ஆசைக் குளத்தினில் நீந்திக் குளிக்கையில் ஆனந்தப் பூஜை தொடங்குமோ…..

 

கடந்த வருடம் அண்ணா பல்கலைக்கழக விவகாரத்தைத் தொடர்ந்து நான் ஃபேஸ்புக்கில் எழுதியது இது.  இங்கு பகிராமலேயே விட்டிருக்கிறேன். 

சென்ற வார செய்தியில் பாகிஸ்தான், பலுசிஸ்தான் பற்றி செய்தி படித்ததும் இது நினைவுக்கு வந்தது. 

OTT புண்ணியத்தில் எத்தனை தமிழ், மலையாள க்ரைம் படங்கள் பார்த்திருக்கிறோம்?

தமிழக காவல் துறையிடம் பிளாக்போர்ட் இல்லையா? அதில் சில பெயர்கள், க்ளூக்கள் எழுதி, டிக் செய்து, இண்ட்டு மார்க் செய்து, ஓரிடத்தில் வட்டமிட்டு, சுற்றிலும் குட்டி குட்டியாய் புகைப்படங்கள் ஒட்டி,

சற்றே பெரிய ஒரு தனி மேஜையில் பாதி குடித்து வைத்த தண்ணீர் க்ளாஸ் இருக்க, சில பேப்பர்கள் கலைந்து கிடக்கின்றன. ஆஷ் ட்ரே ஒன்றும் கண்ணில் படுகிறது.

முக்கிய விசாரணை அதிகாரி, கலைந்த உடைகளுடன் களைத்த முகத்துடன் கையில் புகையும் சிகரெட்டுடன் ஜன்னலோரம் நின்று தூரத்து மேகத்தை பார்த்தபடி யோசித்துக் கொண்டிருக்கிறார்.

[ cigarette smoking is injurious to health ]

சுற்றிலும் சில குட்டி குட்டி மேஜைகள் நாற்காலிகளில் சிலர் அமர்ந்து கம்ப்யூட்டரைப் பார்த்து சடசடசடவென தட்டி சட் சட்டென விவரங்கள் எடுத்துக் கொடுக்க,

"ஏதாவது பேட்டர்ன் இருக்கா... ஒரே கோஷ்டியா? மூணு கேஸையும் கனெக்ட் பண்ண முடியுதா பாருங்க..."

டைட்டாக உடை அணிந்த இளம் பெண் போலீஸ் அதிகாரி ஒருவர் உள்ளே வந்து இறுக்கமாக சல்யூட் அடித்து குற்றவாளியின் ஃபோன் நம்பரிலிருந்து எடுத்த 'கால் லாகை'க் கொடுக்க..."அந்த ஸார் யாருன்னு தெரிஞ்சுதாம்மா... "

CCTV Footage நோண்டிக் கொண்டிருந்த ஒரு அதிகாரி துடிப்பாக "ஸார்.. இதோ பாருங்கள்.." என்று காட்ட...

வேகமாக அங்கு சென்று அதைப் பார்க்கும் முக்கிய அதிகாரி.."அந்த மூன்றாவது footage காட்டுங்க... ஓட்டுங்க.... ஸ்டாப்.. ஸ்டாப்... கொஞ்சம் ரீவைண்ட் பண்ணுங்க... இன்னும் கொஞ்சம்... இன்னும்... ஆங்... அங்கே... அங்கே... அது யாரு.. ஜூம் பண்ணுங்க" சட்டென திரும்பி சுவரில் ஒட்டியிருந்த மூன்று புகைப்படங்களைப் பார்த்து விட்டு திரும்புகின்றன அவர் கண்கள்.

