கலைஞரா, கர்மவீரரா?

 மீண்டும் ஒரு பட விமர்சனத்தோடு வந்திருக்கிறேன்.  தவிர்க்க முடியாமல். 

இரண்டாவது வாரமும் இப்படி விமரிசனம் ஒன்று எழுதுவது என்பது எனக்குப் பிடித்தமானது அல்ல.  எனினும் இந்தப் படம் என்னை எழுத வைத்திருக்கிறது.

ஒரு கடினமான - மிகக்கடினமான - வேலையை முடிக்க முடியாது என்ற நிலையிலிருந்து எப்படியோ முடித்து விடுகிறீர்கள்.  எப்படி உணர்வீர்கள்?  அதுவும் அது பலபேர் உயிரைக் காப்பாற்றிய வகையில் சம்பந்தப்பட்டதாயிருந்தால் எவ்வளவு பாராட்டு கிடைக்கும்?

ஆனால் அதே சமயம் உங்களுக்கு அதே செயலுக்கு ஆப்பு வந்தால்...?

ஒரு செயல் நடந்து முடியும்போது நாம் பார்க்கும் கோணம் ஒன்றுதான்.  சம்பந்தப்பட்டவர்களுக்கோ, அல்லத பாதிக்கப்பட்டவர்களுக்கோ அதன் மறுபக்கம் அல்லது கோணம் தெரியலாம்.  அது வெளிப்படும் போது ஆச்சர்யமாக இருக்கும்.

மிகத் திறமையாக பின்னப்பட்ட ஒரு கதை.  நாயகனும் எதிர் நாயகனும் (கவனியுங்கள்..  வில்லன் அல்ல) கிரிக்கெட் பார்க்கும் பழக்கம் உடையவர்கள்.   வெற்றி தோல்வி யார் பக்கம் என்பது கடைசி வரை நிச்சயமில்லாத விளையாட்டு 

2015 ல் தோஹாவிலிருந்து கொச்சிக்கு வந்த ஒரு பிளைட்டுக்கு ஏற்பட்ட கதி பற்றிய படம்.

விக்ராந்த் கன்னா விமானம் ஓட்டுவதில் பிஸ்தா.  அவரது ரெக்கார்டுகளுக்கு ரசிகர் கூட்டமே உண்டு.   மறுநாள் பிளைட்டை ஓட்டவேண்டிய பைலட் முதல் நாள் இரவு முழுவதும் குடி கூத்து என்று பார்ட்டியில்.  அதில் ஒரு பெண்ணை கரெக்ட் செய்ய முடியுமா என்கிற போட்டி வேறு.

அந்தப் பெண்ணும் பின்னால் சாட்சி சொல்ல வருகிறார்!

மறுநாள் மாலை விமானத்தை ஓட்ட வரும் விக்ராந்த் கலங்கலாக இருக்கிறார்.  (அந்த நடிகர் பார்ப்பதற்கு எப்போதுமே அப்படிதான் இருப்பார் என்பது வேறு விஷயம்)

அவருடன் பயணிக்கும் கோ பைலட் தான்யா அல்பகர்க்கி (விக்ராந்த் அவரை அல்பகர்க் என்று உச்சரித்து அழைக்க அவர் அல்பகர்க்கி என்று திருத்துவது சுவாரஸ்யம்.   அதையே நாராயண் வேதாந்த் திடமும் சொல்வதும் சுவாரஸ்யம்.)  தான்யாவுக்கும் விக்ராந்த் ஆராதிக்கும் ஹீரோதான்.

