கஜா புயலில் வீடிழந்த சஹானா பள்ளியிலேயே தங்கி ....

1)  ".........அதுமட்டுமின்றி, தனிமையில் இருக்கும் வயதானவர்கள், ஆண்கள் உடன் இல்லாது இருக்கக் கூடியவர்கள், கைக் குழந்தைகளை வைத்திருக்கும் பெண்களுக்குத் தேவையான மருந்தை, அவர்கள் கேட்கும் மருந்து கடைகளில் இருந்து, வாங்கிக் கொடுக்கிறோம்...."

சென்னை, மேடவாக்கம் அடுத்த விக்னராஜபுரத்தில், சமூக சேவை செய்து வரும், பாரதி.

2)  வறுமையில் வாடும் வயதான முனியதங்கம் 78, தங்கப்பம்மாள் 70, தம்பதி ராமேஸ்வரம் ராமநாதசுவாமி கோயிலுக்கு ரூ.1.85 லட்சத்தை நன்கொடையாக வழங்கினார்.

3)  கஜா புயலில் வீடிழந்த சஹானா பள்ளியிலேயே தங்கி மின்சாரம் இல்லாத நிலையிலும் படித்து 600க்கு 524 மதிப்பெண் பெற்றிருந்ததைப் பாராட்டி ட்வீட் செய்திருந்ததை பார்த்த நடிகர் சிவகார்த்திகேயன்...

============================================================================================

சென்ற வார பதிவுகளின் விமர்சனம் - (27/4/19 - 3/5/19) இந்த வாரம் விமர்சிப்பவர் கீதா சாம்பசிவம் அக்கா.


"ஶ்ரீராம் பொறுப்பைச் சுமத்தி விட்டார். என்னால் முடியுமானு சந்தேகம் தான். சொல்லிப் பார்த்தேன், கேட்கலை!  என் எழுத்தை எல்லோரும் என்ன தான் பாராட்டினாலும் உண்மையான நிலைமை என்ன என்பது எனக்குத் தான் எனக்கு மட்டும் தான் தெரியும். அதோட எனக்குச் சுருக்கமாச் சொல்லவோ, எழுதவோ வராது! துணிந்து நில் மனமே! என மனசுக்குள் சொல்லிக் கொண்டே ஆரம்பிக்கிறேன்.

சனிக்கிழமை பாசிடிவ் செய்திகள்:  ஒரு காலத்தில் ஶ்ரீராம் இதை நிறுத்திடலாமா என யோசித்துக் கொண்டிருந்தார். அந்த அளவுக்குக் காற்றாடிக் கொண்டு இருந்தது. ஆனாலும் நிறுத்தாமல் தொடர்வது அவர் மனோபலத்தைக் காட்டுகிறது. தொடர்ந்து சனிக்கிழமைகளிலும் கருத்துகள் குவிகின்றன.  இந்தச் சனிக்கிழமை 27 ஏப்ரல் செய்திகளில் உயரம் குறைந்த பெண்ணுக்கு உதவிய கைதியைப் பற்றியும் பக்ஷிகளுக்கு உணவளிப்பதைக் குறித்தும் சொல்லி இருக்கார். பலரும் இப்படிப் பறவைகளைப் பராமரிப்பது குறித்தும் உணவு அளிப்பது குறித்தும் முகநூல் மூலமோ பதிவுகள் மூலமோ அறிந்து சந்தோஷமாகவே இருக்கிறது. சிறைக்கைதி ஒருவர் சிறையில் இருந்த வண்ணமே தனக்குக் கிடைத்த சம்பளத்தில் மாற்றுத் திறனாளிக்கு உதவியது பாராட்டத்தக்கது. இத்தகைய செய்திகளை தினசரிகளில் அல்லது இணையத்தில் தேட வேண்டும். தேடித் தேடிப் போடும் ஶ்ரீராமுக்குப் பாராட்டுகள். 

