புதன் 190529 :: சின்ன வயசில் சைக்கிள் ஓடியிருக்கீங்களா ?

சென்ற வாரக் கேள்விக்கு விடை அளித்த பல்லாயிரக்கணக்கான வாசகப் பெருமக்களுக்கு நெஞ்சார்ந்த நன்றி! 

கை எழுத்தைப் பார்த்து, குணாதிசயங்களை சொன்ன ஏகாந்தன் சாருக்கு சிறப்பு நன்றி. 




நெல்லைத் தமிழன் எனக்கு இன்னொரு காரணத்தை தனியே சொல்கிறேன் என்று எழுதியிருந்தார். அவர் எனக்கு அப்படியே தனியாக எழுதிய  காரணத்தை பார்த்து திடுக்கிட்டேன். ஆனாலும் அவர் அந்தப் பதிவரைப் பற்றி அப்படி ஒரு கருத்து எழுதியிருக்கக்கூடாது. சரி சரி போகட்டும். 

இந்தவாரக் கேள்வி பதிலுக்கு வருவோம்! 


பானுமதி வெங்கடேஸ்வரன் :

பேட்டி என்பதும் கேள்வி பதில்தானே பின் ஏன் அதற்கு பேட்டி என்று தனியாக ஒரு பெயர்?

# (B)பேண்ட்(t) என்றால் ஹிந்தியில் "சந்திப்பு" . இதிலிருந்து பே ட்டி வந்திருக்கும்.  இது ஒரு சொல். நேர் காணல் இரண்டு. 

& (இந்தியில் பேட்டி என்றால் மகள் அல்லவோ! ) பேட்டியில் பேட்டி காண்பவரும், காணப்படுபவரும் பிரபலஸ்தர்களாக இருக்க வாய்ப்புகள் உண்டோ? பேட்டி அளிப்பவர் தமன்னா, பேட்டி காண்பவர் நெல்லைத்தமிழன் என்று எல்லாம் விளம்பரப்படுத்தலாம். 
ஆனால் கேள்வி பதில் என்று வந்துவிட்டால் 'காண்பது' எல்லாம் கிடையாது! கேட்பது மட்டுமே! படிப்பது மட்டுமே!  

என்னதான் நமக்கு பிடித்த வேலை என்றாலும், சில சமயம் அதை செய்யக் கூட சலிப்பு வருகிறதே ஏன்?

# பிடித்த வேலையும் சலிப்புத் தட்டுவது  உடல் களைப்பு, மன உளைச்சல் காரணமாகத்தான் இருக்க முடியும்.

& எனக்கு அப்படித் தோன்றவில்லை. பிடித்த வேலையை முழு ஈடுபாட்டுடன் செய்தோம் என்றால் நேரம் போவதே தெரியாது. சலிப்பு அலுப்பு எல்லாம் வராது. பாருங்க, எனக்குப் பிடித்த வேலை தூங்குவது. அதை செய்யும்போது எனக்கு நேரம் போவதே தெரியாது. அலுப்பு சலிப்பு எதுவும் வருவது இல்லை! 

ஏஜிங் க்ரேஸ்ஃபுலி என்கிறார்களே, மற்ற பருவங்களுக்கு அந்த க்ரேஸ் அவசியமில்லையா?

 # பால பருவத்தில் சமர்த்தாகவும், இளமையில் துடிப்பாகவும், நடுவயதில் பொறுப்பாகவும் முதுமையில் நிதானமாகவும் இருப்பதுதான் ஏஜிங் கிரேஸ்ஃபுலி. ஏஜிங் என்றால் எழுபதுக்கு மேல் என்று ஏன் எடுத்துக் கொள்ள வேண்டும் ?

& எப்படி இருந்தாலும் ஏஜ் ஏறிகிட்டுதான் போகப்போகுது. அதுல என்ன graceful !

I prefer aging Craze fully! 


ஏஞ்சல் : 

1, தவறுகளில் இருந்து திருத்தி க்கொள்ள வேண்டும் என்கிறார்கள் அப்போ தவறு செய்ய பயப்பட வேண்டுமா வேண்டாமா ?
நீங்கள் அப்படி திருத்திக்கொண்ட சம்பவம் உண்டா ?