"ம்ம்ம்.. இந்த ரெண்டு படத்தையும் பிரிண்ட் எடுத்து எல்லா போலீஸ் ஸ்டேஷனுக்கு அனுப்புங்க... கொஞ்சம் பேப்பர் பிரிண்ட் எடுத்துக்கிட்டு, ராஜேஷ்... லதா.. நீங்க ரெண்டு டீமா பிரிஞ்சு அந்த ஏரியால இவர்களை யாருன்னு அடையாளம் தெரியுதான்னு பொது இடங்கள்ல கேளுங்க.."

என்று இந்நேரம் குற்றவாளிகளைக் கண்டு பிடித்திருக்க வேண்டாமோ....

இருங்க.. இன்னொரு காட்சி கற்பனை பண்ணுவோம்...

அங்கு ஓரமாக இருந்த ஃபோன் அடிக்கிறது. 'செல்ஃபோன் இருக்க எதற்கு லேண்ட்லைன் அடிக்கிறது' என்று கேட்கக்கூடாது. அதெல்லாம் பாதுகாப்பு சமாச்சாரம். யாருடைய பாதுகாப்பு என்றும் கேட்கக் கூடாது! ஃபோனை ஒரு ஜூனியர் அதிகாரி எடுக்கிறார்.

ஏதோ கேட்டுவிட்டு விசாரணை அதிகாரியிடம் நீட்டுகிறார். வி அ அதை வாங்கிப் பேசுகிறார். போனில் "ம்ம்...ம்ம்ம்... எஸ் மேடம்.." என்று சொல்லியபடியே திரும்பி கட்டை விரலை கவிழ்து காட்டுகிறார், அவர் முகத்தில் ஒரு சோர்வு தெரிகிறது.

சட்சட்டென மேஜை கம்ப்யூட்டர்கள் உயிரிழக்கின்றன,. அவர்கள் மௌனமாக எழுந்து நிற்கிறார்கள்.

போனை வைத்து விட்டு வி அ சொல்கிறார்..."ஓகே... டிஸ்பர்ஸ் ப்ரெண்ட்ஸ்,, மீட் யு ஆல் லேட்டர்.." என்றவர் கொஞ்சம் இடைவெளி விட்டு "இஃப் எனி சான்ஸ்" என்று சொல்லிக் கிளம்புகிறார்.

அந்த இறுக்க உடை இளம்பெண் அதிகாரி அவரை அணுகி "என்ன ஆச்சு ஸார்?" நாங்க தெரிஞ்சுக்கலாமா?" என்று கேட்கிறாள். பின்னணியில் மற்றவர்கள் மௌனமாக வெளியேறிக் கொண்டிருக்கிறார்கள்.

"எல்லாத்தையும் அப்படியே ஸ்டாப் பண்ண சொல்லிட்டாங்க"

"சரி ஸார்.. ஆனால்..."

"என்னை பாகிஸ்தான் பக்கத்துல பலுசிஸ்தானுக்கு டிரான்ஸ்ஃபர் பண்ணிட்டாங்க"

​இதற்கு வந்த கமென்ட்ஸில் அமைதிச்சாரல் இதை ஏதோ நிஜமான  ஓ டி டி   படம் என்று நினைத்து விட்டது சந்தோஷமாக இருந்தது என்பதைச் சொல்லவும் வேண்டுமோ..

============================================================================

ரோஜாவுக்கு நான் எழுதிய கவிதைக்கு பதில் கவிதை ஒரு 20 வயது தம்பி எழுதி இருந்ததைச் சொல்லி இருந்தேன்.  நான் என் ஸ்டேட்டஸில் வைப்பது போலவே அவனும் அவன்   ஸ்டேட்டஸில் ஒரு படம் போட்டு கவிதை எழுதி பெயரிட்டிருந்தான்.  அது கீழே..

ஒளியால் ஒழிந்தது இருள் 

என்பார் பலர்...

ஒளியே இருளின் எதிர் 

என்பார் சிலர்... 

ஆனால் 

ஒருவருக்கும் புரியவில்லை... 

தினம் தினம் இருளின்

அழகைக் காண 

உயிர்த்தெழுந்து வருகிறது 

ஒளி என்று...

