இன்ப துன்பம் இரண்டிலும் பாதிப் பாதி இருவரும் பகிர்ந்து கொண்டு பழகினோம்...

நட்பு பற்றி சந்தோஷப் பாடல்கள் நிறைய உண்டுதான்.  துரோகம் செய்த நண்பன் பற்றிய பாடல்கள்தான் குறைவு.  இன்று இரண்டு பாடல்கள் பகிர்கிறேன்.  இரண்டும் கமலஹாசன்.   நண்பனின் தங்கைக்கு திருமணம் செய்ய காசு  சேர்க்க வேண்டி கமல் எஸ் வி சேகருடன் சிம்லாவில் நாடகம் நடத்தும்போது கமலின் அம்மாவுக்கு உடம்பு சரியில்லை என்று செய்தி வர, சேகருக்குத் தெரிந்தால் உடனே தன்னை ஊருக்கு அனுப்பி விடுவான், நண்பனின் பணத்தேவை முக்கியம் என்று கமல் துக்கத்தை உள்ளே அடக்கி நடித்துக் கொடுக்க, சேகருக்கு ஏற்கனவே இந்த விஷயம் தெரிந்து தன்னிடம் சொல்லாமல் சுயநலமாக மறைத்திருக்கிறார் என்பது தெரியவர,  நண்பர்கள் பிரிகிறார்கள் என்றாலும் கடைசி நாள் என்பதால் நாடகத்தை நிறைவு செய்து விட்டே கிளம்ப நினைக்கும் சமயம் ரசிகர்களின் வேண்டுகோளுக்கிணங்கி கமல் ஒரு பாடல் பாடி ஆடுகிறார்.  அதில் நண்பனின் துரோகத்தைப் பாடுகிறார்.  கமலே கோரியோக்ராப் செய்து ஆடி இருக்கும் இந்தப் பாடலை வாலி எழுத, எம் எஸ் விஸ்வநாதன் இசையில் SPB குரலில் ரசிக்கும்படி அமைந்திருக்கிறது.   நல்லதொரு பாடல்.  நல்லதொரு ஆடல்.  1982 வெளியீடு.

=============================================

'சட்டம்' படத்தில் தான் விரும்பும் பெண்ணையே தன் வக்கீல் நண்பனும் விரும்புகிறான் என்று தெரிந்து கொள்ளும் போலீஸ் கமல், சிறுவயதிலிருந்தே தனக்கு எல்லா உடுவையும் செய்து வரும் பணக்கார, பாசக்கார நண்பனுக்காக மாதவியை விட்டுக் கொடுக்க நினைக்க, நடுவில் நிகழும் சில எதிர்பாராத அசம்பாவிதங்களால் கமலும் சரத்பாபுவும் எதிரி ஆகிறார்கள்.  ஒரு பார்ட்டியில் துரோகியாகி விட்டான் நண்பன் என்று கமல் பாடும் காட்சி.  ஹிந்தி தோஸ்தானா படத்தின் தழுவல்.  ஹிந்தியில் அமிதாப், சத்ருகன் சின்ஹா.  வாலியின் பாடல்.  கங்கை அமரன் இசை.  1983 வெளியீடு.

======================================================================================

சில விடுகதைகள்!  விடைகள் இன்று காலை 11:11:11 க்கு வெளியாகும்!

- எல்லையில்லா அழகி எட்டி நிற்கும் இரும்பையும் கவர்ந்து தன்பால் இழுப்பான். அவள் யார்?  காந்தம்

- எல்லோர் வீடும் சாத்திக் கிடக்க கங்கையம்மன் கோயில் திறந்து கிடக்குது.
கிணறு

- எல்லோருக்கும் கிடைக்காத மதி எல்லோரும் விரும்பும் மதி.   நிம்மதி

- எல்லோரையும் கூவி அழைப்பான். ஆனால் எவர் அழைத்தாலும் நகரமாட்டான். அவர் யார்?  மணி

