ரீட்டா & மீட்டா 12 : அபிமன்யு

 

சென்ற வார ரீ மீ - பகுதி 11 சுட்டி. 

.. பிளாக் மெயில் செய்யப்பட்ட ஒருவர், சட்ட ரீதியாக ரீட்டாவை எதிர்கொள்ள, போலீஸில் புகார் செய்தார். 

அந்தப் புகார் பற்றி விசாரிக்க, ரீட்டாவின் அப்போதைய விலாசத்திற்குச் சென்றவர் .. அருண். 

.. 

அருணுக்கு ரீட்டாவை முதல் சந்திப்பிலேயே மிகவும் பிடித்துவிட்டது.  ரீட்டாவின் அழகு, அவள் பேசிய ஆங்கிலம், போலீஸ் அதிகாரியான அருணுக்கு  அவள் கொடுத்த மரியாதை, புன்னகையுடன் அவள் கூறிய பதில்கள் எல்லாமே அருண் மனதில், ரீட்டாவை மிக நல்ல இடத்தில் வைத்தன. அருண், ரீட்டா வீட்டிற்குச் சென்ற சமயத்தில், ரீட்டாவின் பெரியம்மா அருகில் உள்ள கோவிலுக்குச் சென்றிருந்ததால் அருண் பெரியம்மாவை சந்திக்கவில்லை. 

ரீட்டாவுக்கு சட்ட ரீதியாக உதவி செய்ய அருண் தன்னுடைய லாயர் நண்பர்  ஒருவரை அனுப்பி வைத்தான். அந்த லாயர் நண்பரின் உதவியால், ரீட்டா நிரபராதி என்று விடுவிக்கப்பட்டாள். 

அதற்கு நன்றி தெரிவிக்கும் வகையில், ரீட்டா ஒரு ஐந்து நட்சத்திர ஹோட்டலில் அருணுக்கு ஒரு பார்ட்டி ஏற்பாடு செய்தாள். பார்ட்டி முடிந்து அருண் அங்கிருந்து கிளம்ப எழுந்தபோது, ரீட்டா, " என்னை இக்கட்டிலிருந்து மீட்க உதவிய உங்களுக்கு என் மனமார்ந்த நன்றி" என்று சொல்லி,  எதிர்பாராத வகையில், அருணைக் கட்டிப் பிடித்து, அவன் கன்னத்தில் முததமிட்டதுடன் அதை தன்னுடைய போனில் படமும் எடுத்துக்கொண்டாள். 

அந்த நேரத்தில், அதை இயல்பான நிகழ்வாகத்தான் எடுத்துக்கொண்டான் அருண். 

ஆனால் - ரீட்டா அடுத்தடுத்து தனக்கு போலீஸ் சிக்கல் வரும்போதெல்லாம், அதிலிருந்து தப்பிக்க - அருணின் (போலீஸ்) உதவியைப் பெற அந்தப் படத்தைக் காட்டி அருணை பிளாக் மெயில் செய்ய ஆரம்பித்தாள். அருணுக்கு இது பெரிய தலைவலியாகப் போயிற்று. இதிலிருந்து எப்படி மீள்வது என்று தெரியாமல் திண்டாடிக்கொண்டிருந்தான். 

இது எதுவரை போனது என்றால் - ஒருநாள் அருணின் மேலதிகாரி, அருணை அழைத்து, அவனிடம் " நீங்கள் யாரோ ஒரு பெண்ணுக்கு உதவுவதற்காக, out of the way சென்று, சில தலையீடுகள் செய்வதாக புகார்கள் அரசல் புரசலாக வருகின்றன. இது விரும்பத்தக்க நிலை அல்ல. இந்த வகை புகார்கள், உங்களின் நற்பெயருக்குக் களங்கம் விளைவிக்கும்; பதவி உயர்வை பெரிதும் பாதிக்கும். " என்று சொன்னார். 

அப்பொழுது அருணுக்கு, போலீஸ் ஜர்னல் பத்திரிக்கையில் படித்த CV235 ஜாடி நினைவுக்கு வந்தது. அந்த ஜாடி ஒன்றை, அருண் வாங்கினான். ஆனால் ரீட்டாவின் வீட்டுக்கு அருண் சென்றபோது, ரீட்டா அந்த வீட்டைக் காலி செய்துகொண்டு சென்றுவிட்டதாகத் தெரிந்துகொண்டான். 

