ராஜீவ் காந்தியும், சிவராசனும் பின்னே சில மர்மங்களும்...

 

சுஜாதா இன்னும் சில சிந்தனைகள் என்கிற புத்தகத்தில் 1-5-2005 இல் கீழ்கண்டவாறு எழுதியுள்ளார்.

*****

"ரெட்ஹெட் இந்தியாவின் பொறுப்பாளரான ஜாவேத் தாப்பியா

வெளியிட, முதல் சிடிக்களை நான் பெற்றுக்கொண்டேன். இந்த

மென்பொருளை அதிகம் கம்ப்யூட்டர் பரிபாஷையைப் பயன்படுத்தாமல், பயங்காட்டாமல் எளிய முறையில் அங்கு கூடியிருந்த பத்திரிகையாளர்களுக்கு விளக்கினேன். நான் பேசியதின் சாரம் இது.

ரெட்ஹேட் என்பது லினக்ஸ் ஆப்ரேட்டிங் சிஸ்டம் செயலாக்க மென்பொருளின் ஒரு வடிவம். பிரபலமான வடிவம். லினக்ஸ் என்பது 'மைக்ரோசாஃப்ட் விண்டோஸ்' போல, அதே வசதிகளைக் கொண்டது. அதற்கு பணம் கொடுக்கவேண்டும்; இதற்கு பணம் கொடுக்க வேண்டாம். சாமர்த்தியமுள்ளவர்கள் யார் வேண்டுமானா லும், குற்ற உணர்ச்சியில்லாமல் நெட்டிலிருந்தோ, தகடாகவோ பெறலாம். இந்த இலவச இயக்கத்துக்கு பெயர் 'ஓப்பன் சோர்ஸ். சோர்ஸ் என்பது இந்த மென்பொருளின் உள்ரகசியங்கள்; வடிவமைப்புக் கட்டளைகள். இவை அனைத்தும் நமக்கு கிடைக்கும். விஷயம் தெரிந்தவர்கள் அதை மாற்றவும் செய்யலாம். மாற்றினால் நீங்கள் செய்ய வேண்டியது, ஒன்றே ஒன்று. அந்த மாற்றத்தை உலகுக்கு அறிவிக்கவேண்டும். நீங்கள் பெற்ற இன்ப துன்பங்களை மற்றவர்களுடன் பங்கிட்டுக்கொள்ள வேண்டும். இதுதான் ஓப்பன் சோர்ஸின் தாரக மந்திரம். ஆனால் உலகத்தில் இலவசம் என்று எதுவுமே கிடையாது. சாவு உட்பட! இந்த சோர்ஸ் கோடு கட்டளைகளை வைத்துக்கொண்டு விஷயம் தெரியாவிட்டால் எதுவும் செய்ய முடியாது. தலைகால் புரியாது. ரெட்ஹெட் போன்ற நிறுவனங்களின் தயவை நாட வேண்டும். இந்த கைத்தாங்கலில்தான் அவர்கள் பலரும் பிழைப்பு நடத்துகிறார்கள்.

அன்று வெளியிட்ட மென்பொருளில் இருப்பது என்ன என்ன, எவைகளைத் தமிழில் பயன்படுத்தலாம் என்பதைச் சொன்னேன்."

இதற்கு மேலும் அவர் எழுதியுள்ளார்.

2012 இல் என்னுடைய அலுவலகத்தில் கணினி அறிமுகப்படுத்தப்பட்டது. அப்போது இந்த லினக்ஸ் ஆப்ரேட்டிங் சிஸ்டம் தான் வழங்கப்பட்டது.

2004 இல் இருந்து நான் கணினி உபயோகிப்பவனாக இருந்தாலும், விண்டோஸில் பழகிய எனக்கு லினக்ஸ் மிகவும் கடினமாக இருந்தது. அவர்கள் சொல்வதை ஏற்று வேலை செய்ய பழகிக் கொண்டாலும், நான் என்னுடைய கணினியில் எதற்கும் இருக்கட்டும் என்று விண்டோஸும் போட்டு வைத்திருந்தேன்.

