"திங்க"க்கிழமை : வாழைக்காய் அப்பளம் - கோமதி அரசு ரெஸிப்பி

​எங்கள் ப்ளாக் ஸ்ரீராம்  திங்கள் பதிவுக்கு சமையல் குறிப்பு கேட்டார்கள். 

கீதா அக்கா சொல்லி இருப்பது போல உங்களிடமிருந்து கட்டாயம் ஒரு சமையல் குறிப்பு உடனேஎதிர்பார்க்கலாமா? பேராசை எனக்கு!

//உற்சாக மன நிலையில் உணவு சமைத்தபோது படம் எடுத்து குழந்தைகளுக்கு அனுப்புவேன்.//

என்ற என் பின்னூட்டத்தில் போட்டதை வைத்தே என்னை எழுத வைத்து விட்டார் ஸ்ரீராம்.

//இங்கிருக்கும் குழந்தைகளுக்கும் அனுப்பலாமே....! தயிர் சாதம் கூட வித்தியாசமாக செய்திருந்தால் அதைக்கூட அனுப்பலாம். நீங்களோ புகைப்படங்கள் எடுப்பதிலும் மன்னி!//

இப்படி வேறு   கூடை நிறைய ஐஸ் வைத்தால் எழுதாமல் இருக்க முடியுமா?

​//திங்கட்கிழமை. "திங்க"ற கிழமை! //  

திங்கட்கிழமை வெளியாகும் சமையல் பதிவை  பாராட்டி கீதா சாம்பசிவம் அவர்கள்  அழகாய் சொல்லி இருக்கிறார்கள். நீங்கள் எல்லோரும்  படித்து இருப்பீர்கள். அந்த புகழ் பெற்ற திங்கட்கிழமையில் நானும்  இணைவதில் பெருமை கொள்கிறேன்.

இங்கு உங்களுடன் பகிர்ந்து கொள்ளும் சமையல் குறிப்பு வாழைக்காய் அப்பளம்

உங்களுக்கு எல்லாம் தெரிந்த சமையல் குறிப்பாக இருக்கலாம். 

சர்க்குலேசன் புத்தகங்கள் வாங்கிக் கொண்டு இருந்த காலம் .

நான் மாத இதழ், வார இதழ் ஆகியவற்றில் வரும் சமையல் குறிப்புகளை அவசர அவசரமாய் எழுதி வைத்துக் கொண்டு  மறுநாள் கொடுத்து விடுவேன் புத்தகத்தை.  

இப்படி பதிவு எழுதுவேன் என்று தெரிந்து இருந்தால் எந்த பத்திரிக்கையில் வந்தது, எழுதியவர் பெயர் எல்லாம் எழுதி வைத்து இருப்பேன்.  மஞ்சரி புத்தகத்தில் வந்தது என்று நினைக்கிறேன்.

   

மாசி மாதம் வத்தல் வடகம் போட ஆரம்பித்து சித்திரைக்குள் முடித்து விடுவார்கள் . சித்திரை வத்தல் சிவந்து விடும் என்பார்கள். இந்த வாழைக்காய் அப்பளம், இலைவடாம் எல்லாம் எப்போதும் போடலாம்.

அதுவும் கிராமத்தில்( திருவெண்காடு) இருக்கும் போது  எங்கள் வீட்டுக்கார அம்மா அவர்கள் வாழைக்காய் காய்த்த போதெல்லாம் தருவார்கள். அக்கம் பக்கத்து    வீடுகளிலிருந்து வேறு  கொடுப்பார்கள். மாயவரத்தில் இருந்த போதும் வாழைக்காய் பஞ்சமில்லாமல் கிடைக்கும். 

என் அனுபவத்தில்  வாழைக்காய் மிகவும் முற்றலாக இருக்கக் கூடாது, பிஞ்சாகவும் இருக்கக் கூடாது. நடுத்தரமாய் இருக்க வேண்டும். அப்போதுதான் நன்றாக இருக்கும் அப்பளம்.

நான் எழுதி வைத்து இருந்த 'வாழைக்காய் அப்பளம்' குறிப்பை இங்கு  கொடுத்து இருக்கிறேன். 

