புதன் 190501 : பொன்னியின் செல்வனில் உங்களைக் கண்டதுண்டா?

குறள் : 

இரவார் இரப்பார்க்கொன்று ஈவர் கரவாது
கைசெய்தூண் மாலை யவர்.

மு.வரதராசனார் விளக்கம்:

கையால் தொழில் செய்து, உணவு தேடி உண்ணும் இயல்புடைய தொழிலாளர், பிறரிடம் சென்று இரக்கமாட்டார், தம்மிடம் இரந்தவர்க்கு ஒளிக்காமல் ஒரு பொருள் ஈவார்.

எல்லோருக்கும் இனிய தொழிலாளர் தின வாழ்த்துகள்! 

எங்கள் சென்ற வாரக் கேள்வியாகிய,

உங்கள் வாழ்க்கையில் நீங்க கடந்து வந்த நாட்களில், ஏதோ ஒரு நாளை, திரும்ப கொண்டுவரலாம் என்றால், நீங்கள் திரும்பக் கொண்டு வர நினைக்கின்ற நாள் எது? ஏன்? 




என்பதற்கு 

விவரமாக பதில் அளித்து, கருத்துப் பரிமாற்றங்கள் செய்த 

கீதா சாம்பசிவம், நெல்லைத்தமிழன், வல்லிசிம்ஹன், கீதா ரெங்கன், பானுமதி வெங்கடேஸ்வரன் ஆகியோருக்கு எங்கள் மனமார்ந்த நன்றி! 

நெல்லைத்தமிழன் : 

நான் கனவு காணும் சமயம், (எங்க அப்பாவுடன் சந்திப்பது போன்றோ இல்லை முக்கியக் கடவுகளோ), போட்டோ எடுக்க முயல்வேன். கேமரா ஆபரேட் பண்ணாது. எவ்வளவு அமுக்கினாலும் படம் விழாது. இது எப்போதும் நடக்கும். என்ன காரணமாயிருக்கும்?

$ ஏதோ ஒரு செய்கை.  மறுபடி மறுபடி முயற்சிக்கிறோம்; ஆனால் ஏதோ ஒரு தடங்கல். இது அனைவருக்கும் வரும் கனவா சிலருக்கு மட்டுமா என்று தெரியும் அளவுக்கு ஞானம் இல்லை.  ஆனால் அப்படிப்பட்ட கனவுகள் வரும்போது நாம் செய்யவேண்டிய ஏதோ ஒரு முன்னேற்பாடு நிறைப்பெறவில்லை என்றாகியிருக்கிறது.

# சிக்மண்ட் ஃப்ராய்டு இப்படிச்சொல்லக்கூடும்: 
  

அப்பாவை  அவர் வாழ்நாளில்  சரிவர கவனித்துக் கொள்ளவில்லை அதை இப்போது சரி செய்ய இயலாது எனும் ஆதங்கத்தின் வெளிப்பாடு இந்தக் கனவு.

என்னைக் கேட்டால், "எனக்குத் தெரியாது" !

& உங்களுக்கு கனவுகள் கூட சஸ்பென்ஸ் சேர்ந்து, சுவாரஸ்யமாக வருகிறது என்று தெரிகிறது. 
பழங்காலத்தில் வந்த ஒரு கேமரா விளம்பர வாசகம் ஒன்று நினைவுக்கு வருகிறது! " Shoot someone you love! " 

கீதா சாம்பசிவம் : 

1) இப்போது திருமணம் ஆகாமல் பல "முதிர்கன்னர்கள்" இருப்பதற்கு உண்மையான காரணம் எது என நீங்கள் கருதுகிறீர்கள்?

$ இருபாலரும் வருமானம் போதாத கவலையில் தீர்மானத்தை தள்ளிப்போட்டு வயதாகிவிடுவதனால் என்று தோன்றுகிறது.

#  சம்பாதிக்கிற மகன் ஆதரவு குடும்பத்துக்கு அவசியமாக இருக்கிறது. மணமான பின் அது தரிக்காது எனும் அச்சம்.

நட்சத்திர /ஜாதக அமைப்பு காரணமாக வாய்ப்புகள் நழுவுகின்றன.

என்ன காரணத்தினாலோ பிள்ளைக்கு யாரையும் பிடிக்கவில்லை.

கல்யாணம் கால்விலங்கு என  நினைக்கிறான்.