லினக்ஸில் ஒவ்வொன்றையும் ஏதோ மவுண்ட் செய்ய வேண்டும் என்றெல்லாம் சொல்வார்கள். எனக்கு தெரிந்து அல்லது அப்போதே Karthik Lakshmi Narasimhan இந்த ரெட் ஹார்ட் லினக்ஸ் பற்றி சிலாகித்து சொல்லிக் கொண்டிருப்பார். எளிமையாக இருக்கிறது, பணம் கட்ட வேண்டாம் என்ற வகையில் உபயோகிக்க நல்லது என்பார். இப்போதும் அவர் இதைத்தான் உபயோகிக்கிறாரா என்று எனக்கு தெரியாது. எனக்கு லினக்ஸ் வேப்பங்காயாக இருந்தது. ஆனால் அலுவலகத்தில் மெக்கானிகலாக, மொட்டை மனப்பாடமாக இதை உபயோகிக்க கற்றுக் கொண்டு வேலை செய்து வவந்தேன்.

அதே கட்டுரையின் கடைசியில் தமிழன்னை பற்றியும் சுஜாதா எழுதி இருக்கிறார். அதற்கு முந்தைய கட்டுரையிலும் கூட தமிழன்னை பற்றியும் தமிழக கட்சிகள் பற்றியும் சில வார்த்தைகள் எழுதி இருக்கிறார். இருந்தாலும் அவர் தமிழன்னை பற்றி எழுதியிருப்பதை கீழே தருகிறேன்

*****

"இன்றைய நிலையில் தமிழ் மட்டும் தெரிந்த ஒருவர் கணிப் பொறியின் பல்வேறு வசதிகளைப் பயன்படுத்தும்படியான சூழ்நிலை உருவாகியுள்ளது ஆரோக்கியமானதே. இந்த தருணத்தில் தமிழில் உள்ள குழப்பங்கள் பற்றியும் குறிப்பிட்டேன். நான் முன்பு சொன்னது போல் ஒவ்வொரு அரசும் அரசியல் கட்சியும் தமிழைக் காப்பாற்ற கங்கணம் கட்டிக்கொண்டிருப்பது வரவேற்கத்தக்கதே. இருப்பினும் நான் மட்டும்தான் காப்பாற்றுவேன் என்று மைய அரசு சொல்லி இலவச சிடி தருகிறது. அதைப் பிடுங்கி, 'நீ யார் தமிழைக் காப்பாற்ற? நான்தான் காப்பாற்றுவேன்' என்கிறது மாநில அரசு. அவர்கள் காப்பாற்றியதெல்லாம் தப்பான காப்பாற்றல் என்று அடித்துச் சொல்லும் வெளிநாட்டு என்.ஆர்.ஐ. தமிழர்கள். ஈழத்தமிழர்கள், 'இவர்களுக்கென்ன தெரியும், நாங்கள் காப்பாற்றுகிறோம், வா தமிழணங்கே' என்று கையைப் பிடித்து இழுக்க... விளைவு -அந்த அழகான பெண்மணி கலங்கிப் போயிருக்கிறாள். நான் சொல்வதில் மிகையில்லை...."

******""

தமிழன்னை இன்னமும் நட்டாற்றில் தான் இருக்கிறாள் போல!

எல்லோரும் இன்னமும் நான் தான் தமிழை காப்பாற்றுவேன், நான்தான் தமிழை காப்பாற்றுகிறேன் என்று சண்டையிட்டுக் கொண்டிருக்கிறார்கள்.

யாராவது காப்பாற்றுவார்கள் என்று தமிழன்னையும் இன்னமும் காத்துக் கொண்டிருக்கிறார் போல ஒரு காட்சி.

ஆனால் தமிழன்னைக்கு இதெல்லாம் தேவையில்லை தன்னை காப்பாற்றிக்கொள்ள தமிழன்னைக்கு தெரியும்!

======================================================================

SonyLiv' ல் The Hunt தொடர் பார்த்தேன். ஏழு எபிஸோட்ஸ். ராஜீவ் காந்தி கொலை பற்றிய தொடர்.

