"பழம்பெரும் நடிகை சரோஜாதேவி" என்பதில் பழம்பெரும் என்றால் என்ன அர்த்தம்?

 

நெல்லைத் தமிழன்: 

நோபல் சமாதானப் பரிசு என்பதே தங்களுக்குச் சாதகமான அல்லது விலைக்கு வாங்கப்படும் அல்லது அரசியல் காரணங்களுக்காக வழங்கப்படுவது என்பது என் எண்ணம். மேற்கத்தைய அடிமைகளால் வழங்கப்படுவது அல்லது இனவெறி கொண்டவர்களால் வழங்கப்படுவது எனத் தோன்றுகிறது. உங்கள் அபிப்பிராயம் என்ன?

# நோபல் பரிசு, அதுவும் இலக்கியம், சமாதானம் இவற்றுக்கானவை மரியாதையைத் துறந்து நெடுங்காலம் ஆகிவிட்டது என்று எனக்குத் தோன்றும்.  காரணங்கள் கேட்டால் பதிலளிப்பது கடினம்.‌

விருச்சிக ராசிக்காரர்கள் அவங்க மனசுல அப்படி நினைக்காட்டியும் அவங்க பேசறது மத்தவங்களுக்கு தேள் கொட்டற மாதிரி சுருக்குன்னு இருக்கும் என ஜாதக புத்தகத்தில் படித்திருக்கிறேன் ‌ உங்கள் அனுபவம் என்ன?

# நான் பார்த்தவரை இந்த மாதிரி ஜோஸ்யங்கள் குருட்டாம் போக்காக வீசப் படுபவை.

& என்னுடைய அம்மா விருச்சிக ராசி - அவங்க பேசறது சில சமயத்துல தேள் கொட்டற மாதிரி இருந்ததாக என் மனைவி சொல்லியது உண்டு. 

கருங்காலி மாலை பாசிடிவ் எனெர்ஜியை நம்மிடம் சேர்க்கும் (அதனால் என்ன பிரயோசனம் என்பது அடுத்த கேள்வி), ருத்திராட்ச மாலை ரத்த அழுத்தத்தைப் போக்கும் என்பது மாதிரியான கண்டுபிடிப்புகளில் உங்களுக்கு நம்பிக்கை உண்டா? உங்கள் சின்ன வயதில், ரஜினியைப் பார்த்து தாமிர வளையலை ஆண்கள் அணிந்ததுபோல முயற்சித்திருக்கிறீர்களா?

# இல்லை. நம்பிக்கை இருந்ததே இல்லை.  சில ஆண்டுகள் ஒரு மோதிரம் அணிந்திருந்தது தவிர அணியும் ஒரே அனாவசியம் (?) கருப்புக் கண்ணாடி. (பூணூல் கணக்கில் சேர்க்கவில்லை)

"பழம்பெரும் நடிகை சரோஜாதேவி" என்பதில் பழம்பெரும் என்றால் என்ன அர்த்தம்? வகை தொகை இல்லாமல் எல்லோருக்கும் பழம்பெரும் என்று போட்டுவிடுகிறார்களே!

# அந்தக் காலத்து பெரிய நடிகை என்று அர்த்தம். ஓரளவு பிரபலமாக இருந்தால்தான் போடவேண்டும்.  தலைப்பு ஆவலைத் தூண்டும் வகையில் இருக்க வேண்டும் என்று எவரானாலும் பழம் & பெரும் ஆக்கி விடுகிறார்கள்.

"சரோஜாதேவியின் மறைவு திரையுலகுக்கு பேரிழப்பு" என்றெல்லாம் செய்தி வருகிறதே - இப்படித்தான் ஒவ்வொருவர் மறையும்போதும் அவரது மறைவு பேரிழப்பு என்றெல்லாம் கூசாமல் செய்தியில் அடித்துவிடுகிறார்கள். எந்த விதத்தில் பேரிழப்பு, அவர்கள் உயிரோடு இருந்திருந்தால் திரைத்துறையில் என்ன என்ன வாய்ப்புகளைக் கொடுத்திருப்பார்கள் என்பதற்கெல்லாம் விளக்கம் ப்ளீஸ்..

# இதெல்லாம் சம்பிரதாயமாக சொல்லும் வார்த்தைகள். பரம விரோதி காலமானால் கூட இதேதான் சொல்வார்கள். இப்போதெல்லாம்  " காமராஜர்,  கக்கன் " என்று தலையில்  தூக்கி வைத்துக்கொண்டு கொண்டாடுகிறார்களே -  அதே தலைவர்கள் அரசியலில் தோல்வி கண்டு ஒதுங்கி இருந்த காலத்தில் அவர்களை யாரும் மதிக்கவில்லை.