அன்றைய தினத்துடன் முடியும் அந்த வாரத்துக்கான விமரிசனத்தைத் திரு நெ.த. செய்திருக்கார். அவர் எழுத்துத் திறமை குறித்துச் சொல்லவே வேண்டாம். எல்லாக்கிழமைகளையும் வரிசையாக அலசி இருக்கார்.  அன்றைய தினம் நான் போன இடங்களில் எல்லாம் யாருமே வராமல் நானே முதல் ஆளாக இருந்திருக்கேன் என்பதை என்னோட முதல் கருத்து வெளியீட்டில் இருந்து தெரிய வருகிறது. அதோடு அடுத்த வாரத்துக்கான விமரிசன எழுத்தாளர் குறித்த என்னோட யூகம் தப்பாகி விட்டது!  இந்தப் புதிய வாசகர்களால் விமரிசனம் எழுதும் பகுதி எல்லோராலும் பாராட்டப்பட்டிருக்கிறது. எங்கள் ப்ளாகின் ஆசிரியர்களில் ஒருவரான கௌதமன் கூடப் பாராட்டி உள்ளார். என்ன ஆச்சரியம்னா ஶ்ரீராமுக்கு இருக்கிற வேலைத் தொந்திரவில் ஒவ்வொருத்தருக்கும் மெயில் போட்டோ, தொலைபேசியில் பேசியோ அல்லது வாட்சப் மூலமோ அவர்களிடம் இருந்து கதையைக் கேட்டுத் தேவை எனில் அதை எடிட் செய்து சரியான படங்களைப் போட்டுக் கதைத் தலைப்பையும் பல சமயங்களில் தேர்ந்தெடுத்து! ஒரு பத்திரிகை ஆசிரியருக்கு உள்ள பணியை ஶ்ரீராம் செவ்வனே செய்து வருகிறார். இது வெறும் புகழ்ச்சி அல்ல. 

அதே சமயம் நம்ம டிடி தான் நெல்லைத் தமிழர் தனியாக வலைப்பூ வைத்துக் கொண்டு ஏன் எழுதவில்லை என்று யோசிக்கிறார். நியாயம் தான். ஆனால் நெல்லைத் தமிழருக்கு அதில் ஏதோ பிரச்னை இருக்கலாம். காரணம் இல்லாமல் இருக்காது என்றே நினைக்கிறேன். அவர் எல்லோரது வலைப்பக்கமும் வந்து கருத்துச் சொல்வதும் தனியாக வலைப்பதிவு ஆரம்பிப்பதும் வேறு வேறு! இதனால் அவருக்கு என்ன அசௌகரியமோ! நமக்குத் தெரியாது! இது ஒரு பெரிய விஷயமே இல்லை.  அது அவருடைய வசதி! அவருடைய பிரச்னை! .

ஞாயிற்றுக் கிழமை! இந்த வாரமும் கேஜிஎஸ்ஸின் படங்கள். தலைப்புகள் ஶ்ரீராம் கொடுத்த மாதிரியும் இருக்கு. கேஜிஎஸ்ஸே கூடக் கொடுத்திருக்கலாம். சில படங்கள் தெளிவாக இல்லை. நான் எடுத்தாப்போல் இருக்கு. இஃகி,இஃகி,இஃகி. அநேகமாகக் கேஜிஎஸ்ஸின் பேரன்கள் யாரானும் எடுத்திருப்பாங்களோ? இன்னமும் ஷில்லாங்கை விட்டுப் போகலை. ஷில்லாங்கிற்குள் நுழையவே இல்லை. அப்புறம் வேறு படங்களுக்கு எங்கே போவது?