எப்போதும் G Pay செய்த உடன் வரும் ரிவார்ட்ஸினால் எனக்குபயனேதும் விளைந்ததில்லை - இதுவரை. இந்த முறை எனக்கு அது Sony Liv OTT ஒரு வருட சந்தா கட்ட குறைந்த தொகை காட்டியது - 650 ரூபாய். சென்ற வருடம் நான் கட்டியிருந்தது முடிந்து போய் சில மாதங்கள் ஆனநிலையில் இது ஒரு நல்ல Offer ஆக தோன்ற, உடனே அதை உபயோகப்படுத்திக் கொண்டேன். அங்கு கட்டணம் 1500 ரூபாய். என்ன பார்க்கலாம் என்று பார்த்தபோது இது அகப்பட்டது.

அப்போது வெளியான திரு ரகோத்தமன் எழுதிய புத்தகம், திரு கார்த்திகேயன் எழுதிய புத்தககம், திருச்சி வேலுச்சாமி எழுதிய புத்தகம் என்று வாங்கி படித்தேன்.

இப்போது சோனியில் இந்த தொடர்பற்றிய அறிவிப்பு பார்த்ததும் ஏதோ புதிதாக சொல்லப் போகிறார்கள் என்று பார்த்தால் அப்படி ஒன்றும் இல்லை என்பதோடு விசாரணைக் குழுவில் ரகோத்தமன், துரை தவிர மொத்தமும் வட நாட்டுக்காரர்களாய் (பெயர் உட்பட) இடம் பெற்றிருந்தார்கள் என்பது போல காட்டுகிறார்கள். உண்மையா என்று தெரியவில்லை. ரகோத்தமன் புத்தகத்தை அல்லது கார்த்திகேயன் புத்தகத்தை மறுபடி எடுத்து படிக்க வேண்டும்.

ரகோத்தமன் கேரக்டருக்கு பக்ஸ் என்று அழைக்கப்படும் பகவதி பெருமாளை போட்டிருக்கிறார்கள். அவர் அந்த கேரக்டருக்கு நியாயம் செய்யவில்லை. ஆனால் அவர் என்ன செய்வார்? தயாரிப்பாளர், இயக்குனர் சொல்வதைதானே செய்ய முடியும்?

"ரகோத்தமன்" அந்த வடநாட்டு டீம் மெம்பர்கள் பின்னால் கான்ஸ்டபிள் போல அலைகிறார். கார்த்திகேயன், ராஜீவ், நரசிம்மராவ், சந்திரசேகர் போன்றோர்கள் ஓரளவு உருவ ஒற்றுமை உடையவர்களாய் தெரிந்தெடுத்திருக்கிறார்கள்.

ஒரு இடத்தில கதாநாயகன் போல வரும் வடநாட்டு கேரக்டர் "ரகோத்தமனி"டம் அவர்கள் இருவரும் மது அருந்தும்போது நடந்த சம்பவம் பற்றி ஒரு தமிழனாக உங்கள் அபிப்ராயம் என்ன என்று கேட்கிறார். விசாரணைக்காக அல்ல, அவர் தெரிந்து கொள்வதற்காக கேட்கிறேன் என்றார். "ரகோத்தமன்" கொஞ்சம் தயங்கி விட்டு ஒரு விசாரணைக்கைதி சொன்னதை திரும்பிச் சொல்கிறார். சிலபேர் பார்வையில் தீவிரவாதியாக இருப்பவர்கள் சிலபேர் பார்வையில் கதாநாயகனாக தெரிவார்கள்" என்கிறார்.

என்ன சொல்ல வருகிறார்கள் என்று புரியவில்லை.

கார்த்திகேயனும், தனிப்படை அமைத்த தலைமை அதிகாரியும் பிரதமரை சந்தித்து பேசும்போது நரசிம்மராவ் 'வேறு அர்த்தம்' தொனிக்க பேசுகிறார். அதுமட்டுமல்லாமல், கார்த்திகேயனை அனுப்பிவிட்டு அந்த தலைமை அதிகாரியிடம் "தனியாக" பேசுவதில் ஏதோ இருக்கிறது என்பதுபோல பார்வைப் பரிமாற்றங்கள் இருக்கிறது.