- எலும்பில்லாத மனிதன் கணுவில்லாத மரத்தில் ஏறுகிறான். அது என்ன?
பேன், மயிர்

- எலும்பு இல்லாத மனிதன் எட்டு ஆறு நீந்துவான். அவன் யார்?  அட்டை

- எவ்விடத்தில் சுகத்தை எப்போதும் காணலாம்?  அகராதியில்

- எவனுக்கும் தெரியாத பொருள் எல்லையெல்லாம் கடக்கும் பொருள். அது என்ன?  காற்று

- எழுத்துத் தமிழுக்கு இறுதி எழுத்தாம் 'இன்'வில் முடியும் மூன்று பேர். தோழர்கள் ஒருவன் காட்டில், மின்னல் ஒருவன் வீட்டில், கன்னல் ஒருவன் நீரில். மன்னன் உரைப்பீர் இவர்கள் பேரை இனிதே.
- மான், தேன், மீன்

- எழுந்து அருகில் சென்றால் காலில் விழுந்து வணங்குவாள் எழுந்து அணைத்துக்கொள்வாள். அவள் யார்?  கடல்அலை

- எழுந்திரு குண்டா ஊருக்குப் போகலாம். அது என்ன?  - கட்டுச்சோற்றுமூட்டை

===============================================================================================

காலங்கள் தாண்டியும் 

கல்வெட்டில் வாழ்கிறார்கள்

மன்னர்களும் மந்திரிகளும்

காது கேட்காதவனுக்கு கூட 

கதை புரிகிறது 

புத்தகம்

பாண்டியனும் சோழனும் 

இன்னமும் 

சண்டையிட்டுக் கொண்டிருக்கிறார்கள் 

கல்வெட்டில்

================================================================================

2026 வெளியீடு.  அறிமுகக் காட்சியாக ஆரம்பத்திலேயே ஒரு மிஷனை வெற்றிகரமாக ராணி முகர்ஜி முடிக்கும்போதே  அடுத்து ஒரு பெரிய வேலைக்கு அசைன் ஆவார் என்று தெரிந்து விடுகிறது.   ஒரு VVIP யின் அடலசண்ட் மகள் கடத்தப்படுகிறார்.  அவளுடன் விளையாடிக் கொண்டிருந்த, அவளுக்கு உதவப் போன ஒரு எளிய உதவியாளரின் மகள் வேலைக்காரச் சிறுமியும் கடத்தப்படுகிறாள்.  அவர்களைக் காப்பாற்ற ராணி முகர்ஜி வரவழைக்கப்படுகிறார்.   எல்லோராலும் 'அம்மா' என்று அழைக்கப்படும் ஒரு சகல அதிகாரங்களும் கூடிய கொடூர பெண்மணியை எதிர்க்க வேண்டிய சூழல்.  கடினமான நேரங்கள்.   வழக்கமான தடங்கல்கள்.  ராணி முகர்ஜியே கேள்விக்குள்ளாக்கப்படுகிறார்.  அந்த மிஷனிலிருந்து நீக்கப்படுகிறார்.  அவர் ஜெயித்தாரா, சிறுமிகள் என்ன ஆனார்கள் எதற்கு கடத்தப்பட்டார்கள் என்று சொல்கிறது இந்த இரண்டு மணி நேர படம்.  சென்சாரை எல்லாம் எப்படி தாண்டியது என்று எண்ணும் அளவு சில காட்சிகள்.  ஆனாலும் ஒரு மூச்சில் பார்த்து முடித்தேன்.  தமிழ் வசனம் கிடையாது.  ஹிந்திதான்.  புரிந்தது.   NetFlix 

