யாசக சாலை

 தர்மம் செய்கிறீர்களா?

நீங்கள் செய்யும் செயல்களில் எல்லாம் தர்மம் இருக்கிறதா என்று கேட்கவில்லை!! யாசகம் கேட்போருக்கு காசு போடுகிறீர்களா என்றே கேட்க விரும்புகிறேன்.  

ஆமாம் என்றால் எவ்வளவு தர்மம் செய்கிறீர்கள்?  தானத்துக்கு தர்மத்துக்கும் வித்தியாசம் உண்டு என்று எங்கோ படித்தேன்..  நம்ம புதனில் கூட கேள்வி வந்ததோ..

அந்தக் காலத்தில் பத்து, ஐந்து, இரண்டு, ஒரு பைசாக்கள் தர்மம் செய்யவே புழக்கத்தில் இருந்தன!  இப்போது 50 பைசா, 25 பைசா கூட புழக்கத்தில் இல்லையென்று நினைக்கிறேன்.  மினிமம் ஒரு ரூபாய்தான்!  உண்மையிலேயே முடியாத, இல்லாத ஏழை யாசகர்களுக்கு அம்மா உணவகம் ஒரு வரப்பிரசாதம்.

தியேட்டர்களிலும், மால்களிலும் ஏராளமாக பணம் செலவழியும் நிலையில் மக்கள் யாசகர்களிடமும் சற்று தாராளமாகவே இருப்பார்கள் என்று நம்புகிறேன்.

ஆனால் யாசகர்கள் முன்னர் அளவுக்கு இல்லாமல் அளவில் குறைந்திருக்கிறார்களோ என்கிற சந்தேகமும் இருக்கிறது.

கேட்காமல் செய்வது தானம்.  கேட்டபின் செய்வது தர்மம்.  

நான் பள்ளியில் படிக்கும்போது அப்பாவிடமிருந்து பஸ் காசு வாங்குவதே பெரிய விஷயம்.  அப்போ பதினெட்டு பைசா பஸ் காசு என்று ஞாபகம்.  ஸ்கூல் சென்று வர ஒன்பது பைசா ப்ளஸ் ஒன்பது பைசா பதினெட்டு பைசாவா,   பதினெட்டு ப்ளஸ் பதினெட்டு முப்பத்தாறு பைசாவா என்று நினைவில்லை.  தினசரி காலை அதை அப்பாவிடமிருந்து வாங்குவதற்குள்...

என் பல தோழர்கள் பஸ்ஸுக்கு காசு இல்லாமல் நடந்தே சென்று வருவது வழக்கம்.  

என் அக்கா பலமுறை அந்தக் காசு இல்லாமல் பள்ளியிலிருந்து நடந்தே வீடு வந்திருக்கிறாள்.  ஒருமுறை நான் என் காசை தொலைத்துவிட, அவள் காசை என்னிடம் கொடுத்து பஸ் ஏற்றிவிட்டு, அவள் நடந்து வந்திருக்கிறாள். அப்பாவிடம் விஷயத்தையும் சொல்ல மாட்டோம்..  யார் அடி வாங்குவது!!

ஆனால் ஒன்று.   இப்போது போல வெள்ளை பஸ், பச்சை பஸ் என்று வெவ்வேறு கட்டணம் கிடையாது.  வெண்சங்கு என்கிற தனியார் பஸ்ஸும் வரும்.  அதிலும் அதே கட்டணம்தான்.

இந்த லட்சணத்தில் இருக்கும் எங்கள் நிலையில், பஸ் ஸ்டாப்பில் நிற்கும் எங்களிடம் ஒரு குண்டான - மிகவும் குண்டான - இளைஞனுக்கும் இளையவன், பையன்களில் பெரியவன் - ஒருவன் வந்து யாசகம் கேட்பான்.  "பத்து பைசா கொடுங்க பிரதர்..   இரண்டு இட்லி சாப்பிட்டுப்பேன்..  பசிக்குது..."

'அவனே இட்லி போல இருக்கிறான்' என்று எங்களுக்குள் சிரித்துக் கொள்வோம்.  'அவனுக்கு இரண்டு இட்லி எப்படிடா போதும்' என்றும் சிரிப்போம்.  இந்தப் பேச்சே சில சமயங்களில் அவன் மீது ஒரு இரக்கத்தையும் எங்களுக்குள் தோற்றுவிக்கும்.