ஜன்னல் வழியே பறவைகளை  பார்த்தீர்கள் !  வாழைக்காய் அப்பளம்  காய்வதைப் பாருங்கள்.எங்கள் வீட்டுப் பால்கனிக்கு வெயில் 12 மணிக்கு மேல் தான் வரும், மாலை 3.30 வரை இருக்கும் அதில் காய வைத்து எடுத்தேன். கொடிக் கம்பியில்  துணியைக் கட்டி காய வைத்து எடுத்தேன்.

வீட்டுக்குள்  3.30 மணி வரை வெயில் இருக்கும்

என் மகனிடம் ,"கூழ் வத்தல் சித்தி, அத்தை எல்லாம் போட்டு கொடுத்து இருக்கிறார்கள் அனுப்பி வைக்கிறேன்" என்றேன். அதற்கு," அம்மா! உங்களுக்கு  முடிந்தால்  வாழைக்காய் அப்பளம் செய்து அனுப்புங்கள்" என்றான். இப்படிக் கேட்கும்போது செய்யாமல் இருக்க முடியுமா? கொஞ்சம் கொஞ்சமாக மூன்று நாள் போட்டு எடுத்து வைத்து விட்டேன். அனுப்ப வேண்டும்.

சோம்பிக் கிடக்கும் உடல். குழந்தைகள் ஆசைப்பட்டால் சுறுசுறுப்பாய் செயல் படுகிறது. என் கணவருக்கும்  வாழைக்காய் அப்பளம் பிடிக்கும்.

கொஞ்சம் காரம் - கொஞ்சம் காரம் குறைச்சலாக -என்று போட்டு செய்து இருக்கிறேன்.

அந்தக்கால முறையில் எழுதிய சமையல் குறிப்பு . அதைத் தற்காலத்திற்கு ஏற்றமாதிரி கீழே கொடுத்து இருக்கிறேன்.

தேவையான பொருட்கள் 6 என்று சொல்லி விட்டு இரண்டு வாழைக்காய் படம் போட்டு இருக்கிறீர்கள் என்று கேட்க வேண்டாம்  வீட்டில் இருந்த காயைப் படம் எடுத்துப் போட்டு இருக்கிறேன் .

வாழைக்காய் அப்பளத்திற்குத்  தேவையான பொருட்கள்:-

வாழைக்காய் பெரியது  6

பச்சைமிளகாய் -6  காரம் வேண்டுமென்பவர்கள் அப்படியே 6 போட்டுக் கொள்ளலாம். காரம் குறைச்சலாகப் போதும் என்பவர்கள் 4 போட்டால் போதும்.

தேங்காய் எண்ணெய் ஒரு கரண்டி என்று போட்டு இருக்கிறது அவ்வளவு வேண்டாம், 1ஸ்பூன் இருந்தால் போதும். அது கூட வேண்டாம் லேசாக ஷீட்டில் தடவினால் போதும் வாழைக்காய் கலவை ஒட்டாமல் இருக்கும் அளவு தடவினால் போதும்.

உப்பு, பெருங்காயம் தேவையான அளவு  போட்டுக் கொள்ளலாம்.

உப்பு வாழைக்காயில் இயற்கையாக இருக்கும், அதனால் கொஞ்சம் குறைத்தே போட்டுக் கொள்ளலாம். பெருங்காயம் சிலருக்குப் பிடிக்காது, அதனால்.   அது மட்டும் அல்ல நிறைய போட்டாலும் நன்றாக இருக்காது. நான் சின்ன ஸ்பூனால் ஒரு ஸ்பூன் பெருங்காயத்தூள் சேர்த்தேன்.

வாழைக்காய் குக்கரில் வேக வைத்தால் கலர் வெள்ளையாக இருக்காது அதனால் ஒரு வாயகன்ற பாத்திரத்தில் வாழைக்காயைத் தோலுடன் வேகவைத்து எடுத்துக்கொள்ள வேண்டும். தோலை உரித்து எடுத்து வைத்துக் கொள்ள வேண்டும்.

 உப்பு, பெருங்காயம், பச்சைமிளகாய் இவற்றை மிக்ஸியில் அரைத்து எடுத்து க்கொள்ளலாம்.

