தேள் விஷமும் காசநோயும் - ஒருசுவை இருசுவை அறுசுவை...... எழுசுவை

1)  இந்துவில் வந்த இந்த செய்தியைப் படித்த ஒரு வாசகர் முகேஷ் கண்ணாவுக்குத் தேவைப்பட்ட ரூபாய் 46 ஆயிரத்தையும் செலுத்தி இருப்பதுடன், அவரின் மூன்றாண்டுகல்விக் கடனையும் ஏற்றுக்கொள்வதாக அறிவித்துள்ளார்.... 

2)  தேளின் விஷத்தில் இருந்து காசநோய்க்கு மருந்து கண்டுபிடித்துள்ளனர் அமெரிக்கா மற்றும் மெக்சிகோ விஞ்ஞானிகள். இந்த மருந்து கண்டுபிடிப்பில் முக்கிய பங்காற்றியவர்கள் தமிழக விஞ்ஞானி என்பது குறிப்பிடத்தக்கது.

===================================================================================================

கடந்த வார பதிவுகளின் விமர்சனம்... 8/6/19 டு 14/6/19  - திருமதி கமலா ஹரிஹரன் 

=====================================

அறுசுவை என்ற சொல் வழக்கு உண்டு.. .ஆனால் இது ஏழுசுவை.... 

அனைவருக்கும் வணக்கம். இந்நாள் அனைவருக்கும் இனிய  நாளாக அமைய எனது பிராத்தனைகள். 

ஒரு சிறந்த உணவை உணவின் தரத்தைப் பொறுத்து அறுசுவை உணவென்று கூறுகிறோம். அதே போல் ஒரு வாரத்தின் ஏழு நாட்களிலும், சுவை நிறைந்த பதிவுகளை பதிந்து, பார்ப்பவர்கள் கண்களையும்,மனதையும், கருத்தையும் உற்சாகப்படுத்தும்  ஏழு சுவைகள் நிரம்பிய ப்ளாக்கென்றால், அது "எங்கள் ப்ளாக்" தான். ஒரு வாரத்தில் ஒவ்வொரு நாளும் ஒவ்வொரு விதமான பதிவுகளை சுவைபட தொகுத்தளித்து, அதில் திங்கள், செவ்வாய் கிழமைகளில் மற்ற வலைத்தள நண்பர்களையும் பங்கு கொள்ளச் செய்து அவர்களின் திறமைகளையும் வெளி கொணர்ந்து, ( இது என்னை மட்டும் குறிப்பிட்டு கூறுவது. மற்றவர்கள் அனைவருமே இங்கு ஜாம்பவான்கள்.) அவர்களுக்கு ஊக்கமும், உற்சாகமும் தருகின்ற " எங்கள் ப்ளாக்கிற்கு" என்றும் வந்தனத்துடன், வாழ்த்துகளையும் கூறிக் கொள்கிறேன். 

இந்த வலைத்தளத்தில்  இணைந்த கைகளாக நட்புறவுடன் கூடிப்பழகும் ஏனைய வலைத்தள வாசக நட்புள்ளங் களுக்கும், பொறுமையுடன் இந்த வலைத்தளம் நடத்தி, தினசரி  தவறாது பணிச்செய்யும்  ஆசிரிய குழுவிற்கும் பணிவுடன் கூடிய பாராட்டுகளையும் தெரிவித்துக் கொள்கிறேன். . 

வாரத்தின் முதலாவது நாளான திங்கட்கிழமையை "திங்க" கிழமையாக்கி சுவையான விருந்தாக சமையல் ரெசிபிகளை பல அறிமுகபடுத்தி,

2ஆவது நாளான செவ்வாய் கிழமைகளில் மற்ற வலைத் தளத்தின்  எழுத்தாளர்கள் எழுதிய அருமையான கதைகளை இணைத்து, 

3ஆவது நாளாகிய பொன்னான புதனில், சிந்தனை திறன் வளர்க்க கேள்விகளும், பதில்களுமாக வளர்த்து, 

4ஆவது நாளான வியாழனில், சகோதரர் ஸ்ரீராம் அவர்கள்  சென்ற இடங்களின் சிறப்பு, (தற்சமயம் காசிப்பயணம்) அதை பற்றிய விரிவான பார்வை மட்டுமில்லாது, அந்த காலத்து பத்திரிகை செய்திகளுடன் புதிர், கருத்துடன் கூடிய நகைச்சுவை துணுக்குகள், குறிப்பாக கவிதைப்புயலும், எ. பியின் ஆசிரியருமான, சகோதரர் ஸ்ரீராம் அவர்களின் கவிதைகள் என கதம்பமாய் மணந்து, 

5ஆவது நானான வெள்ளியின் விடியலில், இனிமை மிகுந்த நல்ல இசையில் தவழ்ந்த  கேட்டிருக்கும், கேட்கவும் தூண்டும் பல திரைப்படப் பாடல்களை பகிர்ந்தளித்து, 

 6 ஆவது  நாளான சனிக்கிழமைகளில் நேர்மறை எண்ணங்களில், பலர் செய்த நல்ல செயல்களை "வலையுலகம்" அறியுமாறு பதிவிட்டு அதை படிக்கும் போது,  நேர்மறை எண்ணங்களைை அனைவரின்  மனதினுள் கடத்த வாய்ப்பளித்து,

 7ஆவது நாளான ஞாயிற்றுக் கிழமைகளில்,  புகைப்படக் கலையில் ஆர்வமுடையவரும், எ. பியின் மற்றொரு ஆசிரியருமான  சகோதரர் திரு. கே. ஜி. எஸ் அவர்கள் அவ்வப்போது குடும்பத்துடன் பயணித்த போது (தற்சமயம் இப்போது  ஷில்லாங்கில்,) எடுத்த புகைப் படங்களையும், அதற்கு பொருத்தமான நறுக்கு தெரித்தாற்போல், அழகான வாக்கியங்களையும்  பொருத்தி எழுதி, படிக்கும் அனைவரையும் இடங்களையும். இயற்கையையும் ரசித்துப்பார்க்க வைப்பது, என ஒவ்வொரு வாரமும் களை கட்டி திருவிழா கோலம் கொண்டபடி உலா வருகின்றது எங்கள் ப்ளாக்.

