நாங்கள் தரிசனம் செய்த கோயில்கள் - 23 :: நெல்லைத்தமிழன்.

  

1.6.25 அன்று வெளியான பகுதி 22 ன் தொடர்ச்சி. 

தஞ்சை பெருவுடையார் கோயில்

சங்காலச் சோழர்களுக்குப் பிறகு தொண்டைநாடு பல்லவர் வசமும், சோழநாடு மற்றும் பாண்டிய நாட்டை களப்பிரர் என்ற வடக்குப் பகுதியிலிருந்த வந்தவர்களும் கைப்பற்றிக்கொண்டு அரசாண்டனர். கிபி 300லிருந்து இதுதான் நிலைமை. சுமார் 300 ஆண்டுகளுக்குப் பிறகு பாண்டியர் சுயாட்சி பெற்றனர். கிபி 600ல் பல்லவர்கள் தொண்டைநாட்டுடன் சோழநாட்டையும் கைப்பற்றி அரசாண்டனர்.  கிட்டத்தட்ட 600 ஆண்டுகள், சோழர்கள் பல்லவர்களுக்கு அடங்கிய சிற்றரசராக உறையூர், கும்பகோணம் திருவாரூர் பகுதியை ஆண்டுவந்தனர். இதனை இடைக்காலச் சோழ அரசு என்று கூறுவர். இவர்களைப் பற்றி நிறைய தகவல்கள் இல்லை என்றாலும், பெரியபுராணம், திருமுறைகள், திவ்யப்பிரபந்தம் மற்றும் சில இலக்கியங்கள் வாயிலாக நமக்குச் சில செய்திகள் கிடைக்கின்றன. இந்த இடைக்காலச் சோழர்களில் பெயர் தெரிந்தவன் கோச் செங்கணான் என்பவன். 

திருமங்கையாழ்வார், திருநறையூர் மணிமாடக் கோயிலைப்பற்றிய பதிகம் ஒன்றில், இந்தச் சோழனைப் பற்றிக் குறிப்பிடுகிறார்.

அம்பரமும் பெருநிலனும் திசைகள் எட்டும்*

அலைகடலும் குலவரையும் உண்டகண்டன்*

கொம்பமரும் வடமரத்தின் இலை மேல்*

பள்ளிகூடினான் திருவடியே கூடிகிற்பீர்*

வம்பவிழும் செண்பகத்தின் வாசம் உண்டு*

மணிவண்டு வகுளத்தின் மலர்மேல் வைகு*

செம்பியன் கோச் செங்கணான் சேர்ந்தகோயில்*

திருநறையூர் மணிமாடம் சேர்மின்களே

செம்பியன், கோச்செங்கட் சோழன் திருப்பணி செய்த கோயில் திருநறையூரில் உள்ள மணிமாடக்கோயில் என்று சொல்கிறார்.

இந்த கோச்செங்கணான், சிறந்த வீரன். சேர பாண்டியர்களை மட்டுமல்லது பல்லவரையும் பல போர்களில் வென்று சோழநாட்டை அரசாண்டவன். இவன் கையில் இருந்த வாள் ‘தெய்வவாள்’  (தெய்வவாள் வலங்கொண்ட சோழன் சேர்ந்த*) என்று திருமங்கையாழ்வார் குறிப்பிடுகிறார். சிவபக்தி கொண்டவன்.  நடராஜர் அருளால் பிறந்தவன் என்பதால் சிதம்பரம் கோயிலுக்கு பல திருப்பணிகள் செய்தவன். வைணவ சமயத்தையும் மதித்து நடந்துவந்தான்.  இராஜேந்திர சோழன், இந்த கோச்செங்கணானை, தன் குலத்தில் உதித்த பெரியோன் என்று பாராட்டியிருக்கிறான்.