இதில் வந்திருக்கும் கருத்துக்களில் பெரும்பாலோருக்கு இந்தப் பதிவிற்கான கருத்துச் சொல்வதில் ஆர்வம் இல்லை. மாறாக சந்நியாசிகள், பிச்சைக்காரர்கள், தெருவோரங்களில் படுத்திருப்போர் ஆகியோருக்கு வாக்குரிமை இருக்கா/இல்லையா என்னும் கேள்விகளுக்கு பதில் தேடிக் கொண்டிருந்தார்கள். ஆரம்பித்து வைத்தது ஶ்ரீராம்,  ஶ்ரீராமின் பாஸ் வாக்களிக்கச் சென்றபோது கேட்டதாகச் சொன்னார். ! :) விடை கிடைக்காத கொடுக்க முடியாத கேள்வி! சிலர் இந்த விமரிசனப் பகுதியைப் பாராட்டிக் கருத்துச் சொல்லி இருக்கின்றனர். பலரும் இதை வரவேற்றிருக்கிறார்கள். ஷில்லாங் தவிர்த்து மற்ற ஊர்களின் படங்கள் அல்லது சமீபத்துக் காசி யாத்திரையின் படங்கள் எனப் பலரின்/என்னுடையதும் கூட எதிர்பார்ப்பு! வரும்நாட்களில் ஶ்ரீராம் பூர்த்தி செய்வார் என எதிர்பார்க்கலாம். ஆனாலும் இந்தப் பக்கத்தில் முன்னால் எல்லாம் கௌதமன் மட்டும் ஒரு குறிப்பிட்ட தலைப்பில் ஒரே ஒரு படத்தைப் பகிர்ந்திருப்பார். அதுக்குப் போட்டியாக ஒரு படத்தை நானும் கொஞ்ச நாட்கள் போட்டுக் கொண்டிருந்தேன். ஒவ்வொரு நாளைக்கு ஒவ்வொரு விதமான பதிவு எனப் பிரித்து வைத்துக் கொண்டு பதிவுகள் போட்டு அதைப் பற்றி அலசுவதும் பலருடைய மாறுபட்ட கருத்துகளைக் கேட்பதும், ஒரு சிலர் தாங்கள் சென்று வந்த நினைவுகளைப் பகிர்வதுமாக இந்தப் பதிவுகளும் களைகட்டுகின்றன. 

திங்கட்கிழமை. "திங்க"ற கிழமை! இதை ஆரம்பிச்சு வைச்ச கௌதமன் எங்கேயோ ஒதுங்கிவிட, முதலில் தான் மட்டும் அனுபவித்துச் சாப்பிட்ட உணவு வகைகளைப் பற்றிய குறிப்புக்களைக் கொடுத்து வந்த ஶ்ரீராம் எப்போது எனச் சொல்ல முடியாத சமயத்தில் இதைப் பொதுவான பதிவாக மாற்றி இருக்கார். ஆலோசனை கொடுத்தது யாராக இருந்தாலும் பாராட்டத்தக்கது.  இது ஜாம் ஜாமென்று வாசகர்கள் பலரும் பகிர்ந்து கொள்ளும் வண்ணம்  சக்கைப் போடு போடுகிறது. பல சமையல் குறிப்புக்களும் தெரிந்தவை என்றாலும் அவரவர் பாணியில் மாறுபாடுகள் உள்ளன. பல்வேறு விதமான மாறுபாடுகளுடன் கருத்துகள் பகிரப்படுகின்றன. உண்மையில் பயனுள்ள பதிவு. சமையல் கற்றுக் கொள்பவர்களுக்கும், மாறுபட்ட சமையல் செய்பவர்களுக்கும் ஏற்றது. இந்த வாரம் யார் சமையல்னு எதிர்பார்க்க வைக்கும். இந்த வாரம் பானுமதியாக இருக்கலாம் என நினைத்தே வந்தேன். எதிர்பார்த்ததே நடந்திருக்கிறது. சமையலும் முற்றிலும் எதிர்பாராதது. வாழைத்தண்டில் புளி சேர்த்துக் கொ.ம.விதை. மி.வற்றல், வெந்தயம் தேங்காய் எல்லாம் அரைச்சு விட்டுப் பண்ணினதே இல்லை! ஒரு முறை பண்ணணும். எங்கே! நம்மவர் தான் ஓட்டமா ஓடறாரே! 