பொதுவாக சூரிய சந்திரன் நம் கண்களுக்கு தெரிந்து நாம் வழிபடும் இயற்கை தெய்வங்கள். இதை குறிக்கும் விதமாக ஒரு வாரத்தின் "முதல் நாள் " குளிர்ந்த "சந்திரனின்" மற்றொரு பெயரான "திங்களுடன்" ஆரம்பித்து,  "ஏழாவது நாள்" வெப்பம் மிகுந்த "சூரியனின்" இன்னுமொரு பெயரான "ஞாயறன்று " முடிகிறது.  குளிரும், வெம்மையும் சரிசமமான விகிதத்தில் இருந்தால்தான் நம் உடல் ஆரோக்கியம் ஒரே சீராக இருக்குமென்பதால், சூரிய சந்திரன் வழிபாட்டு நாட்களாக வாரத்தின் முதல், இறுதி பெயர்களையும் இவ்விதமாக ஆன்றோர்கள் தேர்ந்தெடுத்திருக்கலாம். 

ஆனால், இதில் வாரத்தின் ஆறாவது நாளான சனிக்கிழமையன்று "நேர்மறை எண்ணங்கள்" கொண்ட செய்திகளை தொகுத்து அனைவரின் பார்வைக்கும் விருந்தாக்கி பல்வேறு பாராட்டை பெற்று கொண்டிருந்த எ. பியின் ஆசிரிய பெருமக்கள், அன்றைய தினத்தன்று நட்புறவுடன் எ. பியில் கூடிப் பழகுபவர்களின் எழுத்து திறமையை அனைவருக்கும்  பறைசாற்றுவதற்காக  அவர்களுக்கு  சனிக்கிழமையிலும் மற்றொரு சந்தர்ப்பம்  அளித்து, சனிக்கிழமையிலிருந்து, வெள்ளி வரை வரும்  ஒருவார பதிவுகளை, பதிவுக்கு வரும் கருத்துக்களை விமர்சித்து (கடந்த  ஏப்ரல் 27 சனிக்கிழமையிலிருந்து) எழுத வைத்து, மற்றுமொரு புது புரட்சியை உண்டாக்கி அதில் வெற்றியும் கண்டு வருகிறார்கள். அவர்களது  புதுமை புகுத்திய இந்த முயற்சிக்கும் பாராட்டுக்கள். 

***-----------***---------***

மேலே கூறியபடி இவ்வார தொடக்கம் "சனிக்கிழமையன்று" தொடங்குகிறது. நேர்மறை எண்ணங்கள் என்பது நம் மனதிற்கு புத்துணர்ச்சி தருபவை. நம் விதிகள் எப்படி பயணித்தாலும், தாம் நேர்மறையாக பேசி,  நேர்மையாகவே நினைத்து வந்ததில்தான் பல நல்லதுகள் நடக்கிறது என நினைப்பவர்கள் நிறைய பேர். நேர்மறையாக  நினைத்து செயலாற்றி வந்தால், எதிர்மறையாக நடப்பதை, அப்படியே  நடந்து விட்டாலும் கூட, அதை எளிதில் ஜீரணிக்க இயலும் என்று நினைப்பவர்களும் நிறைய பேர். எது எப்படியாயினும் எதிலும், எங்குமே  எவருக்குமே நல்லதைதான் மனம் நாடுகிறது. அது மட்டுமல்ல... நல்லதை செய்பவர்களை  நல்ல மனம் கொண்டவர்களை அனைவரின் மனமும் விரும்புகிறது. அதில் எவ்வித மாற்றமுமில்லை. 

இந்த வாரம்,  "எங்கள் ப்ளாக்" அறிமுகப்படுத்திய நல்லுள்ளங்கள்.. . 

பாகிஸ்தானில் வாழும் இந்திய வம்சாவளியும்,  தொழிலதிபருமாகிய ஜோஜிந்தர்சிங் சலாரியா என்பவர்

பாக்.,ன் தென்கிழக்கு பகுதியான தர்பார்கர் மாவட்டத்தில் தண்ணீரின்றி மக்கள் மிகவும் வறுமையில் வாடுவதை அறிந்தார். இதனையடுத்து அப்பகுதியில் உள்ள தன்னார்வலர்களின் உதவியுடன், 600 க்கும் மேற்பட்ட அடி பம்பு குழாய்களை அமைத்து கொடுத்துள்ளார். மேலும் அப்பகுதி மக்களுக்கு உணவு தானியங்கள் வழங்கவும் ஏற்பாடு செய்துள்ளார்.

அது போல், சேலம் மாவட்டத்தில் தலைவாசல் கிராம மக்கள், குடிநீர் கிடைக்காமல், மயங்கி விழுந்ததைப் பார்த்த பாபு என்பவர் தான் விவசாயத்துக்காக போட்ட, 'போர்வெல்'லில் இருந்து, மக்களின் தாகம் தீர்க்க, இலவசமாக தண்ணீர் வழங்கி வருகிறார். 

நீர்நிலைகள் வற்றாதிருக்க, தங்கள் கிராமத்திலிருக்கும் ஏரியை தூர்வாருவதற்காக  தன் வாரிசுகள் அனுப்பிய பணத்திலிருந்து செலவு செய்து அத்தகைய ஏற்பாடுகளை செய்து வருகிறார் அரியலூர் மாவட்டம் விளாங்குடியை சேர்ந்த ஓய்வு பெற்ற நல்லாசிரியர் ஜானகிராஜன்.

 நல்ல மனதுடைய இவர்களின் நற்செயல்களை கண்டிப்பாக மனதாற பாராட்ட வேண்டும். 

