​"திங்க"க்கிழமை : 5 ஸ்டார் கேக் - பானுமதி வெங்கடேஸ்வரன் ரெஸிப்பி

என்ன எல்லோருக்கும் ஆச்சர்யமா இருக்கா? பானுமதி ஒரு ஸ்வீட் ரெசிப்பி போடறாங்களேன்னு..?! 

இது ரொம்ப ஈஸியா பண்ணக்கூடிய கேக்(ஹிஹி மேடம் நீங்க இது வரைக்கும் கஷ்டமா ஏதாவது பண்ணியிருக்கீங்களா?)

ஓகே, ஓகே. நோ மிடில் மிடில் டாக்கிங். ஜஸ்ட் லிசன். 

கேக் என்றதும் மைதா அல்லது செல்ஃப் ரைசிங் ஃப்ளார், பேக்கிங் பவுடர், மிக்ஸிங், அவன், இத்தனை டிகிரி, பேக்கிங் என்றெல்லாம் கவலைப் படாதீர்கள். இது அடி கனமான வாணலியில் கிளறி கொட்டக்கூடிய கேக்.

இதுக்கு என்னவெல்லாம் தேவை என்று பார்க்கலாமா?

கடலை மாவு   - 1 கப்

தேங்காய் துருவல்  -  1கப்

பால்                   - 1 கப்

உருக்கிய நெய் - 1 கப்

சர்க்கரை.   - ஒன்றரை அல்லது 2 கப்

இதில் முக்கியமா கவனிக்க வேண்டிய விஷயம் என்னன்னா, எல்லாவற்றையும் அளக்க ஒரே கப்பை தான் பயன்படுத்த வேண்டும். ஓகேங்களா?

எல்லாம் ரெடியா? முதலில் அடி கனமான  வாணலியை அடுப்பில்  வைத்து, கடலை மாவை வறுத்துக் கொள்ளுங்கள். அடுப்பு சிம்மில் எரியட்டும். சிவக்க வறுக்க வேண்டும் என்பதில்லை. பச்சை வாசனை போனால் போதும். 

பிறகு பால், நெய், தேங்காய் துருவல் இவைகளை சேர்த்து நன்கு கலந்து விட்டு பின் சர்க்கரை சேர்த்து, அடுப்பை மிதமாக எரியவிட்டு கை விடாமல் கிளறவும். 

வேண்டுமானால் செல்ஃபோனில் பாட்டு கேட்கலாம், நோ டாக்கிங் ஓவர் ஃபோன் ஓகே?

தளதளவென்றிருந்த கலவை கொதித்து கொதித்து கெட்டியாகி உருண்டு வரும். 

இப்போது வேண்டுமானால் இன்னும் இரண்டு ஸ்பூன் நெய் விட்டு கிளறி பாத்திரத்தில் ஒட்டாமல் வந்தும் நெய் தடவிய தாம்பாளத்தில் கொட்டி, அதிகம் தாமதிக்காமல் நெய் தடவிய கத்தியால் துண்டுகள் போடவும். 

இதற்கு ஏலக்காய், முந்திரி போன்றவை தேவை இல்லை. போட்டாலும் தவறில்லை.

நன்றாக ஆறியதும் எடுத்து பத்தாம் வகுப்பு, +2 தேர்வுகள், நீட் தேர்வுகளில் தேறியவர்களுக்கும், அடுத்த வீடு, எதிர் வீட்டில் உள்ளவர்களுக்கும் கொடுத்து விட்டு நீங்களும் சாப்பிடுங்கள்.