நான் தரிசனம் செய்த கோயில்கள் – நெல்லைத்தமிழன் ஐந்து துவாரகைகள் யாத்திரை – பகுதி 40

 

குருக்ஷேத்திரத்தில் தரிசனம் முடித்துக்கொண்டு வந்த எங்களை ஏற்றிக்கொண்டு, சுமார் 160 கிமீ தூரத்தில் இருக்கும் தில்லியை நோக்கி எங்கள் பேருந்து விரைந்தது.  ஒரு தடவை மிகக் கடுமையான மழை பெய்தது. (கோவிட் நேரத்தில்) மற்றபடி பெரும்பாலும் நாங்கள் தில்லியில் தங்குமிடத்திற்கு இரவு 8 மணி வாக்கில் சென்றுவிடுவோம்.

தில்லியில் நாங்கள் எப்போதும் தங்கும் இடம் கொஞ்சம் சுமார்தான். அங்கிருக்கும் பல அறைகள் முன்பதிவு செய்யப்பட்டுவிடும் போலிருக்கிறது. இரவு உணவுக்குப் பிறகு, மறுநாள் காலை 3 மணி நேரம் தில்லியைச் சுற்றிப்பார்க்கலாம் என்று யாத்திரைக் குழுத் தலைவர் சொன்னார்.

இந்த மாதிரி நெடிய யாத்திரையின் முடிவில் ஒவ்வொருவருக்கும் பெரிய லட்டு ஒன்று கொடுப்பார்கள் (மறுநாள் மதிய உணவிற்குப் பிறகு). பல தடவை குழுவினருடன் பயணம் செய்திருப்பதால் சமையலறைக்குச் சென்று புகைப்படம் எடுத்தேன். கடைசிப் பகுதியை இனிப்புடன் ஆரம்பிக்கலாம் இல்லையா?

காலை குளித்துத் தயாரானதும், பிர்லா மந்திரி, ராமர் கோவில், மற்றபடி தில்லியை பேருந்தில் இருந்தவாறு சுற்றுப்பார்ப்பது, ஒரு சில இடங்களில் நிறுத்தி இறங்கிப் பார்ப்பது என்று ஒரு மூன்று மணி நேரம் பொழுது போகும். என்ன என்ன பார்த்தோம் என்பதைப் புகைப்படங்கள் வாயிலாக் காணலாம்.

தில்லியில் உள்ள ஒவ்வொரு இடமும் வரலாற்றுச் சிறப்பு வாய்ந்த இடங்கள். அது மட்டுமல்ல, நம்மை ஆள்பவர்கள் இருக்கும் பிரதேசம் அது. அவற்றை முழுமையாகச் சுற்றிப்பார்க்க நமக்கு நிறைய நாட்கள்/வாரங்கள் தேவை. எனக்கு எப்போதுமே வரலாறு நிகழ்ந்த இடங்களைக் காண்பது மிகவும் பிடித்தமானது. ஆனால் அதற்கான வாய்ப்பு இன்னும் வரவில்லை.

ஒரு முறை (2020) பிர்லா மந்திரைக் காணச் சென்றபோது, தில்லி வெங்கட் அவர்களைச் சந்தித்தேன்.  இன்னொரு முறை, இந்திரா காந்தியின் இல்லத்தைச் சுற்றிப்பார்த்தேன். நூறு மீட்டர் தொலைவில்தான் குதுப்மினாரைப் பார்த்தேன். தில்லியைப் பற்றி நினைக்கும்போது எனக்கு நிறைய இடங்களைக் காணவேண்டும் என்று எண்ணம். எப்போது வாய்க்குமோ.

வெங்கட் நாகராஜுடன் நான். எதிரே பிர்லா மந்திர்

குதுப்மினார் மற்றும் இந்தியா நுழைவாயில்

இந்திராகாந்தி அவர்களின் வீடு

இந்திரா காந்தி நடந்த பாதையில் நான்

ஸ்ரீராமர் திருக்கோவில், தில்லி

இராமர், சீதை, இலக்குவன்.   அனுமார்.

அதற்குப் பிறகு இந்தியா நுழைவாயில் (India Gate), குதுப்மினார் மற்றும் இந்திரா காந்தியின் இல்லம் சென்றோம்.  எனக்கு மிகவும் பிடித்திருந்த தலைவர் அவர். பஞ்ச துவாரகா யாத்திரையை இவற்றைப் பற்றியெல்லாம் எழுதி முடிக்க விரும்பவில்லை.  12 மணிக்கு நாங்கள் தங்கியிருந்த இடத்திற்குத் திரும்பினோம். யாத்திரையின் கடைசி மதிய உணவு.  நல்ல விருந்தாக அமைந்தது. (சாதம், பருப்பு, சாம்பார், தயிர்வடை, கோஸ் கறியமுது, கத்தரி கூட்டு, வாழை சிப்ஸ், அப்பளாம், அக்காரவடிசல், ரசம், தயிர்) பிறகு ஒவ்வொருவருக்கும் ஒரு லட்டு கொடுத்தார்கள். எங்கேனும் வெளியில் போக விருப்பமிருந்தால் போய்விட்டு, மாலை 6 மணிக்குள் திரும்பிவிடவேண்டும், 7 மணிக்கு பேருந்து இரயில் நிலையத்துக்குக் கிளம்பிவிடும் என்றார்கள்.