சுமைத்தூக்கி வேலையிலிருந்தபடியே அந்த வேலை செய்யும் பொழுதில் கூட படிப்பெனும் ஜீவ நதி வற்றாதிருக்க படித்துக் கொண்டே உழைக்கும் ஸ்ரீநாத் என்பவரின் தன்னம்பிக்கையை விவரிக்க வார்த்தைகள் இல்லையாததால் போற்றுவோம். 

மரங்களின் இன்றியமையாமையை புரிந்து கொண்ட சென்னை கிண்டியில் உள்ள சாசா என்ற தனியார் நிறுவனம் பல தொண்டார்வ நிறுவனங்களின் உதவியோடு ஆம்புலன்ஸ் மூலம் மரங்களை உயிரோடு காப்பாற்ற  வேரோடு எடுத்துச் சென்று வேறு இடத்தில் நட்டு வளர்க்க சேவை செய்து வருகிறது. மழை காக்கும், மரங்களனைத்தையும்  காக்கும் அவர்களை பாராட்டுவோம். 

நல்ல உள்ளங்கள் வாழ்க.! நல்ல தொகுப்பை தந்த  எ. பி ஆசிரியர்களின்  நேர்மறை எண்ணங்களும் வாழ்க. !

இந்த வாரம், போன வாரப் பதிவுகள் அனைத்தையும் வித்தியாசமாக அலசியவர் சகோதரர். திரு. துரை செல்வராஜ் அவர்கள். இரு பெண்கள் (அறிந்த தெரிந்த உறவுகள்) கண்டு பார்க்கும் போது பேசிக் கொள்ளும் விதத்திலேயே, மிக அருமையாக அவர்களின் உரையாடல்கள் மூலம் வார்த்தைகளை செதுக்கி, வாரம் முழுவதையும் அலசி அற்புதமாக விமர்சித்து விட்ட அவருக்கு மனமார்ந்த பாராட்டுகள்.  (அவரைப் போன்ற திறமை எனக்கில்லையாகையால், படிக்கும் அனைவரும் போதும், போதுமென்று கூறும் இந்த நெடும் பயணம். ) இவரும் ஏழுசுவைகளில் ஒருவராகி சுவையான பாராட்டுகளை பெற்று விட்டார். (அதாவது ஏழாவது விமர்சகர்.) இப்போது "எட்டு குடி குமரன்தான் " இந்த எழுதிக் கொண்டிருக்கும் எட்டாவதை காக்க வேண்டும். 

நேர்மறை எண்ணங்களையும்,  சகோதரரின் விமர்சனத்தையும் அலசி ஆராய்ந்து பதில்களையும், பாராட்டுகளையும் பாரபட்சமின்றி தங்கள் எண்ணங்களின் அடிப்படையில் தந்த வாசக நட்புறவுகளுக்கு நன்றிகள்.

 நானறிந்து கொஞ்ச நாட்களாக  சனிக்கிழமை பதிவுகள் 40ம், அதற்கு சற்று 

மேலாகவும் மதிப்பெண் பெற்று சோர்வு கொண்டிருந்த வேளை இந்த விமர்சன பதிவுகள் நல்ல  மதிப்பெண்களை பெற்று தருகின்றன. (இந்த பதிவு எப்படியோ? அதை பின்வரும் சனி பகவான் நல்லபடியாக தீர்மானிக்கட்டும்.) 

இந்நாள் பெற்ற மதிப்பெண்கள்... 129...

***-----------***---------***

இன்று ஒளி பொருந்திய "ஞாயறின்" பதிவு. அதனால்தான் ஒளியுடன் கூடிய  இயற்கை வனப்பு புகைப்படங்களின் தேர்வு நாளோ? பொதுவாக எந்த ஊருக்குச் சென்றாலும் ஒரு புகைப்படம் எடுப்பது நம் தற்போதைய வாடிக்கை. அந்த காலத்தில் சிறுவயதாய் இருக்கும் போது, அதிலும் அதிசயமாய் எங்காவது செல்லும் போது, இப்படி புகைப்படம் எடுப்பவர்களை கண்களில் வியப்பை விரிப்பாக வைத்துக் கொண்டு நா(ன்)ம் பார்ப்(பேன்)போம். 

குக்கிராமங்களில், கேட்கவே வேண்டாம்..  சிறுவர் முதல் பெரியவர்கள் வரை அப்பேர்பட்டவர்களை கொஞ்சம் சூழ்ந்து கொண்டு விடுவார்கள். அப்போது அந்த கேமராக்கள் அதிசயம். அதை வைத்துக் கொண்டு புகைப்படம் எடுப்பவர்கள் அதிசயத்தின் தலை(வர்) (வி)கள். இப்போதுள்ள காலத்தில்  எங்கு சென்றாலும், ஒன்றுக்கு மேற்பட்ட புகைப்பட கருவிகள் அனைவரின் கைகளிலும், தோள்களிலும் தாராளம். போதாகுறைக்கு செல்ஃபோன் ரகங்களும் ஏராளம். அதற்கேற்றபடி பயணங்களும், புகைப்படமெடுக்க வசதியுள்ள இடங்களுமாக  புகைப்பட கலையை  மென்மேலும் வளர்த்து வருகின்றன. 

இந்த இயற்கை மிகுந்த இடங்களை  சுற்றி வளைத்து  எ.பியின் இந்த நாளைய ஆசிரியர் மிக அழகாக எடுத்துள்ளார். அதன் கீழே அதற்கு பொருத்தமான ரசனை வரிகளும். மனதை கவர்கின்றன. எப்படி இவர்களால் (எ. பி ஆசிரியர்கள்) இவ்வளவு சுருக்கமாக வரிகளை தேர்ந்தெடுத்து பொருத்தமாக அமைக்க முடிகிறது என ஆச்சரியப்பட வைக்கிறார்கள்.. 

