இந்திய இதயநோய் சிகிச்சைத் துறையில் புதிய மைல்கல் மற்றும் நான் படிச்ச கதை

 எல்.பி.ஜி., இறக்குமதி: ஒரே கல்லில் பல மாங்காய் அடித்தது மத்திய அரசு

பெரும்பாலான நம் குடும்பங்களில் காலையில் எழுந்தவுடன், முதலில் செய்வது காஸ் அடுப்பை பற்ற வைத்து டீயோ, காபியோ போட்டு குடிப்பது தான். இதற்கு, எல்.பி.ஜி., எனப்படும் திரவ பெட்ரோலிய எரிவாயு சிலிண்டர் பயன்படுகிறது. நாட்டில் உள்ள மொத்த குடும்பங்களில் 60 சதவீதம் பேர், சமையலுக்கு எல்.பி.ஜி., சிலிண்டரையே பயன் படுத்துகின்றனர். இந்த எல்.பி.ஜி., சிலிண்டரில் 'புரொப்பேன்' மற்றும் 'பியூட்டேன்' என்ற இரண்டு எரியக்கூடிய 'ஹைட்ரோகார்பன்கள்' உள்ளன. புரொப்பேன் மிகக் குறைந்த வெப்பநிலையில் கூட ஆவியாகும். அமெரிக்கா, கனடா போன்ற குளிர் நாடு களுக்கு இது சிறந்தது. நம்மை போன்ற வெப்பமண்டல நாடுகளில், புரொப்பேன்- அதிகம் உள்ள சிலிண்டர் சுற்றுப்புற வெப்பம் காரணமாக, மிக அதிக அழுத்தத்தை உருவாக்கிவிடும். அதே சமயம், பியூட்டேன் அதிக வெப்பநிலையில் ஆவியாகும் தன்மை உடையது. இது நம் நாட்டு சூழலுக்கு சரியாகப் பொருந்தும். எனவே தான், நாம் எல்.பி.ஜி.,க்காக மேற்கு ஆசிய நாடுகளான சவுதி அரேபியா, ஐக்கிய அரபு எமிரேட்ஸ், கத்தார் ஆகிய நாடுகளை பெரிதும் நம்பியிருக்கிறோம். உலகின் மிகப்பெரிய எல்.பி.ஜி., உற்பத்தியாளராக அமெரிக்கா இருந்தாலும், நம் இறக்குமதியில் 90 சதவீதம் சவுதி உள்ளிட்ட நாடுகளிடம் இருந்துதான் வருகிறது.

