குறுங்கதை : என்னாச்சு எனக்கு - ஸ்ரீராம்

ஏற்கனவே நான் சொல்லி இருக்கிறேன்..  அழகியசிங்கர். தன் அசோகமித்திரன் நினைவுச் சிறுகதைப் போட்டியில் பங்குபெற்றவர்கள் இருக்கும் குழுவில் ஏதாவது ஒரு படம் கொடுத்து அந்தப் படத்துக்கு பத்திலிருந்து இருபது வரிக்குள் கதை எழுதச் சொல்வார்.  நான் ஏற்கனவே ஒன்றிரண்டு அப்படி வெளியான நான் எழுதிய கதைகளை வெளியிட்டிருக்கிறேன். பானு அக்கா கூட ஒன்று அனுப்பி வெளியிட்டிருந்தேன்.

அப்படி எழுதப்பட்ட கதைகளை புத்தகமாக்கியுள்ளார் அழகியசிங்கர்.  

அதில் வெளியிடப்பட்ட ஒரு கதையை - நான் எழுதிய கதையை - இங்கு பகிர்கிறேன்.

என்னாச்சு எனக்கு?

ஸ்ரீராம் 

‘மது-மாது -‘ என்று தலைப்பு தந்து மாது கொடுத்த அந்தப் படத்துக்கு பரிசு கொடுத்து “மனமொத்த தம்பதியர்” என்று வந்திருந்த சான்றிதழை மேஜை மேல் வைத்து, படத்தை நிமிர்த்தி வைத்திருந்தான் மாது என்கிற மாதவன்.

அதைப் பார்த்ததும் அடுத்தது காட்டும் பளிங்கு போல மனம் கடுத்ததைக் காட்டிய உதடும் கோணியது மது என்கிற மதுமிதாவுக்கு.

அவன் சொன்ன வசனங்களுக்கும், எழுதிய கவிதைக்கும், எடுத்த இந்தப் புகைப்படத்திற்கும் அதற்கு அவன் கொடுத்த விளக்கத்துக்கும் தான் இந்தப் பரிசு.

அதை இவளுக்கும் காட்டவே இப்படி மேஜைமேல் வைத்திருக்கிறான் மாது. மீசையை எடுத்து விட்டு, இருவர் முகத்தையும் படமெடுத்து போட்டோஷாப்பில் பாதிப் பாதியாய் சேர்த்து ‘மாதொருபாகன். மாதுவுக்கு வலப்பக்கம் இடம் கொடுத்த மது’ என்று எழுதியிருந்தான்.

என்ன ஒரு போலித்தனம் என்று மனதில் தோன்றியது மதுமிதாவுக்கு.

ஒரே வீட்டில் இருந்தாலும் ஆறு மாதங்களாக ஒட்டாமல் தனித்தனியாகத்தான் வாழ்கிறார்கள்.

ஏதோ ஒரு கொடும் சந்தர்ப்பத்தில், உறவு என்னும் கண்ணாடிப் பாத்திரம் விழுந்து உடைந்து மனதில் ஆறாத காயம் ஏற்பட்டிருந்தது. கொஞ்சம் ஆறும் சமயம் நெகிழும் கணங்களை இறுக்கமாக்குவது போல் அவ்வப்போது சில வார்த்தைக் கத்திகள் அதைக் கீறி பச்சை ரணமாகவே இவ்வளவு காலம் வைத்திருந்தன.

இந்தப் போட்டியில் பங்குபெற்ற போது அவளைத் தோளணைத்து போட்டியாளர்களிடம் அவன் பேசிய போது அந்தத் தோளணைப்பில் ஒரு புதிய நெருக்கத்தை உணர்ந்திருந்தாள் மது. அவளுக்கும் மனதுக்குள் ஒரு நெகிழ்வு ஏற்பட்டிருந்ததுதான். காதலித்த, மற்றும் மணமான நாட்களின் ஆரம்பகால நினைவுகள் அவளுக்குள் எழுந்து கிளர்ச்சியை உண்டாக்கின என்றாலும் வெளியில் காட்டிக் கொள்ள்வில்லை.

படத்தைப் பார்த்துக் கொண்டே இருந்தபோதே திடீரென தன் தோளில் மாதவனின் கை படர்வதை கதகதப்பாய் உணர்ந்தாள். தோளணைத்த கைகள் முதுகை வளைத்து இடையை இறுக்கிப் பிடித்தன.