=====================================================

இதுவும் 2026 வெளியீடுதான்.  ஜீத்து ஜோசப் படம் என்றதுமே பார்க்கும் ஆவல் வந்து விட்டது.  தமிழில் இல்லை.  மலையாளம்தான்.  ஓரளவு புரிந்தாலும் சப்டைட்டில் நிறுத்தி நிறுத்தி படித்தவாறே தொடர்ந்தேன்.  அவர் படத்துக்கு உரித்தான க்ளூஸ், மர்மம், பரபரப்பு..  கல்லூரி படிக்கும் பெண்கள் திடீர் திடீரென கொடூரமாகக் கொல்லப்படுகிறார்கள்.  குற்றவாளி என்று சந்தேகப்படுபவனை இன்ஸ்பெக்டர் ஆண்டனி சேவியர் (பிஜு மேனன்) காப்பாற்றுகிறார்.  அவர் மீது குற்றச்சாட்டுகள் வருகின்றன.  குடும்ப வாழ்விலும் அவருக்குப் பிரச்னை.  அவர் மகனுக்கும் அவருக்கும் ஏழாம் பொருத்தம்.  மனநல மருத்துவர் சரி செய்ய முயற்சிக்கிறார்.  ஐரீன் என்ற பெண் கொல்லப்படும்போது அவர் தந்தை சாமுவேல் (ஜோஜு ஜார்ஜ்) உள்ளே வருகிறார்.  

ஒரு கட்டத்தில் ஆண்டனியின் மகன் பிலிப் கடத்தப்படும்போது அவனைக் காப்பாற்ற ஆண்டனி சாமுவேல் கொடுத்த க்ளூக்களை வைத்து முயல்கிறார்.  ஜோஜு ஜார்ஜ் திட்டமிட்டு அவரை ஆட்டுவிக்கிறார்.  ஆண்டனி மகனைக் காப்பாற்றினாரா என்று அமேசான் பிரைமில் காண்க.  சில கேள்விகள் உண்டு.  குற்றத்தை ஒத்துக்கொண்டு சரண்டராகும் SI,  உயர் அதிகாரியிடமிருந்து விலகி வெளிச்சத்தை நோக்கி நடக்கிறார்.  ஏன் அரெஸ்ட் ஆகவில்லை என்பது தெரியவில்லை.  படம் பார்க்கலாம்.  ஏற்கனவே  எனக்கு பிஜு மேனனையும் பிடிக்கும், ஜோஜு ஜார்ஜையும் பிடிக்கும்.    பிஜு கொஞ்சம் கொஞ்சம் மம்மூட்டியை ஞாபகப்படுத்துவார்.

மலையாளப்படங்களில் விளித்தல் வினோதமானது.  ஒரு பெயரை அவர்கள் அழைக்கும்போது 'ஏ' விகாரம் சேர்த்து சொல்கிறார்கள்.  உதாரணமாக பிலிப்பை ஆண்டனி "பிலிப்பே பிலிப்பே " என்று அழைக்கிறார்.

ஃபேஸ்புக்கில் வீ. சரவணா இரண்டு படங்கள் சொல்லி இருக்கிறார்.  அவற்றைக் குறித்து வைத்திருக்கிறேன்.  பார்க்க வேண்டும்.

=======================================================================================

நண்பர் வெங்கட் 'சாலையில் படுத்து உறங்குபவர்கள்' படம் போட்டிருந்தார்.  அவர்களுக்கு வீடு என்பதே அதுதான் என்றும் எழுதி இருந்தார்.

