ஞாயிறு பட உலா – நெல்லைத் தமிழன் நான் சென்ற இடங்கள் – மெக்சிகோ - படங்களுடன் - 07

 

சிச்சன் இட்ஸா மற்றும் பிற இடங்கள். 

தலைப்பைப் பார்த்து, ‘கிச்சன்’ஆ? என்று யோசிச்சவங்கள்லாம் கொஞ்சம் தள்ளுங்கப்பா. உங்களுக்காகத்தான் திங்கட்கிழமை தொடர்ந்து பதிவு வெளியாகிறது.

காலை 8 மணிக்கு தயாராக இருக்கும்படி டூர் ஆபரேட்டர் சொல்லியிருந்தார் (இவையெல்லாம் ரிசார்ட்டின் அனுமதியின் பேரில், அவர்களுக்குத் தெரிந்தவர்கள் நடத்தும் டூர் என்பதால், பயமில்லை).  ரிசார்ட்டுகளுக்கும் கட்டணத்தின் ஒரு பகுதி போகுமா என்பது தெரியவில்லை.

நான் போயிருந்த சிறிய பேருந்தின் தோற்றம்

நல்ல ஒரு பார்க். நிறையபேர் நடந்துகொண்டிருப்பதைப் பார்த்தேன்.

அங்கும் காவலுக்கு இருக்கும் போலீஸ் வண்டி. (கான்கன் சுற்றுலாத் தளமாக ஆக்க நினைத்தபோது ரிசார்ட்டுகளை உருவாக்கத் தயக்கம் காட்டியதால், அரசே பண உதவி செய்ததாம்.  அதன் பிறகு ட்ரக்ஸ், துப்பாக்கிக் கலாச்சாரம் போன்றவை அதிகரித்துவிட்டதாம். பெரும்பாலும் போதைப்பொருள் கடத்தல்தானாம்.  அரசும் அதனைக் கட்டுக்குள் வைக்க முனைகிறதாம்.

அங்கு பார்த்த சர்ச் ஒன்று. இதெல்லாம் ஸ்பேனிஷ் கலாச்சாரம் கொண்டுவந்தது.  நாடு பிடிப்பவர்களின் முதல் வேலை கலாச்சாரத்தை மாற்றுவது. இப்படித்தான் பிலிப்பைன்ஸிலும் மதத்தைப் பரப்பிவிட்டார்கள். இப்போது பிலிப்பைன்ஸ் ஒரு கிறித்துவ தேசமாகிவிட்டது. (அதனால் ஒரு அட்வாண்டேஜ் இருப்பதையும் மறுப்பதற்கில்லை)

எங்களுக்குச் செல்லும் இடங்களைப் பற்றி விளக்கிச் சொல்ல ஒரு Guide மற்றும் டிரைவர், கண்டக்டர் ஆகியோர் இருந்தனர்.  ஏறி உட்கார்ந்ததும் அருமையான ஆரஞ்ச் ஜூஸ் தந்தார்கள். பிறகுதான் தெரிந்தது, மெக்சிகோவின் அந்தப் பகுதி முழுவதும் எல்லா இடங்களிலும் ஆரஞ்சு நிறைய விளைகிறது என்று. மதிய உணவு மற்றும் மாலை உணவுக்கு இரண்டு இடங்களில் ஏற்பாடு செய்திருந்தார்களாம்.  எனக்கு அதில் பெரிய ஆர்வம் இல்லை. இவங்க கூட்டிக்கொண்டு செல்லும் இடங்களில் நான் வெஜ்தான் இருக்கும் என்று எனக்கு ஒரு நம்பிக்கை. அதனால் முன்னெச்சரிக்கையாக, சங்கோஜப்படாமல் இரண்டு ஆரஞ்சு ஜூஸ் வாங்கிக்கொண்டேன்.  காலையிலேயே ரிசார்ட்டில் காலை உணவும் சாப்பிட்டுவிட்டேன்.

சிச்சன் இட்ஸா (Chechen Itza) சுமார் 230 கிமீ தூரம், ரிசார்ட்டிலிருந்து.  பேருந்திலேயே டாய்லெட் வசதியும் இருந்தது. சொகுசுப் பேருந்துதான்.

சுமார் 2 ½ மணி நேரப் பிரயாணத்திற்குப் பிறகு, எங்கள் பேருந்து, நினைவுப்பொருட்கள் (மெக்சிகன் கலாச்சாரம் சம்பந்தமான பொருட்கள்) விற்கும் கடை முன்பு நின்றது. நான் இந்த மாதிரி சுற்றுலா பேருந்துகள் கூட்டிச் செல்லும் கடையில் எதையும் வாங்க மாட்டேன். அதிக விலையிருக்கும், கூட்டிச் செல்பவர்களுக்கு கமிஷன் இருக்கும். 

நமக்கே அந்த அனுபவம் இருக்கும். பேருந்துகள் நிறுத்தும் உணவகம் எப்போதுமே சுமாராகவும், கொஞ்சம் விலை அதிகமாகவும் இருக்கும்.

ஆனால் அந்த நினைவுப் பொருட்கள் விற்கும் பெரிய கடை, மெக்சிகன் கலாச்சாரத்தை வெளிப்படுத்துவதாக இருந்தது. அனேகமாக எல்லாப் பொருட்களுமே என்னைக் கவர்ந்தன. விலை எல்லாமே அமெரிக்க டாலரில். (யார் தயார் செய்தார்களோ. சீனாவாக இருக்குமோ?)

கைவினைப் பொருட்கள் என்று அவனே எழுதியிருக்கிறான். அதனால் உள்ளூரிலேயே தயார் செய்த பொருட்களாக இருக்கும்…க்கும்.

தொப்பிதாம்பா மெக்சிகன் ஸ்டைலு..

மாயன் கலாச்சாரத்தைச் சொல்லும் திரைப்படம் புகழ் பெற்ற அபோகலிப்டோ Apocalypto). இது 15ம் நூற்றாண்டில் மாயன் கலாச்சாரம் மங்கி, ஸ்பேனிஷ் ஆக்கிரமிப்பாளர்களால் கிறித்துவ மதம் நுழைவதைச் சொல்லும் படம். பார்க்க வாய்ப்பிருந்தால் பாருங்கள்.

மெக்சிகன் தொப்பிகள் அழகாத்தான் இருக்கு. போட்டுக்கிட்டா God Father நினைவு வருது.

சிச்சன் இட்ஸா மாதிரிகள் (நம்ம ஊரில் தாஜ்மஹல் மாதிரிகளை விற்பாங்களே அதுமாதிரி)

செஸ் போர்ட்

மாயன் கலாச்சாரத்து முகமூடிகள்.

எலும்புக் கூடுகள்லாம் வேணுமா?

இன்னும் அந்தக் கடையில் நான் எடுத்த படங்கள் முழுவதும் முடியவில்லை. அடுத்த வாரமும் தொடரணும் போல் தெரிகிறது. அடுத்த பகுதியில் பார்ப்போமா?

(தொடரும்)