திருமண விருந்துகளில் அங்கு உள்ள உணவு உங்களைக் கவருமா இல்லை ஸ்வீட் பாக்ஸா?

கேள்வி பதில்கள் : 

நெல்லைத்தமிழன் : 

1. திருமண மண்டபத்தில், அதிலும் தாலி கட்டும் நேரத்தில், புகைப்படம், வீடியோ எடுப்பவர்களுக்குத் தொந்தரவாக, மண்டபத்தில் அமர்ந்திருக்கும் மற்றவர்களும் காணவேண்டுமே என்ற நினைப்பு இல்லாமல், ஏன் எல்லோரும் மொய்க்கிறார்கள்? புகைப்படம்/வீடியோ எடுக்கிறார்கள் என்று கூட மனதில் படாமல் செல்ஃபி எடுக்கும் மோகம் ஏன் இப்படி அதிகரித்துவிட்டது?  

# கிட்டப் போய் அட்சதை போடுவது என்ற விருப்பத்தினால் இருக்கலாம்.  எட்டத்திலிருந்து பார்க்க இயலாமல் கூட்டம் மொய்ப்பதாலுமிருக்கலாம்.  படம் பிடித்து வேண்டியவர்களுக்கு அனுப்பும் ஆர்வம் காரணமாகவும் இருக்கலாம்.

& அதெல்லாம் அப்படித்தான் .. ! எவ்வளவு எழுதினாலும், எவ்வளவு படித்தாலும் - அந்த நேரத்திற்கு அதெல்லாம் நினைவு வராது! 

2.  பெங்களூர் திருமண மண்டபங்களில் மேடையில் திருமண நிகழ்வு நடக்கும்போது-அதிலும் தாலி கட்டும் வைபவம் நடக்கப்போகும்போது, மூன்றாம் பாலினத்தவர் உள்ளே வந்து பணம் தரணும் என்று டிமாண்ட் பண்ணுவதுபோல தமிழகத்தில் நடக்கிறதா?   

# நான் அறிந்த வரையில் இல்லை.

& பெங்களூர் உள்பட எந்த திருமணத்திலும் நான் இதை இதுவரை கண்டது இல்லை. Thank God.  

3. நம் திருமண நிகழ்வுகள் ஏன் இவ்வளவு செலவு பிடிக்கும் விஷயமாகிவிட்டது? இதற்குப் பயந்தே, சமூகத்தில் காதல் திருமணங்கள், சாதி மறுப்புத் திருமணங்கள் நடக்கட்டும் என்ற நல்ல எண்ணத்திலா?   

# ஆடம்பர மோகம்,  " என்னாலும் முடியும் " எனும் மனோபாவம்.

4.  திருமணங்களுக்கு நீங்கள் செல்லும்போது, அங்கு உள்ள உணவு உங்களைக் கவருமா இல்லை ஸ்வீட் பாக்ஸா?  

# என்னைப்போல் திருமணத்தில் கலந்து கொள்ள வந்திருக்கும் சுற்றம்-நட்பு  மக்களுடன் பேசுவது.  அவர்களுடன் சேர்ந்து சாப்பிடும் அவகாசம்.

& ஸ்வீட் ஒன்லி !! 

5. சீர் பட்சணங்கள் என்ற பெயரில், பெரிய பெரிய அளவில் இனிப்புகள் மாப்பிள்ளை வீட்டிற்குக் கொடுக்கும் வழக்கம் எப்போதிலிருந்து வந்திருக்கும்?  

# மாப்பிள்ளை கிடைப்பது அரிதான நாளிலிருந்து.  அவர் விஷ்ணு அம்சம் என்பதால் நைவேத்தியம் இருப்பதுதானே சிறப்பு ?

& எப்போ தொடங்கியதோ - ஆனால் பெரிய அளவு சீர் முறுக்குகள் என்பது தனி அட்ராக்ஷன்! 

6. எதிர்காலத்தில்,  அரை நாள் தான் மண்டபம் எடுப்பது, உணவுக்கு வெளியில் ஹோட்டலில் டோக்கன் கொடுத்துவிடுவது என்று நம் திருமணங்கள் சுருங்கினால் உங்கள் ஆதரவு உண்டா?

# முடிந்த அளவு செலவைத் தவிர்த்த மணவிழாக்களைக்காண ஏக்கத்துடன் காத்திருக்கிறேன்.

& கொரானா காலத்தில் நடந்த சில உறவினர் திருமணங்களை கூகிள் zoom போன்ற app மூலம் பார்த்து மனதார வாழ்த்தியிருக்கிறோம். எதிர்காலத்தில் என்ன நடக்கும் என்று பார்ப்போம்! 

= = = = = = = = =

படமும் பதமும் : 

நெல்லைத்தமிழன் : 

எபி ஆசிரியர்களுள் ஒருவர், பஹ்ரைனில் எங்கள் வீட்டிற்கு வந்திருந்தபோது. 

எங்கள் கம்பெனி சூப்பர்மார்க்கெட் உட்பட பல இடங்களுக்குச் சென்றிருந்தோம். ஆபீஸ் அல்லாத இடங்களில் இதுதான் என் உடை. 