நாமெல்லாம் டிஃபன் பாக்சில் எடுத்துக் கொண்டு வந்து சாப்பிடுகிறோம்..  அவனுக்கு யாரும் இல்லை போல என்று எங்களுக்குள் பேசிக்கொண்டு நாங்கள் மூன்று பேர் எங்கள் பஸ் காசிலிருந்து ஆளுக்கு ஐந்து பைசா தியாகம் செய்தோம்.  என்ன, மங்களபுரத்தில் இறங்கி  நடக்கவேண்டும்..  நடந்துடுவோம் என்று பேசிக்கொண்டு!

ஒருமுறை அப்பா, அம்மாவுடன் ஒரு சிவாஜி படம் யாகப்பா தியேட்டரில் பார்க்கச் சென்றபோது எங்களுக்கு அடுத்த மேல்வகுப்பில் அவனைப் பார்த்தேன்.  இடைவேளையில் ஏதேதோ வாங்கி கொண்டு தாண்டிச் செல்லும் அவனை ஏக்கத்துடன் பார்க்கத்தான் முடிந்தது!  அப்பாவிடம் சொன்னேன், 'அப்பா..  இவன் எங்கள் கிட்ட வந்து டெய்லி பத்து பைசா பிச்சை கேட்பான்' என்று.  நான் அவனுக்கு காசு கொடுத்ததோ, என் ஏமாற்றமோ அப்பாவுக்குத் தெரியாதே..   சும்மா தலையை ஆட்டிக்கொண்டார்.  அங்கிருக்கும் கடைப்பக்கம் திரும்பியே பார்க்காமல் மூச்சா போயிட்டு உள்ளே அழைத்து வந்தார்!  ரொம்ப ஸ்ட்ரிக்ட்!

அப்புறம் பஸ் ஸ்டாப்பில் என்னைப்  பார்த்தால் அவன் யாசகம் கேட்க அருகில் வரமாட்டான்.  நாங்கள் நண்பர்கள் அவனை சற்றே விரோதத்துடன் பார்த்தபடி நின்றிருப்போம்.  இப்போது நினைத்தால் சிரிப்பு வருகிறது.

டெலிபோன் டைரக்டரியிலிருந்து ஏமாற்ற என்றே என்னைத் தேடி அழைத்து ஏமாற்றிய ஒரு அன்பரும் உண்டு.  திருப்பதிக்கு வேண்டுதல், தாலிக்கு தங்கம் (நோ அரசியல்ங்க......) என்று பேசி காசு வாங்கிச் சென்றார்.  எரிவாயு சிலிண்டர் விஷயத்தில் ஒரு முறை ஏமாந்திருக்கிறேன், ஒருமுறை மயிரிழையில் தப்பி இருக்கிறேன்.

அது சரி..  பாவப்பட்டவர்கள் என்று நினைக்கும் நபர்களுக்கு யாசகம் போட என்றே முன்னர் இரண்டு பைசா, ஒரு பைசா, அஞ்சு பைசா, பத்து பைசா எல்லாம் இருந்தன.  25 பைசா கொஞ்சம் காஸ்ட்லி!

இப்போது எல்லாம் யாசகம் என்று ஒரு ரூபாய் போட்டால் அவர் நம்மை ஒருமுறை நிமிர்ந்து பார்ப்பார்...  எங்கே திருப்பி எடுத்து கொடுத்து விடுவாரோ என்று கூட தோன்றும்.  திருப்பிக் கொடுக்கும்போது அது அஞ்சு ரூபாய் நாணயமாகக் கூட இருக்கலாமோ என்றும் தோன்றுமளவு..

ஆமாங்க..    பெட்ரோல் என்ன விலை விற்குது?!

முன்பு இருந்த வீட்டுக்கருகில் ஒரு மனநிலை பாதித்த பெண் இருந்தார்.  நல்ல குண்டாக ஆஜானுபாகுவாக இருப்பார்.  எப்போதுமே குளிக்கப் போவது போல ஒரு புடைவையை கழுத்து வரை சுற்றி இருப்பார்.   கையில் ஒரு கம்பு இருக்கும்.   தெருவோர குழாயில் குளியல்.  நடந்து கொண்டே இருப்பார்.  எங்கேயாவது பிளாட்பார்மில், மர நிழலில் படுக்கை.

