சிறுகதை : நாளை முதல் நீ வேறோ நான் வேறோ... - ஸ்ரீராம்

 

நாளை முதல் நீ வேறோ நான் வேறோ...   

- ஸ்ரீராம் 

அந்த காஃபி ஷாப் இருவரும் ஏற்கனவே பலநாட்கள் வந்த இடம்தான்.  கல்யாணத்துக்கு முன் தினமும் சந்தித்த இடம்.  அதன்பின் இப்போது விவாகரத்து தீர்ப்பாகி இன்று மறுபடியும் இங்கே..  பிரிவுக்கு முன் கடைசியாக ஒருமுறை இங்கேதான் சந்திக்க வேண்டும் என்று இருவருக்குமே தோன்றியது ஒரு விநோதம்தான்.

அவன் வரும்போது அவள் முன்னரே வந்து அமர்ந்திருந்தாள். இவன் வருவதை கவனித்திருக்க வேண்டும் என்றாலும் அவள் பார்வை வேறிடத்தில் இருப்பது போல காட்டிக்கொண்டு, அருகில் வந்ததும் கைப்பையை அருகில் எடுத்துக் கொண்டு மெல்ல தலையசைத்து செயற்கையாகப் புன்னகைத்தாள். 

எதிரே அமர்ந்து சுற்றிலும் ஒருமுறை பார்த்து விட்டு அவளை பார்த்தான்.

"இன்னிக்கேவா கெளம்பறே?"

"நாளை ஈவினிங் ஃபிளைட்"

பழகிய சர்வர் புன்னகையுடன் காஃபி கொண்டு வைத்தான்.  அவனுக்குத் தெரிய நியாயமில்லையே... 

மங்கிய வெளிச்சத்தில் மௌனம் அவர்களை போர்த்திக் கொண்டிருந்தது.  அவர்களுக்குத் தெரியும், நாளை முதல் அவர்கள் சந்திக்கப் போவதில்லை.  அவள் வெளிநாடு போகிறாள்.  இவன் வேறு ஊர் செல்கிறான்.

எடுத்த முடிவு சரிதானா என்கிற எண்ணம் இருவருக்குள்ளுமே இப்போது இருந்தாலும் வெளியே சொல்ல முடியாத ஒரு இறுக்கம் சூழ்ந்து தலை கவிழ்ந்து ஒருவர் பார்க்காத போது இன்னொருவர் பார்த்துக் கொண்டார்கள்.  'எந்த ஊரில் எந்த நாட்டில் எங்கு காண்போமோ' என்கிற வரி இருவருக்குள்ளும் மனதில் ஓடியது. 

கால் மணி நேரத்துக்கும் மேல் சும்மா உட்கார்ந்திருந்தார்கள்.

ஒருவரை ஒருவர் இன்னும் கொஞ்சம் மதித்து பொறுத்துப் போயிருக்கலாம் என்று இப்போது தோன்றினாலும் அப்போது அப்படி தோன்றவில்லை என்பதை இருவருமே நினைத்தார்கள்.

இன்றைய தினத்தின் இந்த உணர்வுகள் நாளை மாறி வேறு துணையை மனம் நாடலாம்.   என் பலவீனத்தை நான் ஏன் வெளிப்படுத்த வேண்டும் என்று இருவருமே மனதுக்குள் நினைத்துக் கொண்டார்கள்.

காஃபி குடிக்கப்படாமல் அப்படியே இருக்க, பில் யார் கொடுப்பது என்கிற விவாதங்களுக்கு இடம் வைக்காமல் அவள் பில்லை கையில் எடுத்துக் கொண்டு எழுந்து நடந்தாள்.

=======================================================================================

1960 ஆம் வருட தென்றல் இதழ்.  

தெரியும்தானே?  தென்றல் என்பது கண்ணதாசன் நடத்திய இதழ்.  இந்தத் தகவலை நான் அறியாமலேயே சிறுவயதில் இதே 'தென்றல்' என்ற பெயரில் நான் ஒரு கையெழுத்துப் பத்திரிகை நடத்தினேன்.  நான் தென்றல் என்று பெயர் வைக்கக் காரணம் என் அண்ணனும் அவர் நண்பரும் 'வசந்தம்' என்று ஒரு கையெழுத்துப் பத்திரிகை நடத்தியதுதான்.

