வெள்ளி வீடியோ : நாணம் என்பது நாடகமா அதில் மௌனம் என்பது சம்மதமா

நேயர் விருப்பம் :

திருநெல்வேலி மாவட்டத்தில் ஒரு உண்மை நிகழ்ச்சியின் அடிப்படையில் கே ஹரிஹரன் இயக்கத்தில் 1982 இல் வெளியான திரைப்படம் ஏழாவதுமனிதன்.  அந்த உண்மைச் சம்பவத்தில் படத்தின் தயாரிப்பாளரும் இருந்திருக்கிறார்.  ஏழாவது மனிதன் என்பது இப்போதும் அது ஒரு வித்தியாசமான தலைப்பாகவே இருக்கிறது பாருங்கள்.  படத்தில் இடம்பெற்ற பாடல்களை அத்தனையையும் பாரதியார் பாடல்களிலிருந்தே எடுத்திருக்கிறார்கள்.  இசை எல். வைத்தியநாதன்.  அப்போது மிகவும் பேசப்பட்ட பாடல்கள்.   இப்போதும் மறக்கமுடியாத பாடல்கள்.

'வீணையடி நீ எனக்கு' என்று தேடியபோதுகிடைத்த படங்களில் ஒன்று!

மாநில, மத்திய, தேசிய அளவில் விருதுகள் பெற்ற இந்தப் படத்தில் ரகுவரன் கதாநாயகனாக நடித்திருந்தார்.  கூட ரத்னா என்றொரு நடிகை.  தொழிற் சங்க பிரச்னைகள் பற்றிய படம் என்று நினைவு.  நம் டெல்லிப் பிரச்னை போல அப்போதே காற்றின் மாசு பற்றி பேசிய படம்.

பாரதியாரின் நூற்றாண்டை ஒட்டி முதலில் அவர் பற்றிய ஒரு டாகுமெண்டரி எடுக்கவே முதலில் முனைந்தார்களாம்.   ஆனால் பிறகு பாரதியாரின் முரண்பட்ட சில முகங்களை சொன்னால் மக்கள் ஏற்றுக்கொள்ள மாட்டார்கள் என்று இந்த சம்பவத்தை அடிப்படையாக வைத்து படம் எடுத்தார்களாம்.  படமும் வெற்றிப்படமாகவே இருந்திருக்கிறது. 

இன்னொரு சுவாரஸ்யமான விஷயம், ரகுவரன் முதலில் இந்தப் படத்தில் வில்லனாக நடிக்கவே அழைக்கப் பட்டாராம்.  பின்னர் ஸ்க்ரீன் டெஸ்ட்டில் 'கதாநாயகனுக்குரிய அம்சங்கள்' இருப்பதாகக் 'கண்டுபிடிக்கப்பட்டு' நாயகனாராம்.

இந்தப் படத்திலிருந்து கே ஜே யேசுதாஸ் - நீரஜா பாடிய "வீணையடி நீ எனக்கு" பாடல் இன்றைய நேயர் விருப்பமாக ஒலிக்கிறது.  விரும்பிக்கேட்ட நேயர் திருமதி பானுமதி வெங்கடேஸ்வரன்!

நீரஜா தொடங்க, தொடர்கிறார் யேசுதாஸ்.  சரணத்தில் வரி வாரியாக மாற்றி மாற்றி பாடுவது அழகு.  ஒவ்வொரு சரணத்தின் முடிவும் உயரத்தை அடைவது  தனிச்சிறப்பு!

பாயுமொளி நீ எனக்கு, பார்க்கும்விழி நானுனக்கு 

தோயும்மது நீ யெனக்கு, தும்பியடி நானுனக்கு 

வாயுரைக்க வருகுதில்லை, 

வாழிநின்றன் மேன்மை யெல்லாம் 

தூயசுடர் வானொளியே! சூறையமுதே! கண்ணம்மா!     

  

வீணையடி நீ எனக்கு, மேவும்விரல் நானுனக்கு 

பூணும்வடம் நீயெனக்கு, புதுவயிரம் நானுனக்கு

வானமழை நீ யெனக்கு, வண்ணமயில் நானுனக்கு 

பானமடி நீ எனக்கு, பாண்டமடி நானுனக்கு 

ஞானவொளி வீசுதடி, நங்கைநின்றன் சோதிமுகம் 

ஊனமரு நல்லழகே! ஊறுசுவையே! கண்ணம்மா!

காதலடி நீ யெனக்கு, காந்தமடி நானுனக்கு 

வேதமடி நீ யெனக்கு, வித்தையடி நானுனக்கு

போதமுற்ற போதினிலே பொங்கிவருந் தீஞ்சுவையே! 