நான் சந்தித்த இது மாதிரி மனிதர்கள் நினைவுக்கு வந்தார்கள்.  முன்னர் 90 களில் எம் ஜி ஆர் வீடு அருகில் உள்ள பாலத்தை ஒட்டி ஐ டி பி எல் குடியிருப்பின் அருகே சாலையின் இருபுறமும் சில சின்ன சாதாரண குடிசைகள் இருக்கும்.  அவர்கள் வீடுகளின் வாசலில் கட்டும் மந்திரித்த கயிறுகள் போன்றவற்றை செய்து விற்பவர்கள்.  குடும்பமாகத்தான் இருப்பார்கள்.  அத்தனூண்டு வீட்டுக்குள் தாம்பத்யம், குழந்தைகள், பெரியவர்கள்..   பின்னால் ஒட்டினாற்போல பெரிய சாக்கடை ஓடும்.   அதன் நாற்றம், பொங்கி வரும் கொசுக்கள்..  குழந்தைகள் வெட்ட வெளியில் தூங்கும்.  ஆச்சர்யமாக இருக்கும்.  அந்தக் குழந்தைகளுக்கு இருக்கும் நோய் எதிர்ப்பு சக்தி நம் வீட்டு குழந்தைகளுக்கு இருக்காது என்பார் என் நண்பர்.

நான்கைந்து மாதங்களுக்கு முன் பிஸியான ஒரு கடைத் தெருவில் ஒரு கடைக்குள் நுழைந்தார் பாஸ்.  உள்ளே போக பொறுமையின்றி வெளியே நின்ற என் கண்களில் அந்தக் காட்சி தென்பட்டது.  கடையின் வாசலில் சுவரை ஒட்டி இருந்த இடத்தில் துணிகள் அடைத்திருக்கும் சின்ன லெதர் பை தலைக்கு வைத்தபடி ஒரு பாய்விரித்து ஒருவர் படுத்திருந்தார்.   கால் மேல் கால் போட்டபடி ஒரு பேபாப்ர் துண்டைப் படித்துக் கொண்டிருந்த காட்சி வித்யாசமாக இருந்தது.  

ஏதோ தன் வீட்டு படுக்கையறையில் படுத்திருப்பவர் போல படுத்திருந்தார்.  அதே இடத்தில் கடையிலிருந்து சாலையில் இறங்கும் இடத்தில் தேங்கியிருந்த மழை நீர் சகதிக்கு அருகே ஒருவர் தலைகுப்புற கவிழ்ந்திருந்தார். தமிழ்நாடு செய்த தவப்பயனால் உருவான மதுப்பிரியர் போலும்.

இவர்களை நான் போட்டோ எடுப்பதற்கு ரொம்பத் தயங்கி, காணொளி எடுப்பது எளிது என்று  எடுப்பதே தெரியாமல் மெல்ல செல்லத் திருப்பி எடுத்தேன்.  அப்போது அதை ரீல்ஸில் கூட போட்டேன். பின்னர் போட்டோவும் எடுத்தேன்.  

நான் செல்லை அவரை நோக்கி ஃபோகஸ் செய்வதை அவர் கவனித்தும் கூட லட்சியம் செய்யவில்லை என்பதோடு என்னிடம் காசு கேட்பது போல சைகை செய்தார்!  இருபது ரூபாய் கொடுத்து பேட்டி எடுத்தேன். அருகிலுள்ள பெரிய தனியார் மருத்துவமனையில் புல் வெட்டுபவராக இருக்கிறாராம்.  ஒரு நாளைக்கு ஐம்பது ரூபாய் சம்பளம்.  தங்குவதற்கு காசு செலவு செய்ய முடியாது என்று இங்கு இடம் பிடித்து விட்டார்.  

அருகிலிருந்த பெஞ்சில் படுக்கவில்லையா என்றதும், நாம் அனாவசியமாக இப்படி உரிமை எடுத்தால் உள்ளதும் போய்விடும், விரட்டி விடுவார்கள் என்று வாழ்க்கைத் தத்துவம் பேசினார்!  

வேறு யாரும் ஒன்றும் சொல்ல மாட்டார்களா என்று கேட்டேன்.  சொல்ல மாட்டார்கள் என்றார்.  நான் அவர்கள் கடைக்கு இரவில் ஒரு காவல் போல என்று அவர்களுக்குள் பேசிக் கொள்ளலாம் என்றார்!  ஊர் திருவண்ணாமலை என்றார்.  முன்பு விவசாயம் பார்த்தாராம்.  பிழைப்புக்கு வழியில்லாமல் சென்னை வந்தாராம்.  "போலீஸ் தொந்தரவு?"  அதெல்லாம் ஒன்றும் இல்லையாம்.  'ரிலையன்ஸ், கிரேஸ் போன்ற இடங்களில் செக்யூரிட்டியாக போகலாமே' என்றேன்.  'பார்க்கிறேன்' என்றார்.   7 அல்லது 8 மணிக்கு வந்து படுத்து விடுவாராம்.

