யாரைப் பார்த்ததும், சந்தித்ததும் மிக மகிழ்ச்சி அடைகிறீர்கள்?

 

பானுமதி வெங்கடேஸ்வரன்: 

> உண்ணா நோன்பு, மெளன விரதம் போன்றவை அனுஷ்டித்த அனுபவம் உண்டா?

# உண்டு. உணவு கொள்ளாதிருப்பதும் வாய் பேசாதிருப்பதும் மிகுந்த புத்துணர்ச்சி தரவல்லவை. பல சமயம் அருகில் இருப்போர் நமக்கு விரத பங்கம் செய்வதில் ஆர்வம் காட்டுவது ஒரு ஆச்சரியம்.

$ சந்திரனுக்கு போன விண்வெளிக்கலத்தில் கோளாறு. நான் உண்ணா நோன்பு அனுசரித்து என்னால் தான் அனைவரும் திரும்பினதாக பெருமிதம் கொண்டேன்.

மௌன விரதம் பெரும்பாலும் கோபத்தின் வெளிப்பாடாகவே..

நான் இன்று மௌனவிரதம் என்று சட்டையில் சீட்டு குத்தி இருந்தும் நம்மிடம் வலிய வந்து பேச்சு கொடுத்தோர் பலர்.

& உண்ணா விரதம் இருந்த ஞாபகம் இல்லை. மௌன விரதம் இருந்தது உண்டு. ஆனால் பெரும்பாலான சமயங்களில் பாதி நாளிலேயே மறந்து பேசிவிடுவேன்! 

> இந்த வாரம் நிக்கி கல்ராணியின் தரிசனம் கிடைத்தது. அடுத்த வாரம் மடோனா செபாஸ்டியனை எதிர்பார்க்கலாமா? 

& ஓ எதிர்பார்க்கலாமே !! இதோ -- 

1 )    

மடோனா செபாஸ்டியன் (இடது புறம்  இருப்பவர்!) 

2) 

(இதில் வலது புறம் இருப்பவர்!) 

நெல்லைத்தமிழன் : 

> இதயத்துக்கும் உணர்வுக்கும் என்ன சம்பந்தம்? ஏன் காதலியிடம் உன்னை இதயத்தில் வைத்து பூஜிக்கிறேன் என்று பேத்தறாங்க? 

#   இதயம் என்பது மனதைக்குறிக்க வந்த சொல். மனதைக் காட்டிலும் பவித்ரமாக நமக்குள் இருப்பதாக எண்ணி அதை இதயம் என்று குறிப்பிடுகிறோம்.   (நமக்குள் ஏதோ ஒன்று இருப்பதாக நம்பி...)

& இதயத்தில் நான்கு அறைகள் உண்டு என்று படித்துள்ளேன். ஒவ்வொரு அறையிலும் ஒவ்வொருவர் இருப்பரோ? 

> ஐந்து நாட்கள் மனதுக்கு நிம்மதியா இருந்துட்டு வரலாம் என நினைக்கும் இடம் எது? 

# திருவரங்கம் ,  அண்ணாமலை போன்ற தலங்கள்.  இமயமலைப் பிரதேசம் கன்யாகுமரி போன்ற இயற்கை கொழிக்கும் இடங்கள்.  ஹளேபீடு பேலூர் போன்ற சிற்ப சௌந்தர்யம் செழித்த பகுதிகள்.

& எங்கே போனாலும் மனமும் கூட வருகிறதே! நிம்மதி என்பது நமக்குள் இருப்பதா அல்லது வெளியில் கிடைக்கும் விஷயமா? 

> யாரைப் பார்த்ததும், சந்தித்ததும் மிக மகிழ்ச்சி அடைகிறீர்கள்?