பலரும் இந்தக்குறிப்புத் தெரிஞ்சிருக்குனு சொல்றாங்க. எங்க குடியிருப்புத் திருநெல்வேலி மாமி இது பத்திச் சொல்லலை! இதுக்கு அவ்வளவாக் கருத்துகள் வரலை. தி/கீதா இல்லை. ஏற்கெனவே அதிரடியும், அஞ்சுவும் வரதில்லை. இவங்க 3 பேரும் தான் அதிகம் கருத்துச் சொல்லுவாங்க. அதோடு அதிரடியும், ஏஞ்சலும் மாறி மாறி ஒருத்தரை ஒருத்தர் வாயைக் கிண்டி பதிலை வரவழைப்பாங்க. அது இல்லை! கொஞ்சம் சுவாரசியம் கம்மி தான். ஆனால் அவரவருக்கு அவரவர் வேலையும் முக்கியமே! இந்த வாழைத்தண்டில் பருப்பு உசிலி, வடை, அடை எல்லாம் கூடச் செய்வதாகக் கமலா ஹரிஹரன் சொல்கிறார். உண்மையாகவே ஆச்சரியம் தான் எனக்கு. இந்தச் செய்முறை காமாட்சி அம்மாவோட பிட்லையை ஒத்திருந்தாலும் அதில் மோர் கிடையாது. இம்மாதிரிப் பல்வேறு விதமான பாரம்பரிய சமையல் குறிப்புகள் ஒவ்வொருவரிடமும் இருக்கும். ஆகவே  இதில் ஆர்வமாக இன்னும் பலர் பங்கு கொள்ள வேண்டும். கோமதி அரசு, வல்லி சிம்ஹன், மிகிமா, மனோ சாமிநாதன், ஆகியோர் அதிகம் சமையல் குறிப்பு இதில் எழுதுவதில்லை. காணாமல் போய்த் திரும்ப வந்திருக்கும் அதிரடி எப்போவானும் எழுதுவார். அவர் "செக்"கும்! இவங்க இரண்டு பேரும் வந்தாலே போதும். சபை நிறைஞ்சுடும்! :))))  ஆண்களும் பங்கு பெறலாம். துரைக்கு நிறையத் தெரியும். அவர் பங்கெடுக்கலாம். வெங்கட் மற்றும் அவர் மனைவி போன்றோர் பங்கெடுக்கலாம். டிடி கூடக் கேட்டு எழுதலாம். 

செவ்வாய்க்கிழமை:- இன்னிக்கு ரிஷபனோட கதையா இருக்குமோனு நினைச்சேன். ஆரண்யநிவாஸ் ராமமூர்த்தி அவர்களின் கதை! சுருக்கமான கதை தான். இன்றைய அரசியல் நிலவரத்தைப் பிட்டுப் பிட்டு வைக்கும் பத்திரிகையாளரின் கையை வெட்டுவது குறித்து! இதைப் படித்ததும் பக்கத்துக் கேரள மாநிலத்தில் இப்படி ஓர் நிகழ்ச்சி நடந்தது நினைவில் வந்தது. இந்தக் கதையில் வலக்கை வெட்டுண்ட அந்தப் பத்திரிகையாளர் தான் இடக்கைப் பழக்கம் உள்ளவர் என்கிறார். கை வெட்டையும் தாங்கிக் கொண்டு இப்படிச் சொல்கிறார். உயிரைக் கொடுத்தானும் இப்படி எல்லாம் எழுதணுமா எனத் தோன்றுகிறது. என்ன எழுதினாலும் எல்லோரும்/எல்லாமும் மாறவும் போவதில்லை/திருந்தவும் போவதில்லை. எது நடக்குமோ அது நன்றாகவே நடக்கும். (கீதை அல்ல). இதைப் படித்த வாசகர்கள்  எல்லோருமே முடிவைக் கண்டு பயந்து கதை எழுதுபவரைத் தங்கள் சொந்தம் போல் நினைத்து எச்சரிக்கை கொடுத்திருக்காங்க. இதிலே டிடியையும் ஒரு கதை எழுதித் தரச் சொல்லி ஶ்ரீராம் கேட்டிருப்பதாக ஒரு பின்னூட்டத்தில் படிச்சேன். குறள்களை வைத்து விளையாடும் டிடி பொருத்தமானதொரு குறளையும் அதற்கேற்ற கதையையும் அளிப்பார் என நம்புவோம். 

இதற்கும் அதிகக் கருத்துகள் வரவில்லை. இன்றைக்கும் நான் மட்டும் முன்னாடியே வந்திருக்கேன் போல! எல்லோருமே கதை நாயகனை எச்சரித்திருக்கின்றனர் என்பதில் இருந்து அந்த நாயகன் வீட்டு மனிதர்களில் ஒருவர் போல் நினைக்கிறார்கள் என்பது தெரிகிறது.