காரணம், வளைகுடா நாடுகள் பெரும்பாலும் கச்சா எண்ணெய் சுத்திகரிப்பு நிலையங்களில் இருந்து எல்.பி.ஜி.,யை உற்பத்தி செய்கின்றன. கச்சா எண்ணெய் சுத்திகரிப்பின் போது, இயல்பாகவே பியூட்டேன் நிறைந்த எல்.பி.ஜி., உபப் பொருளாகக் கிடைக்கும். : மாற்றம் : அமெரிக்கா கச்சா எண்ணெய் சுத்திகரிப்பு மூலம் இல்லாமல், இயற்கை எரிவாயுவை பூமியில் இருந்து எடுத்து, எல்.பி.ஜி.,யை உற்பத்தி செய்கிறது. இயற்கை எரிவாயுவில் பியூட்டேனை விட புரொப்பேன் அதிகமாக இருக்கும். வளைகுடா நாடுகள் இந்தியாவுக்கு மிக அருகில் இருப்பதால், சரக்கு போக்குவரத்து செலவு மிகக் குறைவு என நாம் அங்கிருந்து இறக்குமதி செய்தோம் இதில் தற்போது மாற்றம் ஏற்பட்டுள்ளது. அமெரிக்காவில் இருந்து ஆண்டுக்கு 22 லட்சம் டன் எல்.பி.ஜி., இறக்குமதி செய்ய, நாட்டின் மூன்று பொதுத்துறை எண்ணெய் நிறுவனங்கள் ஒப்பந்தம் செய்துள்ளன. இந்த ஒப்பந்தம் சமீபத்தில் மத்திய பெட்ரோலிய துறை அமைச்சர் ஹர்தீப் சிங் பூரி முன்னிலையில் கையெழுத்தானது. இது, நம் நாட்டின் ஓராண்டுக்கான எல்.பி.ஜி., இறக்குமதியில், 10 சதவீதமாகும். அமெரிக்க எல்.பி.ஜி.,யில் புரொப்பேன் அதிகம் உள்ளதோடு, அது சவுதி உள்ளிட்ட நாடுகளை விட தொலைவிலும் உள்ளது. அப்படியிருக்க, நாம் ஏன் அமெரிக்காவிடம் எல்.பி.ஜி., வாங்க வேண்டும்? இதற்கு காரணம், சீனா -- அமெரிக்கா - வர்த்தகப் போர். அமெரிக்க எல்.பி.ஜி.,யை வாங்கும் மிகப்பெரிய நாடாக சீனா தான் இருந்தது. சீன பொருட்களுக்கு அமெரிக்கா அதிக வரி விதித்தபோது, சீனா பதிலுக்கு அமெரிக்க எல்.பி.ஜி., இறக்குமதியைக் குறைத்தது. இதனால், அமெரிக்க உற்பத்தியாளர்களிடம் புரொப்பேன் அதிகமுள்ள எல்.பி.ஜி., குவிந்தது; விலையும் குறைந்தது. குறைந்த விலை : அதே நேரத்தில், மேற்காசிய நாடுகளான ஈரான் - -இஸ்ரேல் மோதல் மற்றும் ஹார்முஸ் ஜலசந்தியில் சரக்கு கப்பல்கள் மீதான தாக்குதல் பதற்றம் காரணமாக, அந்த வழித்தடத்தில் சரக்கு போக்கு வரத்து செலவுகள் அதிகரித்தன. இதனால் முதல் முறையாக நம் நாடு, அமெரிக்காவிடம் இருந்து ஓராண்டுக்கு எல்.பி.ஜி.,யை குறைந்த விலையில் இறக்குமதி செய்யும் ஒப்பந்தத்தை இறுதி செய்துள்ளது. இந்த ஒப்பந்தத்தால், நாட்டின் எரிசக்தி பாதுகாப்பு வலுவடையும். மேற்கு ஆசிய நாடுகளை சார்ந்திருப்பது 10 சதவீதம் குறையும். போட்டி ஏற்பட்டிருப்பதால் சவுதியும் நமக்கு குறைந்த விலையில் எல்.பி.ஜி., வழங்க முன் வரும். அமெரிக்கா, நாம் அதன் தயாரிப்புகளை அதிகம் வாங்குவதில்லை என குற்றஞ்சாட்டி 50 சதவீத இறக்குமதி வரி விதித்தது. தற்போது இந்த ஒப்பந்தம் மூலம் வர்த்தக உறவை சமநிலைப் படுத்த முடியும். இது இறக்குமதி வரியை குறைப்பது தொடர்பான பேச்சை எளிமையாக்கும். எல்.பி.ஜி., விலை உலகளாவிய அளவில் மாறிக் கொண்டிருக்கும். நம் நாட்டு எண்ணெய் நிறுவனங்கள் அவற்றை வாங்கி, ஒரு நிலையான விலையில் விற்கின்றன. சில சமயங்களில் நாம் வீடுகளுக்கு சிலிண்டர் வாங்கும்போது செலுத்தும் தொகையை விட, எண்ணெய் நிறுவனங்கள் இறக்குமதி செய்த தொகை அதிகமாக இருக்கும். இந்த இழப்புக்கான தொகையை மத்திய அரசு வழங்குகிறது. தற்போது அமெரிக்காவுடனான ஒப்பந்தத்தால் எண்ணெய் நிறுவனங்களின் இழப்பு, 37 சதவீதம் குறையக் கூடும் என எதிர்பார்க்கப்படுகிறது. எனவே, எண்ணெய் நிறுவனங்களின் இழப்புக்கு அரசு ஒதுக்கும் பட்ஜெட் குறையும். ஆனால் நமக்கான எல்.பி.ஜி., சிலிண்டர் விலை குறைய வாய்ப்பில்லை.