கிபி 900ல் பல்லவரை வென்று சோழர் ஆட்சியை நிலைநிறுத்தியவன் ஆதித்த சோழன். அவனும் அவனுடைய மரபினரும் பிற்காலச் சோழர்கள் எனப்பட்டனர். பிற்காலச் சோழர்களில் மிகப் புகழ் பெற்றவன் இராஜராஜ சோழன். அவனுக்கு இளைத்தவனில்லை என்று சொல்லும்படியாக அவனுடைய மகன் இராஜேந்திர சோழனும் வரலாற்றில் மிகப் பெரும் புகழ் பெற்றான்

தஞ்சை பெருவுடையார் கோயிலைப் பற்றிப் பார்க்கப்போகும் இந்தச் சமயத்தில் இராஜராஜ சோழன் பற்றிப் பார்த்துவிடலாம்.

இராஜராஜ சோழன் காலச் சூழ்நிலையால் அரசாட்சிக்கு உரியவனானான். இவனுடைய தந்தை சுந்தரச் சோழர், பட்ட த்து இளவரசனான ஆதித்த கரிகாலன் உள்நாட்டில் கொலைசெய்யப்பட்டுவிட்ட தால் மிகவும் மனம் தளர்ந்து ஒரு வருட காலத்துக்குள் மறைந்துவிட்டான். சுந்தரச் சோழனுடன் அவனுடைய பட்ட த்து அரசி உடன்கட்டை ஏறியதை முன்பு பார்த்தோம். அவர் உடன்கட்டை ஏறியபோது குந்தவை கொஞ்சம் பெரியவள், அருண்மொழி வர்மன் சிறுவன் (பால்குடி மாறா என்று கல்வெட்டுகள் செப்புகின்றன.  எப்படித்தான் மனசு வந்ததோ.. இந்தக் காலத்தில், பெண்களுக்கு குழந்தைகள் பிறந்துவிட்டாள், அவர்கள்தாம் அவர்களுடைய உலகமாகிவிடுகிறது, கணவனை அம்போவென விட்டுவிடுகிறார்கள் என்றே பலரும் சொல்கிறார்கள். ஒரு பிரச்சனை என்று வந்துவிட்டால், தன் குழந்தைகள் பக்கம்தான் ஒவ்வொரு தாயாரும் நிற்கிறாளாம், அதிலும் பிரச்சனை தந்தைக்கும் தனயன்களுக்கும் வந்தாலும். சரி இந்தக் காலப் பிரச்சனையை மறந்துவிட்டு வரலாற்றுக்குச் செல்வோம்).

ராஜராஜனுடைய பாட்டனார் கண்டராதித்த சோழர் பெரும் சிவபக்தர். அவருடைய மனைவி செம்பியன்மாதேவி அவரைப்போலவே மிகுந்த சிவபக்தி உடையவர். தன் சொத்தை முழுமையாக தருமத்திற்காக, கோயில்களுக்காக, சைவ சமயத்துக்காகச் செலவழித்தவர். ராஜராஜன் செம்பியன் மாதேவியால் வளர்க்கப்பட்டவன். பலர் நினைப்பதுபோல சகோதரி குந்தவையினால் வளர்க்கப்பட்டவன் அல்லன். ஆனாலும் சகோதரி என்பதால் அவளிடம் மிக அதிக அன்பு வைத்திருந்திருப்பான்.  செம்பியன் மாதேவியால் வளர்க்கப்பட்டவன் என்பதால்தான். தன் வயதையும் கருத்தில் கொண்டு, தன்னுடைய சிற்றப்பா மதுராந்தக சோழன் அரியணை மேல் கொண்ட ஆசையினால் தன் தந்தைக்குப் பிறகு அவர் அரசராகவும், தான் பட்டத்து இளவரசனாக இருக்கவுமான திட்டத்திற்கு அவனுடைய ஆமோதிப்பும் இருந்தது.  (இதெல்லாமே ஊகம்தான். காரணம், மதுராந்தக சோழனுக்கு ஒரு மகன் இருந்தான். அவன் தன் தந்தையின் அரசாட்சியில்-ராஜராஜ சோழன் ஆட்சியிலும் அவன் இருந்தான், அறநிலையத்துறையை மேற்பார்வை பார்த்துக்கொண்டிருந்தான். பிறகு ஒரு சமயத்தில் அவன் மீது குற்றச்சாட்டு எழும்பி, அவன் சிறைப்பட்டு பிறகு சிறையில் இறந்தான் என்று படித்தேன். இதற்கான வரலாற்று ஆதாரம் என்ன என்ன இருக்கிறது என்று தெரியவில்லை)