# தவறு என அறியாமல் செய்து, பின் தெரியும் போது திருத்திக் கொள்வது அறிவுடைமை. தெரிந்தே தவறு செய்வது அல்லது தண்டனைக்கு பயந்து செய்யாமலிருப்பது சிறப்பல்லவே.

& தவறு என்பதைத் தவறி செய்தால் அது தப்பு இல்லை என்று நாம் தவறாக நினைத்துக்கொள்ளக் கூடாது. அதனால் அதைத் திருத்திக் கொள்ளுவதால் தப்பு இல்லை. 
பயந்துகொண்டே தவறு செய்து, அடி வாங்கியவுடன் திருத்திக்கொண்ட சம்பவங்கள் ஏராளம். 


2, இப்படிப்பட்ட நட்பு வேண்டும் என்று நினைத்ததுண்டா ? அப்படிப்பட்ட ஒரு நட்பாக நீங்கள் பிறருக்கு இருந்ததுண்டா ?

# விவரமறிந்த பின், கவனக்குறைவாக சறுக்கியது உண்டு. தெரிந்து செய்ததில்லை எனத் தோன்றுகிறது.

& நட்புகளை முதலில் ஆரம்பிக்கும்பொழுது அது எப்படி வரும் என்று தெரியாது. இப்படிப்பட்ட நட்பு வேண்டும் என்று நினைத்தது எல்லாம் இல்லை. எல்லோரிடமும் திறந்த மனதுடன்தான் பழகுவேன். ஆனால் என்னுடன் பழகுபவர்கள் சந்தேகக்கண் கொண்டு பார்க்கிறார்கள் என்று உணர்ந்தால் உடனே விலகி அவர்களை மறந்துவிடுவேன்.      

3, 10 வயது சிறுவன் /சிறுமி /18 வயது ஆண் பெண் 30 வயது ஆண் பெண் இவர்கள் ஒவ்வொருவருக்கும் ஒரு அறிவுரை கொடுக்கணும்னா என்ன அறிவுரை தருவீர்கள் ?

 # வந்த பின் அவமானப் படாமல், வருமுன் எச்சரிக்கையாக இருங்கள்.

& பத்து வயதினருக்கு : நன்றாக, கவனமாகப் படியுங்கள்.

    பதினெட்டு வயதினருக்கு : சந்தோஷமாக இருங்க, சஞ்சலம் இல்லாமல் இருங்க. எதிர்காலத்தை சிறப்பாக திட்டமிடுங்க. 

முப்பது வயதினருக்கு : எது உங்களுக்கு சந்தோஷத்தைக் கொடுக்கின்றதோ, அதைத் தொடந்து செய்யுங்க. ஆனால் உங்களுக்கு சந்தோஷத்தைக் கொடுக்கும் செயல், மற்றவர்களுக்கு துன்பம் அளிப்பதாக இருக்கக்கூடாது.   

4, வாழ்வின் ஒவ்வொருகட்டத்திலும் ஒரு தீர்மானம் ஏறெடுப்போம் அந்த தீர்மானம் நமக்காகவா அல்லது உலகத்துக்காகவா ?
ஐ மீன் அந்த நாலு பேருக்காகவா ?

# தீர்மானம் எடுப்பது நமக்கு வசதி அல்லது புகழ் வேண்டும் 

என்பதற்காக.

& நமக்காகத்தான் பெரும்பாலும். 

5,முன் பின் தெரியா அறிமுகமில்லா ஒருவருடைய நாளை சிறப்பானதாக ஆக்க என்ன செய்வீர்கள் ?

 # அவரைப் பாராட்ட தகுந்த காரணம் இருந்தால் பலமாகப் பாராட்டுவேன்.

& அவரைப் பார்த்துப் புன்னகை புரிவேன். A smile costs nothing but wins many things.    

6, நீங்கள் கற்ற மிக கடினமான வாழ்க்கைப்பாடம் எது ?