===================================================================================================

வேலூர் சி.எம்.சி மருத்துவமனை: நாட்டிலேயே முதல் மோட்டார் நுட்ப செயற்கை வால்வு மாற்று சிகிச்சை

வேலூர்:
இந்திய இதயநோய் சிகிச்சைத் துறையில் புதிய மைல்கல்லாக, நாட்டிலேயே முதன்முறையாக மோட்டார் நுட்பத்தில் செயற்கை வால்வு மாற்ற (TAVR) சிகிச்சையை வேலூர் கிறிஸ்தவ மருத்துவக் கல்லூரி (சி.எம்.சி) மருத்துவமனை வெற்றிகரமாகச் செய்துள்ளது.  'வைட்டாப்ளோ லிபர்ட்டி' எனப்படும் இந்த அதிநவீன தொழில்நுட்பம் மைக்ரோபோர்ட் நிறுவனம் வடிவமைத்தது. ரத்தநாளங்கள் வழியாக மோட்டார் கட்டுப்பாட்டில் செயற்கை வால்வை இதயத்தில் பொருத்தும் உலகின் முதல் நுட்பம் என்பதுவே இதன் சிறப்பு.  இந்த சிகிச்சை 82 வயது மூதாட்டி ஒருவருக்கு ஜூலை 22 அன்று மேற்கொள்ளப்பட்டது. மருத்துவமனையின் இதயவியல் பிரிவு (யூனிட் II) தலைவரான டாக்டர் ஜான் ஜோஸ் தலைமையிலான குழுவினர் இந்த சாதனையை நிகழ்த்தினர். இதன் மூலம் செயற்கை வால்வு பொருத்தும் செயல்முறை மேலும் துல்லியமாக, பாதுகாப்பாக, மருத்துவர் முழுகட்டுப்பாட்டில் இடம்பெறும் வகையில் வழிவகுக்கிறது.  இந்த மோட்டார் நுட்பம் பயன்படுத்தப்பட்டு இந்தியாவில் மேற்கொள்ளப்பட்ட முதல் மருத்துவ செயல்முறை என்பதால் இது தேசிய அளவில் முக்கியத்துவம் வாய்ந்த சாதனையாகக் போற்றப்படுகிறது. இதுவரை நான்கு நோயாளிகளுக்கு இந்த முறையில் வால்வு பொருத்தப்பட்டுள்ளதுடன், அனைவரும் நலமுடன் உள்ளனர் என மருத்துவமனை தெரிவித்துள்ளது.  வேலூர் சி.எம்.சி மருத்துவமனை இதுவரை 400-க்கும் மேற்பட்ட TAVR சிகிச்சைகளையும், 10,000-க்கும் மேற்பட்ட இதய வால்வு சிகிச்சைகளையும் மேற்கொண்ட முன்னோடி மையமாக திகழ்கிறது. அதிநவீன உலகத் தொழில்நுட்பங்களை இந்தியாவில் முதன்முறையாகக் கொண்டு வந்து நோயாளிகளுக்கு சிகிச்சையளிக்கும் பொறுப்புணர்வை இந்த சாதனை மேலும் உறுதிப்படுத்துகிறது.  இந்த முன்னோடி சிகிச்சையை வெற்றிகரமாக மேற்கொண்ட டாக்டர் ஜான் ஜோஸ் மற்றும் மருத்துவக் குழுவினரை மருத்துவமனை நிர்வாகம் பாராட்டியுள்ளது.

===============================================================================================

