நான் தரிசனம் செய்த கோயில்கள் – மனைவியுடன் யாத்திரை – பகுதி 02 (திருநீர்மலை) நெல்லைத்தமிழன்

 

நான் (ங்கள். மனைவியையும் சேர்த்துக்கொள்ள வேண்டுமல்லவா) 105 வைணவ திவ்யதேசக் கோவில்களையும் தரிசித்துவிட்டாலும், திருநீர்மலைக் கோவிலை தரிசனம் செய்ய வேளை வரவேண்டியிருந்தது. திருமங்கையாழ்வாரையே ஆறு மாதங்கள் காத்திருக்கச் செய்த பெருமாள், எளியனான என்னைத் தன் கோவிலைக் கடைசியாக தரிசிக்கவைத்தார்.

ஏப்ரல் 2024ல் தரிசித்த நாங்கள், இந்த ஆகஸ்டில் உறவினரின் நிச்சயதார்த்தத்திற்காக குரோம்பேட்டையில் தங்கியிருந்தபோது, நிச்சயதார்த்தம் மாலை 6 மணிக்குத்தான் என்பதால், காலையில் சிலபல கோவில்களுக்கு காரில் சென்றோம். அப்போதும் திருநீர்மலையை, இன்னும் அவசரப்படாமல் நிதானமாகச் சேவிக்கும் வாய்ப்பு கிடைத்தது. அப்போது என் பெரியம்மாவையும் (82 வயது) கூட்டிச் சென்றிருந்தேன். அவர் ரொம்பவே சுறுசுறுப்பு. இருந்தாலும் திருநீர்மலையில் மலைக்கோவில் படியில் ஏறும்போதுதான், இவ்வளவு படிகளை அவர் ஏறவேண்டுமே என்று கவலைப்பட்டேன். ஆனால் அவர், இரண்டு மூன்று இடங்களில் ஆசுவாசப்படுத்திக்கொண்டு, எங்களுடன் மலைக்கோவிலுக்கும் வந்து தரிசனம் செய்தார். சென்னையிலேயே பிறந்து, திருமணம் ஆனபின் தில்லி வாசத்தில் இருந்தாலும், அன்று நான் கூட்டிச்சென்ற கோவில்களுக்கு எல்லாம் அவர் முதல் முறை தரிசிக்க வந்திருக்கிறாராம். எனக்கு ரொம்பவே மன மகிழ்ச்சி.

மலைக்கோவிலில் ரங்கநாதர், தாயார், உலகளந்த பெருமாள், பால நரசிம்ஹரை தரிசனம் செய்தபிறகு கோவில் வளாகத்தில் புகைப்படம் எடுத்துக்கொண்டோம்.

கோவில் வளாகத்திலேயே பிரசாதக் கடை இருக்கிறது. புளியோதரை, சர்க்கரைப் பொங்கல், தோசை என்று விதவிதமான பிரசாதங்கள். நாங்கள் மிளகாய்ப்பொடி போட்ட தோசை சாப்பிட்ட நினைவு.

மலையில் ஏறி பெருமாளைச் சேவிக்க வந்தவர்களுக்கு இந்தப் பிரசாதக் கடை ஒரு வரப்பிரசாதம்.

பிரசாதக் கடைக்கு அடுத்த பகுதியில் (உள்கோபுரத்தின் வலதுபக்கத்தில்) நாகருக்கான ஒரு சிறு சன்னிதி இருக்கிறது.

ஆதிசேஷன் சன்னிதி

நல்ல தரிசனத்திற்குப் பிறகு மலையிலிருந்து கீழிறங்கினோம். அங்கு நீர்வண்ணப் பெருமாள் கோவிலுக்குச் சென்று நீர்வண்ணரை தரிசனம் செய்வதற்காக.

இறங்கும் வழியில் ஆஞ்சநேயர் கோவிலுக்குச் சென்று தரிசனம் செய்தோம்.

