புதன் 200101 : எங்கள் பார்வையில் 2019 ...

கடந்த 2019 ஆம் ஆண்டு - எங்கள் மீள் பார்வை - அ பொ க பகுதியில் காண்க. 

இதைப் படிக்கின்ற நீங்கள் ஒவ்வொருவரும் 'எங்கள் குடும்ப' உறுப்பினர். உங்களின் தொடர்ந்த ஆதரவால், நாங்கள் எங்கள் வெற்றிப் பயணத்தைத் தொடர்கிறோம். உங்கள் ஒவ்வொருவருக்கும் எங்கள் இதயங்கனிந்த நன்றி !

   
கர்ண பரம்பரை அதிரா :

1. நேர காலம் புரியாமல், எப்பவும் தன் பேச்சுக்கே முக்கியத்துவம் கொடுத்துப் பேசிக் கொண்டிருப்போரை என்ன பண்ணலாம்?

$ கொஞ்சம் பெரிய தொகை கடனாகக் கேட்டுப் பாருங்களேன்.

# என்னைப் போல் ஒருவன் என திருப்தி அடையலாம்.

   
& ஃபோனில் என்றால் பிரச்னை இல்லை - ஃபோனைக் கொஞ்ச தூரத்தில் வைத்து ஸ்பீக்கர் ஆன் செய்து நம் வேலையை செய்தவாறே பேசலாம். 

நேரில் பேசுகிறார் என்றால். ....  

* முதலில் வாயைப் பொத்தியபடி ஒரு கொட்டாவி விட்டு, 'சாரி' சொல்லவேண்டும்.
* அப்புறம் நன்கு தெரியும்படி வெளிப்படையாக ஒரு கொட்டாவி விடவேண்டும். சாரி சொல்லக்கூடாது. 
* அப்புறம் கை கடிகாரத்தை ஒரு முறை நோட்டம் விடவேண்டும்.
* அப்புறம் மீண்டும் கை கடிகாரத்தை நன்கு கவனிக்க வேண்டும்.
* அப்புறம் கை கடிகாரம் நின்றுபோய்விட்டதா அல்லது ஓடுகிறதா என்று காது அருகே வைத்துப் பார்க்கவேண்டும். 
* இதற்கெல்லாம் அசையாமல் அவர் தொடர்ந்து பேசிக்கொண்டிருந்தால், நம்முடைய அலைபேசியை திடீரென்று எடுத்து, எங்கிருந்தோ அழைப்பு வந்ததுபோல பாவித்து காதருகே வைத்து, " அட ! ஆமாம்டா (அல்லது ஆமாம்டி) --- மறந்தே போனேன். நல்லவேளை ஞாபகப்படுத்தினாய். இதோ அஞ்சே நிமிஷத்துல கிளம்பி அங்கே வந்துடறேன். வெயிட் பண்ணு." என்று சொல்லி அலைபேசியை பைக்குள் வைத்துக்கொண்டே ... பேசிக்கொண்டிருப்பவரைப் பார்த்து, " மீண்டும் சந்தர்ப்பம் கிடைக்கும்போது பேசலாம். " என்று சொல்லி, நேரே செருப்பு வைக்கும் இடத்தை நோக்கி நடக்கலாம். 

2.தமக்கு ஃபிரீ ரைம் எனில், போன் பண்ணி, கட் பண்ண விடாமல் அலட்டுவார்கள், ஆனா நாம் கொஞ்சம் ஃபிரீயாக இருக்கு, பேசலாமே என அழைத்தால், ஒன்று எடுக்க மாட்டார்கள், அல்லது எடுத்தாலும் பேச விரும்பாதவர்போல பேசுபவர்கள் பலர் இருக்கிறார்கள் அவர்களைப் பற்றி என்ன நினைக்கிறீங்க?

$ உங்களை விட்டால் வேறு யாரும் செவிமடுப்பதில்லை போலும்.

# சற்று சலிப்பாகத்தான் இருக்கும். ஆனால் மக்கள் தாம் செய்ய வேண்டிய அவசர அலுவல்கள் பற்றி நமக்குச் சொல்லத் தயங்குவதன் காரணமாக இது நேரலாம்.