இந்த முறை இரு பிரேமில் அடங்காமல் அடம் பிடித்த "நெடிதான மரத்தை" தன் கேமரா எனும் அங்குசத்தால், அதன் அடம் அடக்கி, நம்மிடம் ரசிக்க ஒப்படைத்துள்ளார் ஆசிரியர். . அழகாக பூத்துக் குலுங்கிய மலர்களும், அதிகப்படியாக அவ்வூரிலுள்ள பள்ளியில் பயிலும் மலர் சிட்டுக்களும், அதிகம் இடம் பெற்றுள்ளனர். அனைத்து குழந்தைகளும் வெகு அழகு. "அங்கிட்டும், இங்கிட்டுமாய்"  மலர் மொட்டுக்களுடன் ஒரு மாதும் இருக்கிறார். (என் கண்களுக்குதான் "மொட்டு," ஓரிடத்தில் "பட்டு" மாமியாய் காட்சியளிக்கிறார் என நினைக்கிறேன்.) 

மாருதி வேனில் "சூப்பர் மார்கெட்டுடன்" உலா வருபவரும் இரண்டு வாரங்களாக இவர்கள் புகைப்படம் எடுப்பதை கவனியாமல் புகைப்படம் எடுக்க ஒத்துழைத்துள்ளார். அங்கு பாத்திரங்களின் சுத்தத்தை வாசக நட்புறவுகள் அனைவரும் பாராட்டி, ஒரு பாத்திரத்தில் அடுக்கி வைத்திருப்பது "இட்லிகள்"தான் என்று ஷல்லாங்கில்  முக்கியமான இடத்திற்கு செல்லும் போது, அன்புடன் வாசலில் இருந்து  கை நீட்டி வரவேற்கும் இயேசுவின் சாட்சியாக கூறியுள்ளார்கள். ( நானும்தான்...) 

ஆனாலும் வடநாடுகளில் அதிகம் பயணம் செய்து வித விதமாக அதிக (அதிகப்படியான அல்ல..) உணவுகளை உண்டு ருசித்துள்ள அல்லது  பார்த்து மட்டுமே ரசித்துளள சகோதரி கீதா சாம்பசிவம் அவர்கள் அதன் பெயர் "மோமோ" என்று கூறியுள்ளார். சகோதரி கீதா ரெங்கன் அவர்களும் அதை ஆமோதித்தது அந்த "உணவுதான்" என உறுதியுடன் கூறியுள்ளார். சகோ வெங்கட் நாகராஜ் அவர்களின் பதிவில் இந்த உணவை பார்த்தது மாதிரி எனக்கு நினைவுக்கு வருகிறது. ஆயினும் இது எதில் செய்கிறார்கள் (மைதாவா? ) எனத் ஞாபகமில்லை. 

சூப்பர் மார்க்கெட்டை சொல்ல விடுபட்டு விட்டது எனச் சொல்லிய சகோ துரை செல்வராஜ் அவர்களுக்கு, சகோ ஸ்ரீராம் அவர்கள் "விடுபட்ட" வார்த்தைகளால் வர்ண ஜாலங்கள் தொடுத்தது அழகு. ஒரு வேளை அந்த சூப்பர் மார்கெட் தலைவியும், வர்ணஜாலத்தில் விடுபட்ட மீதியைதான்  தலை குனிந்து மாருதி வேனில், தேடிக் கொண்டுள்ளாரோ.?

இந்த நாளில் ( இந்நாள் மட்டுமல்ல. ! எந்நாளுமே.. ) தலைப்புகள் மிக பிரமாதமாக அமைந்து விடும். இன்றைய தினம் பையை மறந்து வந்த பாப்பா தலைப்புக்கு உதவினார் என அனைவரும் நினைத்திருக்க பின்னூட்டங்களின் இறுதியில் சகோதரி ராமலெஷ்மி அவர்கள் பை அந்த குழந்தையின் தோளில் இருப்பதை சி. ஐ. டி யாய் கண்டு பிடித்து தெரிவுபடுத்தி விட்டார். அவருக்கு என்னுடைய பாராட்டுகள். பதிலளித்து புகைப்படங்களை, வாசகங்களை பாராட்டி மதிப்பெண்கள் தந்த அனைவருக்கும் நன்றிகள். (இருந்தாலும், இன்றைய மதிப்பெண்கள் சற்று குறைவுதான். ! எதிர்பார்த்த அளவு இல்லை.. ) 

இன்றைய மதிப்பெண்கள்.. 55.

***-----------***---------***

இன்று "திங்கள் கிழமை" அறுசுவை நாளான "திங்க"பதிவு. "செவிக்கு உணவில்லாத போது சிறிது வயிற்றும் ஈயப்படும்" என்பது ஆன்றோர் வாக்கு. ஆனால் சுவை மிகுந்த உணவென்றால், அதுவும் வயிறும், மனமும் ஒத்துழைத்தால், செவிக்குள்ளேயே யார் வந்து பேசினாலும், எதுவும்  எடுபடாது கையும், வாயும் போட்டி போட்டு மெளனமாகவே தத்தம் வேலையை செய்யும். 

அந்த வகையில், "திங்கள்கிழமை" சுருங்கி  (நிஜமான  திங்களும் (சந்திரன்) சுருங்கி வருவதாய் சமீபத்தில் செய்தி படித்தேன்.. .உண்மையா, பொய்யா எனத் தெரியவில்லை. ) எ. பியில் " திங்க"வாகி விட்ட போதும், சுவை மிகுந்த உணவுகள் இங்கு சுடச்சுட படங்களுடன் கண்களுக்கு விருந்தாகும் போது, "செவி உணவு" கட்டுப்பாட்டை மீறி, அல்லது முழுவதுமாக மறந்து, எ. பியில் அனைவரும் கூடி விடுகிறோம். 

