வெள்ளி வீடியோ : அலையில் மிதக்கும் மாதுளை இவள் பிரம்மதேவன் சாதனை

      ஏற்கெனவே வாக்களித்திருந்தபடி ஒரு வழியாக இளையராஜா பேட்டியை ஆரம்பிக்கிறேன்!



     எல்லா இசையமைப்பாளர்களும் சொல்லும் சொல்லும் சிரமங்களையே இளையராஜாவும் சொல்கிறார்.  பொண்ணு ஊருக்கு புதுசு படத்தில் இடம்பெற்ற ' ஓரம்போ...' பாடலை அப்போது  ஆல் இந்தியா ரேடியோவில் தடை செய்து விட்டார்கள் என்று ஞாபகம்.  அதைத்தான் அவர் தனது கட்டுரையில் சொல்கிறார்.

     இன்று பகிர்ந்திருக்கும் பாடல் இடம் பெற்ற திரைப்படம் ஒரு தோல்விப்படம்.  காதல் ஓவியம்.   படம் பார்க்க நிறைய பொறுமை வேண்டும்.  ஆனால் பாடல்கள் தேன்.  எல்லாப் பாடல்களும் தேன்போன்ற பாடல்கள்.   உங்களுக்கு ஒரு நல்ல செய்தி என்னவென்றால் காட்சியுடன் இருக்கும் பாடல் பாதிதான் இருந்ததால் காட்சியில்லா கானம் இணைத்திருக்கிறேன்!!

     "காமன் சாலை யாவிலும் ஒரு தேவரோஜா ஊர்வலம்.." 


   'ராஜகீதம்',   'தேவரோஜா' போன்ற பிரயோகங்களுக்குச் சொந்தக்காரர் வைரமுத்து.  உண்மையிலேயே காதல் ஓவியம் படத்தில் எல்லாப் பாடல்களிலும் இவரது வரிகள் வைரவரிகள்தான்.  இந்தப் படத்தில் எனக்கு மிகவும் பிடித்த பாடல் 'பூவில் வண்டு கூடும்' பாடல்தான்.  எனினும் அதை பகிராமல் இந்தப் பாடலைப் பகிர்கிறேன்.

     அலையில் மிதக்கும் மாதுளை இவள் பிரம்மதேவன் சாதனை 

     

==========================================================================

இளையராஜா 

     யார் மனதையும் புண்படுத்தும் எண்ணம் எனக்கில்லை.  அதேபோல பிறரை வம்புக்கு இழுக்கும் நோக்கமும் கிடையாது.  இளையராஜா என்னும் இசையமைப்பாளரின் இதயத்தை அடிக்கடி வந்து நெருடிக்கொண்டிருக்கும் சில எண்ணங்களை - சில நினைவுகளை உங்களுக்குத் தொடர்ந்து சொல்லப்போகிறேன்.

     ஒரு கால கட்டத்தில் புதிதாக நல்ல இந்திப் பாடல்கள் வந்தால் போதும்.  "ஆகா!  இதைப் போன்ற ஒரு பாட்டு நம் படத்திலும் இருந்தால்...."  என்று உணர்ச்சி வசப்பட்டு நேரே இசையமைப்பாளரிடம் ஓடுவார் தயாரிப்பாளர்.  அவரின் முகபாவங்களை பார்த்ததும் "நாம் வேறு எந்த ட்யூன் போட்டாலும் இவர் ஒத்துக்கொள்ளப் போவதில்லை.  நமக்கேன் வீண் வம்பு?" என்று இசையமைப்பாளர் தலையை ஆட்டி விடுவார்.  ஆனால் இதற்குள்ளாக அதே ட்யூனை வேறொருவர் தெலுங்கிலோ, கன்னடத்திலோ போட்டு விட்டிருப்பார்.  இதை நான் வேடிக்கைக்காகச் சொல்லவில்லை.  திரு ஜி கே வெங்கடேஷ் அவர்களிடம் நான் உதவியாளனாகப் பணிபுரிந்துகொண்டிருந்த நாட்களில் நானும் அவரும் - இன்னும் பல இசையமைப்பாளர்களும் நேரடியாக அனுபவித்ததுதான்.