பாவம்...

ஒலி கேட்க இயலாத 

ஒளிக்கு தெரியவில்லை... 

அவளின் அழகைக்காண,

 "ஒளி" என்று பெயர் பெற்ற அவன் 

ஒளிந்து இருக்க வேண்டும் 

என்று

கீதா அக்கா தளத்தில் திருப்பாவை பாடல் விளக்கம் சொல்லிப் போட்ட பதிவில் அவர் சொன்ன பொருல்கலைப் படித்ததும் மனதில் தொன்றுவதை - அந்தப் பாடலின் பொருளை உள்வாங்கி மாற்றி நானும் கிறுக்கியது கீழே..  இது எந்தப் பாடலுக்கு என்று கேட்காதீர்கள்.  அது எனக்கு நினைவில்லை!

 பட்சிகளும் அழைக்கின்றன பார் 

படபடத்துப் பறந்து கூவி அழைத்து 

பகலவன் வந்துவிடுவான், பார்ப்பதற்குள் 

பல்துலக்கி பலகாரம் செய்யாமல் 

படித்துறைக்கு வருவாய் தோழி 

பாடிப் பரவசமாய் சேர்ந்து நாம் நீராடி 

பலபேர் சொல்லி பரமனைத் துதித்து 

பாற்கடல் பள்ளிகொள் பரமனைச் 

சரணடைவோம் பாவைகளே 

====================================================================================

நாபார்த்தசாரதி, திருப்பூர் கிருஷ்ணன் விக்ரமன் பற்றி ஜீவி ,

ஒரு தடவை நா.பா.வைப் பார்க்க எக்ஸ்பிரஸ் எஸ்டேட் போயிருந்தேன். அப்போ நா.பா. தினமணிக்கதிர்க்கு ஆசிரியர். நா.பா. ரூமிற்கு வெளியே திருப்பூர் கிருஷ்ணன் அமர்ந்தபடி ஏதோ வேலையாக இருந்தார். அப்பொழுதெல்லாம் நா.பா விற்கு நேரடி உதவியாளர் மாதிரி தி.கி.

அவரிடம் விஷயத்தைச் சொன்னேன். "உள்ளே தான் இருக்கிறார். போங்கள்.." என்றார். அவர் சொன்னாரே என்று சட்டென்று போனால், உள்ளே நா.பா. மேஜைக்கு எதிரே அசோகமித்திரன் உட்கார்ந்தபடி இரண்டு பேரும் எதையோ சுவாரஸ்யமாகப் பேசிக் கொண்டிருந்தனர். நான் நுழைந்ததும் டக்கென்று அவர்கள் பேச்சு நின்றது.
என்னைப் பார்த்ததும், "வாங்க, ஜீவி.." என்று சுற்றும் முற்றும் பார்த்தார் நா.பா. நான் கொண்டு போயிருந்த கதைக் கவரை அவரிடம் கொடுத்து, "வேறே ஒண்ணும் இல்லே.. இதைக் கொடுக்கலாம் என்று வந்தேன்.. அப்புறம் உங்களிடம் ஃபோனில் பேசுகிறேன்.." என்று சொல்லி வெகு நாகரிகமாக வெளியே வந்து விட்டேன்.

திருப்பூர் கிருஷ்ணன் ரொம்பவும் சிம்பிளானவர். எப்பொழுதும் கதர் வேஷ்டி, கதர் ஜிப்பா, கதர் துண்டு தான். அந்த தோள்த்துண்டு கீழே நழுவி விழுந்து விடாமல் வெகு வேகமாக சைக்கிள் ஓட்டியபடி மாம்பலம் ஆர்ய கவுடர் தெருவில் அவர் செல்வதைப் பார்த்திருக்கிறேன்.

திருப்பூர் கிருஷ்ணனை நினைக்கும் பொழுதெல்லாம் அது என்னவோ தெரிலே, இதெல்லாம் தான் என் நினைவுக்கு வரும்.