“போதும் மது… என்னாலும் என் தவறுகளை உணர்ந்து திருத்திக் கொள்ள முடியும்.. நம்பு.. கொஞ்சம் கொஞ்சமாக மாற்றிக் கொள்கிறேன்.. என்னால் உன்னை விட்டு இருக்க முடியாது மது… ஒரே வீட்டில் இருந்துகொண்டு தள்ளித்தள்ளி… ” உணர்ச்சியில் குரல் நெகிழ அவள் காதோரக் கூந்தலை மென்மையாக கைகளால் ஒதுக்கி நீவியபடி காதில் கிசுகிசுத்தான் மாது.

மனமும் உடலும் ஒருசேர நெகிழ, திரும்பி அவன் மார்பில் முகம் புதைத்தாள் மது. “என்னாச்சு எனக்கு” என்று அவளுக்குள்ளேயே வியப்பான முறுவலுடன் கேள்வி வந்தது.

“என் மேலயும் தப்பு இருக்கு… நான் மாத்திக்கறேன்.. நீ மாறவேண்டாம்.. அப்படியே இரு.. அதெல்லாம் சேர்ந்துதான் நான் உன்னை லவ் பண்ணினேன்.. “

“வேண்டாம்.. நீயும் நீயாகவே இரு” மாதவன் குரலில் காதல் வழிந்தது.

========================================================================================

நாம் மட்டும் சின்னஞ்சிறு கதைகள்  எழுதவில்லை.  பாக்கியம் ராமசாமி எனும்  ஜ ரா சு கூட தன் புகழ்பெற்ற அப்புசாமி சீதாப்பாட்டி கேகரக்டர்களை வைத்து இப்படி கதைகள் எழுதி இருக்கிறார்.  அதுவும் குமுதத்தில் புகழ்பெற்ற அப்புசாமி சீதாப்பாட்டியை விகடனுக்கு அழைத்து வந்திருந்திருக்கிறார்!

1)  பால்பாயிண்ட்டில் ஒரு பாயிண்ட்

அப்புசாமியின் மேஜை டிராயரில் பத்துப் பன்னிரண்டு பழைய பால் பாயிண்ட் பேனாக்கள் இருந்ததைப் பார்த்து சீதாப்பாட்டி, "எதுக்கு இந்த கலெக்ஷன்?' என்றாள்.

"எனக்கு எந்த பேனா வாங்கினாலும் சரியாக எழுதுவதில்லை. ஆனால் கூரியர் சர்வீஸ்காரர்கள் கையெழுத்துப் போடக் கொடுக்கும் பேனா மட்டும் நன்றாக எழுதுகிறது. வருகிற கூரியர்காரன்கிட்டே எல்லாம், அவன் பேனா தரவேயில்லை என்று சாதித்துக் கஷ்டப்பட்டுச் சேர்த்ததாக்கும் இதெல்லாம்' என்றார்.

2)  சுதந்திரம் என் பிறப்புரிமை...!

வாழ்க்கை வரலாறு எழுதுவதில் புகழ்பெற்ற ஒரு எழுத்தாளரிடம் அப்புசாமி, “என் வாழ்க்கை வரலாற்றை எழுதுங்களேன்' என்றார்.

"மனைவிக்குப் பயந்து சுதந்திரமில்லாமல் இருக்கிறீர். அதை எழுதினால் உங்களுக்குக் கேவலம்தானே?' என்றார் எழுத்தாள நண்பர்.

அப்புசாமி கோபித்தார். "எவன் சொன்னான், மனைவிக்கு பயந்தவன் நான் என்று? அவளது கொடுமைகளை அப்படியே புட்டு புட்டு வைக்கிறேன்' என்றவர், "ஆமாம்... அச்சுக்குப் போறதுக்கு முன்னே புரூஃபை அவளிடம் காட்டி அவள் அனுமதி கிடைத்த பிறகு போடுங்கள். சரித்திரம் எனக்குத் தரித்திரம் ஆகிவிடக்கூடாது இல்லையா?' என்றார்.

==========================================================================================

எல்லோரும் அப்துல் கலாமாகிவிட முடியுமா என்ன....!  

இஸ்ரோவிலிருந்து 25 சதவீத விஞ்ஞானிகள் வெளியேறினர்: திட்டங்களை செயல்படுத்துவதில் சிக்கல்

கடந்த மாதத்தில் மட்டும், 10 சதவீத விஞ்ஞானிகள், சமீப காலமாக, 25 சதவீத விஞ்ஞானிகள் வெளியேறி உள்ளதால், இந்திய விண்வெளி ஆய்வு மையமான, இஸ்ரோவிற்கு சிக்கல் ஏற்பட்டுள்ளது.