3. பந்தா காட்டுவது.. என்பதன் சரியான விளக்கம் என்ன?

# இல்லாத முக்கியத்துவத்தை  தோரணை மூலமாக
 சிருஷ்டிக்க முயல்வதுதான். 

4. கண்ணை மூடியபின், சொர்க்கத்துக்குத்தான் போகவேண்டும் என எல்லோரும் நினைப்பது ஏன்? இறந்துவிட்டால் நமக்கென்ன தெரியப்போகிறது?

 $ அந்த நினைப்புதானே நம்மை நல்லவராக்குகிறது!

# வேறு ஒரு தளத்தில் வேறுமாதிரியான அனுபவம் இருக்குமோ எனும் அச்சம்தான். 

5.நடந்து வந்த பாதையை மறப்பது சரியோ?, தவறெனில், கடந்த காலத்தை நினைக்கக்கூடாது என்கிறார்களே அது தப்புத்தானே?

$ பாதை என்றால் திரும்ப உபயோகிக்க நேரிடலாம்

கடந்த காலம் திரும்ப வராது.

#  கடந்ததை நினைத்து பெருமை, கர்வம், மகிழ்ச்சி அல்லது வருத்தம் கோபம் அடைவது பயனற்றது. மற்றபடி கடந்தது உணர்த்திய பாடங்களை நினைப்பது தவறல்ல. 

6. இக்காலத்தில், முந்தைய காலத்தோடு ஒப்பிடுகையில், மனிதர்களிடையே இரக்க குணம் குறைந்துவிட்டதோ? அதிகரித்திருக்கிறதோ?

 $ குறைவு / அதிகரிப்பு என்பது நம் செய்தி எங்கிருந்து என்பது பொறுத்தது.

# குறைந்திருக்கிறது . காரணம், அதை ப் பயன்படுத்தி ஏமாற்றுவது அதிகமாகி விட்டது.

7. என் நண்பியின் புத்திக் கூர்மையைச் சோதிக்க ஆசையாக இருக்கிறது:). எப்படிச் சோதிக்கலாம் என ஒரு ஐடியாத் தாங்கோவன்?

 $ ஒவ்வொருவரும் அவரவர் வழியில் புத்திக்கூர்மை மிக்கவராக இருக்கக்கூடும். அவரை சோதனை செய்யும் திறமை நம்மிடம் இல்லாமலிருக்க வாய்ப்பு அதிகம்.  சோதனை முயற்சிகளைக் கைவிட்டு நண்பராகவே இருங்கள்!

# நம் புத்திக் குறைபாடை வெளிப்படுத்திக்கொள்வது நல்லதல்ல. 

8.இக்காலத்தில், நட்புக்காக உயிரையும் கொடுப்பேன், நட்புத்தான் உயர்ந்தது எனச் சொல்லிக்கொண்டு, அந்த நட்பின் தீய செயலுக்கெல்லாம் துணை நிற்பவர்கள் எப்படிப் பட்டவர்கள்?
      
$ தம் தீய செயல்களையும் எண்ணங்களையும் நியாயப்படுத்தும் முயற்சியாக இருக்கலாம்.

# நட்புக்காக உயிரைக் கொடுப்பதெல்லாம் மிகைபட மொழிதல்தான்.
உடல் உழைப்பு, ஆறுதல் சொற்கள், வட்டி இல்லாக் கடன், நியாயமான அளவு பொருள் உதவி இதெல்லாம் உண்மை நட்புக்கு அடையாளம். மதுப்புட்டி, சீட்டுக்கட்டு, ரேஸ்புக், உல்லாசப் பயணம் ஆகியன அல்ல.

9. வயதானவர் எனச் சொன்னால், பலருக்கும் கோபம் வருகிறதே? அது இயற்கையாக எல்லோருக்கும் வருமோ?

 $ வயதானவர் என்றதும் கோபம் வரவேண்டும் என்றால் புதிதாகக் கற்றுக்கொள்ளும் திறமை மழுங்குவதும் மரணம் நெருங்குகிறது என்று சுட்டிக் காட்டப்படுவதும் பிடிக்கவில்லை என்பதாலிருக்கலாம்.