வழுக்கை, கருப்பு, குட்டை-நெட்டை என விலக்குவர் என்று அச்சம்.

பெரும் படிப்புக்கு இணையான தகுதி உத்யோகம் பெண்ணுக்கு  இல்லை. 

பெரிய்ய இடத்து சம்பந்தம் வேண்டும் என்ற பேராசை.

பெண் வெளிநாடு செல்ல விருப்பம் இல்லை (அல்லது இந்தியா திரும்ப)

தன் காதலை சொல்லத் தயக்கம்.

பொறுப்பற்ற பெற்றோர். 

இப்படி எவ்வளவோ !

& கொஞ்சம் சிக்கலான கேள்விதான். இந்தக் காலத்தில், மணப்பெண் தரப்பு எதிர்பார்ப்புகள் மிக மிக அதிகமாகிவிட்டன என்பது ஒரு முக்கிய காரணம். 

சில ஆண்டுகளுக்கு முன் நான் பெங்களூர் பார்க்கில் சந்தித்த ஒரு நண்பர், தன் பையனுடன் இங்கே வசிப்பதாக கூறினார். பையனுக்கு அப்போ நாற்பது வயது. 'அவன் திருமணம் செய்துகொள்ளவில்லை' என்றார். 'ஏன்' என்று கேட்டேன். 'அது என்னவோ தெரியவில்லை; வேண்டாம் என்கிறான்' என்றார். 

நெருங்கிய உறவினர் ஒருவரின் பையனும் கிட்டத்தட்ட இதே நிலைதான் - 'திருமணம் வேண்டாம்' என்கிறான். ஏன், எதற்கு என்ற கேள்விகளுக்கெல்லாம் சரியான பதில் கிடைக்கவில்லை. 

மனோதத்துவ நிபுணர்கள் உதவியுடன்தான் இந்த சிக்கல்களை தீர்க்க இயலும் என்று தோன்றுகிறது. 

2) பெண்கள் இப்போதெல்லாம் திருமண வாழ்க்கையில் நிபந்தனைகள் பல போடுகின்றனர். அது சரியா? எங்க சொந்தத்திலேயே ஒரு பெண் நாத்தனார் இருக்கக் கூடாது என நிபந்தனை போட்டு அப்படி வந்த ஒரு பையரையே திருமணமும் செய்து கொண்டாள். இது சரியா?

$ நிபந்தனை போடுபவர்கள்  அவை நிறைவேறிய பின் திருப்தியாக இருக்கிறார்களா?

# சரி இல்லைதான். ஆனால், அவள் அப்படிச் சொல்லக் காரணம் என்ன என ஆராய்வது நல்லது. 

3) இப்போதைய பெற்றோர் பெரும்பாலும் ஒரே குழந்தையுடன் நிறுத்திக் கொள்கின்றனர். இது சரியான முடிவா? என்னைப் பொறுத்தவரை முதல் குழந்தைக்குத் தாய் தந்தையர் அளிக்கும் மிகப் பெரிய பரிசே அதற்கு ஓர் தம்பியோ, தங்கையோ கொடுப்பது தான் என்னும் கருத்து! இது சரியானதா?

$ நாங்கள் பெரீய்ய்ய கூட்டுக்குடும்பத்தை சேர்ந்தவர்கள்.  இருப்பினும் இளைய தலைமுறைகள் இரண்டுக்குப்பின் வேண்டாம் என்பதிலிருந்து ஒன்றே போதும் என்பதில் தீவிரமாக இருக்கிறார்கள்.

ஒரு வகையில் ஜனத்தொகை கட்டுப்பாட்டுக்குள் வரும் என்றாலும் வருங்காலத்தில் லீவு எடுக்க சாக்குகள் சொற்பமாகிவிடும்! பின்னே என்ன! சித்தப்பா, பெரியப்பா, அத்தை, பெரியம்மா, சின்னம்மா எல்லோரும் அரிதாகி விடுவர். ஒற்றைக்குழந்தைகள் அடுத்தவரை அனுசரித்துப் போக சிரமப்படுவதும் ஒரு காரணம்.

# குழந்தைகளுக்கு உடன்பிறப்புகள் தேவைதான். 

முன்பு மாதிரி வத வத என்று கு. பிறப்பதில்லை. லைஃப் ஸ்டைல் எஃபெக்ட்.