ஏற்கனவே நான் சொன்னேனே.. இதை வைத்து ஒரு ரீல்ஸ் போட்டேன் என்று...  அது..  இன்ஸ்ட்டாவிலும், ஃபேஸ்புக்கிலும் பகிர்ந்திருந்தேன். 

==========================================================================================

2020 மார்ச்.  கொரோனா வந்த புதிது..   எங்கு பார்த்தாலும் சோகக் குரல்..  பீதியூட்டும் செய்திகள்..  நம்மை நாமே உற்சாகப்படுத்துக்கொள்ள வேண்டும் என்று நான் பேஸ்புக்கில் போட்ட இரண்டு பதிவுகள்.  மனதை திசை திருப்ப, மற்றவர்களையும் உற்சாகமாக வைக்க வேண்டி பகிர்ந்தது.

1. இன்றைய வெட்டி ஆராய்ச்சி!

'லஷ்மி கல்யாணம்' என்ற படத்தில் வரும் பாடல் "ராமன் எத்தனை ராமனடி..."

'ராமன் எத்தனை ராமனடி' என்று ஒரு படம். அதில் வரும் பாடல் "அம்மாடி... பொண்ணுக்குத் தங்க மனசு..."

'பொண்ணுக்குத் தங்க மனசு' என்று ஒரு படம். அதில் வரும் பாடல் "தேன் சிந்துதே வானம்..."

'தேன் சிந்துதே வானம்' என்று ஒரு படம்.. அதில் வரும் பாடல் "உன்னிடம் மயங்குகிறேன்.."

சங்கிலி இங்கு அறுந்து விட்டது என்று நினைக்கிறேன்.

உன்னிடம் மயங்குகிறேன் என்று படம் எடுத்தார்களா, தெரியவில்லை! மங்கலான நினைவில் விஜயகுமார் நடித்த ஒரு படம் இந்தத் தலைப்பில் வந்து ஞாபகம்!   

*****************************************

2. ஒரு பொழுது போகாத வெட்டிக் கணக்கெடுப்பு!

சிவாஜி கணேசன் -

நடித்த படங்கள் 288 (தமிழ், தெலுங்கு, மலையாளம், கன்னடம், ஹிந்தி ) -
முதல் படம் 1952 (ஆனால் அதற்கு முன்னரே முக்கமாலா கிருஷ்ணமூர்த்தி எனும் நடிகருக்கு குரல் கொடுத்திருக்கிறார். படம் நிரபராதி (1951)

எம் ஜி ஆர் -

நடித்த படங்கள் -116 (முதல் படம் 1936) அசோக்குமார் படத்தில் எம் கே டி யுடன் நடித்திருக்கிறார். காவல்துறை அதிகாரியாக வருவார்).

பி யு சின்னப்பா -

நடித்த படங்கள் - 26 (முதல் படம் 1936) சந்திரகாந்தா (இவர் ஹீரோவாக நடித்தபோது எம் ஜி ஆர் இன்னும் பிற்கால நடிகரெல்லாம் பெண்வேஷம் போட்டு நடித்தனராம்) இவர் சூப்பர் ஹிட் படமான உத்தம புத்திரன் முதற்பதிப்பில் இரட்டை வேடத்தில் நடித்தவர்.

எம் கே டி பாகவதர் -

நடித்த படங்கள் - 14 (முதல் படம் 1934 ) இந்தியாவின் முதல் சூப்பர் ஸ்டார். பதினான்கே படங்களில் நடித்தாலும் பல்வேறு சாதனைகளுக்கு சொந்தக்காரர்.