# நான் வயதான நிலையை விரும்பி ரசித்து ஏற்கும் ஆள். 
"வயதான" எனும் அடைச்சொல் மகளிருக்குப் பிடிக்காது என நம்பப் படுகிறது. அது பற்றி எனக்குத் தெரியாது.

10.இஞ்சி இடுப்பு அழகி/அழகன் என்றால் சரியான அர்த்தம் என்ன? படம் போட்டு சே..சே.. விம் போட்டு விளக்கவும் பிளீஸ்ஸ்?:)

# எத்தனை இஞ்சி (") இடுப்பு என்று சொன்னால் படம் போடலாம். 

& பொங்கல் பண்டிகைக்கு பொங்கல் பானைக்கு இஞ்சிக்கொத்து / மஞ்சக்கொத்து கட்டுவார்கள். பானை வயிறு (தொந்தி) உள்ளவர்களை இஞ்சி இடுப்பர்கள் என்று வாலி, கேலி செய்திருப்பாரோ? 

(அதிராவுக்கு ஒரு ஊசிக் குறிப்பு : கர்ணம் என்றால் காது என்று பொருள். எழுதப்படாமல் ஒருவர் சொல்லி ஒருவர் என்று செவிவழியாக வந்த கதைகள்தான் கர்ண பரம்பரைக் கதைகள். கர்ண கடூரம் என்றால் காதால் கேட்க கடூரமான என்று பொருள். கர்ண பரம்பரை என்றால் கர்ணனுடைய பரம்பரை என்று நினைக்கக்கூடாது. ) 

பானுமதி வெங்கடேஸ்வரன்:

ஒரு பொருளை வாங்கலாம் என்று எப்படி முடிவெடுக்கிறீர்கள்? விளம்பரங்களைப் பார்த்தா? உறவினர்கள்,நண்பர்கள் சொல்வதைக் கேட்டா? சும்மா முயற்ச்சிக்கலாமே என்று நினைத்தா?

$ தேவை என்பதை வைத்து.

என்ன,எவ்வளவு,எங்கு,என்ன விலை, பராமரிப்பு செலவு, இன்னும் ஏனைய விஷயங்களை வைத்தே தீர்மானிக்கிறோம். 

# தேவைதான் வாங்குவதற்கு  முதல் காரணம் எனினும் சில சமயம் அந்தப் பொருளின் தரம், அதன் பயன்பாடு சிரமத்தைக் குறைப்பதாகவோ,  பொழுது போக்கின் தரத்தை மேம்படுத்துவதாகவோ, தொழில் நுட்பத்தின் அதிக பட்ச அடையாளமாகவோ இருப்பதைக் கொண்டு வாங்க முனைகிறோம்.
முள்ளுக்கத்தரிக்காய், பட்டாசு/மத்தாப்பு, நெயில் கட்டர், கைவச்ச பனியன், ஸ்மார்ட் ஃபோன் இவை வாங்குவதற்கு வெவ்வேறு காரணங்கள் இருக்குமே !

விளம்பரங்கள் எந்த பிராண்ட் என்பதை முடிவு செய்ய உதவலாம்.

& தேவை என்றால், ஓரளவு விலை குறைவு + தரத்தில் நம்பகம் என்றால் வாங்குவேன். உதாரணம் : பதஞ்சலி பொருட்கள். 
விளம்பரங்களை மட்டும் பார்த்து எதையும் வாங்கமாட்டேன். 
சில பொருட்களை சும்மா முயற்சிக்கலாமே என்ற அடிப்படையில் வாங்குவேன். உதாரணம் : Mango powder, Dry ginger powder, Tamicon, etc.
எலெக்ட்ரானிக் பொருட்கள் என்றால், தேவை + முயற்சிக்கலாம் என்ற அடிப்படையில், அமேசான் ஷாப்பிங் மூலம், கஸ்டமர் ரெவியூ , கஸ்டமர் ரேடிங் எல்லாவற்றையும் தீவிரமாக ஆராய்ந்து (5 star rating + 4 star rating must be more than 80% of the total ratings ) பிறகு வாங்குவேன். 