அதன்படி இன்றைய "திங்க" பதிவாக சகோதரர் நெ. தமிழன் "செள செள" துவையல், உ. ப பொடி போட்டு தயிர் பச்சடி "டாங்கர் "என்று செய்து அமர்க்களப் படுத்தியிருக்கிறார். அதுவும் அவர் மகனுக்காக,  பாசத்துடன்  பார்த்து செய்து, அவரிடமிருந்து பாராட்டு நற்சான்றிதழும் பெற்று விட்டார். இந்த உணவு யாவரும் சுவைத்திருக்கிறார்கள். இந்த மாதிரி காய்கள் (காரட், பரங்கிகாய், பீர்க்கங்காய்) எதிலும் துவையலும், அதற்கு பொருத்தமாக த. பச்சடி. இல்லை.. அந்தந்த  காய்களை வைத்தே கூட்டும் செய்யலாம் என கருத்துக்களை எல்லோரும் பதிந்துள்ளனர். 

தாய் பாசம் தந்தை பாசத்தை விட சிறந்தது என்ற ஒரு கருத்தும் நிலவியுள்ளது. ஒரு குறையோ, நிறையோ,  அவரவர்கள் இயல்புபடி தோன்றுகிறதா ? இல்லை ஜீன் மூலமும் டிட்டோவாக தொடருகிறதா? என்பது போன்ற அலசல்கள்... எப்படியோ, நம் குழந்தைகளை நமக்கு தக்கபடி வளர்க்கும் போதே அன்பையும், பண்பையும் உணவுடனே ஊட்டி வளர்த்தால், அவர்களது  குணங்கள்  வளர்ந்த பிற்பாடு பண்பு நிறைந்த பக்குவத்தோடு மலர்ந்து மணம் வீசி  இருக்குமென்ற விதத்தில் அலசியுள்ள இவ்வார" திங்க" பதிவு நன்றாக இருந்தது. 

இடையில் இன்றைய தினத்தில் நல்ல எழுத்துகளுக்கு சான்றாக விளங்கி வந்த திரு. கிரேசி மோகனின் இழப்பு எனக்கும் மிகுந்த வருத்தத்தை தந்தது. அதை பற்றியும் அனைவரும் கடைசியில் கொஞ்சம் அளவளாவி இருக்கிறார்கள். சகோதரி அதிராவும்,  சகோதரர் நெ. தமிழன் அவர்களும் , நியுமராலஜி பற்றி பேசி மதிப்பெண் பெற்று தந்திருக்கின்றார்கள். கருத்தில் சொன்னது போல் ஆசிரியர் சகோ ஸ்ரீராம் அவர்களும் இடையிடையே  பதிவுகளை பரிசீலித்து மதிப்பெண்கள் தந்திருந்தால், "மேலும் ஏற்றுக" விற்கு சென்றிருக்கலாம். போகட்டும்.... இதற்கு அன்புடனே வந்து பக்குவமாய் பல்வேறு சுவைகளுடன் பதிலளித்து மதிப்பெண்கள் தந்த அனைத்து நட்புறவுகளுக்கும் நன்றிகள். 

இந்த நாள் பெற்ற மதிப்பெண்கள்.. 167..

***-----------***---------***

இன்று கற்பனை சாம்ராஜ்யத்தில் மிதப்பவர்களின் பதிவை பெறும் நாள். இனிய  இச்"செவ்வாயில்" வரும் பதிவுகள் விழிக்கு உணவாகி மனதோடு கதை பேசி போவது  வாடிக்கையான ஒன்று. 

கதைகள் பொதுவாக  கற்பனைகளின் அடிப்படை வசதிகளை கொண்டு வளருகிறது. . கற்பனைகள் சிறகடித்து  நம் எண்ணங்களின் இடுக்குகளில் வந்தமரும் போது, சிறகுகளின் மிருதுவான வருடலில் தோன்றும் எழுத்துகளில், சிலவற்றில் நிச்சயமாக ஆரம்பத்திலேயே உண்மை தெறிக்கலாம்.  சில பொய் முகத்திரை தரித்து ஆனால், பிறந்ததிலிருந்தே, ஸ்வாரஸ்யங்களின் ஊடே, தவழ்ந்து விரிந்த பார்வையுடன் படிப்பவர் மனதை ஈர்த்து, கடைசியில் கானல் நீராய் நீர்த்தும் போகலாம்.  கதைகள் தோன்றுவதும், நிலைத்து நிற்பதும், கற்பனைகளின் ஸ்திர தன்மையை, அதன் அதிர்ஷ்டத்தை பொறுத்து அமைகிறது. ("ரொம்ப யோசித்தால் இப்படித்தான்" என்ற மு. முணுப்பு என் மிக அருகில் கேட்கிறது. எனவே நிறுத்தி இன்றைய கதைக்கு வருகிறேன்.) 

இன்றைய கதை ஒரு தாயின் தவிப்பை மனப் போராட்டத்தை விளக்குவது.. தன்னுடைய பேச முடியாத இயலாமை தன் குழந்தைக்கும் வந்து விடுமோ எனத் தவிப்புடன் அந்த தாய் அந்நாளதை கழிக்கும் போது, நாளின் முடிவில், அவரின் கணவர் "உன்னை தவிக்க விட மாட்டேன். நம் குழந்தைக்கு நான்தான் ஆசான்.. நீ பேச நினைத்ததை இனி நம் குழந்தை பேசும்." நான் பேச வைத்து காட்டுகிறேன். "என்ற பிரயத்தனத்தின் ,முடிவில் குழந்தை அம்மா பெயரை உச்சரித்தவுடன் அம்மாவின் கவலைகள் பறந்தோடி விட்டன. நாளெல்லாம் தவித்த தவிப்பும் மெல்ல விலக ஆரம்பித்து விட்டன. நல்ல அழகான விதத்தில் மிகவும் சுருக்கமாக அமைத்து எழுதியுள்ளார் சகோதரி அனு ப்ரேம். (இத்தகைய சுருக்கம் நான் எழுதும் கதைகளில் லாவகமாய் வராது சற்றே சறுக்கிப் போய் எனக்கு இன்னமும் நெடியதாக்கி விடும்.) அவருக்கு என்னுடைய மனமார்ந்த பாராட்டுக்கள். 