தற்காலத்தில் குழந்தைகளை சிறந்த வழியில் வளர்க்க எக்கச்சக்க செலவு பிடிக்கிறது.

ஒன்றே போதும் என்பது தீவிர கு.க பிரசாரத்தின் தாக்கம். இது அதிகம் தற்போது இல்லை என நினைக்கிறேன். 

4) இந்தியாவிலேயே திரைப்பட நடிகர்களின் மேல் ஓர் ஈர்ப்பு இருக்கத் தான் செய்கிறது. ஆனால் தமிழ்நாட்டில் மட்டும் அது மிக அதிகமாக, அவர்களைக் கடவுள் போல் நினைப்பது ஏன்? இந்த நிலை மாறவே மாறாதா?

$ என் அடுத்த பதிலை காண்க ! 

# முதலில் இசைவல்லமை காரணமாக எம் கே டி மாதிரி நடிகர்களுக்கு ரசிகர் கூட்டம் இருந்தது.

எந்தப் பிரச்சினையையும் முஷ்டியை மடக்கித் தீர்க்கும் சூப்பர் ஹீரோக்கள் வந்து அவர்கள் ரசிகர் கூட்டத்தை பணம் செலவழித்துப் பெருக்க முற்பட்ட சமயம் முதிர்ச்சியில்லாத இளைஞர் பட்டாளம் அவர்கள் பின் ஓடத் தொடங்கியதே இதன் வித்து.

பிற மாநிலங்களில் இது ஏன் இல்லை என்றால், இங்கு மட்டுமே அரசியல் கட்சிகள் சினிமாவிலிருந்து முளைத்துக் கிளைத்தன. எம் ஜி ஆர் முகத்தைக் காட்டினால் மூன்றுலட்சம் வோட்டு என அண்ணா சொன்னது நினைவில்லையா ? 

& ஹீரோ வொர்ஷிப் இப்போ கொஞ்சம் குறையத் துவங்கியுள்ளது என்று நினைக்கிறேன். பார்ப்போம். 

5) ஒரு திரைப்படம் வெளிவந்தால் எல்லோரும் உடனே போய்ப் பார்த்துக் கருத்து/விமரிசனம் என்னும் பெயரில் எழுதி விடுகிறார்கள்.இது ஆர்வமா? திரைப்பட மோகமா?

$ என் அடுத்த பதிலை காண்க ! 

# இது ஒரு பழக்கம். ஊடகங்களில் முந்தியிருப்பதில் ஆர்வம். லைக்குகள் க.பதிவுகள் மீதுள்ள மோகம்.

& அதனால்தான் நான் படம் எதுவுமே பார்ப்பதில்லை என்று முடிவு செய்துவிட்டேன். மற்றபடி விமரிசனம் எழுதுபவர்கள் எல்லோரும் I first syndrome உள்ளவர்கள் என்றும் நினைக்கலாம். 

          
6) படத்துக்கான டிக்கெட் எல்லாம் இப்போது நூற்றுக்கணக்கில் இருப்பதாகச் சொல்கின்றனர். (ஹிஹிஹி, எனக்குத் தெரியாது, தியேட்டர்களுக்குப் போய்ப் படம் பார்த்து 30 வருஷம் இருக்கலாம்.) அவ்வளவு பணம் கொடுத்து டிக்கெட் வாங்கிப் படம் பார்ப்பதால் கிடைக்கும் நன்மை என்ன?

$ என் அடுத்த பதிலை காண்க ! 

# பொழுதுபோக்குதான். 

வசதிகள், வருமானம் பெருகினால் டிக்கட் விலையும் பெருகத்தானே செய்யும் ? ஊதாரித்தனம் யுக தர்மம் ஆகிவிட்டது.

& சில வருடங்களுக்கு முன்பு, பையன் ரிசர்வ் செய்த படம் ஒன்றுக்கு பையனுடனும் பேரன்களுடனும் சென்று பார்த்தேன். 3D படம். நல்லா சௌகரியமாக காலை நீட்டி, இருக்கையில் அமர்ந்து பார்க்கக்கூடிய சீட் அரேஞ்ச்மெண்ட். படம் + கார் பார்க்கிங் கட்டணம் + சிற்றுண்டி வகையறா செலவு என்ன என்று தெரிந்தபோது தலைசுற்றியது. கிட்டத்தட்ட என்னுடைய ஒரு மாதத்து பால், தயிர், மோர் + அரிசி + எண்ணெய் செலவை அதை வைத்து செய்துவிடலாம்! 