உத்தமச் சோழன் ஆட்சியில் (மதுராந்தக சோழன்) அவன் இறக்கும் பதினைந்து ஆண்டுகள் வரை நாடு அமைதியாகவே இருந்தது.  ராஜராஜன் பட்டத்துக்கு வந்த ஓரிரு ஆண்டுகளில், தன் அண்ணன் ஆதித்த கரிகாலன் கொலைக்குக் காரணமானவர்களுக்கு தண்டனை அளித்தான், அவர்களது சொத்துக்களையும் பறித்துவிட்டான்.   இந்தப் பகுதிதான் பல வரலாற்று நாவல்களுக்குக் காரணமாக அமைந்தது. 

தன்னுடைய குலத்துக்கேற்றபடியும் செம்பியன் மாதேவியால் வளர்க்கப்பட்டதாலும் மிகுந்த சிவபக்தனாகத் திகழ்ந்தான் இராஜராஜன். தன் ஆட்சியை தென் இந்தியா முழுவதும் பரவச் செய்யவேண்டுமானால் சிறந்த படை வேண்டும் என்பதை உணர்ந்து பெரும் படையைத் திரட்டி அதற்குப் போர் பயிற்சியும் கொடுத்தான். கடற்படை ஒன்றையும் உருவாக்கினான். இவற்றைக்கொண்டு, பாண்டியர், சேர அரசுகளை வென்றான். திருவந்தபுரம் அருகே காந்தளூர்ச் சாலை என்று சொல்லப்படும் இடம் முழுவதையும் அழித்தொழித்து ‘காந்தளூர்ச்சாலை கலம் அறுத்து’ என்ற விருது பெற்றான். கொங்கு நாடு, கன்னட நாடு முழுவதும் இவன் கீழ் வந்த து. கிருஷ்ணா  நதிக்கும் கோதாவரி ஆற்றுக்கும் நடுவே இருந்த வேங்கி நாட்டை வென்று, அந்த நாட்டு இளவரசனுக்கு தன் மகள் குந்தவையை (தன் அக்கா மீது கொண்ட அன்பினால் தன் மகளுக்கு குந்தவை என்ற பெயர் வைத்தான்) மணம் செய்து கொடுத்து உறவாக்கிக்கொண்டான். அதனால் இவனுடைய செல்வாக்கு கோதாவரி ஆறு வரை பரவியிருந்த து. தன்னுடைய வலிமை மிக்க கடற்படையினால் இலங்கைத் தீவுக்குப் படையெடுத்து அதனை வென்றான். அங்கு தன் பெயரால் ஒரு கோயில் கட்டினான். இன்னும் தென் மேற்குப் பகுதியில் இருந்த மாலத்தீவுகளையும் வென்றான். கடல் கடந்து வெற்றிக்கொடி நாட்டிய முதல் சோழ அரசன் என்று இவனைச் சொல்ல லாம். இதுவே அவனுடைய மகன் இராஜேந்திர சோழனுக்கு இன்னும் பல நாடுகளை கடல் கடந்து வெல்லும் உத்வேகத்தைக் கொடுத்தது