# உறவிலும் நட்பிலும் பலர் இருக்கிறார்கள். பொதுவாகச் சொல்வதானால் ஆறு முதல் பதினைந்து வயதுவரையிலான இளந்தலைமுறையினர்.

நல்ல இசைத்திறன் மிக்கவர்கள்.  அதி புத்திசாலிகள். அறிவும் ஆற்றலும் அழகும் அமையப் பெற்ற அதிர்ஷ்டசாலிகள் இப்படி நிறைய...

& என்னைப் பார்த்ததும், சந்தித்ததும் யார் மிக மகிழ்ச்சி அடைகிறார்களோ, அவர்களை! 

=======  

அப்பாஜி பதில்கள் - மின்நிலா பொங்கல் மலருக்காக --- 

இந்த டிசம்பர் மாதம் முழுவதும் புதன் பதிவுகளில், பின்னூட்டங்களில், நீங்க அப்பாதுரை சாரிடம் கேட்க நினைக்கும் கேள்விகளை, 

" அ கே " ( or A K) என்று குறிப்பிட்டு பதிவு செய்யுங்கள். மற்ற வாசகர்கள் அ கே - கேள்விகளுக்கு பின்னூட்டங்களில் பதில்கள் எதுவும் பதிய வேண்டாம் என்று அன்புடன் வேண்டி விரும்பிக் கேட்டுக் கொள்கிறோம். 

உங்கள் கேள்விகளும், அவற்றிற்கு அப்பாதுரை அவர்களின் பதிலும் தொகுக்கப்பட்டு, மின்நிலா பொங்கல் மலரில் வெளியிடப்படும்.  

அடுத்த வாரம் நாங்கள் பதில் சொல்லவேண்டிய கேள்விகளுக்கு " எ கே " (Or E K) என்று குறிப்பிட்டு கேட்கலாம்! 

======= 

சென்ற வார பதிவில் சில  கேள்விகளுக்கு  அப்பாதுரை சார் அளித்த   பதில்கள் 

அதற்குப் பின் நடந்த சில அரட்டைகள் - தொகுப்பு உங்களுக்காக  இங்கே :

> சிற்றின்பம், பேரின்பம் இரண்டுக்கும் அடிப்படை வித்தியாசம் என்ன?

ஒன்று இட்லி, மிளகாய்ப்பொடி, நெஸ்கபே. 

மற்றது இட்லி, மிளகாய்ப்பொடி, தேங்காய் சட்னி, சின்ன வெங்காய சாம்பார், தக்காளித் தொக்கு, அப்போது வறுத்தரைத்த பில்டர் காபி. 

> ஒரு படம் வெற்றி பெறுவதாலோ, ஒரு நடிகர், நடிகையாலோ நமக்கு ஒரு பிரயோசனமும் கிடையாது. இருந்தாலும் படம் வெற்றியை நினைத்து நாம் சந்தோஷப்படுவதும், நடிகரை யாரேனும் கிண்டல் பண்ணினால் நாம் கோபப்படுவதும் எதனால்?

இந்த இரு நடிகர்களையும் யார் வேண்டுமானாலும் எவ்வளவு வேண்டுமானாலும் கிண்டல் செய்யலாம். கோபமே வராது எனக்கு. ஒருவர் -சன் மற்றவரும் -சன்.

கௌதமன் : 

எனக்குத் தெரிந்து அஞ்சு -சன் இருக்கிறார்கள். நீங்க சொல்வதில் முதல் சன் தெரியும். மற்றவர் யார்?

நெல்லைத் தமிழன் : 

இதிலெல்லாம் சந்தேகமா? சி-சன் அடுத்தது ஜெ-சன்.

msuzhi : 

என் கணக்குல ஒண்ணு சரி.

 

Bhanumathy Venkateswaran : 

தேங்காய் சீனிவாசன் 

 

msuzhi : 

நான் சொன்ன -சன் கமலஹாசன்.

 

கௌதமன் : 

நான் சொன்ன ஐந்தாவது சன் : பவர் ஸ்டார் சீனிவாசன் !!

