புதன் 191204 :: கேக் வெட்டி பிறந்த நாளை கொண்டாடியிருக்கிறீர்களா?

வல்லிசிம்ஹன் : 

1 இத்தனை ஆனந்தாக்களும்,சாமியார்களும் தேவையா? 

    

$ ஆனந்தாக்களும் சாமியார்களும் அவர்கள் பாட்டுக்கு உண்டாகிறார்கள் அவர்களின் தரமறிந்து பயன் பெறுவது மக்கள் அவரவர் செயல்.

& தேவை இல்லைதான் - நமக்கு! ஆனால் அவர்களுக்கு ஏதோ தேவை இருப்பதால்தான் ஆ, சா எல்லோரும் உருவாகிறார்கள். 

    

2 அவர்கள் இல்லாமல் நாம் வழி தவறி விடுவோமா? 

# முதலில் சாமிகள் ஆனந்தாக்கள் வழி தவறாமல் இருக்கட்டும். அதுவே பெரிய அதிர்ஷ்டம். அவர்கள் இருந்தாலும் மக்கள் வழி தவறி நடப்பது இருந்து கொண்டு தான் இருக்கும். 

& அதெல்லாம் ஒன்றும் இல்லை. நடிகர்களுக்கு ரசிகர் கூட்டம் இருப்பதுபோல, சாமியார்களுக்கு followers. 

            

கீதா சாம்பசிவம் : 

1.இறந்த பின்னர் செய்யும் உறுப்பு தானம் குறித்து உங்கள் கருத்து என்ன?

$ இறந்த பின் வலி உணரப்படுவதில்லை. நம் உறுப்புகள் வாழ்கின்றன என்பதை விட வாழ வைக்கின்றன எனும்போது தானம் அவசியமே.

# உயிர் போன பின் உடல்பற்றி பற்பல மத நம்பிக்கைகள் உண்டு. அவற்றை மீறும் தைரியம் உள்ளவர்கள் தாராளமாக உறுப்பு தானத்துக்கு ஓ கே சொல்லலாம். வரவேற்கத் தக்கது. எனினும் நடைமுறை சிக்கல்கள் அதிகம். 

2.சாஸ்திர, சம்பிரதாயங்களில் நம்பிக்கை இல்லாத பெற்றோருக்கு நேர்மாறாகக்குழந்தைகள் இருப்பதும், கடுமையாகக் கடைப்பிடிக்கப்படும் பெற்றோரின் குழந்தைகளுக்கு நம்பிக்கை இல்லாததற்கும் என்ன காரணம்?

# Antithesis ஒரு இயற்கை நியதி. பார்த்து வெறுத்துப் போவது இதன் பின்புலம்.

3.திருமணம் முதல் எல்லாவற்றிலும் சடங்குகள், குறிப்பாக வைதிகக் காரியங்கள் என்பது தற்காலங்களில் பொருள் இல்லாமல் செய்யும் ஒன்றாக ஆகி விட்டது. காசி யாத்திரை என்பதன் பொருளே யாருக்கும் தெரியவில்லை என்னும்போது அதற்கு முன் வரும் சமாவர்த்தனம் என்றால் என்ன தெரியப் போகிறது. எல்லாம் ஓர் இயந்திரகதியில் நடக்கிறது. இது எதிர்காலத்துக்கு நல்லதா?

# ஏதோ முன்பெல்லாம் எல்லாம் தெரிந்து சடங்கு செய்தார்கள் என்று எண்ண வேண்டாம். முன்பை விட இப்போது வைதிகர்களே மெகானிகல் புரொஃபஷனல் ஆகிவிட்டார்கள். ஈவன்ட் மேனேஜர்கள்.

இது எதிர்காலத்தில் பெரிய கெடுதல் ஏதும் செய்யாது. சடங்குகள் இன்னும் கொஞ்சம் சுலபமாகும்.

                    

4.கலப்புத் திருமணங்கள் பெருகி வருவதற்கு என்ன காரணம்? இது நல்லதா? கெட்டதா?

$ கலப்பு மணம் நல்லதே,  மனமும் உணவுப் பழக்கங்களும் ஒத்துப் போகும்போது.