நா.பா.விடம் அவ்வளவு நெருங்கிப் பழகிய திருப்பூர் கிருஷ்ணன்,
சுரதாவிற்கு வித்வத் கர்வத்தைப் பற்றி பாடம் எடுத்திருக்கலாம் என்று தோன்றியது.

தோள் துண்டை அணிந்தபடியே சைக்கிள் பயணமா?

துண்டு நழுவி விடாமல் சைக்கிள் ஓட்டுவதில் திருப்பூர் கிருஷ்ணனுக்கோ அவ்வளவு திறமை இருந்தது..
அமுதசுரபியின் இலக்கிய வட்டச் செய்திகளில் அவ்வப்போது திருப்பூர் கிருஷ்ணனைப் பார்த்ததுண்டு. பிற்காலத்தில் அமுதசுரபியின் ஆசிரியர் இவர் தான் என்று காலம் தெரியப்படுத்தாமல் இருந்தது.
மாம்பலம் ஜெய்சங்கர் தெருவில் தான் அமுதசுரபி ஆசிரியர் விக்கிரமனின் (வேம்பு) இல்லம் இருந்தது.

தேசம் சுதந்திரம் பெற்றதிலிருந்து தொடர்ந்து வெளிவரும் கலை இலக்கிய மாத இதழ் அமுதசுரபி.

ஸ்ரீராம் சிட்ஸால் நடத்தப்படும் பத்திரிகை. ஆரம்ப இதழிலிருந்து கிட்டத்தட்ட அரை நூற்றாண்டுக்கு மேல் அதன் ஆசிரியராய் இருந்தவர் விக்கிரமன். பொன்னியன் செல்வன் முடிந்ததும் அதன் கடைசி அத்தியாயத்தில் கல்கி விட்டுச் சென்ற கேள்விகளுக்கு பதில் அளிக்கிற விதமாய் நந்திபுரத்து நாயகி நாயகி சரித்திர நாவலை மூன்று பாகங்களாய் எழுதியவர் விக்கிரமன்..மிகச் சிறந்த வரலாற்று கதை ஆசிரியர். இலக்கிய விஷயங்களில் ஈடுபாடு கொண்டவர்.

சென்னை வெள்ளம் வந்த பொழுது.,,   விக்ரமன் மறைந்து பட்ட பாடு நினைக்கவே வருத்தம் மேலிடுகிறது.

விக்கிரமனிற்குப் பிறகு அமுதசுரபியின் ஆசிரியரானவர் திருப்பூர் கிருஷ்ணன்.

===================================================================================================

“பாரதிராஜாவின் ‘கிழக்கே போகும் ரயில்’ படத்தில் ஒரு பாடல் எழுதியுள்ளீர்கள். அதன் பிறகு நீங்கள் சினிமாவில் எழுதவில்லையே..?”

“அது பாரதிராஜா வளர்ந்து கொண்டிருந்த காலம். தயாரிப்பாளர் ராஜ் கண்ணன் இந்த ஊரைச் சேர்ந்தவர். எனக்கு தெரிந்த பலர் அதில் இருந்தனர். அப்போது ஒரு படம் வெளியாகிறது என்றால், அதுகுறித்து நோட்டீஸ் அடித்து ஊர் முழுவதும் கொடுப்பார்கள். அந்தப் படத்துக்கு நான் நோட்டீஸ் எழுதிக் கொடுத்தேன். அதை பாரதிராஜா பார்த்துவிட்டு, பாடல் எழுதுவதற்காக என்னை அழைத்தார். பாரதிராஜா திறந்த மனதுடன் இருந்திருக்கக் கூடும். ஆனால், அங்கு நிலைமை வேறு விதமாக இருந்தது. இளையராஜா, அவரின் தம்பி கங்கை அமரன், பாக்கியராஜ் எல்லோரும் இருந்தனர். இரண்டு பாடல்களுக்கான டியூன் போட்டு என்னிடம் கொடுத்தனர்.