அமெரிக்க செயற்கைக்கோளை விண்ணில் செலுத்துகிறது இஸ்ரோ

ஐதராபாத்: அமெரிக்க செயற்கைக்கோளை, வணிக ரீதியில் அடுத்த மாதம் இஸ்ரோ விண்ணில் செலுத்த உள்ளதாக அந்த அமைப்பின் தலைவர் நாராயணன் கூறியுள்ளார். நிருபர்களிடம் அவர் கூறியதாவது: 2040ம் ஆண்டுக்குள் வளர்ந்த நாடுகளின் விண்வெளி திட்டங்களுக்கு இணையாக இஸ்ரோவின் விண்வெளித் திட்டங்களும் இருக்கும். அமெரிக்காவின் தகவல் தொடர்பு செயற்கைக்க்கோள் ஒன்றை இஸ்ரோ விண்ணில் செலுத்த உள்ளது. தேதி இன்னும் முடிவாகவில்லை. அநேகமாக அடுத்தமாதமாக இருக்கும். அது தொலைத்தொடர்பு செயற்கைக்கோள். எல்விஎம்3( Launch Vehicle Mark III) மூலம் அந்த செயற்கைக்கோள் விண்ணில் செலுத்தப்பட உள்ளது. இது கூட்டுத்திட்டம் கிடையது. வணீக ரீதியில் செயல்படுத்த உள்ளோம். தற்போது விண்ணில் 57 செயற்கைக்கோள்கள் உள்ளன. அடுத்த 3 ஆண்டுகளில் இந்த எண்ணிக்கை 3 மடங்காக அதிகரிக்கும். இந்திய வீரர்களை, விண்வெளிக்கு பத்திரமாக அனுப்பி, மீண்டும் அழைத்து வரும் ககன்யான் திட்டத்தில் இஸ்ரோ கவனம் செலுத்துகிறது. பூவி கண்காணிப்பு செயற்கைக்கோள் திட்டங்களிலும் முக்கியத்துவம் அளிக்கப்படுகிறது. சந்திரயான்- 4 மற்றும் 5 ஆகிய திட்டங்களுக்கு மத்திய அரசு ஒப்புதல் அளித்துள்ளது. சந்திரயான் -4 திட்டம் 2028 ல் செயல்படுத்தப்படும். ஜப்பானின் விண்வெளி மையத்துடன் இணைந்து சந்திரயான் -5 செயல்படுத்தப்பட உள்ளது. புவி கண்காணிப்பு மற்றும் தகவல் தொடர்பு மற்றும் நேவிகேஷன் ஆகியவற்றில் செயற்கைக்கோளுக்கான தேவை அதிகமாக உள்ளது. அதனை நோக்கி நாம் பணியாற்றி வருகிறோம். இந்தியாவுக்கு என சொந்தமாக விண்வெளி நிலையம் கட்டவும் பணியாற்றுகிறோம். இவ்வாறு இஸ்ரோ தலைவர் நாராயணன் கூறினார்.

===============================================================================================

 

நான் படிச்ச வியாக்யானம் (JKC)

ஆமாம் = இல்லை

கதையாசிரியர்: சோ 

(போட்டோவில் சோவுக்கு அபாரமான மேக்கப் - காஜல், லிப்-பெயிண்ட்….ஆமா இல்ல?

கீதா மாமி மன்னிக்கவேண்டும். உங்களுடைய ட்ரேட் மார்க் “ஆமா இல்ல” காப்பி அடித்ததற்கு. )

சோ ராமசாமி என்று அழைக்கப்படும் சீனிவாச ஐயர் ராமசாமி, தமிழ்நாட்டைச் சேர்ந்த ஒரு இந்திய நடிகர், நகைச்சுவை நடிகர், ஆசிரியர், அரசியல் விமர்சகர், நையாண்டி எழுத்தாளர், நாடக ஆசிரியர், திரைப்பட இயக்குனர் மற்றும் வழக்கறிஞர் ஆவார்.

முன்னுரை

சோ ஒரு அரசியல் விமரிசகர். ஆகவே சில கருத்துகளை குறிப்பால் உணர்த்துகிறார். அவற்றை புரிந்து கொள்ள அன்றைய (1965-1980) இந்திய அரசியல் நிலையை அறிந்திருக்க வேண்டும். 50 வயதிற்கு கீழ் உள்ளவர்களுக்காக சிறு குறிப்பு தரப்பட்டுள்ளது.

1964இல் நேரு இறந்தபின் இந்தியாவின் அரசியலில் பெரும் மாற்றங்கள் ஏற்பட்டன.

1964 இல் லால் பகதூர் சாஸ்திரி காமராஜர் தயவால் பிரதமர் ஆனார். 1965இல் பாகிஸ்தான் படையெடுப்பு. லால் பகதூர் சாஸ்திரி சமாதான உடன்படிக்கையில் கையொப்பம் வைத்த பின் தாஷ்கண்டில் மர்மமான முறையில் உயிரிழந்தார். 1966இல் இந்திரா பிரதமர் ஆனார்.

1969இல் காங்கிரஸ் இரண்டாகப் பிளந்தது. சிண்டிகேட் காங்கிரஸ் என்ற பழைய காங்கிரஸ், இந்திரா காங்கிரஸ் என்ற புதிய காங்கிரஸ்.