இரண்டுமே பகிரப்பட்டது,  மார்ச் 31 2020 கொரானா இந்த உலகுக்கு  வந்த புதிது. 

=======================================================================================

"எனக்கு இன்னொரு முகம் இருக்கு.."  என்பது ரஜினியின்  ஃபேமஸ் டயலாக்குகளில் ஒன்று.  அப்படியான அவரின் இன்னொரு முகம் பற்றி ஃபேஸ்புக்கில் படித்ததை இங்கு பகிர்கிறேன்.

திடீரென லிவிங்ஸ்டன் மனைவிக்கு ஹார்ட் அட்டாக்.

லிவிங்ஸ்டனின் குடும்பம் ஓடிப்போய் ஹாஸ்பிடலில் சேர்க்கிறது. உடனே ஆபரேஷன் செய்ய வேண்டும். லிவிங்ஸ்டனிடம் அத்தனை பணம் இல்லை. உடைந்து போகிறார்.

இன்னும் ஒரு மாதம் மட்டுமே உயிர் வாழ்வார் என மருத்துவர்கள் சொன்னது காதில் ஒலித்துக்கொண்டே இருக்கிறது. வழி தெரியாமல் முடங்கி விடுகிறார் லிவிங்ஸ்டன்.

அப்போது ரஜினியிடமிருந்து அழைப்பு வருகிறது. மனைவியின் உடல்நலம் பற்றி விசாரிக்கிறார். பதினைந்து லட்சம் பணத்தை லிவிங்ஸ்டனிடம் கொடுக்கிறார்.

இன்று லிவிங்ஸ்டனின் மனைவி ஆரோக்யத்துடன் இருக்கிறார். இந்த சம்பவத்தை சொல்லும் போதே லிவிக்கு தொண்டை அடைக்கிறது.

ரஜினிக்கு ஒரு கஷ்டமான காலம் இருந்தது. ஓய்வில்லாமல் மூன்று ஷிப்ட்களும் ரெஸ்ட் இல்லாமல் நடித்து டிப்ரஷனும், நரம்பு தளர்ச்சியும் ஆட்கொள்ள நோயாளி போல் ஆன நேரம். தர்மயுத்தம் என்கிற படம் தொடங்கப்பட்டிருந்தது. அவர் அருகில் செல்ல இயக்குனர் ஆர்.சி.சக்தியே பயப்பட்ட நேரம். பின் பாலச்சந்தர் தலையிட்டு மருத்துவமனையில் ரஜினி சேர்க்கப்பட்டார்.

ஒழிந்தார் ரஜினி என எழுதப்பட்டது. ரஜினியின் வளர்ச்சியை பிடிக்காத நாக்குகள் இஷ்டத்துக்கு பேசின. முடிந்தது ரஜினியின் ஆரவாரம் என சொல்லப்பட்டன. சிகிச்சை முடிந்து தர்மயுத்தம் படத்தை முடித்துக்கொடுத்தார். தர்மயுத்தம் ரிலீசானது.

படம் அதிரடி ஹிட்.  ரஜினி ஏற்றிருந்த அந்த சங்கிலியால் கட்டப்படும் நாயகக்கதாபாத்திரம் தமிழுக்கு புதிதாக இருந்தது. கதையும் அப்படியே. கண்களை திருடி விற்கும் கும்பலை பழிவாங்கும் அந்த படத்தில் ரஜினி அதிரடி Come back கொடுத்தார். கொண்டாடிய வாய்கள் அடைத்துப்போயின. முடிந்தார் ரஜினி எழுதிய கைகள் துவண்டு போயின. அப்படி எழுந்து நிற்க வைத்த அந்த கதாபாத்திரம் பெயர் என்ன தெரியுமா? விஜய்.