 முத்துலிங்கத்துக்கும் இரண்டு டியூன் போட்டு கொடுத்தனர். அதற்கு முன்பு கங்கை அமரனுக்கு பெரிதாக வாய்ப்பு வழங்கப்படவில்லை. அதனால், இதில் அவருக்கு வாய்ப்பு வழங்க வேண்டுமென்று இளையராஜா மற்றும் பாரதிராஜா கருதியிருக்கலாம். 'ராஜா ரகசியம் தெரிஞ்சாச்சு.. ராணிக்கு சேதியும் வந்தாச்சு..’, ‘மலர்களே நாதஸ்வரம்..’ என்று இரண்டு பாடல்கள் எழுதினேன். இரண்டையும் இளையராஜா இசையமைக்க ஏற்றுக் கொண்டார்.

முத்துலிங்கத்தின் இரண்டு பாடல்களும் ஏற்றுக் கொள்ளப்பட்டன.

அப்போது முத்துலிங்கம், ‘நாங்கள் இதை நம்பிதான் இருக்கிறோம் வெளி ஆள்களை உள்ளே விடாதீர்கள்.’ என்பது போல என்னை சொல்லிக் கொண்டிருந்தார். அதைத் தனிப்பட்ட முறையில் அவர் சொல்லியிருக்கலாம்.

அப்படி இல்லாததால், எனக்கு அது அருவருப்பாக இருந்தது. முத்துலிங்கம் இப்போது எனக்கு நண்பர்தான். அப்போது அப்படி சொல்லிக் கொண்டிருந்தார். அடுத்த நாள் பாடல் பதிவு செய்வதை பார்க்கக் காத்திருந்தேன். திடீரென்று வந்த முத்துலிங்கம், ‘உங்களுக்கு இரண்டு பாட்டு கொடுத்தார்கள் தானே. அதில் ஒரு பாட்டுதான் வரும். இன்னொன்று கங்கை அமரனுக்கு கொடுத்து விட்டனர்.’ என்று மகிழ்ச்சியுடன் சொன்னார். ‘என்னடா சினிமா உலகம் இப்படி வாய்ப்பு வரக்கூடாது என்று நினைக்கிறதே.’ என்று யோசித்தேன்.

மலர்களே நாதஸ்வரம் பாடலை மலேசியா வாசுதேவன், ஜானகி பாடினார். ஜானகிக்கு இந்தப் பாடல் பிடித்திருந்தது. அந்தப் பாடலை படம் பிடிக்க செலவு அதிகமாகும் என்பதால், படமாக்கவில்லை என்று கூறினர். பாடல் சூழல் சொல்லும்போது, ‘உங்களுக்கு கதைத் தெரியும். உங்களுக்கு ஏற்கெனவே சொல்லியிருப்பார்கள்.’ என்று பாரதிராஜா சொன்னார். ஆனால், ஒருவரும் எனக்கு கதை சொல்லவில்லை. சொல்லக் கூடாது என்று முடிவு செய்து வைத்துள்ளனர். அதற்கு முன்பு சினிமாவில் இவ்வளவு போட்டி, பொறாமை இருக்கும் என்று எனக்கு தெரியாது. திரும்பி ஊருக்கு வரும்போது இனிமேல் சினிமாவுக்கு போகக் கூடாது என்று முடிவெடுத்தேன்.

சென்னை தியாகராஜா அரங்கத்தில் நடந்த ஓர் நிகழ்ச்சியில், நான் தலைமை தாங்கிய அமர்வில் பாரதிராஜா பேசினார். அப்போது ‘அந்தப் பாடல் வராததற்கு நானே காரணம்.’ என்று சபையில் மன்னிப்பு கேட்டார். அவர் இப்போதும் உணர்ச்சி வசப்பட்டு பேசுவது போல பேசினார். பிறகு இளையராஜா விருது வழங்கும் நிகழ்ச்சிக்கு என்னை தேர்ந்தெடுக்க சொல்லி நடுவராக போட்டார். அந்தப் பாடல் மறுக்கப்பட்டதால்தான் பிற்காலத்தில் இளையராஜா எனக்கு பிரியமானவராக மாறினார்.”