புதன் கிழமை:- கேள்வி, பதில்வாரம். கௌதமனுக்கே ஆன தினம். இவரோட புதிர்கள் மிக நன்றாக இருக்கும். யோசிக்க வைக்கும். அப்படி ஒண்ணும் நான் சிறப்பாகச் சொன்னதில்லை என்றாலும் புதிர்களையும் விடைகளையும் ஆவலுடன் எதிர்பார்ப்பேன். ஆனால் விடை அளிக்க மாடரேஷன் வைக்க மாட்டார். மாடரேஷன் வைத்தால் தான் ஆர்வம் கூடும். ஆனால் இந்தப் பக்கம் இப்போது கேள்விகள் பக்கமாக மாறி விட்டது. அரசு கேள்வி பதிலெல்லாம் ஒண்ணுமே இல்லை.  எப்போவும் அதிகக் கேள்விகள் கேட்கும் அஞ்சு இப்போ விடுமுறை. அதனாலும் இன்னும் சில காரணங்களாலும் நான் சென்ற வாரம் கேள்விகள் கேட்டிருந்தேன். அதில் தற்காலத்தில் முதிர்கன்னர்கள் இருப்பதன் காரணம் கேட்டிருந்தேன். இன்னும் நெல்லைத் தமிழர், பானுமதி ஆகியோரும் கேள்விகள் கேட்டிருந்தனர். வல்லியும் கேட்டிருந்தார். பொன்னியின் செல்வன் படம் குறித்த கேள்வி. கில்லர்ஜி கூட அதிசயமாக் கேட்டிருந்தார்னா டிடியும் கேட்டிருக்காரே! பொன்னியின் செல்வன் கதாபாத்திரங்களை எங்கள் ப்ளாக் வாசகர்களில் யார், யார் எந்தக் கதாபாத்திரம் ஏற்கலாம் என!

அநேகமா எல்லாக் கேள்விகளுக்கும் # கேஜிஒய்? பதில் சொல்லி இருக்கார்.  நாத்தனாரைக் கண்டு பயப்பட்ட பெண்ணைப் பற்றிய கேள்விக்கு உளவியல் ரீதியாக ஆராயணும் எனச் # சொல்லி இருக்கார். ஆனால் அந்தப் பெண் அப்படி எல்லாம் பயப்படும் பெண்ணே அல்ல! நாங்க கேட்டதுக்கு அவள் சொன்ன காரணம் நாத்தனார் இருந்தால் அவங்க வேலையையும் நம்ம வேலையையும் ஒப்பிட்டுப் பார்த்துப்  பார்த்து நாம் செய்வது சரியில்லை என்பார்கள்.நாத்தனாரே இல்லைனா இந்தப் பிரச்னையே இல்லை என்பது.  ஆனால் இந்தப் பெண்ணும் இப்போது ஒரு நாத்தனார் தான்! :) மன்னியிடம் எப்படி நடந்துக்கறார்னு தெரியலை!   & இவரும் இந்த வாரம் அநேகமா எல்லாக் கேள்விகளும் அட்டென்ட் பண்ணி இருக்கார். சாய்ஸிலே விடலை! சாய்ஸிலே விட்டிருப்பது & தான். அதாவது நம்ம கேஜிஜி. நாத்தனார் பற்றிய கேள்விக்குப் பதிலே சொல்லலை!  ஒரே குழந்தை போதும் என்னும் நினைப்பு சரியாஎன்னும் கேள்விக்கும் பதில் சொல்லலை! நழுவிட்டார்.

திரைப்படம் பற்றிய கேள்விக்கு கேஜிஎஸ் $ 4,5,6,7 எல்லாக் கேள்விகளுக்கும் சேர்த்து ஒரே பதில் ! சினிமா டிக்கெட் பற்றிக் கேஜிஜி சொன்ன கருத்துக்களோடு நான் முற்றிலும் ஒத்துப் போகிறேன். இன்று திடீரென அதிரடியாக் களத்தில் இறங்கிட்டார் அதிரா! ஆகவே கருத்துகள் 200 ஐத் தாண்டும் அபாயம் இருப்பதால் எச்சரிக்கையுடன் பாதுகாப்பான இடத்துக்கு நகர்கிறேன். கூடவே வந்த அஞ்சுவும் கேள்வியின் நாயகியாக மாறிக் கேள்விகளைக் கேட்டிருக்கார்.  தன்னோட பெண் பிறந்த நினைவையும் கல்யாண நாள் நினைவையும் பகிர்ந்தது அருமை. நீடூழி வாழ்க! தி/கீதா வராதது குறித்த கேள்விகள், பதில்கள்! அநேகமாக ஶ்ரீராம் தி/கீதாவுக்கு அவரைக் காணோம்னு பேப்பரிலோ தொலைக்காட்சியிலோ போடப்போறாங்கனு சொல்லி இருப்பார்.