கேள்வி பதில் பகுதிக்கு கண்ணதாசன் 'ஐயம் அகற்று' என்று தலைப்பிட்டிருந்தார் போலும்.  அதில் வந்த ஒரு சுவாரஸ்யமான கேள்வி பதில்.

 

ஐயம் அகற்று - மேலை.சி. மதிமாறன், திருநல்லூர்.

தனித்து இயங்கக்கூடிய தமிழ் மொழியில் தனித் தமிழ் ஆண்டுகள் கிடையாதா? இப்போது தமிழாண்டுகள் என்று வழங்கி வருகின்ற "அறுபது ஆண்டுகளும்" தமிழ்தானா?

பன்னிரண்டு திங்களும் தமிழ்த்திங்கள். சக ஆண்டு (வாக ஆண்டு) தமிழகத்தில் வழங்கிய ஆண்டுதான், வடபுல ஆண்டு அன்று. விக்கிரம ஆண்டே தவிர, கொல்லம் ஆண்டு (தற்போது 1135-வது ஆண்டு) தமிழக ஆண்டுதான். தமிழ் ஆண்டு என்ற சொல்லை மாவட்டத்தில் கொல்லம் ஆண்டு என்பதன் மறு பெயராகவே வழங்குகிறது. தவிர, தமிழகத்தின் தமிழ் மாவட்டங்களுக்குள்ளேயே பிறந்த ஆண்டு மெய்கண்டான் ஆண்டு (இது 737-ம் ஆண்டு).

கேள்வி கேட்பவருக்கு எப்படியோ நிறைவு தரும் ஆண்டுகள் இயல்பில் ஒன்றேனும் அமையவில்லை என்பது தெளிவு. தமிழ் ஆண்டு இலக்கிய இலக்கண அமைப்புகளுக்கு ஏற்ப, காலக் கணிப்பு அமைப்பதே சிறப்பாகும்.

கலி ஆண்டு (இன்றைய ஆண்டு 5082) ஆரிய ஆண்டினும் பிற ஆண்டு முன் தொடங்கியது. ஆனால் கி.பி. 3-ம் நூற்றாண்டுக்கு அதாவது சக ஆண்டுக்கு முந்திய காலம் குறித்த ஆதாரம் எதுவும் இல்லை. இரண்டாவது இதன் வழக்கு வடதிசையில் மிகுதி. மூன்றாவது தொடக்கத் திராவிட, தமிழ் இயக்கத்தார் சமய வாழ்வு முழுவதும் பஞ்சாங்கமும் முற்றிலும் ஆரியருக்குரியன என்று ஒதுங்கி இருந்தனர்.

கேள்வி கேட்பவர் 60 ஆண்டு வட்டம் தமிழருடையதே என்றே கருதுவதாகத் தெரிகிறது. ஆனால் அது தமிழருடையதேயானாலும், பிற ஆண்டு போலயே பஞ்சாங்கம் கோள்களின் நகர்வுடன் கணிப்பிடப்படும் கணிப்புடன் ஊழி பல வரிசைப்படும் ஒரு வழிப்படும்.

அறுபதாண்டு வட்டமும் வானநூலாரால் வரையறுக்கப்பட்டது. தொல்பழங்காலத் தமிழர் வானநூலறிவு பற்றிச் சங்க இலக்கியக் குறிப்புகள் மூலம் அறிகிறோம்.

கிட்டத்தட்ட இன்றைய உலகின்... பண்பாடு உண்டு. தமிழர் மற்ற எல்லா உலக இனங்களையும் விட, ஆரியரை விட ஆண்டு, மாத, வார, நாட்களை நுட்பதிட்பமாகக் கணித்து இருந்தனர் என்றும், அதை இன்றைய பஞ்சாங்கம் வரை கொண்டு வந்தவரே ஆரியர் என்பதும் திராவிட ஆய்வியற் பேரறிஞர்கள் கூறுகின்றனர்.

விடுத்தவர் கேள்விக்கு இவை விளக்கங்களே தவிர விடையாகமாட்டா. தொல்பழங்காலத்திலிருந்து தமிழர் எவ்வாறு காலக் கணிப்பைக் குறித்தனர் என்பதை அறிய இலக்கியச் சான்றுகள் எதுவும் நமக்கு எட்டவில்லை. அதுவும் பிற்பட்ட சிலவே நமக்கு வந்து எட்டியுள்ளன. அறிவு நூல்கள், ஆகமங்கள் இலக்கிய வழிச் சிலவன்றி பிற அழிந்தொழிந்தன. பொருளாராய்ச்சி ஏதேனும் உண்மைகளைக் கொணரலாம்.