 # அடுத்தவரை மாற்ற இயலாது. நாம்தான் மாற முடியும் என்ற உண்மை.

& நெருங்கிய சொந்தங்களை அனுசரித்துப் போவது அல்லது adjust செய்துகொள்வது.        

7, வாழ்கிறோம் என்பதற்கும் இருக்கிறோம் என்பதற்குமான வித்தியாசம் என்ன ?
உண்மை என்றால் என்ன ? எனக்கு உண்மையாகப்படுவது பிறருக்கு பொய்யாக தோன்றுவதேன் ?

# உயிர்த்திருப்பது இரத்த ஓட்டம் "இருப்பதற்கு"  அடையாளம். ரசனை ஈடுபாடு கொண்டிருத்தல்  வாழ்வதற்கு இலக்கணம்.

உள்ளது எதுவோ அது உண்மை. ஆசை வெட்கம் சினம் பொறாமை முதலியன மனதை ஆக்கிரமிக்கும்போது உண்மையின் மேல் பொய்ச் சாயம் பூசப் படுகிறது.

& நம்மால் பிறருக்கு உதவி செய்யமுடிகிறது என்னும் நிலை வாழ்கிறோம் என்பது. பிறர் உதவியில்தான் வாழ்ந்துகொண்டு இருக்கிறோம் என்றால் - ஏதோ இருக்கிறோம். 

உண்மை என்பது எந்தக்காலத்திலும் மாறாமல் இருப்பது. நமக்கு ஒன்றாகவும் மற்றவர்களுக்கு வேறாகவும் படுவது எதுவும் நிரந்தர உண்மையாக இருக்கமுடியாது. தற்காலிக உண்மைகளாக இருக்கும். 

8, தாத்தா குடை என்ற துணியால் தைத்த வளைந்த கைப்பிடி குடைகள் இன்னும் பயன்பாட்டில் இருக்கா ?

 # எனக்கு எப்படித் தெரியும் ?

& இருக்கு, இருக்கு. சமீபத்தில் ஒருவர் வீட்டில் அதைப் பார்த்தேன். 'இதை எதற்கு வைத்திருக்கிறீர்கள்' என்று கேட்டேன். மழைக் காலங்களில் குடை இரவல் கேட்பவர்களுக்கு அதைத்தான் கொடுப்பாராம். அதைக் கண்டவுடன் இரவல் வாங்க வந்தவர் ஓடிப்போயிடுவாராம். 
'சரி, யாராவது இதை இரவல் வாங்கிப் போய்விட்டுத் திரும்பத் தரவில்லை என்றால் உங்களுக்கு எப்படி இருக்கும்?' என்று கேட்டேன். 'அது எனக்குத் தெரியாது. நான் யாரிடமிருந்து இதை இரவல் வாங்கி வந்தேனோ அவரிடம் கேளுங்கள்' என்கிறார்! 

9,வெற்றி தோல்வி இவை கற்றுக்கொடுக்கும் பாடம் என்ன ?

# வெற்றி தருகிற எக்களிப்பும் தோல்வி தருகிற சோர்வும் பாடங்களை நம் பார்வையிலிருந்து மறைத்து விடுகின்றன.

& வெற்றிகள் எப்படியோ எனக்குத் தெரியாது. ஆனால், தோல்விகள் நமக்கு இரண்டு பாடங்கள் கற்றுத் தருகின்றன. 

ஒன்று: எது வேலைக்கு ஆகாது என்று தெரிந்துகொள்ளலாம். (We get to know what will not work or yield expected result) 

இரண்டு : வேறு வழிகளை முயன்று பார்க்க சந்தர்ப்பம். (Opportunity to try different process and tools.) 

10, இவர் அப்படி அவர் இப்படி என்று ஒவ்வொருவரையும் மதிப்பிட்டு எடை போடுகிறோம் தீர்மானிக்கிறோம் இது சரியா ?
அல்லது தவறா ?