இவரை ஏன் நினைவு வைத்திருக்கிறேன் என்றால் ஒருமுறை பள்ளி விட்டு சென்று கொண்டிருந்த மூன்று நான்கு பெண்களை ஒரு விடலைக் கும்பல் சமாளிக்க முடியாத அளவு வம்பிழுத்துக் கொண்டு சென்றது.  நான் வீட்டின் மொட்டை மாடியில் புத்தகம் படித்துக் கொண்டிருந்தேன்.  தெருவில் தாண்டிச் செல்லும் யாரும் ஒன்றும் சொல்லவில்லை.  சிறுமிகள் பயந்து நடந்து கொண்டிருக்க, கையில் குச்சியுடன் எதிரே நடந்து வந்து கொண்டிருந்தார் இவர்.  சம்பவத்தை கவனித்தார்.  நின்றார்.  பார்த்தார்.  நிதானமாக தெருவைக் கடந்து அருகே வந்தார்.  தாண்டிச் சென்ற ஓரிரு கார், பைக்குகள் பிரேக் அடித்து நிற்க நேர்ந்தன.  அவற்றை லட்சியம் செய்யாமல், பார்க்காமல்தான் தாண்டி வந்தார்.

சிறுமிகளுக்கு முன்னே குச்சியுடன்  நின்றார்.  அவர்களுக்கு முன்னே பைலட் போல நடந்தார்.  அவர் பார்வை முழுக்க அந்த விடலைகளிடம் உக்கிரமாக இருந்தது.  அவர்கள் நழுவி ஓடிவிட்டார்கள்.  பார்த்துக் கொண்டிருக்கையில் நீண்ட நேரம் கழித்துதான் திரும்ப தன்வழி நடந்தார் அவர்.  அடுத்த இரண்டு மூன்று நாட்களுக்கு அந்தச் சாலையில் அந்த நேரத்துக்கு குச்சியுடன் 'வைதேகி காத்திருந்தாள்' விஜயகாந்த் மாதிரி நின்றிருந்தார்.  எனக்குத் தெரிந்து அவர் ஒரு வார்த்தை கூட அந்தச் சிறுமிகளிடமும் பேசவில்லை.

சில வருடங்கள் ஆகிவிட்டன.

இவரை  இப்போதும் ஓரிரு போக்குவரத்து நிறுத்தங்களில் பார்க்கிறேன்.  சடை விழுந்த முடியுடன், கையில் குச்சியுடன் சில நேரங்களில் மட்டும் யாரிடமாவது கையேந்துவார்.  அந்த நெரிசலில் இறங்கி தர்மம் செய்ய முடியாது.  அவர் அருகில் கிடைக்கும் ஒருநாளில் அவர் கையில் தர முதலில் பத்து ரூபாய்த்தாள் கையில் வைத்திருந்தேன்.  இப்போது இருபது ரூபாய்த்தாள் கையில் வைத்திருக்கிறேன்.  ஒரு நாள் தருவேன்!

அவர்கள் மனம் நிறையும் வகையிலோ, வாழ்க்கை நிறையும் வகையிலோ தர்மம் செய்ய முடியாது.  நம்மால் முடிந்த அளவு.  இப்போதெல்லாம் ஒரு ரூபாய்க்கு என்னென்ன அவர்களால் வாங்க முடியும்?  ஆனால், நாம் அவர்களால் என்னென்ன வாங்க முடியுமோ அந்த அல்லவா தர்மம் செய்ய முடியும்?  நம்மால் இயன்ற அளவு..  

===========================================================================================================

சென்ற வாரம் வாட்ஸாப்பில் வந்த ஒரு பகிர்வு...

இன்று முதல் பணப் பிச்சை நிறுத்தம்...

  பிச்சைக்காரர்களுக்கு (உணவு + தண்ணீர்) கொடுங்கள்...

ஆனால் ஒரு ரூபாய் கூட பணமாக கொடுக்ககூடாது ...

மும்பை-புனே ஹைதராபாத்தில் அனைத்து விதமான பிச்சைக்காரர்களை கட்டுபடுத்த வித்தியாசமான இயக்கம் தொடங்கியுள்ளது.... 