எல்லாம் சுபமாகத்தான் போகிறது.  இறங்கும் தருணம் பிரச்னை வருகிறது.  கொச்சியில் புயல், மழை.  இறங்க முடியாது.  இருக்கும் எரிபொருளை உபயோகித்து பெங்களூரு சென்று இறங்கி விடலாம் என்பது கோ பைலட் தான்யா அபிப்ராயம்.  திருவனந்தபுரத்தில் இறங்கலாம் என்பது விக்ராந்த் அபிப்ராயம்.  கொச்சியிலேயே இரண்டு மூன்று முறை Force Landing முயற்சிப்பதில் எரிபொருள் குறைகிறது.  கொச்சியில் மோசமான வானிலை என்றால் திருவனந்தபுரத்திலும் அப்படிதான் இருக்கும் என்பது தான்யா அபிப்ராயம்.  அது உண்மையும் கூட.   ஆனால் விக்ராந்தின் பிடிவாதம் வெல்கிறது.

திருவனந்தபுரத்தில் நிலைமை மோசம் என்று அறிவிக்கும் வானிலை அதிகாரிக்கு மன உளைச்சல் காரணமாக உடல்நிலை சரியில்லாமல் போக, அவரை இருக்கைமாற்றும் தருணம் 'அங்கும் நிலைமை மோசம் இங்கு இறங்க வேண்டாம்' என்கிற தகவல் விக்ராந்த், தான்யாவுக்கு தெரிவிக்கப்பபடாமலே போகிறது.

எரிபொருள் குறைவாகி விட்டதால் அங்கு இறங்கியே ஆகவேண்டிய கட்டாயம்.  விக்ராந்த் 'கண்ணை மூடிக்கொண்டு' விமானத்தை இ(ற)யக்குகிறார்.

திகில் மற்றும் கலவரத்தால் பீடிக்கப்படும் நிலைய அதிகாரிகள் விக்ராந்தை இறங்கச்சொல்லும் ரன்வேயை விடுத்து அவன் 34 ஐ தேர்ந்தெடுக்கிறான்.

ஏகப்பட்ட சிரமங்களுக்குப் பின் விக்ராந்த் வெற்றிகரமாக விமானத்தை தத்தித்தத்தி தரையிறக்கியும் விடுகிறான்.  எல்லோரும் நலம்.  ஆனால் ஆஸ்பத்திரி செல்லும் வழியில் ஒரு மூதாட்டி மட்டும் ஹார்ட் அட்டாக்கில் மரணம்.  வெளியில் வரும் விக்ராந்த், தான்யாவுக்கு அமோக வரவேற்பு கிடைக்கும் என அவனைப் போலவே நாமும் எதிர்பார்க்க, 

இருவரும் கைது செய்யப்படுகிறார்கள்.

வருகிறார் எதிர் ஹீரோ நாராயண் வேதாந்த் விசாரணை செய்ய.   அவர் பயங்கர புத்திசாலி.குறுக்கு கேள்விகளில் புலி.  அவரது அணுகுமுறையே வித்தியாசமாக இருக்கும்.

அவர் விசாரணைக்கு ஏற்ற வகையில் பதில் சொல்கிறார் விக்ராந்த்.  தப்பித்து விட்டார் விக்ராந்த் என்று நினைக்கும்போது வேதாந்த் தான்யாவிடம் விசாரணைக்கு வருகிறார்.  நிலைமை மாறுகிறது.  குற்றவாளியாகிறார் ஹீரோ விக்ராந்த்.

விசாரணையின் விளைவாக விக்ராந்த் வெளிநாட்டில் வேறு ஒரு பெண்ணுடன் கூத்தடித்த விவரம் அவன் மனைவிக்கும் தெரிகிறது.  இறந்த மூதாட்டியின் நினைவு விக்ராந்தை கொல்கிறது.

முதல் பாதி ஆங்கிலப்படங்கள் போல ஆபத்தில் விமானம் தரை இறங்கும் காட்சி என்றால், இரண்டாவது பாதியில் அமிதாப்பின் குறுக்கு விசாரணையும் அஜய் தேவ்கனின் டிஃபன்சும்.  ஒருநாள் மேட்ச் போல யார் ஜெயிப்பார்கள் என்று மாறி மாறி வரும் நிலைமை கடைசியில் என்ன ஆகிறது என்று கதை.

அமேசான் பிரைமில் இருக்கிறது. நம்பிப் பார்க்கலாம்.