கல்வெட்டுக்களில் சக முதலிய ஆண்டுகள் தருவன மிகச் சிலவே. ஆயினும் எங்கேனும் ஒன்றன் ஆண்டு தெரிந்தால் மற்றவை கணிக்கப்படுமளவு பிற குறிப்புகளை ஆராய்ந்தே வரலாற்றாசிரியர்கள் கணித்துள்ளனர். இதற்கு உதவும் காலக்குறிப்புகள் பெரிதும் அரசனது பெயர், அவன் ஆட்சியாண்டு ஆகியவையும், சில இடங்களில் அவன் முன்னோரின் விவரமுமேயாகும்.

ஆனால் எகிப்திய மன்னர்களின் பெயர்களுடனேயே ஆண்டுகள் தொடர்பாகக் கிடைப்பதால், அவற்றின் வரலாற்றுக் காலம் கணிப்பது எளிதாகிறது. தமிழகத்தில் அதுவும் தொடர்பாகக் கிடைத்த திருவிளையாடற் புராணங்களில் வடதிசைப் புராணங்களைப் போலச் சோழர் பாண்டியர் பிரம்மாண்டப் புராணங்கள் மரபு வரிசைப் பெயர்கள் உள்ளன. வரலாாற்றுக்கு உதவும் அளவுகூட இந்தத் தென்திசைப் புராணங்கள் உதவவில்லை. மெய்யான பட்டியலிட்டுப் பார்த்து இந்த வரிசை பொய்ப் பட்டியலாக அமைக்கப்பட்டிருப்பதுதான் இதற்குச் சான்றாகும்.

பொருளாய்வில் இனியும் கிடைக்க முடியாதென்றில்லை, கிடைக்க வழி உண்டு. வினாக்களைக் கேட்பவர் போன்றவர்கள் உள்ளத்தில் எழும் கேள்விகள் பெரிதும் கேள்விகளாகத்தான் உலவ முடியும். வீழ்ந்த இடைக்காலத்தின் திரையாக நிற்கிறது. வாழ்ந்த காலத்தை ஒரு புறம் நோக்கி வருங்கால வாழ்வுக்கு வகை காண விழைகிறோம். ஆனால் வாழ்ந்த செய்திகளை வருந்தி மெய் காணும் பொறுப்பும், வருங்காலப் பேருழிகளுக்கும் வழிகாட்டும் கடமையும் நமது இந்தியத் தேசிய அரசியலுக்கும்தான் உரியது.

திருவள்ளுவர் ஆண்டு (இப்போது வருகிறது ஆண்டு 1992) எழும் கேள்விகளுக்கு அந்த அளவுக்கு ஒரு தற்காலிக விடையாக வருங்காலத் தமிழகம் அமைய வரையறுக்கப்பட்டதே. காலப் பழம்பொருளாய்வு ஒரு வேளை உண்மையான திருவள்ளுவராண்டை திருந்திய திசையில் தரக்கூடும் என்று நினைக்கிறேன். அது கிறித்தவ ஆண்டை விட, புத்தர் ஆண்டை விட, சக ஆண்டை விடப் பழமையானதாய் இருக்கும் என்பதே என் நம்பிக்கை.

---

மா.பா. சாரதி, சென்னை:

'மூவருலா'வும், ஏரெழுபது எழுதி, இளமைப் பெருமை காத்த ஒட்டக்கூத்தரைப் பற்றிய உங்கள் கருத்து என்ன?

ஒட்டக்கூத்தரும், கம்பரும் ஒரே காலத்தவர் என்பதற்கு கற்பனை கலந்த கதைகளையன்றி ஆதாரமிக்க, இலக்கியச் சான்றுகள் ஏதேனும் உண்டா? கூத்தன் காலத்துக் குலோத்துங்கனும், கம்பன் காலத்துக் குலோத்துங்கனும் ஒருவரா? ஏரெழுபது இயற்றியவர் கம்பர் தானா?