பிராம்மாண்ட எழுச்சிக்குப் பிறகு ரஜினி ரசிகர்கள் கொண்டாடிய ஒரு கதாபாத்திரம் 'அலெக்ஸ் பாண்டியன்'. அலெக்ஸ் பாண்டியன் பெயரை சொன்னாலே அலறும் கூட்டம். அப்படி நேர்மைக்கு பெயர் போன போலீஸ்.

"ஏகாம்பரம் பேரை சொன்னா வயித்துல இருக்கிற குழந்தை கூட வாயைப்பொத்தும்."

"அதே குழந்தைக்கிட்டப்போய் அலெக்ஸ் பாண்டியன் பேரைச்சொல்லு. இன்னொரு கையால் அவங்க அம்மா வாயைப்பொத்தும்"

ரஜினியின் மூன்று முகம் டயலாக் போலும் பொறி பறந்தது. அனல் அடித்தது.

இந்த விஜய், அலெக்ஸ் இரு பாத்திரங்களையும் வடிவமைத்தது பீட்டர் செல்வக்குமார். பீட்டர் என்கிற கதையாசிரியரின் கை வண்ணம் ரஜினியின் கெரியரை உயரத்துக்கு கொண்டு போக உதவியது என்பதில் மாற்றுக்கருத்தில்லை. பீட்டருக்கு கடன்பட்டவர் ரஜினி.

ஆனால் காலம் காத்திருந்து பீட்டருக்கான நன்றியை பெற்றுக்கொண்டது. ஆம். லிவிங்ஸ்டனின் மனைவியின் ஆபரேஷன் மூலம் நேர் செய்யப்பட்டதாகத்தான் தோன்றுகிறது.

இல்லையென்றும் சொல்லலாம். ஆனால் பாருங்கள். லிவியின் மனைவிக்கு உடல்நிலை சரியில்லாத அந்த நேரம் அவர் 'லால் சலாம்' படப்பிடிப்பில் இருக்க வேண்டும். செய்தி ரஜினி காதுக்கு எட்ட வேண்டும். அவர் அழைக்க வேண்டும். உதவ வேண்டும். எழுதி வைத்தது போல் நடந்திருக்கிறது.

பீட்டரின் சகோதரி தான் லிவிங்ஸ்டனின் மனைவி.

அப்படி சில நிகழ்வுகள் நாம் அறியாமலேயே கடவுளால் முடிச்சிட்டு நல்ல முடிவையும் தருகின்றன.

இதை இப்படித்தான் பார்க்கத்தோன்றுகிறது.

செல்வன் அன்பு பேஸ்புக்

=============================================================================================== 

அரிதான படம்.  தூங்கும் என் ஜி ஆர்.  அதில் சொல்லப்பட்டுள்ள ஒரு பெயர் தவறு என்று நினைக்கிறேன்!

ரங்கபிரசாத்!

சோழத்துணுக்கு!

LIC க்கு அருகே உள்ள மவுண்ட்ரோட் 1971 ல் எப்படி இருக்கிறது என்று பார்க்கலாம்.

====================================================================================================

பொக்கிஷம், ஜோக்ஸ்...

= = = = = = = = = = = = = = = = = =

மன்னிக்க வேண்டுகிறேன் __/\__  

kgg 

நேற்றைய பதிவில், ஏப்ரல் 1 காரணமாக ஏதேனும் கலாட்டா செய்யவேண்டும் என்று .. அயல்நாடு சென்றதாக ஒரு டூப் விட்டேன். 

அந்தப் படங்கள் யாவும், நம்ம சென்னை கிளாம்பாக்கம் பேருந்து நிலையம் பக்கத்தில் உள்ள கலைஞர் நூற்றாண்டுப் பூங்காவுக்குள் எடுக்கப்பட்டவை !

என்னை தாய்லாந்து வரை அனுப்பித்து சிறப்பித்த வாசகர்களுக்கு நன்றி! 

= = = = = = = = = = = = = = = =