* * * * * 

அதுவரை BMC (Business Management Consultant) ஆக இருந்த ரீட்டா, பிறகு BMW (Business Management Wizard) என்று தன்னைத் தானே அழைத்துக்கொள்ள அவளுக்கு ஒரு சந்தர்ப்பம் வாய்த்தது. 

ரீட்டா குடியிருந்த பகுதியில் நடந்த கொடி ஏற்று விழா ஒன்றில், அந்தப் பகுதியின் பிரபல பெண்மணி என்ற வகையில் பங்கேற்று மேடையில் இடம் பெறும் வாய்ப்பு ரீட்டாவுக்குக் கிடைத்தது. அதே மேடையில், ஒரு அரசியல் பிரமுகரின் மகனும் பங்கேற்க வந்திருந்தார். அரசியல் பிரமுகர் கட்சியில் மிக முக்கியமான பதவியில் இருப்பவர். அவர் தன்னுடைய மகனை பிரபலப்படுத்த, உள்ளூர் விழாக்கள், பாராட்டுக் கூட்டங்கள் போன்ற நிகழ்ச்சிகளில் பங்கேற்க அனுப்புவது வழக்கம். 

அந்த அரசியல் பிரமுகரின் மகன் பெயர் அபி என்கிற அபிமன்யு. அபிமன்யுவின் பார்வை, ரீட்டா மேல் விழுந்தது. ரீட்டாவின் பார்வை அபிமன்யுவின் நீலக் கலர் BMW கார் மீது விழுந்தது. 

விலையுயர்ந்த கார், பெரிய பங்களா, நிறைய வேலையாட்கள், நினைத்ததை எல்லாம் வாங்கக்கூடிய அளவுக்குப் பணம் என்றெல்லாம் கனவுகளைக் கொண்டிருந்த ரீட்டாவுக்கு அபிமன்யுவின் நட்பு கிடைத்தது அரிய வரமாக அமைந்தது. மகாபலிபுரம் ஹோட்டல் ஒன்றில் அடிக்கடி அபிமன்யு, ரீட்டா இருவரும் ரூம் எடுத்துத் தங்கினார்கள். 

அந்த நேரத்தில் ஆனந்த் & ரீத்திகா பேட்டி பிசினஸ் இந்தியா பத்திரிக்கையில் பார்த்தவுடன் ரீட்டா ஆனந்தை பிளாக் மெயில் செய்து லட்சக் கணக்கில் பணம் சேர்க்கத் திட்டமிட்டாள். அபிமன்யுவிடம் தானும் ஒரு பணக்காரி என்பதைக் காட்டிக்கொள்ள அவள் போட்ட திட்டம் அது. கேட்டதுமே பத்து லட்ச ரூபாய் ஆனந்த் அனுப்பியவுடன், ரீட்டாவுக்கு சந்தோஷமாக இருந்தது. இன்னும் இருபது லட்ச ரூபாய் கேட்டு கடிதம் அனுப்பினாள்.  

அப்புறம் என்ன? ஆயிரக் கணக்கில் பணம் சம்பாதிக்க சில பிசினஸ்மென், லட்சக் கணக்கில் பணம் சம்பாதிக்க ஆனந்த், அவ்வப்போது போலீஸ் கெடுபிடியிலிருந்து விடுபட அருண் என்று இருந்த ரீட்டா - அபி மூலமாக ஊரப்பாக்கத்தில் ஒரு பங்களாவை தன்னுடைய பெயருக்கு வாங்கிக்கொண்டு, அங்கு தன் பெரியம்மாவுடன் குடியேறினாள். அபி தன்னைத் திருமணம் செய்துகொள்வான் என்று ரீட்டா மிகவும் நம்பினாள். அதனால் அபியுடன் மிகவும் நெருங்கிப் பழகினாள். 

ஆனால் - அரசியல்வாதிகளின் நட்பு ஆபத்தானது என்று அவள் அறிந்திருக்கவில்லை என்பதுதான் சோகமான உண்மை. 