கீழே இருந்த கோவிலில் கட்டுமானப் பணிகள் (ஏப்ரல்) நடந்துகொண்டிருந்தன. கூட்டம் இல்லாதால் நீர்வண்ணர் சேவை மிக நன்றாக இருந்தது. தரிசனம் செய்துவிட்டு கோவிலை வலம் வந்தோம்.  (ஆகஸ்டில் சென்றபோது, நிறைய நேரம் இருந்ததால், முதலில் நீர்வண்ணப் பெருமாள் கோவிலுக்குச் சென்று அங்கு தரிசனம் முடிந்த பிறகு மலைக்கோவிலுக்குச் சென்றோம்)

நீர்வண்ணப் பெருமாள் கோவிலிலிருந்து மலைக்கோவில் தெரியும் காட்சி

நீர்வண்ணப் பெருமாள் கோவில் த்வஜஸ்தம்பம். அருகே ஆஞ்சநேயர் இருக்கும் மண்டபம்.

கோவிலில் கட்டுமானப் பணிகள் நடந்துகொண்டிருந்தன. (ஏப்ரல் 24)

ஆகஸ்டில் அந்தக் கோவிலுக்குச் சென்றிருந்தபோது

நீர்வண்ணப் பெருமாள் கோவில்

பொதுவாக எல்லா திவ்யதேசங்களிலும் ஆழ்வார்கள் பாடிய பிரபந்தங்களை (அந்தக் கோவிலுக்கானது) பதித்து வைத்திருப்பார்கள். திருநீர்மலையில் திருமங்கையாழ்வார் பாடிய ‘அன்றாயர் குலக்கொடியோடு’ பதிகம்.

ஆலயப் பிராகாரத்தை வலம் வரும்போது கோவிலின் பழைமை தெரிந்தது.

இந்த மாதிரி கோவில் சுவர்களில் உள்ள மாடங்களில் சிலைகள் இருக்கிறதென்றால் அந்தக் கோவில் அந்த அளவு சேதப்படுத்தப்பட்டதில்லை என்று புரிந்துகொள்ளலாம்.

துளசிமாடம், பழமையான கோவில் சுவர்கள்.

நீர்வண்ணப் பெருமாள் சன்னிதி கோபுரமும், துளசி மாடமும்.

நீர்வண்ணப் பெருமாள் கோவிலின் இராமர் சன்னிதி (இராமனாகக் காட்சிதருதல்). அருகிலேயே தாயார் சன்னிதி (அணிமாமலர் மங்கை. இந்தப் பெயர் திருமங்கையாழ்வார் பிரபந்தத்திலேயே இருக்கிறது. எவ்வளவு அழகான தமிழ்ப்பெயர்)

நீர் வண்ணப் பெருமாள் நின்ற திருக்கோலம். 

நீர்வண்ணப் பெருமாளைச் சேவித்துவிட்டு, இராமர் சன்னிதிக்கும், அதன் அருகிலிருக்கும் தாயார் சன்னிதிக்கும் (அணிமாமலர் மங்கை) சென்றோம். இராமர் சன்னிதி மண்டபத்தில் திருநீர்மலை கோவிலின் மாடல் வைத்திருந்தார்கள்.

திருநீர்மலைக் கோவில் மாடல்

நீர்வண்ணப் பெருமாள் கோவில் பிரகாரத்திலிருந்து மலைக்கோவிலின் தோற்றம். 

வெயிலில் நடக்க வசதியாக பெயிண்ட் அடித்த தரை.

கோவிலில் பிராகாரத்தில் இருந்த கல்வெட்டுகள்

கோவிலின் பழைமையை கல்வெட்டுகள் கொண்டு அறியலாம்.

நெடுநாள் கைகூடாமல் போக்குக்காட்டிவந்த திருநீர்மலை தரிசனம் அன்று மிகவும் திருப்தியாக அமைந்தது. அதன் பிறகு நாங்கள் திருமணப் பத்திரிகை கொடுக்கும் வேலையைத் தொடர்ந்தோம். இந்த வருடமே இரண்டாவது முறையும் திருநீர்மலை கோவில் தரிசனம் வாய்த்தது எங்களுக்கு மிகுந்த மகிழ்ச்சியைத் தந்தது.

அடுத்த வாரம், நாங்கள் சென்னையிலிருந்து பயணித்து தரிசித்த கோவில்களைப் பற்றிப் பார்க்க ஆரம்பிக்கலாம்.

 (தொடரும்)