நான் பயணம் செய்த இடங்களின் படங்கள் : தாய்பே பகுதி 2 :: நெல்லைத்தமிழன்

 

(001) தாய்பே Taipei, தாய்வான் –  Taipei Zoo – பகுதி 2

என்னுடைய நான்கு பயணங்களில் மூன்று முறை இந்த உயிரியல் பூங்காவுக்குச் சென்றிருக்கிறேன். ஒரு தடவை என் மனைவியையும் பசங்களையும் தாய்வானுக்கு வரச்சொல்லி, அங்கு சில நாட்கள் விடுமுறையைச் செலவழித்தோம். குடும்பத்தோடு சென்றபோது, ஒரு மணி நேரம்தான் இங்கு செலவழித்தோம். நான் தனியாகப் போயிருந்தபோது இரண்டு, மூன்று மணி நேரங்களுக்குக் குறையாமல் உயிரியல் பூங்காவில் அலைந்திருக்கிறேன்.

இந்தப் பூங்காவிலேயே, பாண்டாக்களுக்குத் தனி இடம், பெங்குயின்களுக்குத் தனி இடம், அடர்த்தியான மரங்கள், மலைப்பகுதி போன்ற தோற்றம், பாறைப்பகுதி என்று பல்வேறு பகுதிகள் உள்ளன. பூங்காவின் மேப்பை வைத்துக்கொண்டு ஒவ்வொரு இடமாக நடந்து பார்க்கவேண்டியதுதான். சோலைக்குள் நடக்கும் உணர்வு கிடைக்கும்.

முன்பு சொல்லியிருந்தபடி, பூங்காவிற்கு அருகிலேயே கோண்டாலா எனப்படும் விஞ்ச் ஸ்டேஷன் உண்டு. அதில், மலைகளின் மீது நாம் விஞ்ச் மூலம் பயணித்துப் பரவசமடையலாம். பூங்காவிற்கும் விஞ்ச் ஸ்டேஷனுக்கும் இடையில் பெரிய இசை நீரூற்றுப் பகுதியும் உண்டு. அங்கு விடுமுறை நாட்களில் ஒரு மணி நேரத்திற்கு ஒரு முறையும், மற்ற நாட்களில் மாலையும், இசை நீரூற்று நிகழ்ச்சிகள் நடக்கும்.

தாய்வான் ஒரு ட்ராபிகல் தீவு. காலநிலை நன்றாக இருக்கும். ரொம்ப வெயில் இருக்காது. பாதுகாப்புக்கோ ஒரு குறையும் இல்லை. அதனால் ஒவ்வொரு இடத்தையும் சுற்றிப் பார்ப்பதில் சிரமம் ஏற்படாது. எல்லா இடங்களிலும் உணவு மற்றும் ஸ்நாக்ஸ்க்கான இடங்கள் உண்டு.

நாம் மற்ற விலங்குகளின் அணிவகுப்பைத் தொடர்வோம்.

(தொடரும்)