 # அது சரியா இல்லையா என்பது நம் மதிப்பீடு எத்தகையது என்பதைப் பொறுத்தது. 

& மனிதர்கள் மாறலாம், மாறுவார்கள் என்பதே உண்மை. 
இவர் இப்படி / அவர் அப்படி என்று யாரையும் brand செய்து வைத்துக்கொள்ளக் கூடாது. ஏதேனும் ஒரு சந்தர்ப்பத்தில் மற்றவர்கள் கூறும் வார்த்தைகளையோ அல்லது அவரின் செய்கைகளைக் கொண்டோ யாரையும் எடை போட்டு அப்படியே lock செய்துவிடல் கூடாது. Just find out the intention of the other person. Don't judge anyone by his / her words or deeds.    

11,கடிதம் எழுதி தபாலில் சேர்க்க மறந்து போனதுண்டா ?
அப்படி தபாலில் சேர்த்த கடிதம் உங்களுக்கே வந்த அனுபவம் இருக்கா ?

# இல்லை. இல்லை.

& காரச்சாரமாக கடிதம் எழுதி, பிறகு அதை தபாலில் சேர்க்கவேண்டாம் என்று முடிவெடுத்தது உண்டு. தபாலில் சேர்க்க மறந்தது இல்லை. 

பல வருடங்களுக்கு முன்பு நடந்தது இது. என்னுடைய சிறு குறிப்புகள், குறுங்கவிதைகள், அபிமான நடிகை படம், என் ஃபோட்டோ, அலுவலக சம்பந்தப்பட்ட சில தாள்கள் எல்லாம் என் பெயருக்கு ஒரு கவரில் வந்தது. வீட்டில் இருந்தவர்கள் எல்லோரும் நான் ஏதோ ஏப்ரல் ஃபூல் சமாச்சாரம் செய்திருக்கிறேன் என்று நினைத்து, மாலையில் அலுவலகத்திலிருந்து நான் திரும்பியதும் கேலி செய்தார்கள். முதலில் அதைப் பார்த்து எனக்கும் ஒன்றும் புரியவில்லை. பிறகுதான் தெரிந்தது ஐந்தாறு மாதங்களுக்கு முன்பாக என்னிடமிருந்து பர்சை பிக் பாக்கெட் செய்த நல்ல மனம் கொண்ட திரு திருடர் ஒருவர், பணத்தை மட்டும் எடுத்துக்கொண்டு, அதிலிருந்த கடிதங்கள் புகைப்படங்கள், எல்லாவற்றையும் ஒரு தபால் பெட்டியில் போட்டுச் சென்றிருக்கிறார். தபால் அலுவலகத்தில் இருந்த நல்ல மனம் கொண்ட அலுவலகர்கள் பர்சில் இருந்த  விலாசத்தை ஆராய்ந்து பர்சில் இருந்த மீதி எல்லாவற்றையும் எனக்கு அனுப்பியிருக்கிறார்கள்! 

அப்படி வந்த அந்த நடிகையின் படம் எது? அடுத்த வாரம் அந்தப் படத்தைப் போடுகிறேன்.


அதிரா :


1. பாடல்-பாட்டு.. இரண்டுக்கும் வித்தியாசம் இருக்கோ?

# பாடல் = எழுதப்பட்ட வரிகள். படித்தும் ரசிக்கலாம். பாடியும் பார்க்கலாம்.

பாட்டு = இசைக்கப்படும் வரிகள். கேட்டு மகிழலாம். பொருளையும் எண்ணி வியக்கலாம்.

2. கழுதை கெட்டால் குட்டிச் சுவர் என்பதன் சரியான அர்த்தம் என்ன?

 # காணாமல் போன கழுதை குட்டிச் சுவரைத் தாண்டிச் செல்லாது என்பதுதான். தற்காலத்தில் கழுதைகளும் குட்டிச் சுவரும் அரிதாகி விட்டன.

3. கீசாக்கா என் பக்கம் கேட்டதும்தான் இக்கேள்வி உதிச்சது.. கையும் களவுமாகப் பிடித்தல்.. இது எப்படி சரியாகும்? கையைப் பிடித்தல் அல்லது களவைப் பிடித்தல் எனில் ஓகே.. இது என்ன?