கதையின் கருவிற்கும், கதாசிரியர் சுருக்கமாக அதைச் சொல்லிய பாங்கிற்கும், பாராட்டுரைகளை நம் நட்புறவுகள் அனைவரும் வாரி வழங்கியுள்ளனர். இது கதையல்ல.. க(வி)தை என அனைவரும் மனந்திறந்து உண்மையைச் சொல்லி மதிப்பெண்களை தந்துள்ளனர். அனைவருக்கும் எனது நன்றிகளும். 

இந்நாள் தன் வசம் தக்க வைத்துக் கொண்ட மதிப்பெண்கள்.. 42..

***-----------***---------***

இன்று சிந்தனை "புதனின்" திருநாள். கேள்வியும், பதிலுமாகிய வேள்வித் தீயில் நம் அனைவரின் அறிவுச் சுடர்கள் ( இதில் நிச்சயமாக என்னுடையது மட்டும் மிஸ்ஸிங்)  புடம் போட்டு கொண்டு ஜொலித்துக்காட்டும் பதி(வர்)வுகளை வெளிக்காட்டும் நாள். 

கேள்வி என்று ஒன்று பிறந்து விட்டாலே, அதன் உடன் பிறப்பாக பதிலும், தோன்றி விடுகிறது. "கேள்வி பிறந்தது அன்று... நல்ல பதில் கிடைத்தது இன்று..." என்ற பழைய பாடல் ஒன்று நினைவுக்கு வருகிறது. அதில் "அன்று," "இன்று" என்பவைக்கு நடுவில் எத்தனை நாள் தாமதமோ? ஆனால், இங்கு (எ. பியில்) ஒரு வாரத்திலேயே தாமதமின்றி ஒரு கேள்விக்கு 2, 3 றென சிந்தித்த நல்ல பதில்களாக கிடைத்து வருகிறது. ஒவ்வொன்றும்  கேள்விகளைப் போலவே, ஆற்றல் மிக்க பதில்கள். கேள்வி, கேட்பவர்களுக்கும், அதற்கு தகுந்த மாதிரி பதில் சொல்பவர்களுக்கும் நிச்சயம் திறமைகள் மிக மிக அதிகமாக அமையப் பெற்றிருக்க வேண்டும். 

இந்த வாரத்தில் பெண்ணை ஒரு பெண்ணே (உதாரணமாக தாய்... மகள், மாமியார்... மருமகள்... நாத்தனார்  இப்படியான உறவுகள்.) புரிந்துணர்வு கொண்டு பார்ப்பதில்லை. ! அது ஏன்? என்பதாக சகோதரி கீதா ரெங்கன் அவர்கள் கேட்டிருக்கிறார்கள். அதற்கு பதிலாக, 

"ஒரு மாமியாரைப் புரிந்துகொள்ளுதல் இன்னொரு மாமியாருக்கு இயலும். மருமகளைப் புரிந்துகொள்ளுதல் இன்னொரு மருமகளுக்கு எளிது. 

மேலும், ஒருபெண் உணர்ச்சி வசப்படுவதும் பாசம் உச்சமாக இருப்பதும் இருப்பதை இழப்போமோ என்ற அச்ச உணர்வு அதிகமாக இருப்பதும் காரணமாக இருக்கலாம் எனத் தோன்றுகிறது. மேலும் புது உறவாக வரும் நாத்தனார், மாமியார், மருமகள் குறித்த எதிர்மறை எண்ணங்களும் (போதனைகள் முடிவுகள் காரணமானவை) தவறு ஏதோ நடக்கப் போகிறது என்ற "எதிர்பார்ப்பு"க்கு வழிசெய்யலாம். " என்ற பதில்களும் பொருத்தமாக இருந்தன. 

கவலையை மறக்க  5 யோசனை பதில்கள் தரச் சொல்லி கேள்வி  கேட்ட சகோதரி ஏஞ்சலினுக்கு, 

& a) சூடாக காபி அல்லது டீ குடிக்கலாம். 

     b) இப்போதைய கவலைக்குக் காரணம் என்னவோ அதை ஒரு காகிதத்தில் எழுதி, அதை ஒருமுறை படித்துப் பார்த்து, அதன் பிறகு அந்தக் காகிதத்தை துண்டு துண்டாகக் கிழித்துப் பறக்கவிட்டுவிடவேண்டும். 

c) உற்ற நண்பனிடமோ அல்லது நண்பியிடமோ எல்லாவற்றையும் சொல்லி ஆறுதல் கொள்ளலாம்.

d) மனதுக்குப் பிடித்த செயல் ஏதேனும் ஒன்றில் முழுவதுமாக மூழ்கிவிடவேண்டும்.

e) Stop worrying and start living புத்தகம் படிக்கலாம்!  

என்ற பதில்கள் நன்றாக இருக்கின்றன. 

நேர மேலாண்மை பற்றிய விளக்கங்களும், குறித்த நேரத்தில், ரயிலை எப்படி பிடித்து பயணிப்பது என்ற விஸ்தரித்து இருப்பதும் மிக நன்றாக இருக்கிறது. 

சகோதரர் நெ. தமிழனின் கேள்விகளும், அதற்கு வந்த பதில்களும் சுவையாக இருக்கின்றன. அதில் சகோ நெ. தமிழன் பேயைப் பற்றிய ஒரு கேள்வி கேட்டதிலிருந்து ஒரே பேய்கள் சம்பந்தமாக கேள்விகளும், கருத்துக்களும் சுற்றிச்சுற்றி வந்து பேயையே சற்று அரண்டு விட செய்து விட்டன. இதில் எந்த பேயையும் பகைத்துக் கொள்ளாமல், வந்த கேள்விகளுக்கு எப்படி அடுத்த வாரம் பதில் சொல்லப்போகிறோம் என ஆசிரியர்கள் அடுத்தவாரக்கவலை கொண்டு நித்திரை கொள்ளாமல் இருக்கிறார்கள். 

கருத்துக்கள் கூறி "கலகலப்பை" ஏற்படுத்திய அனைவருக்கும் அகில உலக பேய்கள் சார்பில் நன்றிகள். 