- சிற்பி பாலசுப்பிரமணியம்

நன்றி: விகடன்

====================================================================================

டாக்டர் நாராயணன் அவர்களின் நிகழ்ச்சிகள் ரொம்ப விரும்பிப் பார்ப்பேன்.  கீதா ரெங்கணும் பார்ப்பார் என்று தெரியும்.  ஹம்சத்வனி ராகம் பற்றி அவர் நிகழ்ச்சி...

=========================================================================================

இன்று பகிரப்போகும் பாடல்கள் இரண்டும் ஹம்சத்வனி ராகம்.  இரண்டும் இளையராஜா இசையில்.

முதலில் கிழக்கே போகும் ரயில் படத்திலிருந்து 'மலர்களே நாதஸ்வரங்கள்'  பாடல்.  இதற்கான விளக்கம் மேலே திரைச்செய்தியாக கொடுத்திருக்கிறேன்.  பாரதிராஜா இயக்கத்தில் 1978 ஆம் ஆண்டு வெளிவந்த படம்.  ஒரு வருடம் ஓடி சாதனை படைத்தது.

மலேஷியா வாசுதேவன், ஜானகி அம்மா குரல்.  படத்தில் பாடல் இடம்பெறவில்லை ஆதலால் காட்சி கிடைக்காது.

மலர்களே………. நாதஸ்வரங்கள்
மங்களத்தேரில் மணக்கோலம்
வர்ண ஜாலம் வானிலே

மலர்களே………. நாதஸ்வரங்கள்
மங்களத்தேரில் மணக்கோலம்
வர்ண ஜாலம் வானிலே
மலர்களே……….

பால் வண்ண மேனியை ஆகாய கங்கை
பனி முத்து நீராட்டி அழகூட்டினாள்
பால் வண்ண மேனியை ஆகாய கங்கை
பனி முத்து நீராட்டி அழகூட்டினாள்

பெண் : ஆ…ஆ….ஆ….ஆ….ஆஅ……ஆஅ…….

ஆண் : கற்பக பூக்கொண்டு கருநீலக் கண்ணில்

பெண் : ஆ…..ஆ….ஆ….ஆ…..
ஆஅ ஆ ஆ ஆ ஆ ஆ ஆ ஆ ஆஅ

ஆண் : கற்பக பூக்கொண்டு கருநீலக் கண்ணில்
ரதிதேவிதான் மைதீட்டினாள்
காதல் தேவன் கைகளில் சேர

ஆண் : மலர்களே………. நாதஸ்வரங்கள்
மங்களத்தேரில் மணக்கோலம்
வர்ண ஜாலம் வானிலே
மலர்களே………
பெண் : ம்ம்ம்ம் ம்ம் ம்ம் ம்ம் ம்ம்ம்….

குழு : ………………………

பெண் : கருவிழி உறங்காமல்
கனவுகள் அரங்கேற
இளமை நதிகள் இரண்டும் இணையட்டுமே

குழு : ஆ…..ஆ….ஆ….ஆ…..

பெண் : கருவிழி உறங்காமல்
கனவுகள் அரங்கேற
இளமை நதிகள் இரண்டும் இணையட்டுமே

ஆண் : மன்மதன் திருக்கோயில்
அதில் காதல் பூஜை

பெண் : ஆ…..ஆ….ஆ….ஆ…..ஆ……ஆ…..