அரசர்களின் ஆட்சியாண்டு, வயது எல்லாமே பல நேரங்களில் குழப்பமாக இருக்கும். கல்வெட்டு, ‘பால் மணம் மாறாத பாலகனை’ விட்டுவிட்டு சுந்தரச் சோழனின் மனைவி வானவன் மாதேவி உடன்கட்டை ஏறினாள் என்று சொல்கிறது. ராஜராஜன் தன் நாற்பத்தைந்தாவது வயதில் பட்டமேற்றுக்கொண்டான் என்று வரலாறு சொல்கிறது.  மதுராந்தகச் சோழன் சுமார் பதினைந்து ஆண்டுகள் அரசாண்டான். அப்படியென்றால், மதுராந்தகச் சோழன் பட்டம் பெற்றபோது, அருண்மொழிக்கு முப்பது வயதாகியிருக்கவேண்டும். அருண்மொழிக்கு ஏற்கனவே திருமணமாகி குழந்தை இருந்திருக்கவேண்டும்.  இராஜராஜன் முப்பது வருடங்கள் அரசாண்டான். இராஜேந்திரன் தன் நாற்பத்தைந்தாம் ஆண்டில் பட்டமேற்றுக்கொண்டான். (கிபி 1012). இராஜராஜன் 988ல் பதவியேற்றிருக்கவேண்டும். 973ல் மதுராந்தகன்  பதவியேற்றிருக்கவேண்டும் (கிபி 971 என்று சொல்கின்றனர்).   இராஜராஜன் மறையும்போது 67 வயது. அதனால் 37வது வயதில் பட்டமேற்றுக்கொண்டிருக்கவேண்டும். மதுராந்தகர் பட்டமேற்றபோது அவன் வயது 22 ஆக இருந்திருக்கவேண்டும். ஆனால் ஒன்று மற்றும் தெளிவாக இருக்கிறது. 64-65ம் வயதிலேயே தன் மகனுக்கு ஆட்சிப் பொறுப்பை அளித்துவிட்டு, அரசியலிலிருந்து விடைபெற்றுக்கொண்டான்.

தஞ்சை பெரியகோயிலின் படங்கள் நான்கு வாரங்களாவது வரும் என்று நினைக்கிறேன். மிகுதியை அடுத்தடுத்த வாரங்களில் பார்ப்போம்.

இந்தப் படத்தில் முதலில் உள்ளது மராத்தா நுழைவாயில். இதுதான் முழுக் கோயிலுக்கும் முன்பக்கத்தில் அரணாக அமைந்துள்ளது. (இரண்டு பக்கங்களிலும் சிறிய சன்னிதி போன்ற மாடம் தெரியும்). அதனைத் தொடர்ந்து நமக்குத் தெரியும் கோபுரம் கேரளாந்தகன் திருவாசல்.

கேரளத்திற்கு அந்தகன் போன்று இருந்து போர் புரிந்து வென்ற இராஜராஜனது பட்டப் பெயர் கேரளாந்தகன்.

கேரளாந்தகன் வாசலில் மேல் உள்ள சிற்பங்கள்

மராத்தா நுழைவாயில் மற்றும் கேரளாந்தகன் நுழைவாயில் – இன்னொரு முறை சென்றிருந்தபோது எடுத்தது. 

கோட்டை மற்றும் அகழிகள் அப்போது இருந்தன.

இப்போது அகழி தூர்ந்து போயிருக்கிறது.

கேரளாந்தகன் நுழைவாயிலுள் நுழைந்து உட்புறமாக எடுத்த படம் இது. இதன் உட்பகுதியில் (ஆனால் வெளி வாயில்) தெரிவது மராத்தா நுழைவாயில். இரண்டுக்கும் இடையே இடைவெளி உள்ளது.

சேரர்களை எதிர்த்து வெற்றி பெற்றதைக் கொண்டாடும் வகையில் இராஜராஜ சோழனால் கட்டப்பட்ட இந்த நுழைவாயிலின் அளவு சுமார் 30 மீட்டர் X 18 மீட்டர். கோபுரத்தின் முன் பக்கம் வரிசையாக சங்கை ஊதிக்கொண்டிருக்கும் பூதகணங்கள் அமைக்கப்பட்டுள்ளன. இந்த நுழைவாயிலில் நிறைய சுதைச் சிற்பங்களும் காணப்படுகின்றன. இந்த கோபுரத்தின் முதல் தளத்தில் தெற்குப் பக்கம் தக்ஷிணாமூர்த்திக்கும் வடக்குப் பக்கம் பிரமனுக்கும் தனித்தனி சன்னிதிகள் அமைக்கப்பட்டுள்ளதாம்.