எப்போதும் நிறைய மதிப்பெண்கள் பெறும் இந்த நாள் பேய் பற்றிய பய உணர்வில் பெற்ற மதிப்பெண்கள். 86..

***-----------***---------***

இன்று "வியாழன்" என்ற நாரில் பல்வேறு செய்திப் பூக்களை தொடுத்து மாலையாக தருவதால் கதம்பமாய் மணக்கும் நாள். இதற்கு முன் விமர்சித்தவர்களும், இதையேதான் கூறினார்கள். ஒன்றுக்கு மேற்பட்ட பல சுவாரஸ்யமான சம்பவங்களை கோர்த்து பதிவாக்கி தருகின்ற போது அது கதம்பந்தானே.! 

இன்று சகோதரர் ஸ்ரீராம் அவர்களின் கைவண்ணத்தில், பல மலர்களால் (அவரின் பயணக்கட்டுரை, பழைய பத்திரிக்கையில் இடம் பெற்ற சம்பவங்கள், நகைச்சுவைகள், அவர் எழுதிய கவிதை, இன்னும் பல, பல) தொடுக்கப்பட்டு மாலையாக மணம் வீசும் பதிவுகளை கொண்டு இடத்தைப் பெறும் நாள். 

இன்றைய தினத்தில் அவர் பயணப்பட்ட காசிப்பயணத்தைப்பற்றி ஒவ்வொரு வாரமாக கூறிக்கொண்டு வந்துள்ளதில் . 

இன்று திரிவேணி சங்கமத்தில்,( கங்கை, யமுனை, சரஸ்வதி போன்ற நதிகள் கூடுமிடம்) ஆற்றில் நீராடி, பித்ரு கடன் செலுத்தியது, தம்பதிகளாக வேணிதானம் செய்வதைப் பற்றிய விவரங்களும் இடம் பெற்றிருக்கின்றன. . கங்கையில் படகில் பயணித்தது, கங்கையின் அழகான நீரோட்டங்கள் போன்ற படங்கள், இன்னமும் அங்கு எடுத்த சயனஆஞ்சநேயர் கோவில் படங்கள் அனைத்துமே நன்றாக வந்திருக்கின்றன. அவர் வெளியே செல்லும் போது "வானம் காட்டிய படம்" அருமையாக உள்ளது. அது எந்த இடமென பதிவில் கேட்டிருக்கிறார். நான் கருத்துரை கொடுக்கும் போது, "கோயம்பேடு" வாக இருக்குமோ என ஏனோ என் மனதில்  நினைத்ததை நான் அங்கு சொல்லாமல் வந்து விட்டேன். ஏனென்றால், அந்த அளவிற்கு நான் "அறிவாளி" இல்லையென மெளனித்து இருந்து விட்டேன். ஆனால் அதன்பின் வந்த கருத்துரைகளை பார்க்கும் போது, இதற்கு பேர்தான் "குருட்டு அதிர்ஷ்டம்" என்று புரிந்தது. அதிர்ஷ்டமே கதவை தட்டும் போது திறக்க தவறி விட்டால், வழிமாறி போய் விடும் இதில் இந்த "குருட்டு அதிர்ஷ்டம்" கதவை தட்டத்தெரியாமலேயே போய் விடும். 

பித்ரு கர்மா செய்தவிடத்தில், சிதறிய அரிசியை வந்து உண்டு செல்லும் சிட்டுக்குருவிகளின் படங்களை பார்க்கும் போது, கடவுள் தான் படைத்த எந்த உயிருக்கும் அவை இருக்கும் வரை அந்தந்த விதிப்படி எப்படியோ படியளந்து விடுகிறான் எனத் தோன்றியது.

தன் வீட்டின் அருகே சில நாட்களாக உடல்நல கோளாறுடன் சகோ ஸ்ரீராம் அவர்களின் கண்ணில் பட்ட செண்பக பறவை, "இறைவா அதனை காப்பாற்று" என கருணையுடன் பிரார்த்தித்த அவரின் முன்  பிழைத்து பறக்காமலும், எதுவுமே "சொல்லாமலும் சென்றதை" அவர் சொல்லிய விதம்", எங்கள் ப்ளாக்"நட்புறவுகள் அனைவரையுமே வருந்த வைத்தது. இந்த இடத்தில் விதியின்பால் கொண்ட நம்பிக்கை எனக்கு இன்னமும் வலுவடைகிறது. 

வழக்கை இழுத்தடித்து, எதிராளிக்கு சிரமம் தருவதே ஒரு பெரிய தண்டனை போலும். எங்கோ வேடிக்கையாக படித்ததும், நினைவுக்கு வந்தது. அவசரத்தில் எடுக்கும் முடிவுகள் தவறை உண்டாக்கி விடுவதும், தவறான முடிவை தராமல் இருக்க சிந்தித்து தீர்ப்பளிபளிப்பது சிறந்தது எனவும், நீதிபதி திரு மு. இஸ்மாயில் அவர்கள் சொன்னதும், கடவுள் மேல் வைத்த நம்பிக்கை முழுதாக இருந்து விட்டால் நாம் எதிர்பார்ப்பது எல்லாம் தானாக நடக்கும் என்ற  சுகிசிவம் அவர்களின் ஆன்மீக எண்ணங்களும், சுவாரஸ்யம் தந்தது. ஆனால், அது சாதாரண மனிதர்களுக்கு சாத்தியமாவதில்லை என்ற ரீதியில் கருத்துக்களும், இன்றைய பதிவுக்கு பலமளித்தன. 

"கடந்த செவ்வாயன்று நடந்த சம்பவம் சகோதரர் ஸ்ரீராமுக்கு இன்னமும் அதிர்ச்சியை தந்து கொண்டே உள்ளது என நினைக்கிறேன். அதன் பாதிப்பில்தான் இந்த வாரம் அவரால் இயல்பாக இருக்க முடியவில்லை எனவும் எனக்கு தோன்றுகிறது "என்பது போன்ற கருத்துகளும் சென்ற திங்களன்றைய கருத்துக்களில் இடம் பெற்றன. அதன் பிரதிபலிப்பாக அவரும் அந்த சம்பவத்தை இன்றும் நினைவு கூர்ந்துள்ளார். 