================================================================================================================

காமராஜரைவிட சிறந்தவர் கலைஞர் 

பெருந்தலைவர் காமராசருக்கு அடுத்தபடியாக பின்னணி (சாதி செல்வம் குடும்ப பரம்பரை, அல்லது வழி மரபு முதலிய) பலம் ஏதுமில்லா நிலையில் இயற்கை நுண் அறிவுத் திறத்தாலும் ஓயாத உழைப்பாலும் மக்களின் - இனத் தெய்வமாய் உருவானவர் டாக்டர் கலைஞர்.  இவ்வாறு ஒருவர் உருவாவது அவர் கையிலும் இல்லை.  இயற்கையின் கையிலே -உறவுடைய பலர் கையிலேயே -  உள்ளது எனலாம்.

 பெருந்தலைவர் காமராசருக்கும் அருந்தலைவர் கலைஞருக்கும் உள்ள இரு பெரும் வேறுபாடுகள் நூல் அறிவும் நாவன்மையும் (நாவமைக்குக் கருத்தாற்றலும் கற்பனை ஆற்றலும் கட்டாயம்).  இந்த இரண்டும் டாக்டர் கலைஞருக்கு தமிழ் மக்கள் செய்த தவத்தால் வாய்ந்தமையால் தலைவர் கலைஞர் மணமுடைய பொன்மலராய் விளங்குகிறார்.  மணம் வீசுகிறார்  ஆட்சி செயலாற்றலில் அட்மினிஸ்ட்ரேட் எபிலிட்டி ஸ்கில் தொண்டார் தொண்டில் - இருவரும் ஒருவரே. 

 நுண்ணறிவும் நூல் அறிவும் இன்டெலிஜென்ஸ் காமன்சன்ஸ் இருவரும் ஒருவரே.

 திருவள்ளுவர் இரு கண்களென போற்றிய நுண்ணறிவும் நூல் அறிவும் செயலாற்றலும் கண்டிப்பம் கருணையும் அடக்கமும் அறிவாயவும் ஒருங்கே படைத்தவர் தலைவர் கலைஞர்.  இப்பண்புகள் இன்றைக்கும் அவரிடம் வளர்பிறையாய் வளர்ந்து வருவது தமிழினம் - ஏன், பாரதம் செய்த பெரும்பேறு.  இதை உணராதவர்உலராதவர்!  ஈரம்!

எதிரொலி கலைஞர் பொதுவாழ்வு பொன்விழா மலரில் வெளிவந்த கட்டுரை - 1988

===========================================================================================================

திரு ஆர். கந்தசாமி பேஸ்புக்கில் பகிர்ந்திருப்பது...  நிறைய சுவாரஸ்யமான இலக்கிய, சினிமா துணுக்குகள் எக்கச்சக்கமாய் தினந்தோறும் பகிர்கிறார் இவர்.

இசையமைப்பாளர் எம்.எஸ். விஸ்வநாதனின் வேண்டுகோளின் பேரில் நான் ஒரு விளம்பர சுற்றுப்பயணத்தில் சிங்கப்பூர் செல்ல வேண்டியிருந்தது. எம்.எஸ்.வி யின் குடும்பம் எங்களுடன் வந்தது. நான் பல படங்களில் நடித்திருந்தாலும், அடிப்படையில் நான் ஒரு கூச்ச சுபாவமுள்ளவள். நான் மக்களுடன் உரையாற்ற வேண்டியிருக்கும் போது நான் பதற்றமடைகிறேன். நான் நிறைய பேருக்கு முன் நடனமாட வேண்டுமானால் எனக்கு மேடையில் ஏற பயம் உருவாகிறது.  ’நான் நடனமாடக் கேட்க மாட்டேன்’ என்ற நிபந்தனையின் பேரில் மட்டுமே எம்.எஸ்.வி அவர்களின் அமைப்புடன் வர ஒப்புக்கொண்டேன். சிங்கப்பூரில் நடந்த ஒரு விழாவில், பார்வையாளர்களுக்கு என்னை அறிமுகப்படுத்திய பொழுது, நான் ’நமஸ்காரம்’ என்று கூறிவிட்டு மேடையை விட்டு வெளியேறினேன், ஆனால் மக்கள் என்னை ஆட வேண்டும் என்று கூச்சலிட ஆரம்பித்தனர். அன்று என்னை காவல்துறையினர் பாதுகாப்பாக அறைக்கு அழைத்துச் சென்றனர்.