 ===================================

அவல், பொரி, கடலை & புவி 

சென்ற வாரத்தில் கொடுக்கப்பட்ட பகுதி, சிவசங்கரி அவர்கள் எழுதியது. கதை அல்ல, கட்டுரைத் தொகுப்பு. 'சின்ன நூல்கண்டா நம்மைச் சிறைப்படுத்துவது?' 

*** 

இனி நேற்றோடு விடைபெற்ற 2019 ஆண்டின் (எங்கள்) புள்ளிவிவரங்கள் பார்ப்போம். 

உங்கள் ஆதரவால், இந்த (2019) ஆண்டிலும் நாங்கள் ஒரு நாளைக்கு ஒரு பதிவு என்ற இலக்கை எட்டினோம். மொத்தம் இருந்த முன்னூற்று அறுபத்தைந்து நாட்களிலும், நாளுக்கு ஒன்றாக முன்னூற்று அறுபத்தைந்து பதிவுகள்! 

அதிகம் பேர் கண்டு இரசித்த பதிவு : வெள்ளி வீடியோ   

அதற்கு அடுத்தபடியாக அதிகம் பேர் படித்தது : மைதா பக்கோடா 

அதிக கருத்துரைகள் பெற்ற பதிவு : 

முதல் இடம் : பேய் ஏன் செடிகளில் குடியேறுவதில்லை? 

அதை ஒட்டியே அதற்கு இணையாக அடுத்த இடம் : கேட்காம போட்டோ எடுக்கறது தப்பு தம்பி 

'திங்க' கிழமை சமையல் பகுதியில் சுவையான பல குறிப்புகளை நமக்கு அளித்தவர், நெல்லைத்தமிழன். 

அடுத்தபடியாக அதிகபட்ச  சமையல் பதிவுகளை நமக்கு அளித்தவர், திருமதி பானுமதி வெங்கடேஸ்வரன். 

இருவருக்கும் எங்கள் வாசகர்கள் சார்பில் நன்றி. 

செவ்வாய் சிறுகதைகள் பகுதியில் புகுந்து கலக்கியவர்கள் நான்கு பேர். 

சுவாரஸ்யமான பல கதைகளை நமக்கு அளித்து, வாசகர் கருத்துரைகளுக்கும் உடனுக்குடன் பதில் அளித்து, இந்த வருடத்தின் அதிக கருத்துரைகளையும் நமக்கு வழங்கிய திரு துரை செல்வராஜூ இரண்டாயிரத்துப் பத்தொன்பதாம் ஆண்டின் எங்கள் சிறப்பு வாசகர் பட்டம் பெறுகிறார். 

கதைப் பகுதியில் அடுத்ததாக, ஜீவி, கீதா ரெங்கன், பரிவை சே குமார் ஆகியோர் ஆளுக்கு ஐந்து கதைகள் எழுதி, செவ்வாய் பதிவுகளை சிறப்பித்தார்கள். 

கேள்வி பதில் பகுதியில், வித்தியாசமான பல கேள்விகளைக் கேட்டு புதன் கேள்வி பதில் பகுதியை சுவாரஸ்யமாக ஆக்கிய இருவர், ஏஞ்சல் & அதிரா. 

இருவருக்கும் எங்கள் ஆசிரியர்கள் சார்பில் நன்றி. 

இந்த 2020 ஆம் ஆண்டும், நம் எல்லா வாசகர்களும், பதிவர்களும், பெருமளவில் பங்கேற்று, கதை எழுதி, சமையல் குறிப்புகள் அளித்து, கருத்துரைகள் கூறி உ(எ)ங்கள் Blog ஐ சிறக்க வைக்கவேண்டும் என்று கேட்டுக்கொள்கிறோம். 

இந்த ஆண்டில், உங்கள் எல்லோருக்கும் 

எண்ணிய எண்ணங்கள் ஈடேற, 

எல்லாம் நல்லதாக நடக்க,

எல்லா நாளும் இனிமைகாண 

எங்கள் வாழ்த்துகள். 

+++++++++++++++++++++++++++++++++++++++++++++++++++++++

மீண்டும் சந்திப்போம்! 

=======================================================