"திங்க"க்கிழமை : வேப்பம்பூ மணத்தக்காளி வத்தல் சாதம் - ஸ்ரீராம்

 

பழைய வீட்டின் மொட்டை மாடியில் போர்வை விரித்தாற்போல வேப்பம்பூ விழுந்திருக்கும்.  அந்த இடத்தில இரவு ஒரு துணியை விரித்து வைத்தால் காலை அந்தத் துணியில் விழுந்திருக்கும் பூக்களை மட்டும் சேமித்து வைத்துக் கொண்டாலே நிறைய தேறும்.  பழைய வீட்டை ஒட்டி இருந்த அந்தப் பெரிய வேப்பமரம் நல்ல நிழலையும், காற்றையும் பூக்களையும் கொடுத்துக் கொண்டிருந்தது.  வருடப்பிறப்பில் கசப்பு புளிப்பு இனிப்பு பச்சடி செய்யவும் உதவியாய் இருந்தது.  அன்று அது Must அல்லவா?  "எமனுக்கு கசப்பாக, மனிதனுக்கு இனிப்பாக" என்று சொல்லி மூன்று முறை ஒவ்வொரு ஸ்பூன் கையில் விடுவாள் அம்மா.  

"புளிப்பு தெரிகிறதே..  அதைச் சொல்லவில்லையே" என்று கேட்டால், "அதை கண்டு கொள்ளக்கூடாது என்று அர்த்தம்" என்பாள்.    

வீட்டை விட்டு வெளியே வந்தால் காம்பவுண்டில் ஆங்காங்கே மணத்தக்காளி செடிகள் காணப்படும்.  கொஞ்சம் கொஞ்சமாக மணத்தக்காளி காய்கள் சேமித்துக் கொள்ளலாம்.

இந்த வீட்டுக்கு வந்தபின்னே இதை எல்லாம் விலை கொடுத்து வாங்க வேண்டி இருக்கிறது.  மாம்பலம் சென்றிருந்தபோது வேப்பம்பூ இரண்டு கால்படி ஐம்பது ரூபாய் என்று வாங்கி இருந்ததை முன்னர் குறிப்பிட்டிருந்தேன் என்று நினைக்கிறேன்.  கொஞ்சம் கருப்பு தட்டி இருந்த வேப்பம்பூ.  எங்கள் பழைய வீட்டில் நாங்கள் சேமித்த வேப்பம்பூக்களின் தரத்துக்கு ஈடாகாது.  

எனினும் வேப்பம்பூ!

​,மணத்தக்காளி வத்தல் நாமே போட்டு வைத்துக் கொண்டால் சிறப்புதான்.  காய்களை பறித்து சுத்தம் செய்து ஊசியால் சிறு துளை செய்து மோரில் உப்பு போட்டு ஊற வைத்து காயவைத்து எடுத்துக் கொண்டால் நல்லதுதான்.  ஆனால் செடிகளிலிருந்து நாமே பறிக்கக் கூடிய மணத்தக்காளிக்காய் ஒரு கைப்பிடி கூட தேறாது.  அதை மோரில் ஊறவைத்து இரண்டு நாளில் மோர் சாதத்துக்கு அதை வெடுக் வெடுக் அல்லது சதக் சதக் என்று கடித்து தொட்டுக்கொள்ளும் சுவையும் தனிதான்.  பச்சை மணத்தக்காளிக்காயும் கடைகளில் விலைக்கு கிடைக்கும்.  அதை வாங்கி கூட நாமே ஊற வைத்து காய வைத்து வத்தல் போட்டுக்கொள்ளலாம்.  அளவான உப்புடன் இருக்கும்.