 

எந்த வகையினரும் (பெண், ஆண் ,மற்றும் முதியவர் மாற்றுத்திறனாளி  குழந்தைகள்) பிச்சை எடுத்தால் பணத்திற்கு பதிலாக (உணவு + தண்ணீர்) கொடுப்போம்...,  அப்படி செய்தால்  இன்று முதல் அவர்கள் பணத்தை பிச்சை எடுக்க மாட்டார்கள்.... 

இதன் விளைவாக, சர்வதேச தேசிய மாநில அளவில், பிச்சைக்காரர்கள்

 கும்பல் உடைந்து, குழந்தை கடத்தல் தானே நின்றுவிடும்....  இத்தகைய கும்பல்களின் குற்றம் உலகில் முடிவடையும்...

 பதிவை பகிரவும்...

 மேலும் ஒரு பிச்சைக்காரனுக்கு ஒரு ரூபாய் கூட கொடுக்காதீர்கள்...

 உங்களுக்கு விருப்பமானால் உங்கள் வாகனத்தில் 2 பிஸ்கட் பாக்கெட்டுகள்

வைத்துக் கொள்ளுங்கள் ..  உணவு மற்றும் தண்ணீர் வைத்துக் கொள்ளுங்கள்...

அதை கொடுங்கள்.. ஆனால் பணம்  கொடுக்காதீர்கள்...

 

இந்த பிரச்சாரத்தை நீங்கள் ஏற்றுக்கொண்டால், இந்த யோசனையை அடுத்த மூன்று குழுக்களுக்கு அனுப்பவும்....

Make this chain keep sharing in your contacts..

==========================================================================================================

நேற்றிரவு கீதா தொலைபேசி இந்த விவரத்தை இன்றைய பதிவில் சேர்க்கச் சொன்னார்.  நானெங்கே...  உங்களுக்குத் தெரிந்த விஷயத்தை சுருக்கமாக எழுதி அனுப்புங்களேன் என்று சொன்னேன்.  அவரும் அனுப்பி இருக்கிறார்.  இது ஒரு முக்கியமான செய்தி என்கிறார் கீதா.  நன்றி கீதா.

மிகப்பெரிய சூரிய புவிகாந்தப் புயல்,  ஏப்.14, 2022 அதாவது இன்று, புவியைத் தாக்கும் என்றும், தாக்கிய பின் வேகமாகத் தீவிரமடையும் என்றும் நாசா கணித்திருக்கிறது. நாசா மட்டுமின்றி உலகெங்கும் உள்ள விண்வெளி நிறுவனங்கள் இந்தப் பெரிய, சூரிய புவிகாந்தப் புயல் பூமியைத் தாக்க உள்ளதாகச் சொல்லியிருக்கின்றன.

இது கொஞ்சம் அபாயகரமாக இருக்கலாம் என்றும் கணிப்பின் படி தெரிகிறது.  

இந்திய விண்வெளி அறிவியல் மையம் (CESSI) டுவிட்டரில் வெளியிட்ட பதிவில், “ஏப்ரல் 14, 2022 அன்று 429-575 கிமீ/வி வேகத்தில் பூமியின் தாக்கத்தின் மிக அதிக நிகழ்தகவைக் குறிக்கிறது. குறைந்த முதல் மிதமான புவி காந்த இடையூறுகள் எதிர்பார்க்கப்படுகின்றன.

சூரிய புவி காந்தப் புயல் என்பதாவது, சூரியன் கணிசமான அளவு கரோனல் மாஸ் எஜெக்ஷனை அதிக செறிவு ஆற்றலுடன் பூமியை நோக்கிச் செலுத்த உள்ளது, மற்றும் உள் சூரிய மண்டலத்தில் உள்ள மற்ற சில கிரகங்களை நோக்கியும் வியாழன் அன்று (இன்று) செலுத்த உள்ளதாகச் சொல்லப்பட்டுள்ளது.

NASA மற்றும் NOAA ஆகியவை சூரியனால் ஏற்படும் CME உமிழ்வைக் கண்காணித்து வருகின்றன. மேலும் ஏப்ரல் 14 அன்று புயல் நமது கிரகத்தைத் தாக்கும் என்று கணித்துள்ளது.

இந்தப் புயல் பூமியைத் தாக்கிய பிறகு, அது மிக வேகமாக தீவிரமடையும் என்று நாசா கணித்துள்ளது.