 நாத்திக வாதம் பற்றிய பானுமதியின் கேள்விக்குக் கேஜிஜியின் பதில் அருமை. அதே போல் பிறரைப் பார்த்து அ/ஆ/அ பட்டீர்களா என்னும் கேள்விக்கான கேஜிஜியின் பதில் உண்மை, முற்றிலும் உண்மை! அன்றைய தினம் மே ஒன்றாம் தேதி உழைப்பாளர் தினம் என்பதால் அது பற்றியே எங்கெங்கு போனாலும் பேச்சு. உண்மையில் உழைப்பவர்கள் உழைத்துக் கொண்டே தான் இருப்பார்கள்/ இருந்தார்கள்/இருக்கிறார்கள். தினம் மட்டும் வருஷா வருஷம் வந்து கொண்டே இருக்கிறது. முதிர்கன்னர்கள் பற்றிய கேள்விக்கு பானுமதி ஜோதிட ரீதியாகக் காரணங்களை அலசி இருக்கிறார். அவர் சொன்னது பலருக்குச் சரியாக இருக்கலாம். ஆபாசப்படங்கள் குறித்த ஆதங்கத்தைக் கில்லர்ஜி வெளிப்படுத்தி இருக்கார்! எல்லாம் செவிடன் காதில் ஊதிய சங்கு தான்! அரசாங்கம் தணிக்கைத் துறைனு ஒண்ணு வைச்சிருக்கு! அது என்ன செய்யுது? ஆபாசம்னா அதை வெட்டலாம் அல்லது காட்சியை நீக்கச் சொல்லலாம். ஆனால் செய்வதில்லை. ஒரு புதிய திரைப்படத்துக்குச் செலவிடுவது குறித்த அவரவர் கருத்தைப் பகிர்ந்திருக்கிறார்கள். இதில் கௌதமன் சாரின் கருத்து என் கருத்தோடு ஒத்துப் போகிறது. திரைப்படம் பார்க்காமல் இருந்துடலாம். ஆனால் அத்தியாவசியப் பொருட்களுக்குக் காசு இல்லாமல் சாப்பிடாமல் இருக்க முடியுமா? எனக்குத் தெரிந்து ஒரு காலத்தில்  கடன் வாங்கிக் கொண்டு திரைப்படம் போனவர்களைப் பார்த்திருக்கேன். 

வியாழக்கிழமை:- இன்றைய நாள் ஶ்ரீராமுக்கே ஆன சொந்த நாள். முற்றிலும் அவர் படைப்புக்களே இடம் பெறும். காசி யாத்திரை பற்றி எழுத ஆரம்பித்திருக்கிறார். இன்னும் போய்ச் சேரவில்லை. ரயிலிலேயே இருக்கார். சங்கமித்ரா எக்ஸ்ப்ரஸ் சென்னை சென்ட்ரலில் இருந்து கிளம்ப வேண்டும் என நினைக்கிறேன். அது ஏன் அங்கே வரலை? அதோட  பினாகினி எக்ஸ்ப்ரஸில் கூடூர் போய் சங்கமித்ராவை அங்கே பிடிச்சவங்க எத்தனை பேர்? ஜெயலக்ஷ்மி யாத்ரா ட்ராவல்ஸ்காரங்க எல்லோரும் இல்லைனு நினைக்கிறேன். அப்போ ஶ்ரீராம் மற்றும் அவர் உறவினர்கள் கொண்ட குழு மட்டும் பினாகினியில் போனாங்களா? ஏன்? மத்தவங்க மட்டும் எப்படி சங்கமித்ராவில் ஏற்கெனவே ஏறினாங்க? மண்டையை உடைச்சுட்டு இருக்கேன். அன்னிக்கே ஶ்ரீராமைக் கேட்கலாம்னா கம்பைத் தூக்குவாரோனு பயம்! 