சில முறை நான் முனிர்க்காவில் இருக்கும் என் உறவினர் வீட்டுக்குச் சென்றிருக்கிறேன். சில முறை கடைவீதிகளில் சுற்றித் திரிந்து ஹால்திராம், பிகானீர்வாலா போன்ற உணவகங்களில் சாப்பிட்டிருக்கிறேன்.

இரவு 7 ½ மணிக்கு தில்லி இரயில் நிலையம் நோக்கிச் சென்றோம். பயங்கரமான மழை.  தில்லியே விநோதமாக இருக்கிறது. சில சமயம் தாள முடியாத வெயில். சில நேரங்களில் அளவுக்கு அதிகமான மழை. சில நேரங்களில் பயங்கர குளிர் (பல பயணங்களின் அடிப்படையில் எழுதுகிறேன்).  கொஞ்சம் கஷ்டப்பட்டுத்தான் எங்கள் ப்ளாட்ஃபார்ம் சென்றோம். மூன்றாம் நாள் காலையில் சென்னை வந்து சேர்ந்தோம்.  இப்படியாக எங்கள் பஞ்ச துவாரகா யாத்திரை நல்லபடியாக முடிந்தது.

நாங்கள் தரிசித்த முக்கியமான தலங்களை மாத்திரம் ‘திரும்பிப்பார்க்கும்’ முறையில் கொடுத்திருக்கிறேன்.

வதோரா பஞ்சமுக ஆஞ்சநேயர் கோவில் தரிசனத்துடன் யாத்திரை துவங்கியது. – குஜராத்

டாக்கூர் துவாரகையில் தரிசனம் – குஜராத்

அடுத்து கோமதி நதி முகத்துவாரத்தில் அமைந்துள்ள கோமத்துவாரகா கோவில் தரிசனம் – குஜராத். 

ருக்மணி கோவில் (ருக்மணீ துவாரகா) – குஜராத்

Beyt  Bபேட் துவாரகா – ஸ்ரீகிருஷ்ணர் அரசாண்ட இடம் – குஜராத்

மூலத் துவாரகை – குஜராத்

சுதாமாபுரி – குசேலர் வாழ்ந்த ஊர் (போர்பந்தர் அருகில்) – குஜராத்

ஸ்ரீகிருஷ்ணரின் சரம திருமேனி எரியூட்டப்பட்ட பிரபாஸ நதி தீரம், பலராமர் தன்னடிச்சோதிக்கு எழுந்தருளிய இடம் – இரண்டுமே சோம்நாத்தில் உள்ளது – குஜராத். 

புகழ்பெற்ற ஜ்யோதிர்லிங்கத் தலமான சோம்நாத் கோவில் – குஜராத். 

ஸ்ரீகிருஷ்ணர், வேடன் ஒருவனால் (ஜரா) தவறுதலாகக் கொல்லப்பட்ட இடம், பால்கா தீர்த்தம், விராவல் (சோம்நாத்திலிருந்து 7 கிமீ தூரத்தில்) – குஜராத். 

ஸ்ரீநாத்ஜி துவாரகா (நாத்துவாரகா) – ராஜஸ்தான். 

கங்க்ரோலி துவாரகா – ராஜஸ்தான். 

புஷ்கர் ஏரி (சரோவர்) ராஜஸ்தான். 

புஷ்கர் பிரம்மா கோவில் – ராஜஸ்தான். 

பிர்லா மந்திர், ஜெய்ப்பூர் – ராஜஸ்தான். 

கோகுலம் நந்தகோபர் மாளிகை – உத்திரப்பிரதேசம். 

கோகுலம் பலராமர் பிறந்த இடம் – உத்திரப்பிரதேசம். 

மதுரா – ஸ்ரீகிருஷ்ண ஜென்மஸ்தான் – உத்தரப்பிரதேசம். 

விருந்தாவனம் – நிதிவனம் – ஸ்ரீகிருஷ்ணர் ராஸலீலை – உத்தரப்பிரதேசம். 

குருக்ஷேத்திரம் பிரம்மசரோவர் - ஹரியானா

குருக்ஷேத்திரம் – கீதை உபதேசித்த இடம் - ஹரியானா. 

குருக்ஷேத்திரம் – பீஷ்மகுண்டம் - ஹரியானா

இது ஒரு கடினமான பயணம் என்றே தோன்றியது. காரணம் நிறைய மாநிலங்களில் இந்தக் கோவில்கள் இருக்கின்றன (குஜராத், ராஜஸ்தான், உத்திரப்பிரதேசம், ஹரியானா). முழுமையான பேருந்து பிரயாணம், வதோதராவில் ஆரம்பித்து தில்லி முடிய. நிறைய நாட்களில் போதுமான அளவு தூக்கமின்மை. இருந்தாலும் நல்ல உணவு, எல்லாக் கோவில்களிலும் நல்ல தரிசனம் என்று மனதில் உற்சாகம் இருந்தது.  நிறைய படங்களுடன் ஞாயிறு பதிவாக எழுத ஆரம்பித்து 40 வாரங்கள் ஓடினதே தெரியவில்லை. எழுதுவது எனக்கு கஷ்டமாகத்தான் இருந்தது. (படங்களைக் கோர்ப்பதும்). இந்தத் தொடரைத் தொடர்ந்து வாசித்தவர்களுக்கும் கருத்துக்களைப் பகிர்ந்துகொண்டவர்களுக்கும் மிக்க நன்றி. உங்களுக்கும் இத்தகைய யாத்திரைகள் அமைவதாகுக.

மீண்டும் இன்னொரு தொடரில் சந்திப்போம்.

(நிறைவு)