இது எந்த இடம் என்று தெரிகிறதா? எப்போதாவதுதான் இந்த மாதிரி புகைப்படங்கள் அமையும். இது ஒரு முறை நான் கேதே பசிபிக் ஏர்லைன்ஸில், துபாயிலிருந்து தாய்வானுக்குச் சென்றபோது தேரா, பர்துபாய் ஆகிய இரண்டு பகுதிகளுக்கு இடையில் கடல்நீர் (backwater),இதனை க்ரீக் என்பர், செல்லும் பாதையுடன் எடுத்த படம். இந்தப் படத்தில் ஒரு முக்கியமான கட்டிடம் இருக்கிறது. அங்குதான் நான் 1993ல் முதல் முதலில் சென்றபோது வேலை செய்த அலுவலகம் இருந்தது. கடல்நீரின் கீழ்ப்பகுதியில் தேரா பகுதி. மேல் பகுதியில் பர்துபாய் பகுதி. 

கேதே பசிஃபிக், ஹாங்காங் செல்லும். பிறகு அங்கிருந்து டிராகன் ஏர் என்ற விமானத்தில் தாய்பேய் (தாய் எப்போதும் பேயல்ல.. அது தாய்வானின் தலைநகரம்) சென்றேன். இது கேதே பசிஃபிக் விமானத்தில் நான் எடுத்துக்கொண்ட படம்.

= = = = = = =

படம் 1 - ஸ்ரீராம் 

தாயைக் காணோம் என்று குட்டி காட்ஸில்லா எங்கள் ஏரியாவைத்த தாண்டிச் சென்றபோது மறைந்து நின்று நின்று எடுத்த போட்டோ..

= = = = = = = = = = = = = = = = = = = = = = = = = = = = = =

படம் 2

ஓடி, ஓடி எல்லா இடங்களையும் பார்த்து ரசித்து மனதுக்குள் பூட்டி வைத்து, போதாதற்கு கேமிராவிலும் சிறைப் பிடித்து, வெயில் தாங்காமல் மர நிழலில் அமர்ந்தபோது...

மரத்தின் வேரிலிருந்து யாரோ என்னைப் பார்ப்பது போலப் பிரமை. திரும்பிப் பார்த்தால் யாருமில்லை. மறுபடியும் அதே போலத் தோன்றவே திரும்பி உற்று கவனித்தால் மரத்தின் வேரில் இந்த உருவம்! சில சித்தர்கள் மரத்தில் இருப்பா இருப்பார்களாமே...  மரமாகவே மாறி விடுவார்களாமே... உங்களுக்கு உருவம் தெரிகிறதோ?

தாராசுரத்தில் எடுத்த புகைப்படம். 2014

== = = = = = = = = = = = = = = = = = = = = = = = = = =

KGG பக்கம் : 

சென்ற இரண்டு வாரங்கள் சென்னை விஜயம் பற்றி எழுதி வருகிறேன். 

சென்னை சென்றதற்கு முக்கியமான இரண்டு காரணங்கள். 

1) சென்ற வருடம் செப்டெம்பர் மாதத்திலேயே நான் என் குரோம்பேட்டை வீட்டைக்  காலி செய்து, வீட்டை ரிப்பேர் செய்ய ஏற்பாடு செய்தேன். 

வீடு முழுவதையும் சுத்தம் செய்து, வேண்டிய செப்பனிடல்கள் எல்லாம் முடித்து repainting, ஒயிட் வாஷிங் எல்லாம் முடித்து மின்சார உபகரணங்கள், மின் இணைப்புகள் எல்லாவற்றையும் செப்பனிட்டு, வீட்டை வாடகைக்கு விட என் நண்பர் திரு இளங்கோவன் - (Proprietor - Rajam Housing - Urappakkam) அவர்கள் உதவியுடன்  ஏற்பாடு செய்தேன். 

எல்லாம் முடித்து, வீட்டை வாடகைக்கு வர ஒருவரிடம் முன் பணம் பெற்றேன். வீட்டுக்கு குடி வரும் குடும்பத்தை, அவர்கள் குடியேறும் முன்பு காணவேண்டும் என்ற உந்துதலில், சென்னைப் பயணம் மேற்கொண்டேன். 

எல்லாம் வெற்றிகரமாக முடிந்தது.

2) கூடுவாஞ்சேரியில் மிகப் பழங்காலத்தில் - கிட்டத்தட்ட 45 ஆண்டுகளுக்கு முன்பு இரண்டு பிளாட் வாங்கியிருந்தேன். அந்த இரண்டு பிளாட்களுக்கும் 4 வருடங்களுக்கு முன்பு காம்பவுண்ட் சுவர் கட்டி, க்ரில் gate அமைத்திருந்தேன். அவைகள் தற்சமயம் எப்படி உள்ளன என்பதைப் பார்க்க அங்கு சென்றேன். 

அதற்காகத்தான் ஊரப்பாக்கம் / கூடுவாஞ்சேரி பகுதியில், தங்குவதற்கு ஏற்ற இடம் எது என்று ஆராய்ச்சி செய்தேன். 

என் நண்பர் இளங்கோவன் - எங்கள் (அதாவது அவர்கள் ) ராஜம் ஹோம் ஸ்டேயில் தங்குங்கள் என்று அழைப்பு விடுத்தார். 

அந்த இடம் பற்றி உடனே இணையத்தில் கூகிள் search செய்து விவரங்கள் தெரிந்துகொண்டேன். 

   link : <<<<<< Click here

அடுத்த வாரம் மீதி விவரங்கள் தொடரும். 

= = = = = = = = = = = = =