&  சரோஜாதேவி மறைவில் நான் கவனித்த இரண்டு முக்கிய விஷயங்கள் :

அவர் காலமான ஜூலை 14 அன்று அவருடைய வீட்டு கேட் தாண்டி உள்ளே செல்ல ஊடகங்களுக்கு அனுமதி கொடுக்கப்படவில்லை. சில முக்கிய புள்ளிகள், உறவினர்கள் தவிர வேறு யாரும் உள்ளே செல்ல அனுமதி கிடைக்கவில்லை. 

அவர் தன்னுடைய கண்களை ஒரு தனியார் மருத்துவமனை மூலம் தானம் செய்திருந்தார். அவருடைய கண்கள் பார்வை இழந்த இரண்டு சிறுவர்களுக்கு பொருத்தப்படப் போகின்றன. இந்த இரண்டாவது செய்தி என்னை மிகவும் நெகிழ வைத்தது. கண் தெரியாதவர் படும் கஷ்டங்களை அருகில் இருந்து எட்டு வருடங்கள் பார்த்து வருந்தியவன் நான். 

எல்லா மதங்களிலும் (அனேகமாக) ஒரு ஆண், ஒரு பெண்ணுக்கு மேல் திருமணம் செய்துகொள்ளலாம் என்று இருக்கிறது (மனைவி உயிரோடு இருக்கும்போதுகூட). ஆனால் ஒரு பெண், ஒரு ஆணுக்கு மேல் திருமணம் செய்துகொள்ளலாம் என்று இல்லை (உடனே திரௌபதியை உதாரணத்துக்குக் கொண்டு வராதீர்கள்). இதற்கு என்ன காரணமாக இருக்கும் என்று உங்களுக்குத் தோன்றுகிறது?

# ஆண் உடமையாளனாகவும் பெண் அவனது உடைமையாகவும் அந்தக் காலத்தில்  பார்க்கப்பட்டார்கள். இந்த மனோபாவம் இன்றும் பெருமளவில் உண்டு.‌ 

ஒருவர் பல மோதிரங்கள் வைத்துக் கொள்ளலாம். ஒரு மோதிரத்தை ஒன்றுக்கு மேற்பட்டவர் ஒரே காலத்தில் அணிய முடியுமோ ? இந்தப் பார்வை தான் அந்தக் காலத்தில் இருந்திருக்கிறது.

= = = = = = = =

படமும் பதமும்:

நெல்லைத்தமிழன் : 

துபாய் லுலு மாலில் (கராமா) ஒரு தடவை நான் மிகப் பெரிய வாழைப்பழங்களைப் பார்த்தேன். அதில் உடைந்திருந்த ஒன்று சுமார் 2 அடிகளுக்கு மேல் இருக்கும்.  நல்லதாகத் தெரிந்த இரண்டு வாழைப்பழங்களை நான் வாங்கினேன் (40-50 செ.மீ நீளம்). சுவை மிக வளர்ந்த நேந்திரன் வாழைப்பழம்போல ஆனால் இனிப்புச் சுவை சிறிது குறைவாக இருந்தது. 

= = = = = = =

2) 

நீங்கள் புர்ஜ் கலீஃபா, உலகின் உயரமான கட்டிடத்தைப் படத்தில் பார்த்திருப்பீர்கள். அது கட்டப்பட்டுக்கொண்டிருந்தபோது எடுத்த படம். 

= = = = = =

3) 

பஹ்ரைன் கடற்கரையின் ஒரு பகுதி.  பெரிய ஏரி மாதிரித்தான் தோற்றமளிக்கும். நடந்தே 100 மீட்டருக்கு மேல் போனாலும் பிரச்சனையில்லை. அலையும் இருக்காது. 

4) 

இந்தப் படம் எங்கே எடுக்கப்பட்டிருக்கலாம் என்று உங்களுக்குத் தோன்றுகிறது? யோசித்துச் சொல்லுங்களேன்

க்ளூ இல்லாமல் இருந்தால் எப்படி யோசிப்பதாம் என்பவர்களுக்காக கீழே மேலும் இரண்டு படங்கள் கொடுத்திருக்கிறேன்.

பா ஸ்ரீராம் அனுப்பியுள்ள படமும் பதமும் :

1) 

எவ்வளவு பெரிய இலை!  இது என்ன வகை இலை என்று தெரியவில்லை.  மினி டிஃபன்  இதில் போட்டு சாப்பிடலாம் போல பெரிய இலை.