வேப்பம்பூ ரசம் பேமஸ். அதுபோல மணத்தக்காளி வத்தக்குழம்பு. கசப்பு, அளவான காரம் புளிப்பும் சேர்ந்து நல்ல சுவை. நல்லகாம்பினேஷனில் அமைந்துவிடும் 

மணத்தக்காளி வத்தக் குழம்புக்கு ஈடு இணை கிடையாது.  அப்படி அமையும் நாளில் ரசம் சாதம், மோர்சாதங்களை மறந்து இதையே ஓருணவாக நிறைய சாப்பிடலாம்!  ஆனால் நான் சொன்னபடி புளிப்பு, உப்பு, காரம் சரியான அளவீடுகளில் அமைய வேண்டும்.  அதற்கு கைப்பக்குவம், ராசி வேண்டும்.  அதே வத்தக்குழம்பை மோர் சாதத்துக்கு தொட்டுக்கொள்ளும் சுகமும் தனிதான்.

வறுத்த மணத்தக்காளி வத்தலை மோர்சாதத்துக்கு நறுநறுவென தொட்டுக்கொண்டும் சாப்பிடலாம். லேசான உப்புச்சுவையுடன் அமிர்தமாய் இருக்கும். கடைகளில் விற்கும் வத்தல்களில் சீக்கிரம் கெட்டுவிடக் கூடாது என்பதற்காக நிறைய உப்பு சேர்த்து உப்புக்காடியாக கொடுப்பார்கள். உதாரணம் மோர்மிளகாய்!

இப்போ இன்றைய நிகழ்ச்சிக்கு போவோம்...  வாருங்கள் நேயர்களே....!

கொஞ்சம் வேப்பம்பூ, மணத்தக்காளி வத்தல் ஆகியவற்றை தனித்தனியாக வறுத்து எடுத்து வைத்துக் கொள்ளலாம்.  ஒன்றாகத்தானே போடப்போகிறோம், அப்புறம் ஏன் தனித்தனியாக என்றால், இவற்றில் நம் சுவைக்கேற்ப ஏதாவது ஒன்றை கூட்டி குறைத்து சேர்த்துக் கொள்ளலாம் என்பதால்.

தேவைப்படுபவர்கள் சுண்டைக்காய் வத்தலை, வீட்டில் செய்த தஞ்சாவூர் குடைமிளகாய் வத்தலை கூட வறுத்து தனித்தனியாய் வைத்துக் கொள்ளலாம்.

தட்டில் சூடான சாதத்தைப் போட்டு, தேவைப்படுபவர்கள் நெய்யோ, நல்லெண்ணெயோ ஊட்டி, அதில் முக்கியமாக வேப்பம்பூ வறுத்ததையும், மணத்தக்காளி வறுத்தையும் உங்கள் விருப்பமான ரேஷியோவில் சேர்த்து மெல்லக் கிளறி, கவனியுங்கள், பிசைந்து அல்ல, மெல்லக் கிளறி, சாப்பிடலாம்.  

ஆரோக்கியம்.

இதில் அந்த சுண்டை வத்தலை சேர்த்துக் கொள்ளலாம்.  காரத்துக்கு ஒன்றிரண்டு -  அவரவர்கள் காரத்தேவைக்கேற்ப - மிளகாய் வத்தலையும் சேர்த்துக் கொள்ளலாம்.  வீட்டிலேயே தயாரித்த வத்தல்கள் என்றால் சாதத்துக்கு கொஞ்சம் உப்பு தேவைப்படலாம்.  .  கடையில் வாங்கியது என்றால் சாதத்தில் அளவுக்கதிககமாகவே உப்பு சேர்ந்திருக்கும்!

வேப்பம்பூ மணத்தக்காளி வத்தல்கள் மட்டும் சேர்த்தி பிசைந்து சாப்பிடலாம்.  அவற்றுடன் சண்ட வத்தல் மட்டும் அல்லது மிளகாய் வத்தல் மட்டும் அல்லது இரண்டும் சேர்த்து பிசைந்து என்று வகை வகையான காம்பினேஷனில் சாப்பிடலாம்.

  சாப்பிட்டுப் பாருங்கள்.  சுவைக்கு சுவை; ஆரோக்கியத்துக்கு ஆரோக்யம்.