இத்தகைய நீண்ட யாத்திரைக்குக் கொண்டு போக வேண்டிய பொருட்கள் பட்டியலில் எட்டுமுழம் வேஷ்டி 2 இருந்தால் போதும். அதிகம் சுமந்திருக்கார். அது சரி,பொருட்களைத் திருப்பித் திருப்பிப் பார்த்த அப்பாஸ் அலி யாராக்கும்?கேடரரின் சேவையைப் பாராட்டி இருக்கார். ஏன் அவங்களோடயே திரும்பலை?விமானத்தில் வரும்போது கங்கைத் தண்ணீர் கான் (can) கொண்டு வர முடிந்ததா?கஸ்டம்ஸில் ஆட்சேபிக்கவில்லையா? நாங்க மானசரோவர் தண்ணீர் கொண்டு வந்தப்போக் காபினில்வைச்சுப்போம் என்றதுக்கு நேபாள் காத்மாண்டுவில் ஒத்துக் கொண்டார்கள். தில்லியில் கஸ்டம்ஸில் அதைக் கொட்டிடுவாங்கனு கூட வந்த எல்லோரும் சொல்லி எல்லோரும் மானசரோவர் தண்ணீர் கான்களைக் (can) கார்கோவில் போட்டாங்க! ஆனால் என்ன துரதிர்ஷ்டம்!அவங்க (can) கானெல்லாம் உடைஞ்சு தண்ணீர் கொட்டிக் கொண்டு வந்தது. நாங்க கையில் அப்படியே பத்த்த்திரமாக் கொண்டு வந்தோம். இப்போப் போனால் விமானத்தில் கங்கை நீரைக் கொண்டு வர அனுமதிக்கிறாங்களா? 

ஶ்ரீராம் பல்லைக் கடிக்கிறார்.இன்னும் போயே சேரலை! அதுக்குள்ளே திரும்ப வரதைப் பத்திக் கேட்கிறாங்களேனு. சங்கமித்ராவில் போய் உட்கார்ந்ததும் , இல்லை, இல்லை  பினாகினியிலேயே சாப்பாடு கொடுத்ததைச் சொல்றார். ஆறிப் போயிருக்காது?  சங்கமித்ராவில் இன்னும் ஏறவே இல்லை. ஹிஹி, அந்தச் சமயம் நாங்க தேஜஸில் போயிட்டு இருந்தோம். புல்லாங்குழல் உடைஞ்ச கவிதை பகிர்ந்திருக்கார். கண்ணன் எங்கேனு சொல்லவே இல்லை. "இங்கிட்டு அங்கிட்டு" திரும்பாமல் அவர் பையர் பேசுவதைக் கேட்கணும்னு சொல்றார். ஹிஹிஹி, அம்மூருத் தமிழ்! 

ஶ்ரீராம் அப்பாவின் படத்தைப் போட்டுட்டு நினைவு கூர்ந்திருக்கார். Better late than never. ஶ்ரீராமின் ஜாடையை அவர் அப்பா மாதிரினு எல்லோரும் சொல்லி இருக்காங்க. எப்படி இருந்தாலும் அடுத்த முறையும் நான் ஶ்ரீராமைப் பார்த்தால் கூடவே அவரோட பாஸ் வந்தால் தான் அடையாளம் காண முடியும்! இஃகி, இஃகி, இஃகி! 

கருத்துகள் குவிஞ்சிருப்பதால் அதை அதிகம் அலசலை. ஆனால் முக்கிய விஷயம் தி/கீதா இன்னும் வரலையே எனத் தேடியது! பரம்பரை பரம்பரையாகத் தாத்தா, பாட்டிகளின் mannerism (சரியான தமிழ்ச் சொல் எது?) பேரக்குழந்தைகளுக்கு வருவது பற்றிய உரையாடல் அருமை!  இதன் மூலம் துரை, அழகுத் தமிழில் உள்ள கட்டுமான வேலைகளுக்குப் பயன்படும் வார்த்தைகளைப் பகிர்ந்திருக்கிறார்.தெரியாதவங்க தெரிஞ்சுக்கலாம். அதை வைத்து நெல்லைத் தமிழர் நம்மாழ்வார் பாசுரத்தை நினைவு கூர்ந்திருக்கார். அதிரடி தம் இலங்கை நினைவுகளை அழகாகச் சொல்லி இருக்கார் இலங்கைத் தமிழில். காமாட்சி அம்மாவும் பரம்பரை பற்றி நினைவு கூர்ந்திருக்கார்.