    ஒரு கன்னடத் தயாரிப்பாளர் - பெயரைக் கேட்காதீர்கள் - ஆர் டி பர்மனின் இந்தப் பாடல் ரிலீஸானாலும் முதல் ரிக்கார்ட் வாங்குபவர் இவராகத்தான் இருக்கும்.  கம்போஸிங்கிற்காக நாங்கள் உட்காந்த உடன் அந்த இசைத்தட்டைப் போட்டு விடுவார்.  அதேபோல் பாட்டு வேண்டும் என்பார்.  ஜி கே விக்கு இந்திப் படங்களைப் பார்ப்பதோ, பாடல்களைக் கேட்பதோ அவ்வளவாக வழக்கமில்லை.  எது கம்போஸ் பண்ணினாலும் சுயமாகச் செய்ய வேண்டும் என்ற பிரக்ஞை  உள்ளவர்.  தன்னால் முடிந்தவரை விவாதித்துப் பார்ப்பார்.  சில சமயங்களில் இந்த விவாதமே சீரியஸான சண்டையில் போய் முடிவதும் உண்டு.

     ஜி கே வியும், அந்தத் தயாரிப்பாளரும் என்னையும் பாரதிராஜாவையும் போல அடிக்கடி சண்டை போட்டுக்கொள்பவர்கள்.  இவர் போடும் எல்லா ட்யூன்களையும் கேட்டுவிட்டு, "என்ன இருந்தாலும் து மாதிரி இல்லையே..." என்று பர்மனின் ரிக்கார்ட் பக்கம் கையை நீட்டுவார் தயாரிப்பாளர்.  கைமேலேயே தட்டி, "உனக்கு ஏதாவது அறிவிருக்கா?  அது முழுவதும் முடிந்த பாடல்..  நான் வெறும் ட்யூன்தானே வாசித்துக் காட்டினேன்?  இனி பாடல் எழுதி, ஆர்செஸ்ட்ரேஷன் செய்து, பின்னணிப் பாடகர் பாடி, ஒலிப்பதிவு செய்தால்தானே முழுமை வரும்?  வெறும் ஹார்மோனியத்தையும், கிடாரையும் வைத்துப் பாடிக் காட்டினால் உன் காதுக்கு இப்படித்தான் கேட்கும்.  போய் வேலையைப் பார்..." என்பார் ஜி கே வி.

     இசையமைப்பாளர் ஒருவர் அங்கலாய்த்துக்கொண்டார்.  "சேச்சே... வரவர இந்த இந்திப் படங்களின் பாட்டுகளே சரியில்லப்பா... ஒரு நல்ல டூயட் போடணும்னு நானும் அஞ்சாறு மாசமாய்ப் பார்க்கிறேன்...  ஒரு பயலாவது நல்ல ட்யூன் போடறானா பாரேன்..."

     நல்லவேளையாக கடவுள் புண்ணியத்தில் எனக்கு இம்மாதிரி நேருவதில்லை.   என்னிடம் வருபவர்கள் வேறுமாதிரி.  உட்காரும்போதே "அண்ணே... .............................................................................................................................................................. ராஜேஷ் கன்னா படம் சில்வர் ஜூப்ளி தாண்ணே!"  என்றுதான் சொல்கிறார்கள்.  இந்திப்பாட்டு போல் வேண்டும் என்று கேட்காமல், ஏதோ என் பாட்டையே உதாரணம் காட்டுகிறார்களே, அந்த மட்டில் எனக்குச் சந்தோஷம்.  ஒரே மாதிரி பாட்டுப் போட்டால் இளையராஜா இருந்த இடம் தெரியாமல் போய்விடுவான் என்பது எனக்குப் புரிகிறது. இவர்களுக்கு?  இவர்கள் எதிர்பார்ப்பதெல்லாம் எப்படியும் ஒரு பாட்டு ஹிட் ஆக்கிவிட வேண்டும் என்பதுதான். [கோடிட்ட வரிகள் பைண்டிங் கட் செய்ததில் காணாமல் போன வரிகள்! ]

      எவ்வளவு இடைஞ்சல்களுக்கு மத்தியில் ஒரு பாடல் ஹிட்டாக வேண்டியிருக்கிறது தெரியுமா?