இளஞ்சூட்டில் இருக்கும் போதே வாழைக்காயை பச்சைமிளகாய் , உப்பு, பெருங்காயம் அரைத்த விழுதைச் சேர்த்து மிக்ஸியில் ஒரு ஓட்டு ஓட்டினால் மசிந்து விடும் . அரைத்த கலவையை  உருண்டையாக கொஞ்சம் எண்ணெய் தடவி உருட்டிக் கொண்டு இரண்டு ஷீட்டுகளுக்கு நடுவில் வைத்து அப்பளமாய் அப்பளக் குழவியால்  தேய்த்துக் கொள்ளலாம். நான் பெரிதாக ஷீட்டுகள் வைத்து பெரிதாக அப்பளம் தேய்த்துக்  கொண்டு பின் காப்பி  பில்டர் மூடியால் வட்டமாக வெட்டி எடுத்துக் கொண்டேன். அப்புறம் காய வைக்க வேண்டியது தான். மூன்று நாள் காய்ந்தால் போதும்.

மொட்டை மாடி என்றால் இரண்டு நாள் போதும். என்னைப் போல் பால்கனி என்றால் மூன்று நாள் வேண்டும்.

சிறுகுறிப்பு:-

வாழைக்காய்த்  தோலை வீணாக்காமல் அதைச் சிறு சிறு துண்டாக வெட்டிக் கொண்டு கொஞ்சம் மிளகாய்த்தூள், மஞ்சள் தூள், பெருங்காயத்தூள் போட்டுப் பிசறிக் கொண்டு அதை கடுகு உளுத்தம்பருப்பு போட்டுத் தாளித்து இறக்கும் போது தேங்காய் துருவல் கலந்து இறக்கினால் சத்து மிகுந்த  வாழைக்காய் தோல் பொரியல் (துவரம் ) கிடைக்கும். 

//நெல்லைச் சிறப்புச் சமையல்கள் நிறையத் தெரிந்து வைத்திருப்பீர்கள். 

அவற்றைப் பகிரலாம். //

கீதா சாம்பசிவம் நெல்லை சமையல் குறிப்பு கேட்டார்கள் இந்த துவரம் நெல்லை சமையல் குறிப்புதான்.

முன்னாள் பாரதபிரதமர் இந்திராகாந்தி அவர்களுக்கு எழுத்தாளர் சிவசங்கரி அவர்கள் சத்து மிகுந்த வாழைக்காய் தோல் சமையலைப் பற்றி சொன்னார்கள் என்று படித்த நினைவு இருக்கிறது.

சிறு வயதில் என் மகன் என்னுடன் சேர்ந்து நான் வெட்டித் தருகிறேன் அம்மா என்று உற்சாகமாய்ச் செய்வான், அவன் செய்ததைப் பெருமையாக நான் வெட்டினேன் எப்படி இருக்கு? என்று அவன் அப்பாவிடம் கேட்பான்.

அதை என் கணவரிடம் சொல்லி வரைந்து தரச் சொன்னேன். ஒரு மணி நேரத்தில் இந்தப் படத்தை வரைந்து தந்தார்கள்.

 எழுத்து வேலைகளுக்கு இடையில் எனக்கு வரைந்து தந்தார்கள். ஸ்ரீராம் சார் படம் வந்து மிகவும் நாளாச்சு என்று கேட்டார் என்றதும் மகிழ்ச்சியாக படம் உருவானது.

ஏதோ எனக்குத் தெரிந்த முறையில் சமையல் குறிப்பு எழுதி இருக்கிறேன்.உடனே செய்வது போல் இல்லையே என்று கேட்காதீர்கள்.  ஸ்ரீராம் உடனே அனுப்பச் சொன்னார். கைவசம் படங்கள் உள்ளது இதுதான்.

எல்லாக் காலங்களிலும் வாழைக்காய் கிடைக்கும்.  ஆனால் அக்னி நட்சத்திரம் ஆரம்பித்து விட்டது, வத்தல் வடகம் போட மாட்டார்கள். 

வாழ்க வளமுடன்.

========================================================================