* * * * * * 

அருணின் மேலதிகாரி, அருணைக் கூப்பிட்டு ஒருநாள் காலையில், " ஊரப்பாக்கத்தில் யாரோ ஒரு பெண் தற்கொலை செய்துகொண்டுவிட்டாள் என்று அவளுடைய உறவுக்காரப் பெண்மணி தகவல் கொடுத்துள்ளார். நீ அங்கு சென்று விசாரித்து - தற்கொலையா அல்லது கொலையா என்று விஜாரித்து, அந்தக் கேஸை உடனடியாக முடித்து வை" என்று சொல்லி அனுப்பினார். 

ஊரப்பாக்கம் சென்ற அருண், இறந்துபோனது ரீட்டா என்று தெரிந்தவுடன் அதிர்ந்து போனான். போஸ்ட் மார்ட்டம் ரிப்போர்ட் பார்த்த அருணின் அதிர்ச்சி இன்னும் பலமடங்காகியது. 

அதிர்ச்சி 1: மரணத்தின் காரணம் CV235 விஷ வாயு. 

அதிர்ச்சி 2 : ரீட்டா கர்ப்பமாக இருந்தாள். கர்ப்பத்தின் ஆரம்ப நிலை என்றது ரிப்போர்ட். 

அருண் உடனடியாக, interpol வழியாக சென்னையில் கடந்த ஒரு மாதத்திற்குள் யார் எல்லாம் CV235 ஜாடி வாங்கினார்கள் என்ற தகவலை சீனா கம்பெனியிலிருந்து வாங்கினான். 

அதிலிருந்து, CV235 வாங்கப்பட்ட விலாசங்கள் அருணுக்குத் தெரியவந்தது. 

ஆனந்த் : ரீத்திகா கெமிக்கல்ஸ், 

அருண் (அவனுடைய விலாசம்) 

மற்றும் இருந்த ஒரு பெயர் மதிவாணன் - அண்ணா நகர். 

அருண், ரீட்டாவின் பெரியம்மாவிடம், கடந்த நான்கைந்து நாட்களுக்குள் வழக்கமாக வீட்டிற்கு வந்து செல்லும் பால்காரர், வேலை ஆட்கள் தவிர்த்து யார் எல்லாம் வந்து சென்றார்கள் என்று கேட்டான். 

பெரியம்மா: " மூன்று நாட்களுக்கு முன்பு ஊரப்பாக்கம் நர்சரியிலிருந்து ஒருவர் ரோஜாச் செடி தொட்டி ஒன்றை பரிசாகக் கொண்டு வந்து வைத்துவிட்டுச் சென்றார். "   

அ : " அது எங்கே? " 

பெ : " ரீட்டாவுக்கு  ஃபோன் செய்து, கேட்டபோது, அவள் ' தான் மகாபலிபுரத்தில் இருப்பதாகவும், வீட்டிற்கு வர இரண்டு நாட்கள் ஆகும்' என்று சொல்லி, 'அந்தத் தொட்டியை மொட்டை மாடியில் கொண்டு போய் வைத்து, தண்ணீர் விடும்படியும் சொன்னாள்' ரீட்டா சொன்னதுபோல அதை மொட்டைமாடியில் கொண்டுபோய் வைத்தேன். ஆனால், அப்போது மழை பெய்ய ஆரம்பித்ததால்,செடிக்குத் தண்ணீர் விடவில்லை. மாடி செல்லும் கதவை மூடி, பூட்டுப் போட்டுவிட்டு வந்துவிட்டேன். " 

அ : " பிறகு யார் வந்தார்கள்? " 

பெ : " ரீட்டா ஊரிலிருந்து திரும்பி வருவதற்கு முன்பு, அவளுடைய படுக்கை அறை ஏர் கண்டிஷனர் சர்வீஸ் செய்ய மெக்கானிக் வந்தார். தனக்கு ரீட்டா ஃபோன் செய்து, தனது அறை ஏர் கண்டிஷனரிலிருந்து அதிகமாக சத்தம் வருவதாகவும், மேலும் ஏதோ கிரீஸ் வாடை வருவதாகவும் புகார் அளித்திருந்ததால், அதை சரி செய்ய அந்தக் AC கம்பெனி அனுப்பி வைத்திருப்பதாகவும் சொன்னார். " 

அ : " பிறகு?" 