1971இல் தேர்தலில் இந்திரா காங்கிரஸ் வெற்றி பெற்று மீண்டும் இந்திரா பிரதமர் ஆனார். அவரை எதிர்த்து  போட்டியிட்டு தோல்வி அடைந்தவர் தான் ராஜ் நாராயண். அப்போது சம்யுக்த சோசலிஸ்ட் கட்சியில் இருந்தார். இந்திரா வெற்றி பெற்றதை எதிர்த்து நீதிமன்றத்தில் வழக்கு தொடர்ந்தார்.

1975இல் அலஹாபாத் நீதிமன்றம் இந்திரா வெற்றி பெற்றது செல்லாது என்று தீர்ப்பு வழங்கியது.

கடுமையான எமெர்ஜென்சி அமலுக்கு வந்தது. எதிர்கட்சித் தலைவர்கள் யாவரும் சிறையில் அடைக்கப்பட்டனர்.

(மோடிஜி தலை மறைவானார், அத்வானி சிறையில் 19 மாதங்கள் அடைக்கப்பட்டார்). 1977 இல் எமெர்ஜென்சி நீக்கப்பட்டு பாராளுமன்ற தேர்தல் நடைபெற்றது. தலைவர்கள் சிறையில் இருந்து விடுவிக்கப்பட்டனர்.

ஜெ பி என்ற ஜெயப்ரகாஷ் நாராயண் எதிர்கட்சிகளை ஒன்றிணைத்து ஜனதா பார்ட்டி என்ற புதிய கட்சியை தொடங்கினார்.

1977இல் ஜனதா கட்சி வெற்றி பெற்று ஆட்சியை கைப்பற்றினர். ராஜ் நாராயண் இந்திராவை ரே பரேலியில் தோற்கடித்தார். பிரதமர்  மொரார்ஜி தேசாய் மந்திரிசபையில் மந்திரி ஆனார்.

உட்கட்சி பூசல்களால் ஜனதா கட்சி உடைந்தது. 1980 இல் தேர்தலில் இந்திரா வெற்றி பெற்று மீண்டும் ஆட்சி அமைத்தார்.

1980இல் பி ஜெ பி பிறந்தது. 

ராஜ்நாராயன் : ஜனதா பார்ட்டி அங்கம். ரே பரேலியில் 1977இல்  இந்திரா காந்தியை தோற்கடித்தவர்.  ஆஞ்சநேய பக்தர். 1975 எமெர்ஜென்சிக்கு காரணமானவர்.

ஜெகஜீவன் ராம் பழைய காங்கிரஸின் தலித் தலைவர். இந்திரா மந்திரிசபையில் பாதுகாப்பு அமைச்சர் ஆக இருந்தவர். நேரு இறந்தபின் பிரதமர் ஆக முயற்சித்தவர். 30 வருடங்கள் மத்திய அமைச்சர் ஆக இருந்தவர்.

(மீரா குமார் என்ற மக்களவை முதல் பெண் தலைவர் இவரது மகள்). “ஆயா ராம் கயா ராம்” என்ற சொலவடை  இவரை முன் மாதிரியாகக் கொண்டது.

ஆமாம் = இல்லை.

சோ

தின/வார இதழ்: கல்கி

(1980ல் வெளியான சிறுகதை)

நன்றி. https://www.sirukathaigal.com

நகைச்சுவை கட்டுரை வேண்டும் என்று கல்கி ஆசிரியர் கேட்டவுடன் பேசாமல் போய் ‘ராஜ்நாராயண் அவர்களைப் பேட்டி கண்டு விட்டால் என்ன’ என்று தோன்றியது. யார் யாரையோ விசாரித்துப் பார்த்தேன், அட்ரஸே கிடைக்கவில்லை. ஏதாவது சர்க்கஸில் சேர்ந்து விட்டாரோ என்று கூட சந்தேகம் வந்து விட்டது.

சரி, எதற்கும் ஒரு கடைசி சான்ஸ் பார்க்கலாம் என்று தீர்மானித்து ஒரு சர்க்கஸ் பபூனை விசாரித்தேன்

அவர், “ராஜ்நாராயண்தான் பெரிய பபூன் என்று உங்களுக்கு யார் சொன்னது? எந்த யுகத்தில் இருக்கிறீர் நீர்? ராஜ்நாராயண் எங்கள் குருவாக இருந்த காலம் உண்டு. இப்போது அந்தக் காலம் மலையேறி விட்டது. ராஜ்நாராயணனிடம் இனி கோமாளித்தனம் ஒன்றும் மீதியில்லை!” என்றார்.