7) ஒருத்தருக்கே250 ரூ டிக்கெட் என வைத்துக் கொண்டால் நான்கு பேர் கொண்டஒரு குடும்பத்துக்கு டிக்கெட் மட்டுமே ஆயிரம் ரூபாய் ஆகிவிடுகிறது. ஒரு மாசத்துக்கான எரிவாயுவுக்கான விலைனுவைச்சுப்போம்.(மானியம் இருக்கு இல்ல, அதான், வைச்சுக்கச் சொல்றேன்.) இதைத் தவிர்த்துப்போக வரச்செலவுகள், அங்கே ஏதேனும் வாங்கித் தின்றால் அந்தச் செலவுனு ஐநூறு ஆயிடும்னு நினைக்கிறேன். இவ்வளவு பணம் செலவு செய்து திரைப்படம் பார்ப்பது தேவையான ஒன்றா?

4 to 7 : $  ஊம்ஹும் நான் சத்யாவுக்குப் பிறகு தியேட்டர் பக்கமே போனதில்லை.

# முடியும் என்றிருப்பதால் தேவையாகி விடுகிறது. 

& தேவை இல்லை என்று நமக்குத் தோன்றுகிறது. இளைய சமுதாயத்திற்கு அப்படித் தோன்றுவதில்லை!            
         
8) ஒரு காலத்தில் படிப்பில் நன்றாகப் படிக்கணும், புரிந்து படிக்கணும் என்பதே முக்கியமாக இருந்து வந்தது. ஆனால் இப்போது? மதிப்பெண் வாங்குவதற்காகவே படிக்கின்றனர். இது நல்லதா?
பாடங்களைப் புரிந்து கொண்டு படிப்பது நல்லதா? மதிப்பெண் குறைந்தாலும் பரவாயில்லை என இருப்பது நல்லதா?
இந்தக் குழந்தைகள் படிக்கும் இந்தப் பாடங்கள்/பாடத் திட்டங்கள் அவர்கள் வாழ்க்கைக்குப் பயன் தரக் கூடியதா?

$ மார்க் வாங்கப் படிப்பது தப்பில்லை.

# கல்வியின்அடிப்படை நோக்கம் சிந்திக்கும் திறனை மேம்படுத்துதலே.

ஆனால் போட்டி அதிகமாகும்போது மார்க் முக்கியத்துவம் பெற்று விடும். வேறு வழி ?

பாடத் திட்டம் எப்படி இருந்தாலும் படிக்கும் பாங்கு சரியாக இருந்தால் இலட்சியம் நிறைவேறும். 

9) இப்போது முதல் மதிப்பெண் பெற்றுத் தொலைக்காட்சி, தினசரிகளில் இடம் பெறும் குழந்தைகள் கல்லூரிப் படிப்பிலும் அவ்வாறு முன்னிலையில் இருப்பார்களா?/இருந்திருக்கிறார்களா?

$ நிறையப்பேர் மேற்படிப்பு படிக்கும் முயற்சியில் தோல்வி அடைவதைப் பார்க்கிறோம்!

# பெரும்பாலும் இல்லை போலிருக்கிறது. இதற்கு சரியான பதில் தர நமக்கு வசதி திறன் இரண்டுமே இல்லை.

   
10) நீட் தேர்வு ரத்து செய்யப்படும் என அரசியல் கட்சிகள் அறிவித்துள்ளன. ஆனால் கடந்த இரு வருடங்களாக அரசுப் பள்ளி மாணவ, மாணவியர் பலரும் நீட் தேர்வு முறையில் மருத்துவப் படிப்புக்கான இடம் பெற்றுப் படிப்பதைப் பற்றிச் செய்திகள் வந்தன. யாரும் இதுக்கு முக்கியத்துவம் கொடுக்கவில்லை. அரசே இலவசப் பயிற்சி முகாம்களை நடத்தவும் செய்கிறது. இந்நிலையில் நீட் தேர்வை ரத்து செய்வது/செய்ய வேண்டும் என்று கோருவது சரியா?


$ போட்டி பரீக்ஷை என்றாலே சினிமா நாயகர்கள் மாதிரி சென்றோம், வென்றோம், வந்தோம் என்றிருக்க வேண்டுமானால் தேர்வெதற்கு?