இந்த மாதிரி அதிர்ச்சி சம்பவங்கள் நாம் எதிர்பார்க்காமலே இருக்கும் போது நடந்து முடிந்து விடுகிறது. அதன் பின் நடந்ததை மறக்க இயலாமல், அதிலிருந்து மீளவும் முடியாமல் தினமும் நாம் சஞ்சல முறுகிறோம்.  ஏனெனில் இது மனிதர்களின் இயல்பு.. இதில் சக மனிதர்களின், (உறவுகள், நட்புகள்) ஆறுதலும், தேறுதலும் பாதித்தவர்களுக்கு ஒரு வலுப்படுத்தும் மருந்துக்கு சமானமானவை.  இன்றும் கருத்துரைகள் கூறி ஆறுதல்கள் அளித்தவர்களுக்கும், பதிவை பாராட்டியவர்களுக்கும் நன்றிகள். 

இன்றைய மதிப்பெண்களும் கூடவில்லை. (ஒருவேளை என்னுடைய விமர்சன வரவின் காரணமோ?) சகோதரிகள் அதிரா, ஏஞ்சலின் இவர்களை இன்று காண முடியவில்லை. பொதுவாக எப்போதும் இவர்களால்100க்கும் மேலாக தாண்டி ஓடும் மதிப்பெண்கள் இன்று சதமடித்த திருப்தியில் சந்தோஷமடைகிறது. 

இன்றைய மதிப்பெண்கள்... 100 ...

***-----------***---------***

இன்று "வெள்ளியின்" இனிமையான "வெள்ளித்திரை" பாடல்கள் வெளியாகும் நாள். பாடும் குரலின் இனிமையும், இசையின் மகிமையும் ஒன்று சேர்ந்த திரைப்பட பாடல்கள்   "வெள்ளி" முளைக்கும் முன்பே ஆகாய வீதியில் வலம் வந்து அனைவரையும் உற்சாகப்படுத்திச் செல்லும்.

திரைப்பட பாடல்கள் மட்டும் பகிர்வது என்றில்லாமல், அந்த பாடல் இடம்பெற்ற படம்,  வந்தஆண்டு, இசையமைத்தவர், இயற்றியவர் என அந்த திரைப்படத்தின் பல செய்திகளையும் தெரிவிப்பது இந்த தினத்தின் ஆசிரியர் சகோ ஸ்ரீராம் அவர்களின் சிறப்பு.  இதன் மூலம் கருத்துரைகள் தந்து  பேசிக் கொள்ளும் நட்புறவுகள் மூலமாக நிறைய பழைய / புதிய திரைப்படங்கள்,  திரைப்பட கலைஞர்களின் திறமைகள், குறைகள், நிறைகள் என அவரவர்கள் அறிந்த தெரிந்த நிறைய விஷயங்களும் இன்று அலசப்படும்.

அவ்வகையான இன்றைய தினத்தில், பழம் பெரும் நடிகரான முத்துராமன் அவர்களின் மகன் கார்த்திக் நடித்த "ஹரிச்சந்திரா" படத்திலிருந்து ஒரு பாடல் (பாடல் வரிகளுடன்) இடம் பெற்றுள்ளது. திரு. எஸ். பி. பியின் இனிமையான குரலுடன் பாடலின் தேர்வு நன்றாக உள்ளது. இசையமைத்தவர்களும் புதிதானவர்கள். இசையும் குறை சொல்ல முடியாதபடி நன்றாகவே வந்துள்ளது.

பாடலை ரசித்த நட்புள்ளங்கள் பாடலின் சிறப்பு பற்றி நிறைய கருத்துரைகள் தந்துள்ளார்கள். இந்த பாடல் வேறு பல பாடல்களை நினைவுபடுத்துவதாக, சகோதரர் தனபாலன் அவர்கள்  சில பாடல்களை வழி மொழிந்துள்ளார். இன்றைய இந்த பதிவுக்கு வந்து சிறப்பான கருத்துரைகள் தந்த நட்புறவுகளுக்கு  என் இதயம் கனிந்த நன்றிகள்.

இன்றைய பதிவு இது வரையிலான பெற்ற மதிப்பெண்கள்...87...

இனி இப்பதிவு நாளைக்குள் மதிப்பெண் கூட்டல்களும் பெறலாம் என்ற நம்பிக்கையில், உங்கள் அனைவரிடமும், அன்புடன் விடை பெற்றுக் கொள்கிறேன்.

விமர்சனம் செய்வதென்பது, எழுதுபவர்களுடைய திறமைகளையும், அத்திறமைகளை ஊக்குவித்து கருத்துரைகள் இட்டு, பாராட்டி வாழ்த்தி செல்பவர்களையும் ஒரு சேர சந்தோஷபட வைப்பதுதான். அவ்வகையில் நான் செயல்பட்டுள்ளேனா என்பது நாளை எனக்கு அனைவரும் தரும் மதிப்பெண்களில் தெரிந்து விடும். என்னுடையது சற்றே நெ(கொ)டும் விமர்சனந்தான்.! பொறுமையுடன் படிக்க வேண்டுகிறேன். அவரவர் பாணி என ஊக்குவித்து எழுத சந்தர்ப்பம் அளித்த சகோதரர் ஸ்ரீராம் அவர்களுக்கும், எ. பியின் மற்ற ஆசிரியர்களுக்கும் என் பணிவான நன்றிகள்.

இது முதல் முயற்சி என்பதினால் இப்படி.. இனி அனைவரும் தரும் ஊக்கத்தில் மறுபடியும் ( மறுபடியுமா.. .. ? அலறல் சத்தம் இப்போது கேட்டு விட்டது..  சும்மா ஜோக்கிற்காக சொன்னேன். ) சந்திக்க காத்திருக்கிறேன். நன்றி. ....