இந்தப் பதிவின் மூலம் பலரின் பயணங்கள், அவர்கள் உடை உடுத்தும் விதங்கள், தலைக்கு டை தேவையா இல்லையா என்பது முதல் அனைத்தும் விவாதிக்கப் பட்டுள்ளது. சாதாரணமாய் நேரில் பேசுகையிலேயே ஆரம்பிக்கும் தலைப்பை விட்டு விலகி எங்கோ போயிடுவோம். இதில் கேட்கவே வேண்டாம்.

அடுத்து வெள்ளிக்கிழமைப் பதிவு வழக்கமான  திரைப்பாடல் பகிர்வு. சுஹாசினி நடிச்சதாம்! எங்கே நடிச்சார்? அது என்னமோ தெரியலை, யாரோ சொன்னாங்களோ என்னமோ! மூக்கைச் சுருக்கிக் கொண்டு ஒரு சிரிப்பு க்ளோசப்பில் காட்டுவாங்க! பயம்ம்ம்ம்ம்ம்மா இருக்கும். சுஹாசினி படங்களை நான் தொலைக்காட்சி தயவில் பார்த்திருக்கேன். இப்படி எல்லாம் படம் வந்திருப்பதே ஶ்ரீராமால் தெரிஞ்சுக்கறோம். அவர் என்னமோ பாடலுக்காகப்பகிர்கிறார். ஆனால் நாம் படத்தைத் தான் நினைக்கிறோம். இந்தப் பாடலுக்கு. தி/கீதா இருந்திருந்தால் ராகத்தைப் பிரித்து மேய்ந்திருப்பார். அவர் இல்லை, ஆனால் ரேவதி ராகம் என ஶ்ரீராமுக்கு மெயில் அனுப்பி இருக்காராம். யாரும் இந்தப் பாடலைக் கேட்டதாகச் சொல்லக் காணோம். 

எங்கெங்கோவெல்லாம் அலைந்து திரிந்து இணையத்தில் தேடித் தேடிப் பாடல்களை வெளியிடும் ஶ்ரீராமுக்குப் பாராட்டுகள். இதுக்கெல்லாம் நேரத்துக்கு என்ன செய்கிறார்? பானுமதி ஒரு பக்கம், தி/கீதா ஒரு பக்கம் கலந்து பேசிக் கதை ஒரே மாதிரி எழுதுகின்றனர். யோசித்து எழுத அரை மணி நேரமாவது வேண்டாமா? கமலா ஹரிஹரன் இரவில் உட்கார்ந்து பதிவுகளைப் படித்துப் பின்னூட்டம் போடுவேன் என்கிறார். எப்போத் தூங்குவார்? எப்போ எழுந்து வேலைகளைப் பார்ப்பார்?கோமதி அரசோ விருந்தினர்களையும் வரவேற்றுக்கொண்டு அவங்களோட வெளியேயும் போய்க் கொண்டு பறவைகளையும் படம் எடுத்துப் பதிவு போட்டுனு வெளுத்து வாங்குகிறார்.  எல்லோரும் கண் சிமிட்டும் நேரத்தில்  சுறுசுறுப்பாக வேலை செய்ய நான் மட்டும் எதுவும் செய்ய முடியாமல் தவிக்கிறேன்.  இவங்களோட வேலைகளை எல்லாம் பார்க்கையில் எனக்கு நேர மேலாண்மை என்றால் என்ன என்றே புரியலைனு நினைக்கிறேன்.  இங்கே இப்போ ஒருவாரமாக மதிய வேளையில் மின்வெட்டு வந்து விடுகிறது. அப்போ எதுவும் செய்ய முடியறதில்லை. அதோடு இணையம் வேறே அவ்வப்போது போய்ப் போய் வருது! நேத்திக்கு ஒன்றரை மணி நேரத்துக்கு மேல் இணையம் இல்லாமல் அது வந்தப்போ என்னால் உட்கார முடியலை! வழக்கமான வீட்டு வேலைகள்!   இத்தோடு என் அறுவையை முடிச்சுக்கறேன்.  பதிவுகள் பற்றிய கருத்துக்களை அதிகம் மேயவில்லை. அப்புறமா இன்னும் பெரிசா ஆயிடும். ரொம்ப பயமுறுத்த வேண்டாமே!......"