இராஜராஜன் திருவாசல். இது கேரளாந்தகன் நுழைவாயிலைக் கடந்தால் எதிர்ப்படுவது.

இராஜராஜன் திருவாயிலைக் கடந்தால் நாம் முதலில் பார்ப்பது நந்தி மண்டபம்.  இந்த பெரிய நந்தி மராத்தியர்கள் காலத்தில் அமைக்கப்பட்டது. முதலில் இருந்த நந்தி கோவிலை நாம் பார்த்தால் நம் வலப்புறச் சுற்று மண்டபத்தில் இப்போது இருக்கிறது. 

ராஜராஜன் திருவாயிலைக் கடந்துவந்தபிறகு உட்புறமாக எடுத்த படம். இருக்கும் இட த்தில் கோயில் பிரசாத விற்பனை ஸ்டால். நான் இந்த மாதிரி ஸ்டால்கள் பக்கமே செல்வதில்லை. அதற்கு வெளியில் ரோட்டில் இருக்கும் எந்தக் கடையிலும் வாங்கிவிடலாம் என்பது என் எண்ணம். 

முன்பெல்லாம் கோயிலில் இறைவனுக்கு கண்டருளப்பட்டவற்றை பிரசாதம் என்று அந்த அந்த நேரங்களில் தருவார்கள். இவைகள் முக்கியமானவர்களுக்கு மாத்திரம் கிடைக்கும்படியாக ஆயிற்று. பிறகு இதற்கு டிமாண்ட் அதிகமாகவும், கோயிலின் உள்ளேயே விற்பனை செய்ய ஆரம்பித்தார்கள். ஆனால் இறைவனுக்கு ஒரு அளவுக்குத்தான் பிரசாதம் செய்வார்கள். அதிகமான டிமாண்ட் இருக்கவும், கோயிலின் உள்ளேயே இன்னும் அதிகமாகச் செய்து அதனை விற்பனை செய்து அது கோயிலின் இன்னொரு வருவாயாக ஆயிற்று. அப்புறம் இதனை ஏலம் எடுத்துச் செய்ய ஆரம்பித்தார்கள். இந்த பிரசாதங்கள் என்று சொல்லப்படுபவை இறைவனுக்குப் படைத்ததல்ல. இதிலும் சோம்பேறித்தனம் வந்து, முழுவதுமாய் வெளி ஆட்களுக்கு இதனை காண்டிராக்ட் விட்டுவிடுகிறார்கள், எந்த அளவுக்கு என்றால், லாபம் மாத்திரமே குறிக்கோள்.  ஸ்ரீரங்கம் கோயிலுக்கு பிரசாதம் சப்ளை (ஹா ஹா ஹா) பண்ணுகிறவரே உறையூர் கோயிலுக்கும் சப்ளை. நானெல்லாம் கோயில் பிரசாதம் எங்கு தயார் செய்கிறார்கள் என்று முதலில் நம்பிக்கையானவரைக் கேட்பேன். பெரும்பாலான கோயில்களில் வெளி காண்டிராக்ட்தான். 

ஒரு வகைல, பெரிய பெரிய கோயில்களில் பல சன்னிதிகளை தரிசித்து கால் வலி எடுத்து கொஞ்சம், இந்த மாதிரி ஸ்டால்ல புளியோதரை, சர்க்கரைபொங்கல், தயிர்சாதம் சாப்பிட்டு அக்கடான்னு ரெஸ்ட் எடுக்கலாம். அதனால உபயோகம்.  எங்க போனாலும் ஒரு ஹோட்டல் பக்கத்துல இருக்கணும் என்ற நம் நினைப்புதான் இதற்கெல்லாம் காரணம். இனி கொஞ்ச நாள்ல காபி, தேநீர்னு வந்துவிடும் போலிருக்கிறது.