# களவாடிய பொருள் கையில் இருக்கும் போதே பிடிக்கப்படுவதுதான்.

& ஒருவேளை கையும் கிளவுசுமாக (Glouse) பிடித்தல் என்பதுதான் மருவி கையும் களவுமாகப் பிடித்தல் என்று ஆகிவிட்டதோ?     

4. சின்ன வயசில் சைக்கிள் ஓடியிருப்பீங்கதானே? ஒரே தடவையாக எத்தனை கிலோமீட்டர் அதிகமாக ஓடியிருக்கிறீங்க?.. நான் என் 15 ஆவது வயதில்.. ஒரு 20 கிலோ மீட்டர்வரை மாமாவுடன் ஓடியிருக்கிறேன் என் லேடீஸ் பைக்கில்... காலையில் தொடங்கி முடிக்கும்போது 2,3 மணியானதாக நினைவு.

 # ஒரு ஒப்புதல் வாக்குமூலம். எனக்கு சைக்கிள் ஓட்டத் தெரியாது.

& //சின்ன வயசில் சைக்கிள் ஓடியிருப்பீங்கதானே? // ஆஹா, நிறைய ஓடியிருக்கேன்! 

முதல் பகுதியிலிருந்து ஒரு extract: // 

அந்தப் பழுவேட்டரைய சைக்கிளுக்கு மருத்துவம் பார்த்து, கட்டுப் போட்டு, அதனை சொஸ்தப் படுத்திய மூன்றாவது அண்ணன் டாக்டர் கே ஜி.

   

நான்காவது அண்ணன் ஏற்கெனவே நாகை பஸ் ஸ்டாண்ட், பெருமாள் கோவில், மிஷன் ஹை ஸ்கூல், மாரியம்மன் கோவில் பக்கம் வருகின்ற பயணிகளையும், பக்தர்களையும், ஹவர் (Hour) சைக்கிளால் மோதி, அவர்களுக்குக் கடவுள் பயம் ஏற்படுத்தி, அவர்களிடம் அர்ச்சனை வாங்கி, அதை எல்லாம் ஒரு குலுக்கலில் மறந்து / மறைத்து, ஓரளவுக்கு  பாலன்ஸ் செய்யக் கற்றுக் கொண்டான். அவன் பிராக்டிஸ் செய்யும் பொழுதெல்லாம் கூடவே சைக்கிளைப் பிடித்துக் கொண்டு ஓடிய அனுபவம் எனக்கு நிறைய உண்டு. ஒருநாள் நாங்கள் இருவரும் இப்படிப் பயிற்சியில் (ஓட்டும் பயிற்சி, ஓடும் பயிற்சி) ரோலிங் மில் வேலைக்கு அவசரமாகச் சென்று கொண்டிருந்த ஐம்பது வயது தொழிலாளி (ரோலிங் மில் தொழிலாளி) ஒருவரின் கால்களுக்கு நடுவே அவரறியாவண்ணம் பின்புறமாக சைக்கிளை விட்டு, சைக்கிளை அவரிடமிருந்து பிரித்தெடுக்கத் தெரியாமல், அதிலிருந்து குதித்து ஓடி வந்தான் அண்ணன்.

&1 முதல் பகுதி.
&2 இரண்டாம் பகுதி 
&3 மூன்றாம் பகுதி 
&4 நான்காம் பகுதி 

என்று நான்கு பகுதிகளாக நான் சைக்கிள் கற்றுக்கொண்ட அனுபவங்களை ஆறு வருடங்களுக்கு முன்பு பகிர்ந்திருக்கிறேன். ஒவ்வொன்றாக க்ளிக் செய்து படித்து இரசிக்கவும்! 

=====================================================

இந்த வாரக் கேள்வி : 

மேலே எங்கேயோ கேட்டிருக்கேன். யாராவது அதைக் கண்டுபிடித்து பதில் சொல்லுங்க!

மீண்டும் சந்திப்போம்! 

=====================================================