“அப்படியானால் நான் என்ன செய்வது? பபூன்களுக்கெல்லாம் குருவாக இருக்கக் கூடியவர் ஒருவரைப் பேட்டி காண விரும்புகிறேன்!” என்றேன்.

“இப்போது எங்கள் குரு ஜெகஜீவன்ராம் தான், போய் அவரைப் பாருங்கள்!” என்றார் அந்த பபூன்.

 

ஜெகஜீவன்ராமைச் சந்திக்கப் புறப்பட்டேன், டெல்லியில் விசாரித்தேன். “சஞ்சய் காந்தியைக் கேட்டால் ஜெகஜீவன்ராம் விலாசம் கிடைக்கும்” என்றார்கள்.

“சஞ்சய் காந்தியின் விலாசம் யாரிடம் கேட்டால் கிடைக்கும்?…”

“ஜெகஜீவன்ராமின் மகன் சுரேஷிடம் கேட்டால் கிடைக்கும்”

“சுரேஷ் எங்கிருப்பார்….”

“ஜெகஜீவன்ராம் வீட்டில்”

“ஜெகஜீவன்ராம் வீடு எங்கே இருக்கிறது?”

“சஞ்சய் காந்தியிடம் கேட்டால் தெரியும்!”

இப்படி நான் ஒருவரோடு பேசிக் கொண்டிருக்கும் போது, யாரோ ஓடி வரும் சப்தம் கேட்டது. மூச்சிரைக்க ஜெகஜீவன்ராம் தான் ஓடி வந்து கொண்டிருந்தார். 

”ஏதோ சஞ்சய் காந்தி, சுரேஷ் என்றெல்லாம் பேச்சு காதில் விழுந்தது!… எங்கே சஞ்சய், எங்கே சுரேஷ்?” என்று மூச்சு முட்ட கேட்டார் ஜெகஜீவன்ராம்.

கிடைத்தது சான்ஸ் என்று அவரைப்பிடித்துக் கொண்டேன், “உங்களிடம் ஒரு பேட்டி வேண்டும்!” என்று கேட்டேன்.

உடனே அவர், “நான் ஜனதாவில் இருக்கிறேன். ஆனால், ஜனதாவை எதிர்க்கிறேன்!” என்றார்.

“எதிர்த்தால் அந்தக் கட்சியை விட்டு வெளியேற வேண்டியது தானே?”

“அப்புறம் எப்படி எதிர்க்க முடியும்?”

“உள்ளே இருந்தால் தான் எதிர்க்க முடியுமா?”

“நிச்சயமாக, நான் பாதுகாப்பு மந்திரியாக இருந்தவன்…. எனக்குத் தெரியாதா? ஒரு நாட்டோடு சண்டை என்றால். அந்த நாட்டுக்குள் போய்த்தானே நாம் சண்டை போட வேண்டும். வெளியே இருந்து சண்டை போட முடியுமா? அந்த மாதிரி தான் இதுவும்!”

“கரெக்ட்… கரெக்ட்!… சரி, உள்ளே இருந்து கொண்டு எப்படி எதிர்க்கப் போகிறீர்கள்?”

“நாலே நாலு அறிக்கை விடுவேன், ஜனதா குளோஸ் ஆகிவிடும்.”

“என்ன அறிக்கை?”

“ஜனதா மட்டம், ஜனதா சமூக விரோதி. ஜனதா உருப்படாது!”

“மூணு அறிக்கை ஆயிற்று. நாலாவது?”

“நான் ஜனதாவை விட்டு வெளியேறுகிறேன்.”

“இதையே முதல் அறிக்கையாக்கி விட்டால் என்ன?”

“அப்படிச் செய்து விட்டால் மற்ற மூன்று அறிக்கைகள் விட முடியாது!”

“சரி. இவ்வளவு மட்டமான கட்சியில் இத்தனை நாள் எப்படித் தாக்குப் பிடித்தீர்கள்?”

“தேர்தலில் அந்தக் கட்சி ஜெயிக்கும் என்று சொன்னார்கள். என்னுடைய போறாத காலம் நம்பி இருந்து விட்டேன்”

“தோற்றுவிட்டதால் தான் ஜனதா மட்டமாகிவிட்டதா?”