பெரியகோயிலில் இருந்த படம்

இராஜராஜேச்வரம் கோயிலின் முழுப் பரிமாணமும் வெளிப்படுகிறதா? இதில் முன் மண்டபத்தின் மேல் இருக்கும் பகுதியில் இரண்டாவது தளம் அமைந்திருந்தது. அது பழுதுபட்டு இடிந்துவிட்டது. தற்போது முதல் தளம் மாத்திரமே இருக்கிறது.

பிரகதீஸ்வரர் ஆலயத்தை முழுவதுமாகப் புகைப்படங்கள் எடுக்க அதிகாலை கோயில் திறந்தவுடன் சென்றால் ஆட்கள் யாரும் இல்லாமல் நிம்மதியாகப் புகைப்படங்கள் எடுக்கலாம். 

மண்டபங்கள் எழுப்ப முனைந்து பாதியில் விட்டுவிடப்பட்ட தூண்களா?

ராஜராஜன் நுழைவாயிலைக் கடந்ததும் எதிர்ப்படும் நந்தி மண்டபம். அதன் பின்புறம் கோவில் விமானம்  (உங்களுக்குத் தெரிந்திருக்கும் என்று நினைக்கிறேன். ஒரு கோயிலின் நுழைவாயிலிலோ அல்லது அதற்கு அடுத்த தாகவோ அமைந்திருப்பது கோபுரம். இந்த கோபுரம் ஒரு கோயிலின் நான்கு பக்கங்களிலும் அமைந்திருக்கும், ஆனால் கோயில் நுழைவாயிலில் உள்ளதுதான் மிகப் பெரிதாக இருக்கும். அதனை ராஜகோபுரம் என்பர். ஆனால் கருவறையின் மீது கட்டப்பட்டிருப்பது விமானம் என்று அழைக்கப்படும். பொதுவாக விமானம் பல்வேறு வகைகளில் அமைத்திருப்பார்கள் (இது பற்றி பல கோவில்களின் உதாரணத்துடன் விளக்கினால்தான் புரியும்). இராஜ ராஜ சோழன் கட்டிய இந்தக் கோவிலில் விமானம் மிகப் பெரியதாக அமைந்துள்ளது. இராஜராஜன் தான், கோயில் விமானத்தை மிகப் பெரியதாகக் கட்டியவன் என்று சொல்லலாம்.. இது ஒரு காலத்தில் முழுவதுமாக பொன்னால் வேயப்பட்டிருந்தது.  தஞ்சை பெருவுடையார் கோயில் விமானம் மிகப் பெரியது என்பது இந்தக் கோயிலின் சிறப்பு.

மற்றபடி இந்தக் கோயிலைப் பற்றி மிகையாக நிறைய செய்திகள் (வதந்திகள்) காணக்கிடைக்கின்றன. கோவில் கோபுர நிழல் கீழே விழாது, ஒற்றைக் கல்லால் ஆன பிரம மந்திரம் எனப்படும் கல் விமானத்தின் மேலே இருக்கிறது, சாரப்பள்ளத்திலிருந்து சாய்வான மேடை அமைத்து இந்தக் கோவிலைக் கட்டினார்கள் என்றெல்லாம். இவையெல்லாம் சரியல்ல என்பதை கோவிலைப் பற்றி ஆராய்ந்தவர்கள் எழுதியிருக்கின்றனர்.

அதெல்லாம் சரிதான். இந்தப் பகுதியில் எப்போது கோயிலின் சன்னிதிக்குச் சென்று இறைவனைக் காண்பிப்பார் என்று யோசிப்பவர்களுக்கு, பெரு உடையாரின் திருவுருவம் கீழே.

தென்னாடுடைய சிவனே போற்றி  எந்நாட்டவர்க்கும் இறைவா போற்றி

சரி அடுத்த வாரம் தொடர்வோம்.

(தொடரும்)