நாதவடி வானவளே! நல்லஉயிரே கண்ணம்மா!

==================================================================

இனி என் விருப்பம்!

கால்களே நில்லுங்கள் 

1965 இல் வெளிவந்த திரைப்படம் எங்க வீட்டுப்பெண்.  தெலுங்கில் சவுகார் ஜானகிக்கு சவுகார் என்று பெயர் வாங்கித்தந்த சவுகாரு என்கிற தெலுங்குப் படத்தைத் தமிழில் 'எங்க வீட்டுப்பெண்' என்று தயாரித்தார்கள் விஜயவாகினி கம்பெனியினர்.   

சவுகார் ஜானகி தெலுங்கில் நடித்த பாத்திரத்தில் நிர்மலா என்கிற விஜய நிர்மலா நடிக்க, உடன் நடிக்க வந்த எஸ்வி ரெங்காராவ் நிர்மலா அந்தக் கேரக்டருக்கு பொருத்தமாயில்லை என்று சொல்லி ஸ்ட்ரைக் செய்ய, அன்றையஅந்தப் படப்பிடிப்பு அத்துடன் நிறுத்தப்பட்டது.  மறுநாள் விஜயநிர்மலா படப்பிடிப்பு தளத்துக்கு வந்தபோது எஸ் வி ரெங்காராவ் கேரக்டரில் எஸ் வி சுப்பையா நடிக்கக் காத்திருந்தாராம்!  நிர்மலா விஜயநிர்மலா ஆனது இந்தப்படத்துக்கு அப்புறம்தானாம்.  விஜயா தயாரிப்பில் நடித்ததால்!

எம் ஆர் ராதா, ஏ வி எம் ராஜன், ஜெய்சங்கர், விஜயநிர்மலா ஆகியோர் நடித்த இந்தப் படத்துக்கு இசை கே வி மகாதேவன்.  பாடல்கள் ஆலங்குடி சோமு மற்றும் கவியரசர்.  இயக்கம் டாபி சாணக்யா.  இந்தப் பாடலை எழுதி இருப்பவர் ஆலங்குடி சோமு.  சிரிப்புபாதி அழுகைபாதி, தெய்வ மலரோடு வைத்தமனம் திருமணம் போன்றமற்ற பாடல்களும் இனிமையானவை.

இந்த இனிமையான பாடலை பாடியிருப்பவர்கள் டி எம் சௌந்தரராஜன் - பி சுசீலா.

அவசரப்படும் ஆணும், அன்புடனே மறுத்து நிற்கும் பெண்ணும்...  அந்தக் கால பண்பாடு... 

கால்களே நில்லுங்கள் கண்களே சொல்லுங்கள் 

நாணம் என்பது நாடகமா அதில் மௌனம் என்பது சம்மதமா 

கால்களே நில்லுங்கள் கண்களே சொல்லுங்கள் 

கால்களே நில்லுங்கள் கண்களே சொல்லுங்கள் 

ஆசை என்பது நாடகமா அதில் ஆண்மை என்பது அவசரமா 

கால்களே நில்லுங்கள் கண்களே சொல்லுங்கள் 

பூவிருக்கும் கூந்தலிலே நானிருந்தால் ஆகாதா 

பூவிருக்கும் கூந்தலிலே நானிருந்தால் ஆகாதா  

பால்மணக்கும் பெண்ணழகை பார்த்திருந்தால் போதாதா

பால்மணக்கும் பெண்ணழகை பார்த்திருந்தால் போதாதா  

கால்களே நில்லுங்கள் கண்களே சொல்லுங்கள்   

இன்னொருநாள் தருவதெல்லாம் இன்று தந்தால் ஆகாதா 

இன்னொருநாள் தருவதெல்லாம் இன்று தந்தால் ஆகாதா 

அன்றுவரை பொறுத்திருந்தால் அந்தமனம்  கேளாதா 

அன்றுவரை பொறுத்திருந்தால் அந்தமனம் கேளாதா 

கால்களே நில்லுங்கள் கண்களே சொல்லுங்கள் 

ஒருவருமே பார்க்காமல் ஒன்றுதந்தால் ஆகாதா 

ஒருவருமே பார்க்காமல் ஒன்றுதந்தால் ஆகாதா 

தனிமையிலே தவறு செய்தால் தன்மனமே பார்க்காதா 

தனிமையிலே தவறு செய்தால் தன்மனமே பார்க்காதா 

கால்களே நில்லுங்கள் கண்களே சொல்லுங்கள் 

ஒரு சிறு புதிர்!

இதே டியூனில் பின்னாளில் இன்னொரு பாடல் வந்தது.   என்ன பாடல் என்று தெரியுமா?