ஆண் : மன்மதன் திருக்கோயில்
அதில் காதல் பூஜை
எந்நாளுமே அரசாளுமே
காதல் வானம் பூமழைத் தூவ

ஆண் : மலர்களே………. நாதஸ்வரங்கள்
மங்களத்தேரில் மணக்கோலம்
வர்ண ஜாலம் வானிலே
மலர்களே………

====================================================================================

அடுத்த பாடல் என் புருஷன்தான் எனக்கு மட்டும்தான் படத்தில் வரும் இந்தப் பாடல்.

விஜயகாந்த், சுஹாசினி, ரேகா  நடிப்பில் மனோபாலா இயக்கத்தில் 1989 ல் வந்த படம். வாலியின் பாடல். ஜெயச்சந்திரனும் சுனந்தாவும் பாடிய பாடல்.

PJ  : பூ முடித்து பொட்டு வைத்த வட்ட நிலா
புன்னகையில் பாட்டெழுதும் வண்ணப் புறா
தீர்த்தக் கரையினில் காதல் மயக்கங்கள்
தீரும் வரையினில் புது வசந்த விழா……

PJ  : பூ முடித்து பொட்டு வைத்த வட்ட நிலா
பெண் : புன்னகையில் பாட்டெழுதும் வண்ணப் புறா

குழு : மாங்கல்யம் தந்துனானே
மம ஜீவன ஹேதுனா
கண்டே பத்னாமி சுபாகே
த்வம் சஞ்சீவ சரத சதம்

PJ  : மீட்டாமல் போனால் மணி வீணை வாடும்
கை தீண்டினால் தான் கல்யாணி பாடும்
சுனந்தா : எழுதாத புது இலக்கியம்
உயிர்க் காதலில் விளையும்
இதழோடு இதழ் இணைந்திட
இசைக் கோலங்கள் வரையும்

PJ  : மேளம் முழங்கவும் மாலை வழங்கவும்
வேளை வருகையிலே
சுனந்தா : பாயை விரித்திடும் பாட்டுப் படித்திடும்
கானக் கருங்குயிலே
PJ  : ஆசைக் குளத்தினில் நீந்திக் குளிக்கையில்
ஆனந்தப் பூஜை தொடங்குமோ…..

PJ  : பூ முடித்து பொட்டு வைத்த வட்ட நிலா
சுனந்தா : புன்னகையில் பாட்டெழுதும் வண்ணப் புறா
PJ  : தீர்த்தக் கரையினில் காதல் மயக்கங்கள்
தீரும் வரையினில் புது வசந்த விழா……

PJ  : பூ முடித்து பொட்டு வைத்த வட்ட நிலா
பெண் : புன்னகையில் பாட்டெழுதும் வண்ணப் புறா

குழு : ……………………

சுனந்தா : கஸ்தூரி மானை கடன் கேட்டு வாங்கி
நான் கொண்ட கண்கள் நாளாச்சு தூங்கி
PJ  : நிறுத்தாமல் மலர்க் கணைகளை
விடும் வாலிபம் இதுதான்
அரங்கேற தினம் இரவினில் வரும்
நாடகம் இதுதான்

சுனந்தா : பிள்ளை பிறந்தது பள்ளையறை கொஞ்சம்
மூடிக் கிடக்கட்டுமே
PJ  : கட்டில் ஒரு புறம் தொட்டில் ஒரு புறம்
ஆடிக் கிடக்கட்டுமே
சுனந்தா : மூச்சு இருக்கின்ற காலம் வரையினில்
மோகத்தின் வேகம் குறையுமோ….

PJ  : பூ முடித்து பொட்டு வைத்த வட்ட நிலா
சுனந்தா : புன்னகையில் பாட்டெழுதும் வண்ணப் புறா
PJ  : தீர்த்தக் கரையினில் காதல் மயக்கங்கள்
தீரும் வரையினில் புது வசந்த விழா……

PJ  : பூ முடித்து பொட்டு வைத்த வட்ட நிலா
சுனந்தா : புன்னகையில் பாட்டெழுதும் வண்ணப் புறா

==========================================================================================