ஒருமுறை சிவாஜி கணேசன் ஒரு வெளிநாட்டுக்
கார் வாங்கி விட்டு, அதை யாரும் தொடக் கூடாது, அப்படி, இப்படி என்று பந்தா
பண்ணிக் கொண்டிருந்தாராம். இந்த பந்தா ஓவராகப் போவதாக நினைத்த எம் ஆர்
ராதா அதே வெளிநாட்டுக் காரை, தானும் வாங்கி, அதில் வைக்கோல், சாணம்,
கன்னுக்குட்டி, மாடு என்று ஏற்றிக் கொண்டு சிவாஜி கணேசன் கண்ணில் படும்
வகையில் ஒட்டிக் கொண்டு போனாராம்.
உண்மையோ, பொய்யோ.. உண்மையாயிருந்தால் சிவாஜி வெறுத்துப் போயிருப்பார். அப்புறம் சிவாஜி என்ன செய்தாரோ?
பொய்யாயிருந்தாலும் சுவாரஸ்யமான கற்பனைதான். அவரவர் குண
நலத்துக்கேற்றவாறு கற்பனை செய்ய முடிகிறது அல்லவா?
சந்திரபாபு
உச்சத்திலிருந்தபோது காரை நேராக மாடிக்கே ஒட்டிக் கொண்டு போவது போல வீடு
கட்டியிருந்தாராம். சந்திரபாபு எம் ஜி ஆரை நம்பி படம் எடுக்க நினைத்து,
முதலில் ஒத்துக்கொண்ட எம் ஜி ஆர் பின்னர் கை விட்டதால் ஏழையாகிப் போனார் என்று சொல்வார்கள். அவர் எடுத்த படத்தின் பெயர் கூட 'மாடி வீட்டு ஏழை'. 
அதிலும் இரண்டு கருத்து உண்டு. சந்திரபாபு எம் ஜி ஆரை 'மிஸ்டர் ராமச்சந்தர்' என்றுதான் கூப்பிடுவார் என்றும், அதை விரும்பாத எம் ஜி ஆர் இப்படிச் செய்து விட்டார் என்பார்கள். சந்திரபாபு திரையுலகில் எம் ஜி ஆருக்கும் சீனியர், அவர் எல்லோரையுமே பெயர் சொல்லித்தான் கூப்பிடுவார் என்பது ஒருபுறம் இருக்க,
இதே சம்பவத்துக்கு இன்னொரு பக்கத்தையும் ஃபேஸ்புக்கில் ஒரு நண்பர் சொல்லி இருந்தார். அதாவது சந்திரபாபு 'தட்டுங்கள் திறக்கப்படும்' என்ற படத்தை இயக்கி நடித்திருந்தார். அதைப் பார்த்த எம் ஜி ஆர் ரிஸ்க் எடுக்க விரும்பாமல் 'மாடி வீட்டு ஏழை' படத்தில் நடிக்கும் வாய்ப்பிலிருந்து நழுவி விட்டார் என்பார்கள். ஆனால் அந்த 'தட்டுங்கள் திறக்கப்படும்' படத்தில் சந்திரபாபு பாடும் ஒரு பாடல் எனக்கு மிகவும் பிடிக்கும்.
"கண்மணி பப்பா... மனிதன் பிறந்தது குரங்குக்குத்தான் என சொன்னது தப்பா...
கண்மணி பப்பா...கோழி பிறந்தது முட்டையில் என்று சொன்னது தப்பா...."
கண்மணி பப்பா...கோழி பிறந்தது முட்டையில் என்று சொன்னது தப்பா...."
எதையோ சொல்ல வந்து எங்கேயோ வந்து விட்டேன். சந்திரபாபு காரை வீட்டுக்குள்ளேயே மாடிக்குக் கொண்டு போகும் விஷயத்தைப் படித்தபோது எனக்கு 'எங்கள் தங்க ராஜா' படக் காட்சி நினைவுக்கு வந்தது.