அந்த இலையின் வடிவத்தை பார்த்ததும் மனதில் தோன்றிய கற்பனை: 

( பாதாளம் நோக்கிப் பாயும் நீல மீன்!)

---------

பாதுகாப்புக் கவசமாய் முட்கள்.  நட்சத்திர மீன் போல இலைகள். பாரதியார் இதைப் பற்றி சொன்னதால் இதற்கு கர்வம் வந்துவிட்டது போலும். "கணக்கு பிணக்கு ஆமணக்கு" 

ஆம்! ஆமணக்கு காய் தான் இது! 

= = = = = = = = = = = = =

KGG பக்கம் : 

நான் தொலைக்காட்சித் தொடர்கள் எதுவும் பார்ப்பதில்லை. காதுகள் நன்றாகக் கேட்டுக்கொண்டிருந்த நாட்களிலேயே அப்படித்தான். கேட்கும் திறன் மந்தம் ஆனவுடன் அந்த நிலைக்கு justification கிடைத்துவிட்டது! 

இந்த நிலையில், படங்களோ அல்லது நல்ல சீரியல்களோ உபதலைப்புகளுடன் (Subtitles) கிடைப்பது ஒரு வரம். 

அதனால், பிரபல படங்கள் வெளியாகி சில மாதங்கள் அல்லது வாரங்கள் கழித்து Amazon Prime தளத்தில் கிடைக்கும்வரை காத்திருப்பேன். 

ம ர வின் பொ செ பகுதி 1 மற்றும் இரண்டு இவைகளை amazon தளத்தில் பெரிய அளவு எழுத்துரு உப தலைப்புகளுடன் பார்த்து ரசித்தேன். 

பிரித்வி ராஜ் நடித்த Gold மலையாளப் படம் இவற்றை எல்லாம் முன்பு பார்த்தேன். 

சமீபத்தில் பா வெ மேடம் கேட்டிருந்த கேள்வி மூலம் Tourist Family படம் பற்றி தெரியவந்தது. எனவே அந்தப் படத்தைப் பார்த்தேன். படம் நன்றாக இருந்தது. பொதுவாக எனக்கு தாடி வைத்திருக்கும் கதாநாயகர்களைக் கண்டாலே பிடிக்காது. 

ஆனாலும் இந்தப் படத்தில் சசிகுமார் பாத்திரத்தின் மீது ஒரு பரிவு தோன்றியது. 

அதேபோல்தான் என் பார்வையில் யோகி பாபு காமெடி, மொட்டை ராஜேந்திரன் காமெடி எல்லாம் பிடிக்காத வகை. இந்தப் படத்தில் நல்லவேளை யோகி பாபு காமெடி பாத்திரம் கிடையாது; பாசக்கார அண்ணனாக வருகிறார். 

படம் ஆரம்பம் முதல் கடைசி வரை நல்ல விறுவிறுப்பு. 

தற்போது பார்த்து வருகின்ற தொ கா தொடர் - Jio Hotstar - தளத்தில், Criminal Justice. ஒவ்வொரு season தொடரிலும் பத்து episodes போல இருக்கின்றன. ஐந்து episodes கடந்தாலே இழுவையாக தோன்றும். ஆனாலும் என்னதான் கதை என்ற ஆர்வத்தில் தொடர்ந்து பார்க்கவேண்டியதாகிறது. கதாநாயகன் / கதாநாயகி இவர்கள் எல்லோரும் ஏன் ஜெயிலில் எப்போது பார்த்தாலும் அசுத்த டாய்லெட் கழுவ அல்லது உபயோகிக்க வேண்டி வருகிறதோ தெரியவில்லை. 

எல்லோரும் தாராளமாக F**k, F****r, M****r F****r போன்ற வார்த்தைகளை உதிர்க்கிறார்கள். என்ன கண்றாவிடா இது  :(( 

முதல் episode ல ஒரு ஆபாசக் காட்சி + தொடர்ந்து ஒரு கொலை + கைது செய்யப்பட்டவர் அப்பாவி - அப்போ கொலை செய்தது யார்? ஒரு லாயர் மற்றும் அவரது உதவியாளர், கைது செய்யப்பட்டவரை விடுவிக்க செய்யும் முயற்சிகள் இவை யாவும் Perry Mason type கதையாக இருந்தாலும் Erle Stanley Gardner நாவல்களில் இருந்த decency, சட்ட நுணுக்கங்கள், வாதாடும் திறமைகள் எல்லாமே இந்த criminal justice சீரியலில் கடுகளவும் இல்லை. 

= = = = = = = = = = = =