பின்னர் எம்.எஸ்.வி, என் அறைக்கு வந்து என்னிடம் சொன்னார், நான் அவர்களுக்கு முன் நடனமாடாவிட்டால் எனது ரசிகர்கள் நிகழ்ச்சியை தொடர விடமாட்டார்கள். அவர் என்னிடம் நடனமாடும்படிக் கேட்டார். நான் மறுத்துவிட்டேன். அடுத்த நாள், என்னிடம் கூட சொல்லாமல் தனியாக விட்டுவிட்டு எம்.எஸ்.வி மற்றும் அவரது குடும்பத்தினர் இந்தியாவுக்குப் புறப்பட்டனர், எம்.எஸ்.வி போன்ற ஒரு மூத்த, மரியாதைக்குரிய நபரின் செயலில் இது மிகவும் பொறுப்பற்ற நடத்தை என்று நான் நினைக்கிறேன். ஒரு பெண்ணை தனியாக ஒரு புதிய நாட்டில் விட்டு விட்டார்கள். எப்படியாவது எனது பாஸ்போர்ட்டைத் திருப்பித் தருமாறு பயணத்தின் அமைப்பாளர்களை வற்புறுத்தினேன், நானும் மெட்ராஸுக்கு பறந்தேன்.

விமான நிலையத்தில், (customs )சுங்கத்துறை அதிகாரிகளால் நான் சோதனைக்கு உள்ளானேன். எனக்காக நான் கொண்டு வந்த சில பொருட்களுக்கு நான் ஒரு சிறிய தொகையை செலுத்த வேண்டியிருந்தது. பின்னர் தான் சில மேல் அதிகாரிகள் என்னைச் சோதனையிட வருகிறார்கள். அவர்களில் ஆறு பேர் சிபிஐயிலிருந்து வந்தவர்கள் என்று நான் நினைக்கிறேன். அவர்கள் எனது உடைமைகள் எல்லாவற்றையும் தேடி, பின்னர் மன்னிப்பு கேட்டு வெளியேறினர். நான் எதையாவது கடத்துகிறேன் என்ற தகவல் தங்களுக்கு கிடைத்ததாக அவர்கள் கூறினர். இதுபோன்ற தகவல்களை யார் கொடுத்தார்கள் என்று எனக்குத் தெரியவில்லை. அதற்குப் பிறகு அந்த வழக்கு என்ன ஆனது என்பதும் எனக்குத் தெரியவில்லை.

- சில்க் ஸ்மிதா நேர்காணலில் சொன்னது 

பேசாமொழி.காம்

========================================================================================================

சாப்பிடும் முறை....

'வேளா வேளைக்குச் சாப்பிடாமல், பசி எடுக்கும் போது மட்டும் உணவு அருந்தி வந்தால், ஆரோக்கியமான வாழ்வை வாழலாம்,'' என்கிறார், இயற்கை மருத்துவர் திவ்யா பிரியதர்ஷினி.

அவர் கூறியதாவது:உயர் ரத்த அழுத்தம், நீரிழிவு, சினைப்பை நீர்க்கட்டி போன்ற வாழ்க்கை முறைகளால் வரும் நோய்களுடன் வருவோரிடம், அவர்களின் உணவு, பழக்கவழக்கம், வேலை போன்ற தினசரி நடவடிக்கைகளை கேட்டறிந்து, அதற்கேற்றாற்போல, உணவு முறைகளை பின்பற்ற அறிவுறுத்துகிறோம்.உடற்பருமன் பிரச்னைக்கு, அதற்கு மட்டுமன்றி, முழு உடலுக்குமே சிகிச்சை அளிக்கப்படும்.

