"திங்க"க்கிழமை : காராசேவு - துரை செல்வராஜூ ரெஸிப்பி

 வெகு நாட்களுக்குப் பிறகு எழுதியுள்ள பதிவு...

 காராசேவு 

தேவையான பொருட்கள்:-

கடலை மாவு 250 gr

அரிசி மாவு 50 gr

மிளகுத்தூள் அல்லது ஓமம்

ஒரு tsp

மஞ்சள் தூள் சிறிதளவு

உப்புத்தூள் தேவைக்கு

வெண்ணெய்  ஒரு Tbsp

பூண்டு மூன்று பற்கள் 

கடலெண்ணெய் தேவையான அளவு

கடலைப் பருப்பை வாங்கி சுத்தம் செய்து வெயிலில் காய வைத்து அரைத்து மாவு தயாரித்துக் கொள்வது சிறந்தது..

அரிசியையும் நாமே அரைத்து மாவு தயாரித்துக் கொள்வது நல்லது..

வெளியில் வாங்குகின்ற மாவு வகைகளில் சுத்தம் என்பது சந்தேகத்திற்குரியது..

இருப்பினும்,

வீட்டிலேயே மாவு தயாரித்துக் கொள்வது சிரமம் என்றால் வெளியில் தான் மாவு வாங்கிக் கொள்ள வேண்டும்

செய்முறை:

பூண்டு பற்களை சுத்தம் செய்து பசை போல அரைத்துக் கொள்ளவும்.

அகலமான பாத்திரம் ஒன்றில் மேற்கூறிய பொருட்களைச்  சேர்த்து. நன்றாக கலந்து கொள்ளவும்.

கொஞ்சம் கொஞ்சமாக தண்ணீர் தெளித்து சப்பாத்தி மாவு பதத்திற்கு  பிசைந்து கொள்ளவும்.

வாணலி ஒன்றை அடுப்பில்  வைத்து அவற்றில் தேவையான அளவு கடலெண்ணெய் ஊற்றி, பிசைந்த மாவினை முறுக்கு உரலில் (சேவை பிழிவதற்கான  ஒற்றைத் துளை அச்சில்) வைத்து எண்ணெயில்  பிழிந்து பக்குவமாக பொரித்து எடுத்தால் சுவையான மிளகு காராசேவு..

இந்த மாவை இதே பக்குவத்தில் (முறுக்கு உரலின் பட்டைத் துளை அச்சினைப் போட்டு) ஓலை முறுக்கு ஆகவும் பிழிந்தெடுக்கலாம்..

இதெல்லாம் உங்களது சாமர்த்தியம்.. 

இதில் ஆப்பச் சோடா, அந்தச் சோடா இந்தச் சோடா - என்று எவ்வித இரசாயனக் கலப்பும் இல்லாதது சொல்லத்தக்கது.. 

சுத்தமான கலனில் வைத்து பாதுகாத்துக் கொண்டால் ஐந்து  நாட்களுக்குக் கெடாது..

நமது நலம் நமது கையில்..