செலெக்ஷன் தேர்வில் 40 ,30 என்று வாங்கி வந்த மருத்துவர் திறமையானவராக இருப்பதில்லை என்றுதானே வேறு மருத்துவர்களை நாடுகிறோம்.
 
# நிச்சயம் சரி இல்லை. ஆனால் யாரும் கேட்காமலே கட்சிகள் இதை வோட்டு வேட்டை ஆயுதமாக்கி இருக்கின்றன.

             

வல்லிசிம்ஹன் : 

1. வந்தியத்தேவனா பாஹுபலியைப் போட்டால் எப்படி இருக்கும்? 

# அவருக்கு வுடன் ஃபேஸ் சிண்ட்ரோம் இருக்கிறது. 

& வந்தியத்தேவன் = வீரம் + நகைச்சுவை + விவேகம் கொண்ட காரெக்டர். பிரபாஸ் இதற்கு சரிவரமாட்டார் என்று தோன்றுகிறது. 

2, நீங்கள் கொடுத்திருக்கும் பொன்னியின் செல்வன் படம்
எந்தப் பத்திரிக்கையில் எப்போது வந்தது? 

& அது தெரியாது. எல்லாப் படங்களும், கூகிளாண்டவர் அருளிய படங்கள்! 

கில்லர்ஜி :

திரைப்படங்களில் வரும் ஆபாசக்காட்சிகளுக்கு எதிர்ப்பு தெரிவிப்பது நமது கடமையா ? அல்லது அரசின் (தணிக்கைக்குழுவின்) வேலையா ?

# அரசின் கடமைதான். நாம் சொல்லி எவர் கேட்பார் ?

என் அந்தக் கால சக ஊழியர் புலம்பல்:

"ஆபாசக் காட்சி இருக்குன்னாங்க. இரண்டு தடவை பார்த்துட்டேன். ஒண்ணுமில்லை. சுத்த ஏமாத்து" (ஜயமாலினி படம்)

               

திண்டுக்கல் தனபாலன் : 

ஒரு வேளை நாம் பொன்னியின் செல்வனில், அதாவது நம் வலைப்பதிவர்களுக்கு என்னென்ன வேடம் மற்றும் மற்ற பொறுப்புகள்...?

# பொது மக்கள், அரசவை பிரமுகர்தான். வேறு என்ன ?

& இதற்கு நாங்கள் ஏதாவது பதில் கூறி, பதிவர்களின் சாபத்துக்கு + கோபத்துக்கு ஆளாவதை விட, எங்களின் இந்த வாரக் கேள்வியாக இதையே மாற்றி கேட்டிருக்கிறோம். திண்டுக்கல் தனபாலனுக்கு நன்றி. 

வாட்ஸ் அப் கேள்விகள் : 

பானுமதி வெங்கடேஸ்வரன் :

நாத்திக வாதம் தமிழ் நாட்டில் மட்டும் தான் வலுவிழந்ததா? அல்லது உலகம் முழுவதும் இப்படித்தானா?        

# இதற்கு பதிலளிக்க நம்மிடம் தகவல்கள் இல்லையானாலும் நாத்திகம் உலகளவிலும் வலுவிழந்ததாகவே தோன்றுகிறது. 

& இன்றளவில் உண்மையான நாத்திகவாதமோ அல்லது ஆத்திகவாதமோ இல்லை. சுத்தமான சந்தர்ப்பவாதம் ஒன்றுதான் உள்ளது. 

மேற்கண்ட கேள்வியின் தொடர்ச்சி: அதற்கு காரணம் என்ன?             

# இதற்கு முதன்மைக் காரணம்: எது ஒன்று எதிர்க்கப்படுகிறதோ அது பெரும்பான்மை மக்களுக்கு பெருந்தீங்கு செய்வதாக உணரப்பட வேண்டும். மாறாக கடவுள் நம்பிக்கை அடிப்படையில் கஷ்டங்களை எதிர்கொள்ளவும் நல்லனவற்றை எதிர்பார்க்கவும் ஒரு மன நிலை உருவாக  வழிவகுக்கிறது.

                  

சிறு வயதில் அல்லது வாழ்வின் ஏதாவது கட்டத்தில் மற்றவர்கள் செய்யும் செயலைப் பார்த்து "எப்படி இதை செய்கிறார்கள்?" என்று அதிசயப்பட்ட, அல்லது ஆத்திரப்பட்ட அல்லது அருவருப்பு பட்ட ஏதாவது ஒரு செயலை பின்னாளில் நீங்கள் செய்திருக்கிறீர்களா?
        