இதனால், உடற்பருமன் சார்ந்த பல்வேறு நோய்களுக்கும் தீர்வு கிடைக்கும்.அலோபதி மருந்து சாப்பிடுவோர், அந்த மாத்திரைகளைத் தவிர்த்துவிட்டு, இயற்கை மருத்துவத்தைப் பின்பற்ற தயங்குவர். அவர்களை, அலோபதி மருந்து உட்கொண்டபடியே, இயற்கை மருத்துவத்தை பின்பற்ற ஆலோசனை வழங்குவோம். காலப்போக்கில், இயற்கை மருத்துவத்தின் மீது நம்பிக்கை அதிகரித்து, ஆங்கில மாத்திரைகளை தவிர்த்து விடுவர். நேச்சுரோபதியின் தத்துவமே, உடல்மொழியைக் கேளுங்கள் என்பதுதான்.உதாரணமாக, நேரத்துக்கு சாப்பிடாதீர்கள் என்கிறோம்.

உணவு இடைவேளை என்பதற்காக உண்ணக்கூடாது. பசித்தால் மட்டுமே உண்ண வேண்டும். தினமும் குறிப்பிட்ட நேரத்துக்கு சாப்பிட்டுப் பழகிவிட்டு, அதே நேரத்துக்கு பசித்தால், அது உளவியல் சார்ந்த பசி. அதைத்தவிர்த்து, ஏற்கெனவே உண்ட உணவு செரித்து, உடலியல் ரீதியான பசி எடுக்கும்போதுதான், உண்ண வேண்டும்.துாக்கம், பசி, தாகம், ஓய்வு என்ற உடலின் நான்கு மொழிகளை கவனித்துப் புரிந்து, தேவையானதைக் கொடுத்து வந்தால், உடல் எப்போதும் ஆரோக்கியமாக இருக்கும்.மனச்சிக்கல் இன்றி உறங்கி, மலச்சிக்கல் இன்றி விடிந்தால், ஆரோக்கியத்துக்கு ஒருபோதும் குறையிருக்காது.

தண்ணீரை அமர்ந்து, நிதானமாக அருந்த வேண்டும்; அவசரமாக அருந்தக் கூடாது. இயற்கை மருத்துவம் என்பது, வாழ்வியல் நடைமுறை, உணவு மாற்றம், யோகா என, பக்கவிளைவுகளற்ற வகையில் சிகிச்சை அளிப்பதுதான். இதை மத்திய அரசின் ஆயுஷ் அமைச்சகம் அங்கீகரித்துள்ளது. ஆரோக்கியமான வாழ்க்கைக்கு உடலின் மொழியைக் கேட்க வேண்டும்.இவ்வாறு, அவர் தெரிவித்தார்.

=================================================================================================================================

ராஜாஜியைப் பற்றி இந்த வாரமும் ஒரு (குட்டிச்) செய்தி...

===========================================================================================================

'கோரா'விலிருந்து ரசித்த படம் ஒன்று..

===================================================================================================

ஒரு காக்கையோ குருவியோ

குரல் கொடுத்து இந்த

மௌனத்தைக்

கலைக்காதா என்ன?

ஒரு மேகம் திரண்டு

மழை பொழிந்து விடாதா என்ன? 

 Sep 12, 2014

===============================================================================================================

பொக்கிஷம் பக்கம் போகலாமா...

முகத்தை வைத்தான் மூக்கை வைத்தான் நாக்கை வைத்தான் தாடியால் அனைத்தையும் மறைத்தான்!

இரு வாரங்களுக்கு முன் கச்சேரியில் பாடகர் செய்யும் சேஷ்டை பற்றி கேள்வி வந்தததாய் நினைவு!

தலை வைத்தான்.. முடியை வளர்த்தான்.. ஸ்டைலை வைத்தான்.. அந்தஸ்தை வைத்தான்!

மீண்டும் அடுத்த வியாழன் தொடர்வோமே.....