பல்மொழிப்புலவர் பதில் தருகிறார்:

ஜெயங்கொண்டார் கலிங்கத்துப் பரணி பாடியது முதற் குலோத்துங்க சோழன் (கி.பி. 1070 - கி.பி. 1120) காலத்தில்தான். அக்காலத்துச் சோழ அரசின் புலவரிலைத் தலைவராயிருந்தவர் அவர். அவருக்குப் பின் அதே கவிச்சக்கரவர்த்திப் பட்டமேற்ற மூன்று கவிச்சக்கரவர்த்திகள் ஆட்சியில் அச்சக்கரவர்த்திகளின் ஆசிரியராயிருந்து (விக்கிரம சோழன் 1118-1135, இரண்டாம் குலோத்துங்கன் 1133-1150, இரண்டாம் இராசராசன் 1146-1173 ஆகிய) 'மூவருலா' பாடியவர் அவர். இந்த இரு கவிச்சக்கரவர்த்திகள்தாம் வரலாறு அறியும்.

ஒட்டக்கூத்தர் மூன்று வரலாற்றுப் பேரரசர்களைப் பற்றி உலா பாடியவர். அவர் காலத்தையும் அவர் காலத்தில் அவருக்கு இருந்த புகழ், மதிப்பையும் நாம் திட்டவட்டமாக அறிகிறோம்.

கம்பர் எக்காலத்தவர் என்பது பற்றி இன்றும் அறிஞர் ஒருமுகமாக வரவில்லை. அவர் ஒட்டக்கூத்தர் காலத்தில் இருந்தவர் என்பதற்கு எத்தகைய ஆதாரமும் இல்லை. 'கவிச்சக்கரவர்த்தி' என்ற பட்டம் கம்பருக்கு எந்தச் சோழனோ, சேரனோ, பாண்டியனோ கொடுத்த பட்டம் அல்ல. அது மக்கள் கொடுத்த பட்டம் என்றுதான் தற்காலக் கவிதைப் பண்பாளர்கள் கூறுவர். சோழப் பேரரசர்களில் பெரும் பேரரசர்கள் அத்தனை பேரும் சைவர்கள். அவர்கள் காலம் அரிய அரசியல் ஆதரவு பெற்றிருக்க முடியாது. அவர் இரண்டாம் குலோத்துங்கன் காலத்தவரா அல்லது 12-ம் நூற்றாண்டில் ஒட்டக்கூத்தரின் உலாவுக்குரிய இரண்டாம் குலோத்துங்கச் சோழர் காலத்தவரா என்று பலரும் கொள்கின்றனர். ஆனால் அவரது கவிதைப் பண்பையும் அரசியல் ஆதரவற்ற நிலையையும் நோக்க அவர் மூன்றாம் குலோத்துங்கன் (1178-1218) காலத்தவர் என்றே கூறத்தகும். பாண்டியர் கையில் சோழநாடு சின்ன பின்னமுற்றுச் சீரழிந்த காலத்தில் ஆமுதத் தாத மலராகவே அவர் கவிதை விளங்கியிருத்தல் பொருந்தும்.

தமிழில் திருவள்ளுவர், ஔவையார் கதைகளைப்போல, மலையாளத்தில் எழுத்தச்சன், சமஸ்கிருதத்தில் காளிதாசன், பவபூதி முதலியார் கதைகளைப்போல, ஒட்டக்கூத்தர் கதையும் விசயநகர காலத்துக்குச் சற்று முன்னோ பின்னோ ஏற்பட்ட இடைக்கால புதிய எழுத்தாளக் கும்பலின் கட்டுரைக் கலையேயன்றி வேறல்ல. அவற்றில் உள்ளது பொய்ம்மை. பொய்ம்மை என்று தேடும் பொறுப்பை விட, எது பொய்ம்மை என்று காணும் பொறுப்பே நம் வரலாற்றுக்குப் பெரிது. அக்கதை பற்றி நாம் கூறத்தகும் ஒன்று, அவை நல்ல கட்டுக்கதை எழுத்தாளர்களின் படைப்புகள் என்பதில் சிறிதும் ஐயமில்லை என்பதுதான்.

---

அறிவிப்பு

நான் மார்ச் முதல் வாரத்தில் சென்னையிலேயே தங்க வேண்டியிருப்பதால் இயக்க உணர்வாளர்களும் மற்றவர்களும் 4/141, மவுண்ட் ரோடு, சென்னை - 2 என்ற முகவரிக்கு எழுதும்படி தெரிவித்துக் கொள்ளுகிறேன்.

அன்புக்குரிய,

ஏ.கே.வில்வம்.