இஸ்ரோவில் கடந்த ஒரு மாதத்தில் மட்டும், நுாற்றுக்கும் அதிகமான முதல்நிலை விஞ்ஞானிகள் வெளியேறி உள்ளனர். சமீப காலமாக, 1,000க்கும் மேற்பட்டோர் வெளியேறி உள்ளதாக கூறப்படுகிறது. இது, இஸ்ரோவின் மொத்த பணியாளர்களில், 25 சதவீதமாகும். இதனால், இஸ்ரோவின் முக்கிய திட்டங்களை செயல்படுத்துவதில் சிக்கல் ஏற்பட்டுள்ளது. இதையடுத்து, விஞ்ஞானிகள் ராஜினாமா செய்யவும் மற்றும் விருப்ப ஓய்வு பெறவும், விண்வெளி துறை தடை விதித்துள்ளது.

கடந்த, 2020ல், மத்திய அரசின் விண்வெளி துறையானது, விதிகளை மாற்றி, தனியாரும் விண்வெளி திட்டங்களில் பங்கேற்க வாய்ப்பளித்தது. அப்போது, ஒரு நிறுவனம் மட்டுமே இதில் பங்கேற்றது. பின்னர், மத்திய அரசின் ஊக்குவிப்பால், 'ஸ்கைரூட் ஏரோஸ்பேஸ், அக்னிகுல் காஸ்மோஸ், பிக்சல், பெல்லாட்ரிக்ஸ் ஏரோஸ்பேஸ், துருவா ஸ்பேஸ், திகந்தரா உள்ளிட்ட 400 நிறுவனங்கள், இந்திய விண்வெளி ஆய்வில் இணைந்துள்ளன. இவை மிக வேகமாக, ராக்கெட் வடிவமைப்பு, செயற்கைக்கோள் கட்டமைப்பு, உந்துவிசை செயல்பாடுகளில் வளர்ந்து வருகின்றன.

இவற்றுக்கு மிகவும் திறமையான விஞ்ஞானிகள் மற்றும் தொழில்நுட்ப பணியாளர்களின் தேவை அதிகரித்துள்ளது. எனவே, பணி ஏற்ற உடனேயே மிகப்பெரிய திட்டங்களுக்கு, தலைமை ஏற்கும் பொறுப்பு, பல மடங்கு ஊதியம் உள்ளிட்ட சலுகைகளை வழங்க முன்வருகின்றன. இதனால், தன்னிச்சையாக சாதிக்க துடிக்கும் இளம் விஞ்ஞானிகள், இஸ்ரோவில் இருந்து வெளியேற தொடங்கி உள்ளனர். ஓய்வு பெற்ற விஞ்ஞானிகளில் சிலர், புத்தாக்க நிறுவனங்களின் ஆலோசகராகவும், வழிகாட்டியாகவும் செயல்படுகின்றனர்.

தாமதம்

ஊழியர்கள் வெளியேறியதால், இஸ்ரோவின் இந்தாண்டு திட்டங்களான, 'ககன்யான் ஜி1, எஸ்.எஸ்.எல்.வி-.எல் - 1, ஜி.எஸ்.எல்.வி-. எப் - 17' உள்ளிட்டவை தாமதமாகி உள்ளன. மேலும், 10க்கும் மேற்பட்ட திட்டங்கள் கைவிடப்பட்டுள்ன. இந்த ஆண்டின் தொடக்கத்தில், இரட்டை பி.எஸ்.எல்.வி., திட்டங்கள் தோல்வி அடைந்தன.

இந்நிலையில், இந்த ஆண்டுக்குள் ஏழு விண்கலங்கள், ஆறு செயற்கைக் கோள்களை, இறுதி செய்யும் கட்டாயத்தில் இஸ்ரோ உள்ளது. மேலும், குலசேகரப்பட்டினம் விண்வெளி நிலையத்தின் இறுதிக்கட்ட பணிகள் நடப்பதால், சிறிய ரக ஏவுதல்களை, அங்கிருந்து நடத்தும் ஆய்வுகளும் நடக்கின்றன. அந்த பணிகள் பாதிக்காமல் இருக்க, விஞ்ஞானிகளின் ராஜினாமா மற்றும் விருப்ப ஓய்வுக்கு, மத்திய அரசு கட்டுப்பாடு விதித்துள்ளது