திங்கக்கிழமை 170807 : மட்ரி - கீதா சாம்பசிவம் ரெஸிப்பி

இது ராஜஸ்தான் குஜராத் மாநிலங்களில் ரொம்பவே பிரபலமானது.


என் அம்மா வெறும் கோதுமை மாவில் இதைச் செய்திருக்கார். காரப்பொடி, உப்பு, பெருங்காயம் மட்டும் போட்டு! ஆனால் குஜராத்திலும், ராஜஸ்தானிலும் கொஞ்சம் மாறுதலாகச் செய்கின்றனர். கரகரப்பும் அதிகம்.  இதை நிறையச் செய்து ஒரு காற்றுப் புகாத டப்பாவில் போட்டு வைத்துக் கொண்டு மாதக் கணக்கில் வைத்திருப்பார்கள். அவ்வப்போது வெளி ஊர் போனாலோ காலை ஆகாரம் இல்லை என்றாலோ, இரவுக்கோ இதை ஊறுகாயுடன் சேர்த்துச் சாப்பிடுவார்கள். ஆனாலும் இது அநேகமாக மாலை தேநீருடன் உண்ணும் உணவாகவே பார்க்கப்படுகிறது.

தேவையான பொருட்கள்

கோதுமை மாவு இரண்டு பெரிய கிண்ணம்

மைதா மாவு ஒரு பெரிய கிண்ணம்

கடலை மாவு ஒரு பெரிய கிண்ணம்

வெங்காய விதைகள் அல்லது ஓமம்

உப்பு

சமையல் எண்ணெய் ஒரு சின்னக் கிண்ணம் மாவில் சேர்க்க

பொரிக்க எண்ணெய் தேவையான அளவு

இந்த மாவுகளோடு உப்புச் சேர்த்துக் கொண்டு வெங்காய விதைகள் அல்லது ஓமம் அல்லது கறுப்பு ஜீரகம் சேர்த்து நன்கு கைகளால் கலக்கவேண்டும். பின்னர் சின்னக் கிண்ணம் எண்ணெயை மாவில் ஊற்றி நன்கு கலக்க வேண்டும். மாவு முழுவதும் பரவுமாறு எண்ணெயைக் கலக்கவும். மாவைச் சிறிது நேரம் விடாமல் கலக்கியபின்னர் கையால் பிடித்தால் உருட்ட வரும். அப்போது கொஞ்சம் கொஞ்சமாக நீரைச் சேர்த்துக் கெட்டியாகப் பூரிக்குப் பிசைவதை விட இன்னும் கெட்டியாகப் பிசையவும். உடனே அடுப்பில் எண்ணெயைக் காய வைத்துப் பிசைந்த மாவைச் சின்னப் பூரிகளாக இட்டு எண்ணெயில் போட்டுப் பொரிக்கவும். பூரியாக இட்டதும் அது உப்பாமல் இருக்கப் பூரியின் நடுவே கத்திகளால் குத்தி விடவும். எல்லாவற்றையும் இப்படிக் கரகரவெனப் பொரித்துக் கொண்டு ஒரு காற்றுப் புகாத டப்பாவில் போட்டு மூடி வைத்துக் கொண்டு தேவையான போது எடுத்து உண்ணலாம். இதை அநேகமாக மாங்காய் ஊறுகாயுடன் சாப்பிடுவார்கள்.

இன்று நான் செய்யும்போது ஒரு சில மாறுதல்களைச் செய்தேன். மாவு அளவுகள் எல்லாம் மேலே சொன்னாற்போல் போட்டுக் கொண்டேன்.

அதில் காரப்பொடி இரண்டு டீஸ்பூன்

உப்பு தேவையான அளவு

ஓமம் இரண்டு டீஸ்பூன்

கசூரி மேதி ஒரு டீஸ்பூன் கையால் கசக்கிச் சேர்க்கவும். இதை எல்லோரும் கஸ்தூரி மேதி என்கிறார்கள். இதன் பெயர் கசூரி மேதி ஆகும். தேவையானால் கரம் மசாலாவும் சேர்க்கலாம். நான் சேர்க்கவில்லை. அதற்குப் பதிலாகப் பெருங்காயப் பொடி கொஞ்சம் சேர்த்தேன்.

எல்லாவற்றையும் நன்கு கலந்து கொண்டு இரண்டு டேபிள் ஸ்பூன் நெய்யை அதில் கலந்து (எண்ணெய்க்குப் பதிலாக) நன்றாகக் கலந்து கொண்டே இருந்தேன். மாவு பிடிக்கும் பதம் வந்தது.  அந்தப் படம் கீழே கொடுத்துள்ளேன்.

கொஞ்ச கொஞ்சமாக நீரை விட்டுப் பிசைந்தேன். பிசைந்த மாவு கீழே. 

பின்னர் பூரிகளாகப் பொரித்து எடுத்தேன். அவை இங்கே

  

பொரித்த பூரிகள் 

  டப்பாவில் போட்டிருப்பது 

இதிலேயே காரம் இருப்பதால் அப்படியே சாப்பிடலாம். நீண்ட தூரப் பயணங்களுக்கும் ஏற்றது. செய்து கையில் எடுத்துச் செல்லலாம். இதற்கு மட்ரி என்று பெயர் சொல்கின்றனர். நாங்க எங்க வீட்டில் கார பூரி என்று சொல்வோம். 

[ தட்டையைப் போல இருக்கிறது.  பார்க்கும்போதே கரகரமொருமொரு என்று இருக்கிறது.  சாப்பிட ஆசைதான்.  சமீபத்தில் ரிப்பேர் செய்து கொண்டிருக்கும் பல் "கொஞ்சம் யோசித்து உள்ளே அனுப்பு" என்கிறது! - ஸ்ரீராம்  ] 

தமிழ்மணத்தில் வாக்களிக்க...