 சூரிய புவி காந்தப் புயல் பூமியின் மின்சார கிரிட் மற்றும் பிற வளங்களை சேதப்படுத்தும் ஆற்றலைக் கொண்டுள்ளதாம். மற்றும் பூமியில் அதிக உயரத்தில் உள்ள பகுதிகளில் மின் தடை மற்றும் ரேடியோ சிக்னல்களில் இடையூறு ஏற்பட வாய்ப்புள்ளதாக அமெரிக்க தேசிய கடல் மற்றும் வளிமண்டல நிர்வாகம் (NOAA) தெரிவித்துள்ளது. மத்திய உயரமான பகுதிகள் அதிக சேதத்தை சந்திக்காமல் இருக்கலாம், ஆனால் சில மின் தடைகள் இருக்கலாம்.

லிங்க் 1

லிங்க் 2

=====================================================================================================

எங்கே போனார்கள் எல்லோரும்?

முடியவில்லை என்றாலும் 

முயன்றுகொண்டுதான் இருக்கிறேன் 

எப்படி மாட்டிக்கொண்டேன் என்று தெரியவில்லை 

ஆயிரம் கிளைகளுடன் படர்ந்து 

தரையில் நீண்டிருக்கும் 

இலையிலா மரத்தின் 

வளைந்த கிளைகளுக்கு நடுவில் 

முகம் இடுப்பு முதுகு கால் 

கை யென்று மாட்டிக்கொண்டிருக்க 

எப்படி வெளிவருவது என்று தெரியாமல் 

நெளிந்து நெளிந்து 

முடியவில்லை என்றாலும் 

முயன்றுகொண்டுதான் இருக்கிறேன் 

நசுங்கி விழுந்த கணம் 

மீண்டும் நகர்கையில் வாழ்க்கையின் 

வாய்ப்பொன்றை இழந்ததது 

தெரிந்தாலும் 

முயன்று கொண்டுதான் இருக்கிறேன் 

=========================================================================================================

2020 ல் கொரோனா இந்தியா முழுவதும் பயமுறுத்திய காலத்தில் செய்தித்தாள், பேஸ்புக் என்று எங்கெங்கும் கொரோனா நியூஸ்...  அப்போது முக்கியமாக என் மனதை திருப்ப இது மாதிரி சில பதிவுகள் பேஸ்புக்கில் இட்டேன்.

எம் ஜி ஆருக்கு இருக்கும் சிறப்புகளில் இதுவும் ஒன்று என்று வைத்துக் கொள்ளுங்களேன்...!

================================================================================================================

ரசித்த படங்கள் வரிசையில்...

இன்று பெட்ரோல்  விற்கும் விலையில் இது பொருத்தமே....

========================================================================================================

பொக்கிஷம்...

சுவாரஸ்யமான விஷயங்கள்தான்.  டைப் அடித்துப் போட்டால் கூட நன்றாயிருக்கும்.  பொறுமை இல்லாததாலும், எப்போதோ வெளிவந்த விநோதங்கள் என்பதை நிரூபிக்கவும் படமாக வெளியிடுகிறேன்.  படிக்க முடிகிறதா என்று சொல்லுங்கள்.  கீழே உள்ளவை யாவுமே இன்றைக்கு 52 வருடங்களுக்கு முன்னால் தீபம் இதழில் வெளிவந்தவை.

ரகசியத்தைக் கேட்பவர்களுக்கு நல்ல பதில்...

அனுபவித்தவனுக்குத் தெரியும் அதன் கஷ்டம்!

இடது மேல், கீழ் மூலைகளைப் பார்த்தீர்களா?  என்ன தெரிகிறது?

பூச்சிகளுக்குத் தெரிவதில்லை புத்தகத்தின் அருமை!

அடுத்து வரும் மூன்று செய்திப் படங்களும் முக்கியமான விஷயங்கள்.  இது போன்ற விஷயங்களை வெளியிட்டிருப்பபது கல்கண்டு!

======================================================================================================

என்னடா...   இன்று தமிழ்ப்புத்தாண்டு...    அது சம்பந்தமாய் பதிவில் ஒன்றுமில்லை சரி, ஒரு வாழ்த்து கூடவா இல்லை என்றுதானே யோசிக்கிறீர்கள்?

அதற்குதான் நான் வந்திருக்கிறேன்...   தமிழ்ப் புத்தாண்டு வாழ்த்துகள் மக்கா...