> திருமணத்துக்குச் செல்வதற்கு மிக முக்கியக் காரணங்களில், அங்கு போடப்படும் டிஃபன், விருந்தும் முக்கியமானது என்பது உண்மையா?

பதின்ம நாட்களில் உண்மை. [யாருக்குக் கல்யாணம் என்பது கூடத் தெரியாமல் கல்யாண சீசன் டயத்தில் மாம்பலம் வடபழனி பகுதி கல்யாண மண்டபங்களில் நிறைய புகுந்து சாப்பிட்டிருக்கிறோம். ஒரே ஒரு தடவை மாட்டிக்கொண்ட தருணம் பார்த்து சகிக்கவில்லை சமையல்.]

கௌதமன்: 

நானும் என் ஒன்றுவிட்ட சகோதரரும், ஒரு முறை அதே ஏரியாவில் ஒரு கல்யாண ரிசப்ஷன் - வெளியே பந்தலில் என். ரமணி புல்லாங்குழல் கச்சேரி நடந்து கொண்டிருந்ததைப் பார்த்தோம். ஒ வி சகோதரர் கொஞ்சம் த்ரில் டைப் ஆசாமி. 'டேய் வாடா' என்று என்னையும் இழுத்துக்கொண்டு உள்ளே போய் விட்டார் . 

கூட்டத்தில் நடுவே இருந்த காலி இருக்கைகள் இரண்டில் உட்கார்ந்துகொண்டோம். எனக்கு மனசு திக் திக் - அவர் எதைப் பற்றியும் கவலைப்படாமல் கச்சேரியை தலையை ஆட்டியவண்ணம் கண்ணை மூடி ரசிக்க ஆரம்பித்துவிட்டார்.

ஒருவர் வரிசைகளுக்கிடையே புகுந்து எங்களை நோக்கி வந்தார். பயத்தில் நானும் கண்களை மூடி கச்சேரி ரசிப்பவனைப் போல நடிக்கலாமா என்று யோசிப்பதற்குள் அவர் அருகே வந்துவிட்டார்.

என்னைப் பார்த்து " டிபன் சாப்பிட்டாயிற்றா ?" என்று கேட்டார். அதைக் கேட்டதும் கண்ணைத் திறந்து பார்த்த ஒ வி ச - 'வேண்டாம்' என்று தலையை ஆட்டினார்.

விசாரித்தவர் உடனே போய் இரண்டு Fanta orange பாட்டில்களைக் கொண்டுவந்து, மூடி உடைத்து, எங்களிடம் கொடுத்து, 'இதையாவது குடிங்க' என்றார். வாங்கிக் குடித்தோம்.

கச்சேரி முடிந்து, கை தட்டி பாராட்டிவிட்டு வெளியே வந்த பிறகு ஒ வி ச விடம் 'இவர்கள் ஏற்கெனவே உனக்குத் தெரிந்தவர்களா?' என்று கேட்டேன்.

" யாருக்குத் தெரியும்?" என்றார் !

msuzhi : 

அது ஒரு ஜாலியான காலம்.

ஒரு கல்யாணத்தில் அட்டகாசமான தேங்காய்ப்பால் பாயசம் போட்டார்கள் என்று நண்பன் எங்கள் அனைவரின் அப்போதைய மொத்த சொத்தான ஐந்து ரூபாயை ஓதிவிட்டான் (மொய்?); அவனை மொத்தி எடுத்து பல்லாவரத்துக்கு வித்தவுட்டில் பயந்து கொண்டே வந்தோம்.

=========  

மின்நிலா பொங்கல் மலர், சிறந்த முறையில் தயாராகி வருகிறது. உங்கள் எல்லோருக்கும் பிடித்த பல அம்சங்கள் இடம் பெறுகின்றன. மேன்மேலும் உங்கள் படைப்புகளை engalblog@gmail.com மின்னஞ்சலுக்கு அனுப்பி வைக்கவும்.

நன்றி.

========