# அதிசயப் பட்ட பலவற்றையும் செய்யும் அதிர்ஷ்டம் இல்லை.

என்றோ எனக்கு ஆத்திரம், அருவருப்பு உண்டாக்கியவற்றை நானும் பிற்காலத்தில்  செய்திருக்கக் கூடும். ஆனால் அவற்றை கவனத்தில் கொள்ளும் திறன் எனக்கு இருந்ததில்லை.

& நான் இன்னும் சிறுவயது நிலையிலேதான் இருந்து வருகிறேன். ஆனால், 'எப்படி இதை செய்கிறார்கள்' என்று யாரையும் பார்த்து இதுவரை அ / ஆ / அ கொள்ளவில்லை. 

        

கட்சித் தலைவர்கள் செய்யும் தேர்தல் பிரசாரங்களுக்கு நிஜமாகவே பலன் இருக்கிறதா?
              

# தலைவர்கள் பிரசாரம் நிச்சயம் பலன் தரும். அண்ணா, கருணாநிதி பிரசாரம் இல்லாதிருந்திருந்தால் தி மு க ஆட்சிக்கு வந்திருக்க முடியாது. 

(அந்த சமயம் - 1962 & 67 - காங்கிரஸில் நல்லவர்கள் வல்லவர்கள் இருந்தனரே தவிர திறமையான பிரசாரகர்கள் இல்லவே இல்லை)

& நிஜமாகவே பலன் இருக்கும் என்றுதான் தோன்றுகிறது. ஆனால் அது (-) பலனா அல்லது (+) பலனா என்பதுதான் மில்லியன் $ கேள்வி! 

 =====================================

எங்களின் இந்த வாரக் கேள்வி. 

இந்த வாரத்தில், பொன்னியின் செல்வன் குறித்த கேள்விதான் கேட்கவேண்டும் என்று சென்ற வாரமே நினைத்திருந்தேன். அதற்கு ஏற்ப DD கேட்ட கேள்வியும் அமைந்துவிட்டது. 

நாம் ஒரு நாவலை அல்லது தொடரை அல்லது கதையைப் படிக்கும்போது, அதில் வருகின்ற ஏதோ ஒரு கதாபாத்திரத்தை நாமாகவோ அல்லது நமக்கு மிகவும் நெருக்கமாகத் தெரிந்த ஒருவராகவோ கற்பனை செய்து படிப்போம். 

பொன்னியின் செல்வனை ஆழ்ந்து படிப்பவர்களுக்கு இந்த நிலை ஏற்படாமல் போவது அரிது. 

அப்படி, உங்கள் வாசிப்பு அனுபவத்தில், நீங்கள் பொன்னியின் செல்வன் படித்தபோது, அதில் வருகின்ற எந்த கதாபாத்திர படைப்பில் உங்கள் சாயலைக் கண்டீர்கள்? வேறு எந்த கதாபாத்திரமாவது உங்களுக்கு நன்கு தெரிந்த ஒரு நபரை பிரதிபலித்ததாக தோன்றியதா? 

இந்தக் கேள்வியை என்னிடம் கேட்டால், எனக்கான என் தேர்வு : சேந்தன் அமுதன். என் மனைவியின் கேரக்டர் : பூங்குழலி. 

ஒரு புள்ளிவிவரம் : இதே கேள்வியை பல ஆண்டுகளுக்கு முன்பு எங்கள் குடும்ப உறுப்பினர்கள் (சுற்றம் + சொந்த பந்தங்கள் சேர்த்தால், இன்றளவில் எங்கள் கூட்டம் ஐநூறைத் தாண்டுகிறது!) குழுவில் கேட்டபோது, எங்களில் இருபத்தேழு வந்தியத்தேவர்கள் (நான்கு பெண்கள் உட்பட!) , ஐந்தாறு நந்தினிகள், இரண்டு பழுவேட்டரையர்கள், நான்கு பூங்குழலி, ஒரு சேந்தன் அமுதன் (!) மூன்று ராஜராஜசோழன், ஒரு வானதி, நான்கு குந்தவை இருப்பது தெரியவந்தது! 

நீங்க எல்லோரும் ஆரம்பியுங்க உங்க கச்சேரியை! 

மீண்டும் சந்திப்போம்! 

============================================