பெ : " சுமார் அரைமணி நேரம் ஏர் கண்டிஷனரைப் பிரித்து உள் பாகங்களை சுத்தம் செய்து ஏதோ சில பாகங்களை மாற்றிவிட்டு, 'எல்லாம் சரியாகிவிட்டது' ரீட்டா அம்மா வந்தால் சொல்லிடுங்க. AC வாரண்டி பீரியட்ல இருப்பதால் ரிப்பேர் சார்ஜ் எதுவும் கொடுக்கவேண்டாம்' என்று சொல்லி சென்றுவிட்டார். " 

அருண், அதன் பிறகு, பெரியம்மா மாதுரியிடம்,  ரீட்டாவின் பாங்க் அக்கவுண்ட் பற்றியும், ரீட்டா, மாதுரி இவர்களின் பின்னணி பற்றியும், ரீட்டாவின் பழக்க வழக்கங்கள், பிசினஸ் வாடிக்கையாளர்கள் பற்றியும், மாதுரியின் எதிர்கால திட்டம் என்ன என்பதைப் பற்றியும் பல தகவல்கள் கேட்டுத் தெரிந்துகொண்டான். ரீட்டாவின் சமீப கால நடவடிக்கைகள் பற்றியும் பல கேள்விகள் கேட்டு விவரங்கள் தெரிந்துகொண்டான். 

மொட்டை மாடியில் வைக்கப்பட்டிருந்த ரோஜாத் தொட்டியில் மறைத்து வைக்கப்பட்டிருந்த CV235 ஜாடியை ஜாக்கிரதையாக விரல் ரேகை அழியாமல் பாதுகாக்கும் வகையில் கைப்பற்றி, அதை ஒரு அட்டைப் பெட்டியில் வைத்து எடுத்துக்கொண்டான். பெட்டி மீது 'Flower pot' என்று எழுதினான். 

மாதுரியிடம், அந்தத் தொட்டியை மாடியில் வைத்த இரவில் மழை பெய்தபிறகு, ஏதேனும் குறிப்பிடத்தகுந்த மாற்றங்கள் நிகழ்ந்ததா என்று கேட்டான். மாதுரி, 'மறுநாள் காலையில் தோட்டத்தில் இரண்டு காக்கைகள் இறந்து கிடந்தன' என்று கூறினாள். 

அதே போல, ஏர் கண்டிஷனர் 'Fresh air inlet ' பகுதியில் வைக்கப்பட்டிருந்த CV235 ஜாடியையும் ஜாக்கிரதையாக எடுத்து, வேறு ஒரு அட்டைப் பெட்டியில் வைத்து, பெட்டி மீது 'AC' என்று எழுதினான். 

பிறகு, ரீட்டாவின் ஃபோன், லாப்டாப் எல்லாவற்றையும் வேறு ஒரு பையில் போட்டு எடுத்துக்கொண்டான். 

****** 

இதன் பிறகுதான் அருண், ரீத்திகா கெமிக்கல்ஸ் சென்று அதன்பின் ஆனந்தை விசாரிக்க ஹைதராபாத் கிளம்பிச் சென்றான். 

**********

திரும்ப வந்தபின் CV235 வாங்கப்பட்ட அண்ணாநகர் விலாசம் சென்று விசாரணை செய்வோம் என்று புறப்பட்டான். 

= = = = = = = = = = =

( இந்த வாரம் கதையை முடிக்க இயலவில்லை. சில வாசகர்கள், இந்தக் கதைக்கு எதிர்ப்புத் தெரிவித்து இதைத் தொடரவேண்டாம் என்று கேட்டுக் கொண்டுள்ளனர். மேலும் பலர், கதை புரியவில்லை என்று எழுதியுள்ளனர். சிலர் கதை போரடிக்கிறது என்றும் தெரிவித்துள்ளனர். - எனவே கதையை தொடர்வதா வேண்டாமா என்று சில வாரங்கள் யோசிக்க வேண்டியுள்ளது. அது வரை, வேறு சிறுகதைகள் வெளி வரும். கதையைத் தொடரவேண்டுமா வேண்டாமா என்பது பற்றி வாசகர்கள் கருத்து பதியவும். நன்றி.) 

(தொடருமா ? )

= = = = = = = = = = = = = ===