நல்ல பச்சரிசி இப்போ கிலோ ஐம்பது ரூபாய் முதல் எழுபது ரூபாய் வரையிலும் விற்கப்படுகிறது. (இன்னும் ஐம்பது வருடங்கள் கழித்து, அதாகப்பட்டது கி பி இரண்டாயிரத்து அறுபத்தைந்தில் இந்தப்பதிவை கூகிள் மூலம் தேடி யாராவது படித்தால், 'அட! அரிசி இவ்வளவு விலை குறைவாக அந்தக்காலத்தில் கிடைத்திருக்கின்றதா!' என்று அதிசயப்படுவார்கள்!)
பச்சரிசி இருநூறு கிராம் எடுத்துக்குங்க.
நல்ல தண்ணீரில் கழுவி (அரிசி கழுவுவது என்றால், ஓரிருமுறையாவது தண்ணீர்விட்டு, கலக்கி, தண்ணீர் கலங்கல் எதுவுமின்றி ஆகும்வரைக் கழுவுவதாம். ) அறுநூறு அல்லது எழுநூறு மி லி தண்ணீர் இட்டு, பிரஷர் குக்கரில் வைத்து, சாதம் வடித்துக்கொள்ளவும்.
ஒரு பெரிய தேங்காயின் ஒரு மூடியை மட்டும் எடுத்து, தேங்காயைத் துருவி எடுத்துக்கொள்ளவும். எடுத்துகிட்டீங்களா? (தேங்காய் துருவுவதற்கு, இதுவரையில் நல்ல மெஷின் எதுவும் அமையவில்லை. வாங்கிய மெஷின் எதுவுமே ஆறு மாதத்திற்கு மேலே உருப்படியாக வேலை செய்யவில்லை. திருவண்ணாமலை பக்கம் வாங்கிய அருவாமணையின் (ஸ்பெல்லிங் சரியா?) ஆதிசேஷத் தலைப்பகுதிதான் இப்பவும் தேங்காய்த் துருவ வாகாக உள்ளது!)
ஒரு வாணலியை அடுப்பில் வையுங்க. ஒரு கரண்டி நல்லெண்ணெய் விடுங்க. எண்ணெய் காய்ந்ததும், ஒரு டீஸ்பூன் கடுகு அதில் போடுங்க. கடுகு வெடித்ததும், மூன்று மிளகாய் வற்றலைக் கிள்ளிப் போட்டு, ஒரு டீஸ்பூன் வெ உளுத்தம்பருப்பைப் போட்டு, ஒரு மேசைக்கரண்டி கடலைப்பருப்பு, ஐம்பது கிராம் நிலக்கடலை, (துட்டு அதிகமா இருக்கறவங்க நிலக்கடலைக்கு பதில் முந்திரிப் பருப்பு போடலாம்!) துருவி வைத்த தேங்காய், சுண்டைக்காய் அளவு பெருங்காயம், இருபது கறிவேப்பிலை, எல்லாவற்றையும் போட்டு, வாட்டவும். தேங்காய்த் துருவல் பொன்னிறமாக வறுபட்டதும், சாதத்தில் கொட்டிக் கரண்டியால் கிளறவும். தேவைக்கேற்ப உப்புப் பொடியைச் சேர்த்துக் கிளறவும்.
இதுதான் தே சா. சமைத்துச் சுவைத்துப் பாருங்கள்.
