(ஃபோட்டோ எடுத்தவர் என்னுடைய இரண்டாவது அண்ணன் kgy 1957?) 

படத்தில் இருப்பவர்கள் :

1 kgs 

2 kgg (நான்!) 

3 சின்ன அண்ணன் விசு(வேஸ்வரன்)

4 சின்ன அக்கா (வனமாலினி) 

5 சித்தப்பாவின் மகன் (நாகையா) 

(இதில், என்னைத் தவிர வேறு யாரும் இப்போது உயிருடன் இல்லை)

kgs சொல்லாடல்கள் :

(அப்போது எங்களுக்கு தமிழ் & தெலுங்கு. பேசத் தெரியும். பெரியவர்களுக்கு தமிழ், தெலுங்கு ஆங்கிலம் தெரியும்) 

ஒருநாள் எங்களிடம் ஒரு கேள்வி கேட்டார். 

" ஒரு போட்டி - நான் கேள்வி கேட்கின்ற பாஷையில் பதில் சொல்லக் கூடாது. சரியா ? "

நான் : " சரி " 

kgs : " அவ்வளவுதான் - நான் தமிழில் கேட்டதற்கு நீ தமிழில் பதில் சொல்லிவிட்டாய். நீ அவுட்."

நான் : " சரி - சரி திரும்ப ஆடலாம். "

அதற்குப் பின் அவர் தமிழில் கேட்டால் நான் யோசித்து தெலுங்கில் பதில் சொல்வது; தெலுங்கில் கேட்டால் தமிழில் பதில் சொல்வது என்று ஆட்டம் தொடர்ந்தது. 

kgs : " ரொம்ப நேரம் யோசிக்க எடுத்துக்கொள்ளக்கூடாது. உடனடியாக பதில் சொல்ல வேண்டும். " 

கொஞ்ச நேரம் கேள்வி பதில் தொடர்ந்தது. கிடு கிடுவென பதில் சொல்லி வந்தேன். 

kgs : " ஹிந்தியில் கேள்வி கேட்கலாமா /"

நான் : " கூடாது "

அவ்வளவுதான் - நான் அவுட்! 

---

அப்புறம் வேறு ஒருநாள் என்னிடம், " உன்னை பச்சை என்று சொல்லவைக்கவா ?"

நான் : " உம் "

அவர் : " நீ போட்டிருப்பது என்ன கலர் சட்டை? "

நான் : " வெள்ளை"

அவர் : " சுண்ணாம்பு என்ன கலர் ?"

நான் : " வெள்ளை "

அவர் : " வான வில்லின் நிறங்களில் ஐந்து நிறங்கள் சொல்லு "

நான் : " நீலம், ஊதா, சிவப்பு, ஆரஞ்சு, மஞ்சள் "

அவர் : " ஹா ஹா ஹா - நீ அவுட் மஞ்சள் என்று சொல்லிவிட்டாய் !"

நான் : " இல்லை இல்லை போட்டியில்  'பச்சை' என்றுதான்  சொல்லக் கூடாது. நான் மஞ்சள் என்றுதானே சொன்னேன். "

அவர் : " இப்போ அவுட் ! பச்சை சொல்லிவிட்டாய்! 

போட்டிகளில் அவரை ஜெயிக்க முடியாது! 

= = = = = = = = = = =