“பின் என்னவாம். தோற்பவன் எங்கேயாவது உயர முடியுமா? தோற்ற கட்சியில் இருப்பது முட்டாள்கள் செய்யும் வேலை”

“பின் ஏன் இன்னும் நீங்கள் ஜனதாவில் இருக்கிறீர்கள்?”

“நான் ஜனதாவில் இருப்பதாக உனக்கு யார் சொன்னது?”

“நீங்கள் தானே சொன்னீர்கள்?”

“எப்போது சொன்னேன்?”

“பேட்டி ஆரம்பத்தில் சொன்னீர்களே?”

”அங்கேதான் பாய்ண்ட் இருக்கிறது…. பேட்டி நடந்து கொண்டிருக்கும்போதே நான் வெளியேறிவிட்டேன்!…”

“இதைச் சந்திரசேகருக்குத் தெரியப் படுத்த வேண்டாமா?”

“அது யார் அது…. சந்திரசேகர்?”

“ஜனதாக் கட்சியின் தலைவர்”

“நான் தான் அந்தக் கட்சியில் இல்லையே? அவருக்கு எதற்கு நான் தெரியப்படுத்த வேண்டும்?”

“சரி, ஜனதாவை விட்டு வெளியேறி விட்டீர்கள், இப்பொழுது என்ன செய்யப் போகிறீர்கள்?”

“ஜனதா கட்சியில் சேரப் போகிறேன்.”

“என்ன சார் இது? அந்தக் கட்சியை விட்டு வெளியேறினேன் என்று சொன்னீர்கள், இப்போது அந்தக் கட்சியில் சேரப் போகிறேன் என்கிறீர்களே? இப்போது அந்த கட்சியில் எப்படிச் சேர முடியும்?”

“முட்டாள் தனமாகக் கேள்வி கேட்காதே. நான் ஜனதாக் கட்சியிலேயே இருந்தால் அந்தக் கட்சியில் சேர முடியுமா? வெளியேறினால் தானே சேர முடியும்? அதற்காகத்தான் வெளியேறினேன்”.

“சேர்ந்து விட்டதாகச் சந்திரசேகருக்கு சொல்ல வேண்டாமா?”

“கட்சியில் யார் இருக்கிறார்கள், யார் சேர்ந்தார்கள் என்று கூடத் தெரிந்துகொள்ள வில்லையா அந்தச் சந்திரசேகர், தலைவராம். தலைவர்?… இதுகூடத் தெரியவில்லை, ரொம்ப முட்டாள் தனமான தலைமை”

“அப்படியானால் கட்சியை விட்டு வெளியேற வேண்டியது தானே”

“எந்தக் கட்சியிலிருந்து?’

“ஜனதாவிலிருந்து தான்”

“அந்தக் கட்சியில் நான் இருந்தால் தானே வெளியேறுவதற்கு?”

“அந்தக் கட்சியில் தான் நீங்கள் இருப்பதாகச் சொல்லி முட்டாள் தனமான தலைமை என்று கூடக் குற்றம் சாட்டினீர்களே?”

“எப்போது குற்றம் சாட்டினேனோ அப்போது அந்தக் கட்சியில் நான் இல்லை என்று தானே அர்த்தம்?”

“அப்படியானால் நீங்கள் இப்போது ஜனதா கட்சியில் இல்லை…”

“இல்லை.”

“கொஞ்சம் விளக்கமாகச் சொல்லுங்கள்! எது இல்லை… நீங்கள் ஜனதா கட்சியில் இல்லையா? அல்லது நீங்கள் ஜனதா கட்சியில் இல்லை யென்று நான் சொன்னது இல்லையா?”

“ஆமாம்.”

“எது -ஆமாம்? நீங்கள் ஜனதா கட்சியில் இல்லை என்பது ஆமாமா? அல்லது நீங்கள் ஜனதா கட்சியில் இல்லை என்று நான் சொன்னது இல்லை யென்பது ஆமாமா?”

“ரொம்பக் குழப்புகிறாய்.”

“உங்களிடம் பேச ஆரம்பிப்பதற்கு முன்பாகத் தெளிவாகத்தான் இருந்தேன், இப்போது எது இல்லை, எது ஆமாம் என்பது கூட எனக்குப் புரியவில்லை.”