# மன ஒற்றுமை, புரிதல், சந்தோஷம் இருப்பின் கலப்புத் திருமணங்கள் வரவேற்கப்பட வேண்டியதுதான். 

5. காசிக்குச் சென்று திரும்புபவர்கள் இனிமேல் தாய், தகப்பன் ஸ்ராத்தமோ அமாவாசைத் தர்ப்பணங்களோ செய்ய வேண்டாம் என அவர்களாக முடிவெடுப்பது சரியா? அதுக்கும் இதுக்கும் சம்பந்தமே இல்லை என்பதை அவர்கள் புரிந்து கொண்டிருக்கிறார்களா?

# சிரார்த்தங்கள் இருவரின் மனத் திருப்திக்காக செய்யப் படுபவை. ஒன்று செய்வோர் அடுத்து செய்து வைப்போர். காசி கயா சடங்குகள் பின்னாட்களில் விடுதலை தருவதாக நம்பப்படுகிறது. 

இவை பற்றி தீர்மானமாக இது இப்படி என யாரும் எதுவும் சொல்வதற்கில்லை.   

     

6.எச்சல், பத்து போன்றவை பார்த்தால் அவர்கள் கடுமையான ஆசாரக்காரர்கள் என்று அனைவரும் அவர்களை விலக்கி வைப்பது ஏன்? சுகாதார ரீதியாகவே அது நல்லது இல்லை என்பது தெரியாதா?

$ சரியான சுகாதாரப் பழக்கங்களானால் சரி. 5 மில்லி தண்ணீர் தெளித்து சுத்தி செய்வது வெறும் கண் துடைப்புதானே?

# எச்சில் பற்று இவற்றிற்குப் பரிகாரமாக செய்யப் படும் சிலவற்றைப் பார்த்தால் அவை சுகாதாரத்தின் அடிப்படையில் இல்லை எனத் தோன்றும். எனினும் எச்சிலை விலக்கி இருப்பது மன நிறைவு தரும் விஷயம். "பத்து" அப்படி இல்லை. உணவை மீதம் வைக்காமல் நிர்வகிக்க இது ஒரு யுக்தியாக இருக்கலாம். 

7. ஆடு, மாடு, நாய் போன்றவை தாகம் அதிகம் ஆனால் தண்ணீர்க்குழாய்களில் வாய் வைத்து நீரை உறிஞ்சும், பார்த்திருப்பீர்கள். அதன் பின்னர் அந்தக் குழாயைச் சுத்தம் செய்வது நல்லதா, இல்லையா? அதே போல் மனிதர் வாய் வைத்துக் குடித்தாலும் அப்படித் தான் அலம்புவோம். அதையும் குற்றமாகவோ குடித்தவர்மனதைப் புண்படுத்தியதாகவோ எடுத்துக்கொள்ளலாமா?

$ எச்சில் பாத்திரத்தை ஒன்று நாம் கழுவ வேண்டும் இல்லாவிடில் உபயோகித்தவர் கழுவ வேண்டும். கோபித்துக் கொள்வது சுகாதாரக் கேடு.

# 7 & 8 மேலே # உள்ளபடி.

8.உணவைப் பகிர்ந்து உண்ணவேண்டும் என்பது சரி. ஆனால் ஒரே பாத்திரத்தில் இருந்து எல்லோரும் எடுத்துச் சாப்பிடுவது சரியா? தனியாகக் கிண்ணங்களில் போட்டுக்கொண்டால்/அல்லது போட்டுக்கொண்டு சாப்பிடச் சொன்னால் அது தப்பா?

$ பகிர்ந்துண்ணல் என்றால் தனித்தனி தட்டு கிண்ணம் எல்லாம் உபயோகிக்கலாமே! 

                      

9.குழந்தைகள் மிச்சம் வைப்பதைப் பெற்றோர் சாப்பிடுவது சரியா?

$ மிச்சமிருப்பது தரக்குறைவாக இல்லாத பக்ஷத்தில் நான் சாப்பிட்டு விடுவேன்.

# உணவை விரயம் செய்யாமை சாலவும் நன்று.

10. குழந்தைக்குத் தனியாக உணவைக் கொடுப்பது நல்லதா? அல்லது நம் தட்டிலிருந்து எடுத்து உண்ணப் பழக்கம் செய்வது நல்லதா?

$ பருப்பு நெய் கலந்த சாதத்தை சிறு உருண்டைகளாக உருட்டி போட்டு நாமும் அருகில் வேறு தட்டில் போட்டு சாப்பிட்டால் குழந்தைகள் ஓரிரு நாட்களில் தானே எடுத்து சாப்பிடக் கற்றுக் கொள்வார்கள்.