     ஒரு தேதியைச் சொல்லி "அண்ணே....   அடுத்த மாசம் இந்த நாள்தான் நல்லாயிருக்கு.  அதை விட்டா நல்ல நாள் எதுவும் இல்லே...  அன்னிக்கி ஒரு பாட்டை எடுத்துக் கொடுத்திட்டீங்கன்னா மத்ததை அப்புறமா பார்த்துக்கலாம்...." என்று பலர் வருகிறார்கள்.  நல்ல பாடலைவிட நல்ல நாளுக்குத்தான் அவர்கள் முக்கியத்துவம் தருகிறார்கள்.  ஐந்தாறு  மாதங்களுக்கு முன்பாகவே என்னுடைய நிகழ்ச்சிகள் வரையறுக்கப்பட்டு விடுகின்றன.  அடுத்த மாதம் பாடல் வேண்டுமென்றால் நான் என்ன மெஷினா? தயாரிப்பாளர்களை நான் வேண்டிக்கொள்வது இதுதான் :  "நீங்கள் தரும் பணத்துக்காகததான் நான் உழைக்கிறேன்.  ஆனால் அதே சமயம் என்னிடமிருந்து கொஞ்சமாவது எதிர்பார்க்கும் ரசிகர்களை ஏமாற்ற முடியாது.  என் திருப்திக்காகவும், உங்கள் பட வெற்றியில் பங்கு வகிக்கவும் நான் பாட்டைக் கம்போஸ் செய்யப் போதிய அவகாசம் கொடுங்கள்."

     இதுதான் இப்படி என்றால் ரிக்கார்டிங் தொல்லைகள் வேறு.  29ம் தேதி திடீரென்று தியேட்டர் கிடைக்கும்.  அன்று எப்படியாவது பாடலைப் பதிவு செய்தாக வேண்டும்.  நான் ஐடியாவில் வைத்திருக்கும் இசைக்கருவி வாசிப்பவர் அன்று கிடைக்க மாட்டார்.  அந்தக் கருவியை வைத்து ஏதாவது புதுமை செய்ய எண்ணியிருப்பேன்.  அவர் வரவில்லை என்பதற்காகக் கிடைத்திருக்கும் தியேட்டரைத் தியாகம் செய்ய முடியாமல் நான் நினைத்திருக்கும் புதுமையைத் தியாகம் செய்ய வேண்டிய நிலை.

     அப்படியே எல்லாம் அமைந்தாலும் முதல் பத்து டேக்கிற்குள் பாட்டு ஓகே ஆனால்தான் உண்டு.    நாற்பது இசைக்கலைஞர்களை எல்லா நேரத்திலும் சரியாக வாசித்து விடுவார்கள் என்று யாரும் எதிர்பார்க்க முடியாது.  டேக் அதிகமாக அதிகமாக அசதியும் அதிகமாகும்.  வாசிப்பவர்கள் தவறு செய்யும் வாய்ப்புகள் அதிகமாகும்.  

     இது எல்லாம் நல்லபடியாக அமைந்து விட்டால் மட்டும் போதாது.  பாடலின் வெற்றி அது படமாக்கப்படும் விதத்தையும் பொறுத்தே அமைகிறது.  இவ்வளவையும் மீறி பாட்டு ஹிட் ஆகி விட்டாலும் ஆல் இண்டியா ரேடியோ சென்னை வானொலி நிலையத்தில் கேட்க முடியாத நிலை (புரிகிறதா? )    (தொடரும்)



தமிழ்மணம் வாக்களிக்க.....