“என்னைப் போல் தெளிவாக இருக்கக் கற்றுக்கொள், இல்லை என்பதும் ஆமாம் என்பதும் ஒன்றேதான்!…”

“அது எப்படி?”

“சொல்கிறேன். நான் ஜெகஜீவன்ராம் இல்லையா?”

“ஆமாம்.”

“பார்த்தாயா? இல்லை என்பது ஆமாம் ஆகிவிட்டது!”

“இல்லையே!”

“கரெக்ட்! இப்போது ஆமாம் என்பது இல்லை ஆகிவிட்டது!”

“கரெக்ட்.. இப்போது எனக்கு எல்லாமே தெளிவாகப் புரிகிறது”

“இது தான் அரசியல்!”

“நான் இது தான் அத்வைத சித்தாந்தம் என்று நினைத்தேன். நீங்கள் ஒரே சமயத்தில் ஞானியாகவும், யோகியாகவும், அரசியல்வாதியாகவும் இருக்கிறீர்கள். உங்களிடமிருந்து கற்றுக்கொண்ட இந்த ‘இல்லைதான் ஆமாம்’ ‘ஆமாம் தான் இல்லை ‘ என்ற பேருண்மையை நான் மறக்கவே மாட்டேன்”.

“சரி, பேட்டியை முடித்துக்கொள். நான் அவசரமாகச் செல்ல வேண்டும்,”

“எங்கே ஸார்?”

“சந்திரசேகரைப் பார்க்க.”

“ஐயைய்யோ! நீங்கள் ஜனதாவிலா இருக்கிறீர்கள்?”

“ஆமாம்!”

“ஆஹா! அப்படி யாரும் இல்லை! அதாவது. ஆமாம்!….” என்று நேராகக் கீழ்ப்பாக்கத்தை நோக்கி ஓடினேன்!

(6-3-80ல் எழுதியது)

என்னுரை

வாசகர்கள் கீழ்பாக்கத்திற்கு ஓடாதது புண்ணியம்.

//“நிச்சயமாக, நான் பாதுகாப்பு மந்திரியாக இருந்தவன்…. எனக்குத் தெரியாதா? ஒரு நாட்டோடு சண்டை என்றால். அந்த நாட்டுக்குள் போய்த்தானே நாம் சண்டை போட வேண்டும். வெளியே இருந்து சண்டை போட முடியுமா? அந்த மாதிரி தான் இதுவும்!”// ஆப்பரேசன் சிந்தூர் மனதில் நிழலாடுகிறதா?  

//நான் இது தான் அத்வைத சித்தாந்தம் என்று நினைத்தேன். நீங்கள் ஒரே சமயத்தில் ஞானியாகவும், யோகியாகவும், அரசியல்வாதியாகவும் இருக்கிறீர்கள். உங்களிடமிருந்து கற்றுக்கொண்ட இந்த ‘இல்லைதான் ஆமாம்’ ‘ஆமாம் தான் இல்லை ‘ என்ற பேருண்மையை நான் மறக்கவே மாட்டேன்”.//

ஆமாம், இல்லை என்பன ஒரே நாணயத்தின் இருபக்கங்கள். அதனால் 50 50 எனலாம். ஆகவே ஆமாம் = இல்லை என்பது சமன்பாடு. சரிதானே….ஹா ஹா …. என் தலையும் சோ தலை மாதிரிதான்….. வழுக்கை.  

சமகால அரசியலில் ஜெகஜீவன் ராம் யாராக இருக்கலாம்? சுப்ரமணிய சாமி ? அவர் தான் தற்போது பல் பிடுங்கப்பட்ட சிங்கம் ஆகிவிட்டாரே!! நிதிஷ்? அவரே தலைவர், நித்திய முதல்வர், சரியாகாது.

இந்திராகாந்திக்கு ஒரு பாடம் புகட்ட அமெரிக்காவின் CIA (முக்கியமாக கிஸ்ஸிங்கர்) ராஜ்நாராயணனை கருவியாக உபயோகித்து கீழிறக்கியது என்ற ஒரு வதந்தியும் நிலவியது. அதே போல்தான் ஜனதா பார்ட்டியின் வரவு CIA உண்டாக்கிய ஒன்று என்பதுவும்.