# தனியாகக் கொடுத்து உண்ணக் கற்பிப்பது நல்லது. அது படிப்படியாக சாதிக்க வேண்டிய ஒன்று. 

குறிப்பு:

# கேள்வி பதில் ஒரு பொழுது போக்கு. நம்முடன் இவர் ஒத்துப் போகிறாரா எனும் தேடல். மாற்றுக்கருத்தை அறியும் ஆவல். மற்றபடி பதிலளிப்பவர் அதி மேதாவி அவர் சொல்வது மிகச் சரியான கருத்து என்று எண்ணிவிடக்கூடாது.

பானுமதி வெங்கடேஸ்வரன் : 

சிலரைப் பற்றி நினைத்துக் கொண்டிருப்போம்,அவர் நம் கண் முன் வந்து நிற்பார்கள் அதை அவர்களிடம் சொன்னால் நம்ப மாட்டார்கள் என்பது வேறு விஷயம். இப்படிப்பட்ட அனுபவங்கள் உங்களுக்கு உண்டா?

# எல்லாருக்கும் சில சமயம் நடந்திருக்கும். நம்பாததன் காரணம் ஞாபகமறதியாக இருக்கும். 

& எனக்கு இது அடிக்கடி நிகழ்ந்துள்ளது. அது போல, நண்பர்கள் நினைக்கும்போது நான் அங்கு சென்று நின்ற அனுபவமும் நிறைய உண்டு. இவற்றை coincidence என்று ஒதுக்கிவிட முடியாது. Thought waves travel. நாம் மற்றவர்களைப் பற்றி நினைப்பதும் மற்றவர்கள் நம்மைப் பற்றி நினைப்பதும் சில எண்ண அலைகளை உண்டாக்கும். சில சமயங்களில் அவை ஐம்புலன்களுக்கு அப்பாற்பட்ட ESP (Extra sensory perception) மூலம் உணரப்படலாம். நாம் relaxed மன நிலையில் இருக்கின்ற சமயங்களில் இந்த உணர்வு நிலை மேம்பட்டு இருக்கும். 

கேக் வெட்டி பிறந்த நாளை கொண்டாடியிருக்கிறீர்களா?

# என் அல்லது என் அடுத்த வாரிசுகளின்பிறந்த நாளுக்கு என்றால் இல்லை.  கேக் வெட்டுவது என்னைக் கவர்ந்ததில்லை. ஆனால் பேரன்களின் பிறந்த நாள் கேக் கிஃப்ட் ரிட்டர்ன் கிஃப்ட் பழகிவிட்டது.

& நான் பிறந்த பாவத்துக்கு - பாவம் ஏனுங்க கேக்கை வெட்டனும்! 

நெல்லைக் தமிழன் : 

1. நம் இந்தியத் திருமண முறையில், பெண், புகுந்த வீட்டுக்குப் போன பிறகு, தன் அப்பா அம்மாவை தன் கூடவே வைத்துக்கொள்ளணும் என்று சொல்வதே (ஒரே குழந்தையாக, சகோதரர்கள் இல்லாதவர்கள் தவிர) தவறல்லவா?  

# இதே ரீதியில் சொல்வதானால் சகோதர சகோதரியர் உள்ள நபரிடம் பெற்றோர் தொடர்ந்து வசிக்கக் கூடாது என்றாகிறதே அது சரியான செயலாக இருக்குமா ?

இந்த மாதிரி பிரச்சினைகள் ஒவ்வொன்றும் வெவ்வேறு தன்மையதாக இருக்கும். எனவே தீர்வு பொது விதிகளுக்குப் பொருந்தாததாக இருக்கும்.

$ தனிமனித சூழ்நிலைகள் மாறுபடலாம். பொது சமூக விதிகள் பொருந்தா.

                                      

2. பிறர் துன்பத்தில் இன்பம் காணும் போக்கு ஏன் பல மனிதர்களிடத்தில் இருக்கிறது?

# இது மனித மனதின் அடிப்படையான அமைப்பின் செயற்பாடு.

$ வேணுங்கட்டைக்கு வேணும்! 

வெண்கலக் கட்டைக்கு வேணும்...! 

& பல அல்ல. சில sadistகளிடம் மட்டுமே. 

 ===============================================

அவல், பொரி, கடலை. 

யாருடைய திருமணப் பத்திரிகை. பின் குறிப்பு சொல்வது என்ன? 

என்ன படம்? 

இன்றோடு அவர் மறைந்து மூன்று வருடங்களாகிவிட்டன. 

===============================