கோடியக்கரை ஷண்முகம் தற்கொலை சம்பந்தப்பட்ட விஷயத்தில் அந்த உயர் போலீஸ் அதிகாரி திருட்டுமூழி முழிக்கிறார். மேலிடத்து ஆர்டர் அதனால்தான் விலங்கை அகற்றி ஸ்பெஷல் சாப்பாடு போட்டேன் என்கிறார். யார் அந்த மேலிடம் என்பதை ஊகத்துக்கு விட்டு விடுகிறார்.

சிவராஜனைப் பிடிக்க வரும்போது கார்திகேயனோ, ரகோத்தமனோ புத்தகத்தில் சொல்லாத விஷயங்கள் இடம்பெற்றிருக்கின்றன. அபப்டி நடந்திருக்குமானால் மிகப்பெரிய பொறுப்பற்ற தன்மை வேண்டுமென்றே செய்திருக்கிறார்கள். திரு கார்த்திகேயன் கைப்பாவையா, உடந்தையா என்பது குழப்பம், உண்டாகும்படி அமைத்திருக்கிறார்கள்.

தொடர் முடிந்ததும் எழுத்துகளாக, பிரியங்காவும், வாத்ராவும் நளினியைச் சந்தித்து மன்னித்து விட்டதாகச் சொன்னார்கள் என்று வருகிறது.

தொடரில் நளினி வெளிப்படையாக இந்தியர்களைத் திட்டுகிறார். சிவராஜன் மரணத்துடன் தொடர் முடிந்து விடுகிறது. ஏமாற்றம்.

இன்றும் நிற்கும் பல கேள்விகளுக்கு இந்தத் தொடரில் ஒரு ஊகமாகக் கூட ஒன்றும் சொல்லவில்லை.

=========================================================================

ஜூலை 6 உலக முத்த தினம். எதை மிஸ் செய்கிறேனோ இல்லையோ, இதை மிஸ் செய்வதில்லை! சென்ற வருடம் கூட ஏற்கனவே எழுதியடைதை வைத்துக் கொண்டு ஒப்பேற்றி இருந்த நிலையில் இந்த வருடம் இதற்காக எழுதிய ஒன்றை இங்கு பகிர்கிறேன்!

கண் நிறைந்து மனம் நிறைந்தவளுக்கு

கண்களில் முத்தம்

காதலியாய் நின்றவளுக்கு கனியிதழில் முத்தம்

தொட்டணைத்துக் கொண்டவளுக்கு

தோளில் ஒரு முத்தம்

கைக்குழந்தையாய் கையில் தவழ்பவருக்கு

கன்னத்தில் முத்தம்

மழையில் நனைந்து

தலை துவட்டுபவளுக்கு

(சென்சார்) ஒரு முத்தம்

தொப்புள் குழி கேட்டதொரு

தொன்மையான முத்தம்

இடையிடையே மயக்கம் தீர

இடைகளிலே முத்தம்

வாழைத்தண்டு தொடைகளிலே

மீண்டும் மீண்டும் முத்தம்

கொலுசு சத்த மயக்கத்தில்

பாதத்தில் கொஞ்சி

ஒரு முத்தம்

மஞ்சத்தில் சாய்ந்து அங்கே

மனைவிக்கு தரும் முத்தம்

பிடித்த பொருள்கள் யாவற்றுக்கும்

கிடைத்த இடத்தில் முத்தம்

எத்தனை முத்தம் வேண்டுமடி

எண்ணிக்கொள்

காரணங்கள் கண்டுபிடித்து

கணக்குப் பார்க்காமல்

கணத்துக்கொரு முத்தம்

விலகிப்போகாதே

விகல்பமாய் எண்ணாதே

பல கண்கள் பார்த்தாலும்

கலகம் செய்ய மாட்டார்கள்

உலக முத்த தினமாம் இன்று

================================================================================

=====================================================================================

இந்தப் படம் எதற்காக எடுத்திருக்கிறேன் என்று கண்டு பிடிக்க முடிகிறதா?

==============================================================================

சின்னதும் பெரிசுமாய் அவ்வப்போ FaceBook ல் இப்படி போடுவதுண்டு!

--------------------------------------------------------------------------------------------------------------------------------------

அப்போது இந்த செய்தியை வைத்து ஒரு கதை எழுதி இருந்தேன்.